طلاق بعد طول عشره

وصلتني الرسالة التاليه على بريدي الخاص في أحد المنتديات:

		المشاركة الأصلية بواسطة : اقتباس
	الأخ سعود الحارثي (شاعر المستحيلات) انا تزوجت وطلقني زوجي بغير رضاي وانا ماسويت شي ابدا المهم هو الان بيرجعني قريب لكن ابي اكتب له قصيده لوووم ليش يطلقني وانا ماسويت له اي شي واحب انك تقول ان الحريم هم الي يطلبون الطلاق بدون سبب ماعرفت ان الرجاجيل يطلقون بلا سبب اسمه ابو __ وانا ام __ وابيك تكتب في القصيده احساسي بالاحباط وكره الحياه بعد الطلاق لاني ضحيت وضحيت ومالقيت نتيجه وسلامتك ابو (فلان) وانا ام (فلان)

ولبيت طلبها بكتابة القصيدة التاليه:

وش عذر زوجي ياطويلين الاشناب

رسالـة مضمونهـا لــوم وعـتـاب=مسـوّدة المظـروف وحروفهـا سـود
للغـادر اللـي بـاع غاليـه بـتـراب=وبدل ليـال الوصـل نكـران وصـدود
يا فلان..أنا أعطيتها غلا أحباب لحبـاب=وزرعت لـه قلبـي نواوويـر وورود
وهو تركنـي دون توضيـح الاسبـاب=وقطـع وريـد الحـب بهبـال وبـرود
شربـت سـم الـداب وأكلنـي الـداب=ومن والدك يا فلان حالـي غـدا عـود
عفت الحيـاة وقلـت يامـوت ماهـاب=شرح العذاب يطـول والعمـر محـدود
يشتب في جوفي مـن الوجـد شبّـاب=واسهـر وخلـق الله ساليـن ورقـود
من شدة اللي شفت فقـدت الاعصـاب=جسمي نحل والحيـل يا فلان مهـدود
ياللي طرقت البـاب فكـو لـك البـاب=أخواني اللـي فيهـم الخيـر موجـود
زواج شرعي لا صداقـه ولا أصحـاب=عطاك ابوي بمهـر وكتـاب وشهـود
ياما طلبني مـن هـل الخيـر طـلاب=ويا ما رفضت وقت لـي ذوق ياعـود
جيتك وفرحاتـي بكـر والهـوا طـاب=وخليتهـا لعيونـك سهـود ومـهـود
كلـي شبـاب ومنـي الملـح ينسـاب=الزين ياصـل مفرقـي فـوق ويعـود
وغضيت طرفي عن مثيرين الاعجـاب=زين الشباب مخضعـة هنـد وعهـود
وغمضت عن عيبك ولو كنـت تنعـاب=وقنعت بك واسندت في مدحـك سنـود
وليا قال قايل راعي البيـت وش جـاب=قلـت أسكتـو حياتنـا زود فــي زود
واليوم بعد سنيـن وأنجـاب وأنجـاب=هبت على الشيـب الخماسيـن والنـود
صدمتنـي ياطايـح الضـرس والنـاب=وفكيـت حبـلٍ كـان مثنـي ومعقـود
واليوم أنا من جملة النـاس الاغـراب=فـي عالمـك لاكـن مابقـت بعهـود
بنت الرجال أحرص على الرجل لو شاب=وأبن الرخامـة ناكـر العيـش منكـود
وش عذر زوجي ياطويليـن الاشنـاب=اليـا تركنـي مـا لقـى فـي منقـود؟
كان الرجوله هجـر ومقاطـع أنسـاب=ما يترك العصمـة لكـم غيـر مقـرود

سعود

شعر جزل يناقش قضية اجتماعية ولكن الطلاق ليس بهذا السؤ لا تنسى انه انحناء اما عاصفة مع شريك لا يقدر ولا يجيد فن المعاشرة الزوجيه .ومن ثم تستمر الحياة مع من يقدرها .. ....

يالها من مصيبة الطلاق بعد عشرة

وبعد إنجاب أطفال أصعب من أن يكون مبكر

وعلى العموم الطلاق أبغض الحلال سواءاً بعد عشرة أم لا

قصيدة رائعة أخي سعود وصح لسانك

صح لسانك


والرجل اذا لم يريد المراءة وتركها بطريقة تبيض وجهة فلاا يلحقة ملامة

شكلرا لك على القصيدة

		المشاركة الأصلية بواسطة : المستحيلة اقتباس
	شعر جزل يناقش قضية اجتماعية ولكن الطلاق ليس بهذا السؤ لا تنسى انه انحناء اما عاصفة مع شريك لا يقدر ولا يجيد فن المعاشرة الزوجيه .ومن ثم تستمر الحياة مع من يقدرها .. ....

المستحيلة..أتفق معك بالراي الطلاق قد يكون حلا !!!! سعيد بأطلالتك وياهلا!!

		المشاركة الأصلية بواسطة : الهيئة اقتباس
	صح لسانك والرجل اذا لم يريد المراءة وتركها بطريقة تبيض وجهة فلاا يلحقة ملامة شكلرا لك على القصيدة

صحت أبدانك ...
نعم نعم..هناك من تستحق الطلاق وبجداره!!

البرنس...مرورك أروع والله يحييك..

		المشاركة الأصلية بواسطة : اقتباس
	صحت أبدانك ... نعم نعم..هناك من تستحق الطلاق وبجداره!!

اشكرك يالذيب عندى شغالة مطلقها رجالها بالمليون


المهم جتنا وعلمتنى وكان لها عيال


رحمتها وتعاطفت معها وبعد فترة


بعد ماشفت عقلها الفاضى وشغلها وش توقع سويت ياذيب

طلقتها بالمليار ههههههههههههههه


عندها عذرت زوجها وقلت فى نفسى يصبر الارض عليك

وعطيتها خروج نهائى بلاا عودة

وعسى ان تكرهوا شيئا وهو خيرا لكم

الله يعين يالهيئة البيوت أسرار!!

ههههههههههه الله يرجك يا سعود

يكفيها ذنب أنها أرسلت لك عشان يطلقها زوجها

هههههههههههههههه هذا السبب كافي جداًَ

أمون وأمزح

المهم

بيض الله وجهك يا راعي الفزعات وصح لسانك ولا هنت

وأنا من الناس المعجبين في شعرك ويبهرني تطويعك للحروف وانتقائك للمعاني