الوقت غيّر

أعزائي أعضاء وزوار منتديات الشدادين

أضع بين يديكم القصيدة التالية آملاً من

الله أن تحوز رضاكم وتنال استحسانكم

الوقت غير من له الحال مرهون=خلٍ جفانا مرخصٍ ما يبينا

صارت تجينا اخباركم بالتلفون=من عقب ماكانت تعانق يدينا

والله ماكنت احسب إن وقتنا يخون=لكن هذا حكم المقادير فينا

كنا وكانوا مثلنا ما يشوفون =ونسيوا وحنا لاحشى مانسينا

حنا لقينا غيرهم من يسلون=لكن والله مثلهم مالقينا

يشهد علينا من خلق كل هالكون=لنموت وإحنا لحبهم مخلصينا

إدمان حبه فاق الادمان بإفيون=ماله علاج وش بقى في يدينا

الحال عقبه كنها حال مسجون=بين العنابر طايحٍ له سنينا

سجين حب اللي به القلب مفتون=واخفيت جرحي لين باح الكنينا

مجروح ماينسى والاحباب ينسون=اهل عيونٍ تجرح العاشقينا

بااسبابه دمع العيون احمر اللون=الله على فرقى هوانا يعينا

لوقالوا العذال مهمى يقولون=فيكم مانسمع كلمة الحاسدينا

سبة فراقك شوف كم تسهر عيون=والمشكله من دن ذنبٍ جنينا

ياليتكم عن هالغرابيل تدرون=يمكن بعد هالهجر قلبك يلينا

تدري ان قلبي عقب فرقاك مطعون=عطيتنا فالحب درسٍ ثمينا

علمتنا كيف المحبين يقسون =وعرفت مقداري وقدرك علينا

من حبكم شف حال مغليك وشلون=وخافي عذاب اللي خلق وارحمينا

ترى سكارى حبكم صعب يصحون=املي لنا كاس الغرام وعطينا

سكران حب وقالوا الناس مجنون=قلت إيه انا مجنون صافي الجبينا

مجنون هايم في هوى صافي اللون=انا اشهد إن الله بها مبتلينا

تركي بن عبدالله بن مشعل الشدادي

الله الله يا أبو عبدالله

الوقت صعب والظروف تغيرت والحال الله وحده هو اللي يعلمه

قصيدتك جزلة يالجزل وبيض الله وجهك يا ذيبان

صارت تجينا أخباركم بالتلفون من عقب ماكانت تعانق يدينا
صح لسانك أبو عبدالله توصيف لهذا الوقت المتغير
ولم يقتصر التغيير على شي معين بل شمل كل شي حوله
قصيدة أكثر من رائعه سلمت يمينك وصح لسانك

مشكور اخي قصيده جميله الله يعافيك

	صح السانك يابوتركي قصيده جزله من شاعر جزل وبيض الله وجهك

صح لسانك اخي تركي راااائعه

تلك القصيده في انتظار جديدك تحيتي لك

تركي الشدادي
عافاك اللة
قصيدة جزلة من راس شاعر
تمتعنا بقراتها وفقك اللة

صح لسانك تركي... وقواك الله ..
اي والله كل شي يتغير ...
ما يدوم غير وجهه ..

قصيدة رائعة .. لا هنت
صح لسااانك يا تركي الشدادي

بيض الله وجهك يا أبو عبدالله ولا هنت

قصايدك من أقوى القصايد وأجزلها

الله يعطيك العافية ويطول في عمرك