ودي أضحك صراحة

مـجـمـوع الأوسـمـة · 05:25 PM

السلام عليكم ورحمة الله وبركاته

** قولي أحبك ودي أضحك صراحة **

بضحك شوية عيدي إلي تقولين = الضحك للمجروح بلسم جراحه
أرجوك عيدي الكلمة إلي من اشويتين = الكلمة إلي ضحكتني صراحة
قولي أحبك بإذني بهمس تكفين= وأنا بزيد الضحك وازداد راحة
ماهي شماتة بس ودي تشوفين = طيرٍ كسرتي قبل مدة جناحه
حاول يطير وما أسعفته الجناحين = شهرين منك ماتعدى مراحه
مع كل ليلة لا لفاه المحبين = ينام خوف الناس تسمع نواحه
يقول يمكن بكرة تهون وتلين = ويقوم لكن ما صباحه رباحه
مع كل صبح تسولف علومه العين = بدمعها اللي كان قصة صباحه
غبتي ولا قلتي غيابك على وين = ليتك تركتي للموادع مساحة
على الأقل يجبر غياب المقفين = لا طاح دمعٍ ما رحمني مطاحه
ما جيت في بالك على طول شهرين =ياوسع قلبك والله إنه براحة
كم كنت أدور عنك الزين والشين =أيّا خبر لو جرّحتني رماحه
ما هو كذا عايش تقل بين نارين = وقلبي هماجه مستوي مع قراحه
لا جيت أبسلى هب نسناس بعدين = واليا سليت الموت جتني رياحه
وبعد مرور الوقت جيتي بعذرين =كلٍ يقول إني انا أكثر قباحه
الأول إنك كنتي بوسط برلين = بالصيف كله قاضيتها سياحة
والثاني إنك ما قدرتي تدقين = رقمي ماهو وياك يامال الفلاحة
شريحتك ضاعت قبل لا تروحين =لما طلعتي مع آهلك للإستراحة
وانا هنا كأني على حد سكين =الهم هددني و لقم سلاحه
لوجيتي بعذرٍ يعدل الموازين = يمكن أشوف محرماتك مباحه
لا تسأليني عن غلاتك بعد حين= غلاك جعلك ما تروحي مراحه
الصد والهجران والدمع والبين = غزو على حبك و صفو مراحه
من حط له في كل يومين وجهين = والله ما يفرح بالوفا والسماحة
وأبشرك طيرٍ سكن قلبك سنين= نهض وأخيراً منك أطلق سراحه
لحظة طلبتك عيدي إلي تقولين = قولي أحبك ودي أضحك صراحة
مستغربة ماهو بأنا إلي تعرفين = أدري وأدري بان صابك تناحة
لكن وش اسوي في احاسيسي ألحين = أحس في كلمة أحبك وقاحة