من فرسان قبيلة بني الحارث

بسم الله الرحمن الرحيم


السلام عليكم ورحمة الله وبركاته..

أخواني الأعزاء
لا نقول إلا رحم الله فرسان وأعلام قبيلة بني الحارث فنحن مقصرين في حق مشاهيرنا ونرى كثير من كتاب المنتديات ينقلون قصص شيوخ القبائل الأخرى وسيرهم ولا نقول في ذلك شي ولا ننقص من قدر الرجال ولكن لدينا من المشاهير من هم في مكانة هؤلاء الشيوخ والفرسان فليت كتاب بني الحارث يهتمون بفرسانهم وأعلامهم كنقلهم لقصص القبائل الأخرى..
أما في هذا الموضوع سنتكلم عن أحد أعلام وفرسان قبيلة بني الحارث المشهورين
وهو الفارس الشاعر ناصر بن سفر بن داغان الحطابي الشلوي الحارثي

أشتهر بالشجاعة والإقدام والراي السديد والصدق في القول وكان له شأن عظيم في قبيلته وكذلك كان شاعراً مجيداً له قصائد كثيرة في مناسبات مختلفة ووالده كان فارساًً شاعراً ويقول في احدى قصائده يمدح الأمير بنيه ابن جريس الحطابي الحارثي:

واصاحبي عقب شفا نجد والنير = اقفى وأنا عنها اتحذا العلامي
اقفى تحت غر المزون المزابير = بدار العذا وأنا بدار الهيامي
يتلون شيخ ٍ فيه قدوة وتدبير = تربع به البدوان شرق ٍ وشامي
ما يلحقه ياكود سدس ٍ معاشير = سدس ٍ وربع ٍ كل ابوهن جسامي
نصف ٍ مجاهيم ٍ ونصف ٍ مغاتير = تزعزع تزعزاع ربد النعامي

وله من الأخوان منصور الذي كان فارساً مقدام ويقول أحد الشعراء في مدح ناصر وأخيه منصور:

ابا اتنصى دار ناصر ومنصور = سعد الرفيق أليا حدته الضهودي
ناصر ليا ذل الردي يحتمي الخور = من القوم يفتك اللقاح الضمودي
ويكفا حياض امسهّفت كل حنجور = لا نشب هرج اللاش بين الزغودي
ومنصور في المعايير مذكور = مثل العسل حلو ٍ يداوي الكبودي
وينسل عقال امكبّرت كل جمهور = ويكسّب اللي عند أهلهم قعودي

وفي الحقيقة لو أسترسلنا في سيرة فارسنا ناصر ابن داغان فسوف يطول المقام بنا وقد لا تكفي صفحات المنتدى لذكر بطولاته وقصصه المشرفة ولكن أخترت لكم بعض من أخباره وأشعاره..

** ناصر بن داغان وقبيلة بني أكلب:

تجلت شجاعة ناصر ابن داغان واضحة في إصطدامه مع قبيلة بني أكلب عندما أستطاع إسترجاع إبله وإبل أحد ربعه المسمى صقلان وكان ناصر في تلك الوقعة لم يكن معه بندق وأخذ البندق من نفال الذي كان صغيراً في السن وأستطاع ابن داغان أن يكسر القوم لوحده بقتله شيخهم ذويبان الأكلبي حتى جاء فرسان ذوي حطاب وأكملوا الباقي وبهذه المناسبة تمثل ناصر ابن داغان بهذه القصيدة:

عند العشي ناصر تهيض بقيفـان =زين المثايل يوم تطـري عليـه
هيّض علّي بغارتن من ذويبـان= اهل الفراوه جاهرونـي عشيـه
جاهرني المركي وذربين الايمان= الخيـل والمركـي تكـالا عليـه
نخيت ابن دبلان واقفـى ولا لان =واقفى على ذوده سريـع الهويـه
ردية للحضره هجدا و صقـلان =ونفال ورعن مالحقـه مشرهيـه
صقر الصقور ولد ذربين الايمان =لو كان على البندق تلوى شويـه
ساعة قبضة حزامها خاطري زان= واقول عاون يـا رقيبـن عليـه
ندهتها وانـا ادرهـم وعجـلان =تبغى الفكاك ولدة الشـوف ليـه
نفضتهم من جوف حلوات الالبان =والكل منهم مـا يـراوز خويـه
انا احمد اللي قادها فـي ذويبـان= يوم ان ربعـه ينتخونـه عليـه
والثانيه قضة لواحـي سحيمـان =على اسفل الجمهاه قضـة لحيـه
رقرق عليه الطير والذيب سرحان= حامت عليـه الحيـز فالاكلبيـه
ولحقوا ربعي على الخيل ظفـران =لابتي عنـد العشايـر صيرميـه
من يم فالح صار للمـال عقـلان= زيزوم ربعـه والفعايـل طريـه
مااغط فعل حسين اليا لحق بـان =سبعان من فعلـه تزاغـل دميـه
رديت نوقاتي ونوقـات صقـلان =ومن ذل عن ذوده حظوظه رديه

** ناصر ابن داغان وأخيه منصور:


في أحد الأيام ركب الفارس منصور ابن داغان مع سته من ربعه يريدون الكسب وبعد أن أخذوا الإبل من أحد القبائل أبتعدوا عن أهل الإبل مسافة فحل عليهم الليل وأرادوا أن ينامون قفام كل واحد يربط ذلوله ماعدا منصور الذي لم يربط ذلوله ولما جاء الصباح فإذا بذلول منصور قد سرت في الليل فقال منصور بأدورها فلاموه ربعه وأقسم على أن لا يرجع إلا بها أما ربعه فعادوا إلى ديارهم ولما قابلهم ناصر ابن داغان أخبروه بما حصل وكان هناك أحد الرجال أستنقص منصور بالكلام وتمثل ناصر ابن داغان بهذه الأبيات:

ناصر تهيّض في طوال المراقيب = عطشان ميبسته سموم الهبايب
أقولها في أطراف الفطر الشيب = ولانيب عن حلوات الألبان غايب
سبر ٍ لهنه من بعيد المغاييب = بشغل الفرنج موسعات الضرايب
وأخوي باتوع ٍ قليل العذاريب = صارومة ٍ للقوم لو كان سايب
ويفجر المرحان ويجري كما الذيب = ويقطع الخيفات فوق الركايب
الله يجيبه من بعيد المغاييب = أكل شبابه لو على الراس شايب
يوم الردي متكاين كنه الفيل = تلقاه عند منسعات الذوايب

** ناصر ابن داغان ومعركة صباح الحزم:


كان للفارس ناصر ابن داغان دور في معركة صباح الحزم التي حصلت بين قبيلة بني الحارث وقبيلة سبيع الغلبا فهو أحد السبور وهو صاحب القصيدة في تلك الوقعة التي كانت بقيادة الأمير عجير ابن مهرس عندما يقول في قصيدته:

يالله يا غفار يـا منشـي الامطـار=شفت الجياشة يوم ربـي نصرهـا
جاهم صباح عجير والطير ما طار=اخذ العشايـر والحلايـل دمرهـا
بغى بها الغلبا وصابت بنـي ثـار=وأصبح على حوقان خاير نورهـا
أميرنـا اللـي للمخاسيـر صبّـار=كم حايل ٍ للضيف يفجـر نحرهـا
ويا ظفر عايض يوم عمسن الاشوار=اللي يـرد شيوخهـا مـع جبرهـا
يرجع له المركي ويرجع له الشار=ويريّع الشيخـان صنعـة جبرهـا
ربع ٍ كسايبهـم يشوقـن الأنظـار=سحج الخلايا اللي وساع ٍ جفرهـا

** ناصر ابن داغان وبعض قصائده


يقول ناصر ابن داغان في إحدى المناسبات:

روّح علّي البرد والبرد مجنون = في ديرة لا عوّد الله حياها
عسّاسها الأجرب على وسق مامون = جر الشلاوى لين ضيّع جداها
يقول البل تشبع لها ربل وفنون = وخباري ٍ ما بيّح القيض ماها
تحالفوا من عقبها ما يحيلون =ياكود ديارهم حيل ٍ حصاها

يقول ناصر ابن داغان في مدح قبية الشدادين وتذكر أفعاله الماضيه معهم:

يا راكب ٍ من عندنا فوق عجلات = خصن على محماس شيخ القبيله
الاد شداد الفهود المغذات = حماية المضيوم يوم الدبيله
في ما مضى كسبي لقاح ٍ وخلفات = شهودها شرار وعايض تسيله

يقول ناصر ابن داغان في رثاء أبنه تركي بن ناصر:

عزالله على تركي كثير الحسايف = الموت أخذ تركي وأبوه خلاه
من راح من عقبه عساها ذلايف = موت ٍ نقل تركي يشيل ضالاه
يالله يا كاتب ذنوبي خفايف = أوردني الجنة برحمتك يالله

يقول ناصر ابن داغان عندما يطلب الأمير محماس بن عجير ابن مهرس بشت:

سلام يا محماس يا طيب الساس = ولد عجير اللي فعوله مضني
جيتك وابا لي بشت ٍ أكسي به الراس = ابا جديد ٍ وأنطل الهمل عني

يقول ناصر ابن داغان محباً للسلوم الطيبة ومحثاً لها:

ياليت(.....) عقبهم شب ناره = شب المناره وألتهب كنه الذيب
ذكر مناقيد العرب والعياره = وأحيا مقاعدهم تراها تشابيب

توفي الفارس الشاعر ناصر ابن داغان في مدينة الطائف ودفن فيها رحمه الله وأسكنه فسيح الجنان

وأختاماً أرجوا أن وفقت في ذكر بعض من تاريخ هذا العلم الشهير وأن شاء الله في الأيام القادمة سوف أضيف بعض من قصصه وقصائده كقصته مع المقاطي وغيرها من القصص..

رحم الله موتانا الأبطال وموتى المسلمين
وأسكنهم فسيح جناته ورضي عنهم برضاه
فتاريخهم يكتب بماء الذهب
وسيرتهم معطرة بماء الورد والكادي
شكراً أخي العاشق

العاشق
بيض الله وجهك وسلمت يمناك . مواقف طيبة لأحد
فرسان القبيلة رحمه الله رحمة وأسعة وجميع أقاربنا
وأحبابنا وجماعتنا والمسلمين أجمعين . تقبل مروري .
دمت بخير ,,,

رحمه الله ورحم امواتنا الأبطال ومازلنا متعطشين للمزيد فلا تبخل علينا

شكرا شكرا ويعطيكم عافيه الله الموفق

يعطيك العافيه يا العاشق وتسلم يمينكـ
والله يرحم ابن داغان واموات المسلمين




.................................................. .................................................. ..............
حنا الشلاوى والقبايل خابرين ......... وابليس حطينا في رأسه حصاه