وجهٍ يستاهل !!!

السلام عليكم ورحمة الله وبركاته،،

هذي الله يحييكم ويسلمكم ويخليكم لعين ترجيكم قصه زوج وزوجته كانوا

عايشين في قمه الرومانسيه والحب وكانت الزوجه مدرسه وراتبها زين

مع الإعتذار لجميع الإخوة ممن زوجاتهم مدرسات .

وهذا الزوج جاء يوم من الايام وهو طفران .. ماهنا زود دراهم الله يخلف

وحصل زوجته توها مستلمه المعاش و هو اللي ينبسط و يوم طلعت من
البيت . نقز للدرج اللي فيه الدراهم .. والقط سبعه الاف ريال فقط لا غير
المهم درت زوجته .. وازعلي واطلعي لبيت اهلها ونادت اخوها وتمردس
ببطنه وماخلى فيه عرق صاحي والله لا يوريكم .. لكن الزوج بعد ماصحى
وصحصح و استصح قال هالقصيده اللي كلها شجن وعاطفه بعد ما هجرته
زوجته بدون عوده اتمنى تنال اعجابكم و لكم تحياتي

لي زوجة حبه يتــل المعــاليق = عرسي عليها العام باول شباطي
من روحته والزاد بالبيت ماذيق = ولا اميز العلم القوي والخراطي
بياض وجهه من بياض الغرانيق = وخدودها ياخوي مثل الطمــاطي
والصدر يزهابه عذاب العشاشيق = والردف زامي فوقة الخصر واطي
ومدرسه مع زين كل التخاليق = وزود على هذا تعـرف ..........
وجابت رويتبها وصفـقت تصفيق = تسـعة الاف كلهن بالمــغاطي
وصكت عليه بغرفته بالصناديق = وغطت على صندوقهن بالبساطي
وديتها تشري قدور واباريق = وانا انطلقت للبيت يم الشناطي
واخذت سبعة الاف معهن تلاحيق = وخليت انا الف وخمس معهن افراطي
عرفت وقالت عندك اليوم ماليق = واللة لوتربط برجلي ارباطي
وانا عرفت اني توهقت توهيق = يااللة يارب اتهديـن الصراطي
وقالت لخوها كل شي بتوثيق = وجاني حلال القوم راع النشاطي
ثمن ضربني ضربة تييبس الـريق = وقام وفرشني فرشتة للــسماطي
وقام يتوطاني بليا ترافيق = و! يرجد علي ويمسحن بالبلاطي
وا وجس بصدري عقب ضربه حشاريق = قمت اتنفس عقبها من اباطي
لي تسعة ايام وانا بي تشاهيق = عجزت اسولف كن فيني اصقاطي
براسي صعارير اسواة الزرانيق = ومضارب بالبطن مثل المقاطي
ولا ضاق صدري قمت اجمع طوابيق = و الى توسع قمت اجمع قــواطي
انا احمد الله بدّل الضوق بالضيق = والهم من راسي نزل للمواطي

لم أبحث عنها لمن .... وسلامة الجميع ,,,

شكراً أخوي واعي ع القصة والقصيدة

الله يعطيك العافيه

أخوي المحكوم
لك مني جزيل الشكر والتقدير
لتفضلك بقراءة الموضوع .
دمت بخير ,,,

قصيدة فيها العظه والعبره
ههههههههههههههه
مشكر على النقل يا الواعي
تقبل مروري
تحياتي

الناصر
مشكور على تفضلك بقراءة القصة والقصيدة ...
وأضح إنك قريتها والا ماعرفت العبر اللي فيها....
كلمة العبر بمعناها العربي الفصيح وكذلك
بمعناها الشعبي المعروف عندنا .
دمت بخير ,,,

ههههههههههههه على هونك أخوي واعي
أحياناً فيه أعضاء يجون ماحطين طبلونهم
وما يدققون في الموضوع زين
لكن أنا بأقول لك وش العبر اللي فيها ههههههه

1 - إن الرجل يبحث عن الحرمة اللي لو شلّح دراهمها ما تقول له شيء
2 - إن الرجل ما يمد يده لشيء ما هو له ويسرقه
3 - لازم الرجال يحتزي نفسه وخاصة وقت المشاكل وإلا بيجيه من يتوطى في بطنه
ورفيقنا ومن قصيدته يتضح إنه قصيمي وما احتزى أخو حرمته وإلا ما كان ضربه
4 - المفترض ما تخرج مشاكل الأسرة خارج البيت ولا أحد يدري عنها

السلطان
أشكرك على تفضلك بقراءة الموضوع
ومرورك الذي يوضح كذلك فهمك الجميل
للموضوع من جميع جوانبه
..... دمت بخير ,,,