قصيدة مقدّمه لدخيل الله بن هلاّل بمناسبة بيت الشعر الجديد

سلام يا راعي الوفاء والجمايل=يا راعي النخوة ويا راعي الطيب
بنيت لك بيتٍ لكل القبايل=بيتاً شعر وهو مسلّح بترتيب
بيتاً يزورونه عيال الحمايل=وللضيف فيه تكمّلون المواجيب
الضيف عن منزلك ماهو بعايل=أنت المعزّب من خيار المعازيب
يقلط على حيلٍ شحمها هوايل=وحليب خلفاتٍ ودلّه وترحيب
وتمرٍ من الوديان ماله مثايل=وسوالفٍ بين النشاما تعاجيب
في مجلسٍ ما فيه قيلٍ وقايل=ودلال منها ما تمل الشراريب
في بيت بن هلاّل والراس طايل=عيد الركاب اللي يجنّه مناجيب
ناره بشق البيت تشعل شعايل=وبجنبها عشرين دلّه محاديب
وكبشٍ يذكّى في العشا والقوايل=وحليب وضحٍ وسمهن المشاعيب
وغير الكرم والجود رجل الدلايل=وله بفكات المشاكل تجاريب
شيخٍ ولد شيخٍ سلوكه جلايل=ولا همّه اللي يشذبون العراقيب
يفيد كلمة " نِعم" رجل الصمايل=في دارنا وإلا بدار الأجانيب
ولعزوته يوم المواقف فعايل=يا ويل من جاله وراهم مطاليب
آلاد شداد الجبال الثقايل=عدوهم يونس بكبده لواهيب
وإليا تعزووا فوق قبّ الأصايل=بأثناء سفرهم يشبع الطير والذيب
يروون حد المرهفات السلايل=يا كثر ما عدّوا بروس المراقيب
خيالهم ينطح ميه ما يسايل=ليا منهم ركبوا على شمّخ النيب
عدوّهم منهم بكبده ملايل=منهم يشوف الخوف والذل ويشيب
وعدوّهم ما باقيٍ له عقايل=عنهم يغيب ويحسب الوقت تحسيب
من واد ابن هشبل إليا سوق حايل=فوق الركايب كاسرات المصاليب
يابو سعد ربعك رجالٍ زحايل=مثل الجبال النايفات الشواهيب
يثنون من راسه وراء المتن طايل=علمٍ عليه ثبوت مافيه تكذيب
وطيبك وصل نجران بأهون وسايل=وذكرك يردد بين كل الأعاريب
والطيب ورثٍ للجدود الأوايل=جدّك وعمّانك شيوخٍ عواطيب
يوم القدايح ولّعت بالفتايل=فعولهم ماتنحصي بالمكاتيب
يا جعل تفداك الوجيه الفلايل=اللي تخرّب سمعت الدار تخريب
يالله يا منشي صدوق المخايل=إنك تجنّبهم عن النّار تجنيب

يستاهل ابوسعد المدح والثناء

صح السانك يابو عيد وتشكر

على هذه القصيده الجزله ..

		المشاركة الأصلية بواسطة : اقتباس
	وطيبك وصل نجران بأهون وسايل=وذكرك يردد بين كـل الأعاريـب والطيب ورثٍ للجـدود الأوايـل=جدّك وعمّانك شيـوخٍ عواطيـب

يستاهل ابو سعد ... الله يبيض وجهه وصح لسانك يابو عيد ..

يستاهل والاهنت يابو عيد

صح لسانك يا أبو عيد

والله يطول في عمرك ويحفظك

يستاهل أبو سعد الثناء والمدح

وأنت تستاهل العلوم الغانمة كلها

والله أن ابو سعد يستاهل المدح والعلوم الطيبه

صح لسانك يا ابو عيد ولا هنت يالنشمي


وتسلم يالغالي

صح لسانك يابو عيد على القصيده

الراااائعه وبارك الله فيك

في انتظار جديدك