محاوره جرت بيني وبين زميلي وصديقي مشعل الحارثي

اخواني أعضاء منتديات الشدادين إليكم هذه المحاوره التي جرت بيني وبين زميلي وصديقي
مشعل الحارثي فهو من أعز أصدقائي فلا تنظرون إلى مايحصل بيننا من مهاترات وتعتقدون اننا
اعداء فالشعراء يقولون مالا يفعلون وهي من باب المزوح والتسليه ...
أرجو ان تستمتعوا بالمحاوره


الحارثي:

مرحبا في الحارثيه ديرتي والها مكانه=ديرة أبالحارث الشجعان موفين العهودي
البرينيسي نشوفه مشتحن بأول زمانه=ياترى هم الدراسه ؟ ليه يالرجل الرقودي

البرينيسي

البقا يا شاعر ٍ ما يعرف الزله لسانه=في ديار ٍ عزها الله تحت حكم آل السعودي
الليالي ما تخلي كل رجال ٍ بشانه =لا قرار ٍ في الزمان و لا ثبات و لا ركودي

الحارثي:

يرحم الله من بنى مجد السعوديه وصانه=جعل ذاك العود في الجنات ما هو بمحسودي
نحمد الله في امن والاسلام خير النا ديانه=ما نبا غيره ديانه و العلم فوق العمودي

البرينيسي:

من يحاول العبث بالأمن اله ذل و مهانه=نحكم بحكم الشريعة والفهد ذخر الفهودي
رجح العقل الشريد و لا تبالغ في اتزانه=خابرك رجل ٍ فهيم و ما أنت رجال ٍ شرودي

الحارثي:

أنته علومك تراها مع فلان ومع فلانه=بدلت دنيا ك بيض أيا مها بأيام سودي
ما تصل الفرض ياربي عليك الأستعانه=هذي الدنيا تراها لهو تنقص ما تزودي

البرينيسي:

شفت لي خيال في الصحراء على صهوة حصانه=ما يفكر في الصعاب وماسك ٍ سلم الجدودي
نحمد الله حافظين الفرض و نصوم رمضانه=ما نبى منكم شهاده يالبخيل و يالزهودي

الحارثي

اعترف و الصدق ما يمنع على صاحب ذهانه=أنت رجل ٍ من شدادين ٍ يحفظون السدودي
خير يا طير ٍ على غصن الشجر تشدي لحانه=كل ما قلته صحيح مثبت و عندي شهودي

البرينيسي:

لو تحفظ المال في صندوق و ألا في خزانه=ما تنام و تحضن الخزنه و العالم رقودي
أحسبنّك رجال عاقل و أنت خوّان الأمانه=تسلك الدرب الصعيب وتحسبه سهل ومهودي

الحارثي:

نحمد الله رافعين الراس ما نرضى المهانه=أنت غادي ما تقول الصدق جعلك ما تعودي
أحتزم بأم الشراره يوم معك الطرطعانه =أنت رجال ٍ ضعيف و لا تقاد و لا تقودي

البرينيسي

أنت أشوفك تومي براسك وجاي ٍ لك رطانه=والله إنّا ما نلومك عايش ٍ لك مع هنودي
ما علينا منك يا للي عندك الشينات زانه=والله إنك لو تحزم با لذخيره ما ش فودي

صح لسانك يالبرينيسي ولسان مشعل الحارثي

محاوره رائعه رغم المزح اللي فيها

تحياتي لك وفي انتظار محاوراتك معنا في المنتدى

صح لسانك أخوي البرينيسي

وصح لسان الشاعر مشعل وبصراحة محاورتكم هذه سوت لخبطة

هههههههه

أخوي الغربي

صح بدنك وشكراااا لك على مرورك الجميل

ونحن في خدمة هذا المنتدى الغالي

وتحياتي لك

أخوي البرنس

صح بدنك وشكراااااا لك على مرورك الجميل

وما أدري وش اللخبطة اللي سوتها المحاورة أنا خمنتها بس ياليت أسمعها منك

تحياتي لك

أنا أعدل وأنسق وأبو عبيد ينسق

وضربت التنسيقات في بعضها هذه هي اللخبطة اللي أقصدها

ومحاورتكم رائعة وتبض وجوهكم

البرينيسي صح لسانك ولسان الشاعر مشعل الحارثي

محاورـه جميله ولا هنتوا

بيض الله وجهك يا ولد العم

وبيض الله وجه الشاعر مشعل الحارثي

وننتظر منك المزيد من المحاورات المباشرة هنا

مع شعراء المنتدى

صح لسانك يالبرينيسي وصح لسان خويك وبيض الله وجيهكم

محاورة جداااااااااا راااااااااااائعه

استمتعنا بها كثيرااا والله يعطيك العافيه

صح لسانك يالبرينيسي وصح لسان مشعل الحارثي
وبيض الله وجيهكم