بحة الشوق

مـجـمـوع الأوسـمـة · توقيع : حلم السنين

-

تعال اغنيلك الموال وغيابك=للشوق ( بحه ) تميز نبرة اشعاري

زهبت عذري وردي لاابتدى عتابك=كم لي افكر شقول ان قلت شالطاري

بقول مشتاق للطعنه من اهدابك=ومشتاق اكثر لقولة باخذ بثاري !!

وبقول مليت مدري ملني بابك=من غبت دونه وقف عمري ومشواري

مغير اسولف له اللي صار باسبابك=وارمي عليه الشقا والهم واعذاري

من غير لا ادري اجي وان قال وش جابك ؟=قمت اتساقط علي من ( غيمة افكاري)

لين اتبلل (( وله )) واطير اسرابك=وتروى عصافير فرقانا من انهاري

وارد ميت عطش واقلب كتابك=واقرى حكاية سراب ٍ عذب ازهاري

شفني ذبلت وطفيت وجيت ابحيابك=عمري دفعته ثمن دربي ومسياري

اما تخليني احيا فيك وابقابك=ولا تاكد وفاتي آخر اخباري

ابك انت مره طرالي احرق اعصابك=طاوعت فكري عليك وجيت لك ساري

فكرت ابيعك وابعثر بالمدى اطيابك=عقلي نواها وقلبي قال انا ( شاري )

ورديت احسك بصدري واحسب احسابك=اني زرعتك لقا وابقطف اثماري

واليوم دام المسا توه تغنابك=اقررب مدامك لحن تشتاقه اوتاري

ابعزفك للقصيد اللي تسمابك=وشب لك داخل بحور الشعر ناري

واسمعك ما كتبته لين ينتابك=غرور واسمع كلام ٍ عده اجباري

لاصرت انا والقلم والدفتر احبابك=يحق لك لو تقول ان الشعر داري

ما قلتها قصدي اني اكسب اعجابك=لكني بهذي ادري ويش مقداري

الصعب جذاب وانت الصعب يزهابك=وانا على الكايده يا عاشقي ضاري

وان جات للجد له لذه ترى غيابك=شف ( بحة الشوق ) كيف تميز اشعاري ؟؟

للشآعر محمد جآر الله السهلي