دموع الذكريات

السلام عليكم ورحمة الله وبركاته

مساء الخير

دموع الذكريات

يافوح صدري فوح قدرٍ على نار=زادوا حطب ناره وصكوا وجاره
عوده غضا جمره مزابير وكبار=ويشوح مع كتمة وجاره حراره
وياعيني اللي تسفح الدمع مدرار=تبكي وجع ماهوب شوق وعياره
تهمل عبايرها بلا سابق إنذار=مع كل طيفٍ له يجيها زياره
وطيفه يمر بكل الاوقات زوّار=وان غاب صبح يمر تالي نهاره
وابوي الا وابواه ياواف الاشبار=ياريف ضيفه ياذرا بيت جاره
ياكسر ساقي كل ماجيت تذكار=وياهشم حالي هشم عود الكراره
وابكيك ماتخفى على الناس الاخبار=ويدرون عن حالي بليا شطاره
أعوي عوا ذيبٍ مصوّب بالاسحار=من كف شاوي دس له في مغاره
وطاح وصوابه جوّده قاضي الثار=في طرشه اللي منه ماخذ خياره
ويقنب ويرجع له صدى الصوت تكرار=واقنب كماه أبكيك ضيم بغزاره
ويوحون صوتي كل ليله بتجوار=ويوحون وناتي ترافق مداره
أبكيك يوم أذكرك والتاع وانهار=واذوق من وجدي عليك المراره
وابكي ويبكي مع بكا عيني الدار=وتصيح بيبانه ويصرخ جداره
وارثيك ياشيخ المكارم بالاشعار=وابكي ودمع العين أهمّل عباره
أبكي وانا قانع وراضي بالاقدار=ماهو سخط من حكم مرغم وكاره
ما اقوى على ذكراك من دون تعبار=وليا ذكرتك دمعي أصدر قراره
وليا بكيت أرتاح وتعود الافكار=وامسك رسن عقلي واحدد مساره
وارفع يديني فوق مع رفع الانظار=للواحد اللي معتلي في وقاره
وادعي عساه يجير وجهك من النار=وقبرك مدى شوفك يوسّع مداره

ساير صح السانك والله يرحم ابوك ويرحم جميع اموات المسلمين اجمعين وعساه محجوب عن النار ومسكنه مع الابرار
تحياتي لك

صح بدنك يابدر
وسلمت يمينك ولاهنت

شكرا يالغالي

بدر اللهم آمين آمين

وجميع المسلمين يارب

الله يسمع منك يابدر ويوفقك

تعجز يداى عن شكرك أخــى..
فقد وفيت وكفيت فيما قدمت ..
جزاك الله كل خير ,,
وبارك الله فيك ولكـ ..

لا حرمنا من جميل ما تقدم لنا ،،

كيان

الشكر لك يالغاليه

وبارك الله فيك

واغلا مرور

تحياتي

اخوي
سائر
مشكور على هالقصيده وصح لسانك
وعلا شانك
والله يرحم اموات المسلمين اجمعين

ابوعبدالله
صح بدنك يالغالي
واللهم آمين

وشكرا على المرور

كفو والله يا شاعرنا
والله يحييك ويحيي ما نظمت وابدعت
ما قصرت
كفيت ووفيت
وصح لسانك ملايين