((( صوت و صدى ))) بيني وبين والدي فرحان الحرش

السلام عليكم ورحمة الله وبركاته
أسعد الله أوقاتكم بكل خير
وأتمنى ان تنال هذه القصيدتين على إستحسانكم وتليق بذائقتكم
هذه القصيدة أرسلتها لوالدي / فرحان الحرش الحارثي
وهو في جمهورية مصر العربيه بتاريخ 4 / 11 / 1431 هـ
7
7
7
7

راكب اللي كنّها كف شحاذٍِ فقير= حدته سود الليالي وكفه مدها
ما ملكها تاجر ولا هي بملك الوزير= ملك دولة عزها الله وعظّم ودها
معجزة عصر التقدّم على مد النظير=وماضي التاريخ يشهد لها ويعدها
من على عهد النبي نوح والقوم والغفير=الله آمر صنعها والكوارث ردها
باخره ترسى على الموج فالبحر الغزير=ماتهاب أهوال جزر البحور ومدها
فالمواني كنّها قصرمكسي بالحرير=ينشرح صدر المسافر وهو في حدها
ما تقول ألاّ مدينة على اليم وتسير=جلّ سبحانه حماها من اللي ضدها
يا المسافر هاك ظرف الرسائل من ضمير=ماترك طبع المواصيل حتى هدها
إقطعوا البحر الحمر وإطلبوا الرب القدير= صوب ديرة والحقيقة جهلنا ندها
مصر .. ياجعل السحابه ترازم بالوفير=وتسقي ديارٍ عضيدي رحاله شدها
عادته سج الفيافي ويقطف من عبير = ووالله إنه عوّض الفايته وإرتدها
أعطه المكتوب جعله يعيش بألف خير= عزوتي يوم إن عين الردي ما لدها
وبلغه خالص تحية من القلب الكبير = وباقي الموضوع خل الهجوس تسدها
يا إلهي بأمرك يصير ما يمكن يصير=وأنت تعلم سر الأنفس وخافي سدها
بدّل الدرب العسِر يا إلهي باليسير=وإفرج لعينٍ هوت دمعها في خدها
آآه يا حملٍ على المتن ما شاله بعير=وآآه يا غربه خذتني على ما ودها
والله إني للمواقيف صبّار ومغير=مير ذالدنيا تقول البشر من قدها ؟
ياحزامي ، عزوتي ، درع في وجه الشرير=شد لي يمناك لا لا عدمتك شدها
الزمن قاسي ووجه عبوسٍ قمطرير =والهموم تزيد لا رحم أبوها وجدها
والجروح البايتة سيّلت دمٍ غزير = والحياه لزوم نتعب لها ونكدها
والليالي حين تضحك لنا وأحيان غير=ما عرفت أعيش مزح الليال وجدها
إقصرت رجلي عن الدرب لو ماني كسير=وقلت أبصبر لكن النفس هذا حدها
فزعتك يا رأس مالي عسى درب سفير =وأنت تقدر للمواقف وتاطأ خدها
وسمعتك يشهدلها من عتيبه لا مطير = والقبايل بالجميلات دوم تعدها
والصلاه إختام قولي على الهادي البشير = عد ماهبت هبائب وذعذع ندها

ــــــــــــــــــــــــــــــــــــــــ
وهذه القصيدة رد والدي في نفس اليوم والتاريخ

راكب اللي كنها البوص في وقت الصفير= تشبهه وإلا لاقده ولا هو قدها
في يد اللي واسمه ميسم الظرف الخطير=اللحون يمدها غيض ما يرتدها
نبرته نبرة حزن من قسى الوقت المرير=لو يبي يجمع همومه ما هو معتدها
كونكوردٍ وردوها بني عزوة بلير = إنجلاند تورّد أنواعها وتعدها
مستواها مرتفع كنها صقرٍ يطير = الهوى والموج والظلع ما يحتدها
توصل المردود مني على النهج المثير = وأنت يا فواز عش الضيوف وغدها
حاسبينك درع دولة هل السيف الشطير=الملوك اللي سنا مجدنا من مجدها
وإعرف إنك ماأنت في عين عرافك صغير=والمثال يقول ليه السيوف نحدها
وإعرف إن المتر والباع ما يرجع شبير=والأمانه بينك وبين ربك أدها
وإبشر بتوفيق من يعلم السر السرير=وينفعك في بيض الأيام مع مسودها
هكذا الدنيا كبد بين خير وبين غير = وكان في نفسك علومٍ جديده بدها !
وصل وإسلم على الهاد النذير = عد ما فالأرض من حدها لا حدها

تقبلوا وافر التحايا والتقدير
.
.
.
أخوكم/ فواز فرحان الحارثي
.
.
.

الله الله الله يافواااااااز صح لسانك ولسان ابوك

وبيض الله وجيهكم

صوت وصدى رائعين بحق

تحياتي

بيض الله وجيهكم

والله لايهينكم

وصوت وصدى في قمة الروعه

والشبل من ذاك ألاسد

الله عليك يافواز صح لسانك وصح لسان والدك والله يخليكم لبعضر

قصيدتين في قمة الروعه

والله لا يهينكم جميعاً ويطول بعماركم

الله الله
يا شاعرنا فواز
مبدع وجزل ومتميز
وأكيد شاعرنا الكبير فرحان الحرش من شعراء بني
الحارث المشهورين وشهادتنا فيه مجروحة
لا هنتوا أخوي فواز والله يحفظ لكم غاليكم
وصحت ألسنتكم

صوت وصدي في قمة الروعة ياشاعرنا فواز
صح لسانك ولسان والدك والله يمتعه بالصحة ويطول عمره
اعجبني كثير وصفه للطائرة والذي يدل على الخيال الواسع والخبرة الشعرية ان صح التعبير
بيض الله وجيهكم والله لايهينكم
تحياتي لوالدك ولك ودمتم بخير

صح لسانكـ

وصح لسان والدكـ

قصيديتين جزلة

لاهنتم