خلف المشعان ... ( مواقف رمضانية ) !

المـــواقــف الرمضانية



أحيا الشاعر خلف المشعان يوم الاثنين 2/اكتوبر/2006 أمسية شعرية عند الساعة العاشرة مساء وذلك في الملتقى الرمضاني الثالث بالجنادرية تحت اشراف هيئة الأمر بالمعروف والنهي عن المنكر بجوار أستاد الملك فهد الدولي بالرياض .

وكان من ضمن القصائد التي القاها في الأمسية .... مجموعة قصائد تحت عنوان مواقف رمضانية ....

الموقف الأول :

البارحه رحت .. اتقضى من .. السوق=هل رمضان ورحت اجيب المقاضي
لقيت لي واحد .. من الربع مطفوق=اسمه اذا ماني بغـلطان .. راضي
سلم علي .. وصار يطـلبني .. حقوق=تقــول انا مذنب وهالأخ .. قاضي
جلس يسمعني .. من الشعر .. طاروق=وانا ورايه شغل .. مانيب فـاضي
يقول هذا البيت ماهو بمسروق=يانوض قلبي نوض براق ناضي
حاولت اجيه بذوق .. مافاد به .. ذوق=ولا فاد به .. تلميحتي واعتراضي
قلت العفو ياخوك انا الحين مزنوق=والشعر كله .. صارلي فعل ماضي
صدري على وجه الشهر صار به ضوق=رغم ان خلقي .. كان جداً رياضي
الا انه اجبرني .. اخلي له .. السوق=جانا رمضان ولا شريت المقاضي

الموقف الثاني :

كم لي شهر.. ماشفت .. حامد .. وفرحان=ربع ٍ .. لياغاب الخوي .. يفـقدوونه
رغم انهم .. ماهم .. بعيدين .. جــيران=حامد ورى المسجد .. وفرحان دونه
إلا انّ هالدنيا .. خذت .. عقل الانسان=ونابت أذانه .. عن مهمة عيونه
أصبح فلان .. اليوم .. يسمع عن فلان=وكلٍ سعى في هالحياة .. بشؤونه
دنيا المشاغل .. فرقت .. بين الاخوان=يموت ابوهم .. والعزى .. مايجونه
رحماك .. ياربي ونسألك .. الاحسان=نطلبك .. عن هول الزمان .. المعونه
اليوم ( صدفه ) شفت حامد .. وفرحان=بالمسجد .. اللي توّهـم .. يدخلونه
قبل رمضان .. تشوف به خمس شيبان=واليوم كل الحي .. صاروا يجونه

الموقف الثالث :

قبل الفطور بربع ساعه اتخبرون=كلٍ .. ببيته .. للفطور .. يتولم
وانا تورطت بهديفه ,, ومجنون=تصادموا .. والكل قام .. يتظلم
هذا يقول أنت آعـَمى مالك عيون=وهذاك .. من هول الفجيعه تبلم
قدام بيتي .. قلت يالربع تدرون=تفضلوا بعد الفطــور نتكلم
عيا الهديفه قلت له طيب شلون=نبقى هنا قال ايه ، قلت اتحلم
لو ننتظر لين الحكومة يمرون=يمدي للإمام من التراويح .. ســلم
أما اقلطوا والا عساكم تطسون=مدري متى .. شعب الخليج يتعلم

الموقف الرابع :

محدٍ بهالعالم من الذنب معصوم=نسألك .. يارب العباد .. السلامه
بعض البشر بوزه على الصبح ملموم=نفسه بخشمه .. لا اقعدوه .. لدوامه
تلقى فرامل خلقه الصبح معدوم=وعاجز لسانه .. لا يربّط .. حزامــه
وبعض البشر لا نام ماوده يقوم=يقضي عبادات الصيام بمنامه
يجمع صلاته يوم يقعد من النوم=ويطلب لقا ربـّه .. بيوم القيامه
لاصار صومه نوم .. وشوله يصووم=ربه .. ترى ماهو .. بحاجة صيامه
وبعض البشر عن ماذكرناه محشووم=يتعب على صوم رمضان .. وقيامه

الموقف الخامس :

السالفه .. ماهي بحاجة .. لتصعـيد=موقفك .. جاهز .. منتهي .. ما يبـيـله
لااتجيب فينا العيد .. بدري على العيد=قدامنا .. سته وعشرين .... ليله
ياصاحبي سرْعَتـْـك كل مالها .. اتزيد=خفف .. ترى كلٍ .. تحراه .. عـيله
كانك تدور صيد .. ماعاد به صـيد=فرّطت .. في شهر ٍ فضيل .. بفضيله
من قالك تسهر .. وتعطي .. مواعيد=حتى لو انك .. ماانت راعي .. طويله
والله لو بيدنا .. عطيناك .. تمـديد=لكنّه .. اذّن .. مالنا فيه .. حيـله
بس هـدّ .. تكفى .. لا تحضّر بنا العيد=قدامنا .. سته وعشرين .... ليله

الموقف السابع :

الموقف .. السابع .. عن انسان مسكين=رُبـَى يتيم .. وكان .. رابع خواته
أبوه مات .. وماترك .. لامهم .. شين=ماغير .. رحمة ربهم .. في وصاته
عاشوا على .. شغل امهم .. بالفساتيــن=وياحسين ود الثوب .. ياحسين هاته
باول حياته .. جرب الشين .. والشين=هو فيه .. زين يجربه .. في حياته
ان راح يلعب .. عيروه الوراعين=واذا .. رجع للبيت .. مـو .. من .. حلاته
يسمع كلام امه عن الفقر والدين=ويضيق فيه الكون .. باربع .. جهاته
يعني بنت مستقبله .. دمعة .. العين=ماعاد .. تفرق .. عن حياته .. مماته
كُبر .. وصار .. اكبر حرامي .. دكـاكين=يسمع .. بفقر الذيب .. والا .. غناته
لين اكفشوه .. وصارله .. أربع سنيـن=يدعي ... لرب البيت .. بآخر .. صلاته
يارب .. تشملني .. بعـفو .. المساجين=وتفرج عن اللي .. يرتجنـّه .. خواته

الموقف الثامن :

في ليلة الثامن .. بدينا بالاهمال=وصار الشهر .. عند الكثيرين عادي
مدري بدينا ننتظر شهر شواال=والا شهر شوال بالفعل بادي
يعني بدال نصير نخلص بالاعمال=نزداد عن رب العباد .. ابتعادي
عن التراويح .. نتعذر .. بالاشغال=واشغالنا مابين ... سوق ونوادي
غزل .. اتمشي .. مشترى .. كذب .. تفصال=حراء طبعا غير .. سوق البوادي
غزل .. ( على وِدنه ) .. وترقيم .. واهبال=ومحاضرة .. للشيخ .. جوهر .. عبادي
استغفر الله .. وأسأله .. يرحم الحال=صرنا بوادي .. والعباده .. بوادي

الموقف التاسع :

دايم .. الياقالوا : (( شـباب .. وعلى الدين ))=أسكت .. على بالي .. فهمت العباره
أدري بها .. زينه .. ومفهومها .. زين=واكيد .. واضح .. مايبيله .. شطاره
( واحد رقم )..( زايد ) .. ( رقم واحد ).... ( اثنين )=لكن مهو كل الكلام استعاره
يعني مثل لا قلت لك صل هالحين=هي نفسها لا قلت ولع زقاره
وش دخّـل اهل الدين بـمحمد( .....)=اللي فقع في كبد ابوه المراره
عزَب هتيم .............................=لا دك في غزوه ولا فك غاره
مافيه شي اسمه شبابٍ على الدين=إلا شباب ٍ يستحق العباره
شفهم اليـا أَ ذ ّن ينقلون الكراتين=ويفطّرون الناس عند الإشــاره

الموقف العاشر :

ثلث الشهرعدى وعدت لياليه=مسكين يامن في معاصيه لاهـي
كلْ مـا الشهر ينقص يزيدن معاصيه=ويزداد مع زود المعاصي تباهـي
من لا هداه الله وسمح خطاويه=مايردعه عن منكر الفعل ناهـي
ليل الشهر بين البرامج يقضّيه=متحطم بهيفا ومعجب بزاهي
محتار مايدري وش اللي ينقيّه=مثل اليتيم اليادخل بالملاهـي
من مهزلة طاش لسخافة دقـدّ يـه=لقريقعان وغانيات المقاهـي
صارت تردد بينهم كلمة أ و مـبـيــه=يالله تحفظ عقولنا مثل ماهـي
كن الشهر موسم برامج وترفيه=من فاهية وجه ٍ إلى وجه فاهـي
ويالله تثبتنا فباقي لياليه=وتذكّر اللي عن عبادتك ساهـي

الموقف 11 :

ايوالله اذكر طلته ياحليله=كان الشهر مع طلته متخاوي
يطلع على وقت اجتماع الـعيله=يروي لنا والله ونعم الراوي
لا من طلع برنامجه نصغيله=شيخٍ عن امراض القلوب يداوي
اذكر بنان الياحكى تطريله=واذكر بعد في وقتها شيـساوي
ينسى يحسب غتيرته منديله=يمسح بها دمع العيون الهاوي
اذكر كثير وجيتكم داعيله=الله يرحم شيخنا الطنطاوي

الموقف 12 :

خلو ملاك تصلي .. لا تحرموها الجنه=ياويلكم من ربي يااهل الحسد خلوها
حتى الصلاة لربي صارت بعد بالمنه=مو زين يطلع منها بعض العرب نسيوها
تحجبت من بدري تبي مع اهل السنه=تلحق صلاة المسجد واخوانها ردوها
وهي عادةً لا قالت تـــنـه فـيعني تنه=لامن بغتهم شغله تسابقوا جابووها
البارحه مانامت وبعذرها منجنه=عيو عليها تصلي جت تشتكي لـبوها
يبه يبه وش علمك يبا احسدوني الجنه=منهم هذولا شفهم وجع وجع خلوها
ودو ملاك المسجد لا تحرموها منه=ياويلكم من ربي يااهل الحسد ودوها

الموقف 13 :

ماكنت ابكشف عن خفا عارف سرور=لكن هو اللي قام يبحث خفايه
يعني على كشْـف الورق صرت مجبور=وهذا جزى اللي لف ذيله معايه
على الفطور البارحه جاني الدور=وبلغت ابو طارق وكل خويايه
سلطان يشهد ماحصل مني قصور=والحر كزه مايبيله وصــايه
انا اشهد انه ماهو بشاهدٍ زور=افطر معاي وشاف كل الحكاية
مااحدٍ حظر غيره وسلطان مخبور=اما يجي أو يعتذر بالبدايه
بس البلا اللي داخل البيت محصور=ان مسمحت له عاد ماهو خطايه

الموقف 14 :

الناس من تصبح يقولون يارب=يارب تصلح حالنا واتهدينا
وانا اصطبحت ولا طرالي أبد سب=الين شفت اليوم بنت اللذينا
قدام خلق الله تشرب سفن أب=يدري بها الله عاد لو مادرينا
ما حقها تشتيم ذي حقها د َ ب=حرام هالأشكال منا وفينا
هذي هي اللي بالشهر مالها طب=يالله انا طالبك لا تبـتلينا

اخي الكريم بدوي اشكرك على نقل

قصايد الشاعر المبدع بشكل رااائع

ومميز لاهنت يامشرفنا الغالي

صح لسان الشاعر


لكـ كل الشكر من صميم قلبي على النقل الرآئع


لا هنتـ حبيب قلبي

يا كثر المواقف يا بدوينا الفاهم

من مهزلة طاش لسخافة دقـدّ يـه=لقريقعـان وغانيـات المقـاهـي
صارت تردد بينهم كلمة أ و مبيـه=يالله تحفظ عقولنـا مثـل ماهـي
كن الشهر موسم برامـج وترفيـه=من فاهية وجه ٍ إلى وجـه فاهـي

بس بصراحة أعجبتني ثقافة الشاعر خلف

تسلم يديك ولا هنت يا مشرفنا العزيز على النقل الجميل

		المشاركة الأصلية بواسطة : عبدالله الشدادي اقتباس
	اخي الكريم بدوي اشكرك على نقل قصايد الشاعر المبدع بشكل رااائع ومميز لاهنت يامشرفنا الغالي

ياهلا والله يا بوعابد ....ولاتهون يا الغالي

مشكور

		المشاركة الأصلية بواسطة : سيف الشدادين اقتباس
	صح لسان الشاعر لكـ كل الشكر من صميم قلبي على النقل الرآئع لا هنتـ حبيب قلبي

تسلم يا سيف ولاهنت يا الغالي على متابعتك

تحياتي لك .

		المشاركة الأصلية بواسطة : السلطان اقتباس
	يا كثر المواقف يا بدوينا الفاهم من مهزلة طاش لسخافة دقـدّ يـه=لقريقعـان وغانيـات المقـاهـي صارت تردد بينهم كلمة أ و مبيـه=يالله تحفظ عقولنـا مثـل ماهـي كن الشهر موسم برامـج وترفيـه=من فاهية وجه ٍ إلى وجـه فاهـي بس بصراحة أعجبتني ثقافة الشاعر خلف تسلم يديك ولا هنت يا مشرفنا العزيز على النقل الجميل

الله يسلم يا بوعبدالله

ولاتهون يا الغالي

أختيار موفق يابدوي..شاعر رائع وقصائد ممتازه..
تحياتي

		المشاركة الأصلية بواسطة : سعود سليمان الحارثي اقتباس
	أختيار موفق يابدوي..شاعر رائع وقصائد ممتازه.. تحياتي

كل عام وانت بخير يا بو طارق

رفع الموضوع جاء في وقته يا أبو فيصل

وخصوصاً مع قدوم شهر الخير والبركات

وفقك الله