..:.. مرحباً بك في شبكة الشدادين الرسمية ، ضيفنا الكريم يسعدنا دعوتك للانضمام والمشاركة معنا .. اضغط هنا لتسجيل عضوية جديدة ..:..


العودة   شبكة الشدادين > المنتديات العامة > القسم العام
  [ 1 ]
قديم 04 May 2005, 01:21 AM
عضو ألماسي

orgwan غير متصل

تاريخ التسجيل : Apr 2005
رقم العضوية : 129
الإقامة : saudi arabia
الهواية : اي شي فيه مغامرة
المشاركات : 1,182
معدل التقييم : 25
الملف الشخصي للكاتب
إضافة تقييم
الرد على الموضوع
ارسال الموضوع لصديق
طباعه الموضوع
تبليغ عن الموضوع
مذكرات طالبة جامعية مقهورة



الثلاثاء
4/مايو/2005
______________


اليوم كان عندي دوام على الساعة 8 الصبح... اوووف شكثر أكره دوامات الساعة 8 ... لوعة جبد.. ما ادري شو الهدف اننا نداوم من الفجر جذي؟؟ تقول مضيعين عنز و قايمين ندو عليها.... يلا شنسوي؟ حكم القوي على الضعيف.. على اي حال داومت كالعادة ... عين مفتوحة و عين مسكرة.. و البيجاما تحت العباه و ماخفي كان اعظم.. وصلت القاعة يا حليلي بأمان الله..قبل الدكتور ما يوصل بربع ساعة.. وشوي الا بنت تسألني : جاهزة للعرض مالج؟؟
هي سألت هالسؤال و انا الدنيا اسودت في عيني من الصوب الثاني.. كيف ؟ متى ؟؟ و اخر شي تذكرت اني لازم اشارك في عرض اليوم ويا وحدة بنت.. و ياحسرة على قلبي الراقد فاق على مصيبة و طار النوم .. و صار هاجس اني ادبر عذر معضلة ما يقدر عليها تشارلوك هولمز... شو أسوي ؟؟ شو أسوي؟؟ بصراحة خفت وايد على العشر درجات.. مع انها مو عادتي اخاف من درجات ولا من غيره.. بس يمكن كنت متأثرة بالجو الدراسي الصباحي و صدقت اني طالبة مجتهدة ولازم أخاف..
المهم دخل الدكتور...ومعاه بدأت عظام القولون تتجرجع... وشوي الا صابني قلق معوي و عسر تنفس و تسارع في نبضات المخ...
دخل الأخ: Good morning ... sorry for being late
اللي يسمع على اساس يعرف برستيج و نظام.. ايه بالمناسبة ما وصفتلكم الدكتور عشان تعيشون الموقف..
دكتورنا الحبيب .. من النوع اللي بايع الدنيا.. سحنة استرالية معتبرة.. صلعة على الخفيف من فوق و على الأطراف مطول الشعيرات شوي.. على اساس موضة يعني..لا بس جد لون شعره تحفة... فير طبيعي...يلبس نظارة و خشمه مدور .. و مسوي لحية بس أحلى شي فيها أنها محددة في نص رقبته ( في نص الحنحون بالضبط) بس حرمة الخصلتين البيض في لحيته وناسة.. غير شكل.. هذا كوم و لبسه كوم.. تلاقي البنطلون مبهدل يلبس 4 منه ما يثبته غير الحزام .. اللي يدوب ملحق يلمس طرف القميص من كثر ما البنطلون نازل.. القميص.. ايه هذا احلى شي بالموضوع.. تلاقي كم زر محلولين .. تقول لابس ملابسة في التاكسي على التيك اوي !!! بس في شي شوي غريب مي موضوعه... انا اموت وا عرف .. هو ليش يطلع جزء من طرف القميص و الجزء الثاني داخل البنطلون؟؟ يعني يا فوق البنطلون (سبورت يعني) او تحت البنطلون (رسمي).. لا هو من جماعة (احب اكون متميز).. لا ... و الأدهى انه يخش طرف القميص اللي طالع... تحت الحزام بس فوق البنطلون.. يعني بين الاثنين.. شفتوا الحركات؟ و الله حالة.. ويقولون ليش الطالبات يعجبون بالدكاترة.. من هالحركات الشبابية اكيد..
ااااه بس لو تشوفون الشنطة اللي يحط كتبه فيها.. شنطة ظهر مال اطفال.. بس مو هني القضية .. المصيبة ان هالشنطة انا حاسة انها السبب في ظهور فايروس السنكبيكس في الخليج.. حشى.. زبااااااااالة تقول توه مطلعنها من فم كلب مقضي اليوم كله بعلج فيها....اكيد الكل يتساءل من باب الفضول شو المادة اللي يدرسها.. انا اقولكم.. الاخ يدرس ادب امريكي.. وبما ان الامريكان ما عندهم أدب.. يعني صار اسم الساق قلة ادب امريكي و انتوا عاد افهموها...
المهم خلنا نرد على موضوعونا...العرض اللي انا اخر من يعلم عنه
بدأ الحبيب يوضح ان اليوم انا و رفيجتي عندنا عرض ..وانا ولله الحمد انفكت عقدة لساني دقايق بس عشان اقوله ان رفيجتي بس عندها عرض.. قام طالعني بطرف خشمه.. قصدي عينه.. وقال: ليش؟؟
من الخوف ما عرفت شو اقول.. كنت عارفة ان بالعادة اللي ما يقدم العرض في يومه ياخذ على طول صفر يعني مافي فرصة ثانية.. المهم لما سالني .. من الخوف قمت اتلفت يمين و يسار مثل الدجاجة اللي مضيعه بيضة.. شوي انتبهت للبنت اللي جنبي و تذكرت ان عرضها يعد اسبوعين..قلت له بدون تخطيط .." انا معاها.. بقدم العرض في نفس موضوعها".. طالعني باستغراب.. وقالي: خلاص نتكلم في الموضوع بعدين.."
و مرت المحاضرة وانا حالتي الهضمية في تدهور مستتب..كنت حاسة كان يتكلم عبري.. ما فهمت شي من المحاضرة .. الشي الوحيد اللي يدور في بالي كان.. " يوم انت ناوي تخسف لي الدرجة.. خلاص.. ليش هالتعذيب النفسي و نتكلم بعدين وما ادري شو؟؟؟ .. خلصني وقول من البداية اني خذت صفر..."
احلى شي في الموضوع انه كل ما يسألني في الدرس ما اعرف اجاوب.. اللي سهل الموضوع ان في بنت ورا تحب تجاوب على كل الاسئلة فكان كل ما يسال تجاوب و انا اقوله " ايه ..نفس اللي قالته .. كلامها صح.. انا اوفقها" لين خلصت المحاضرة ووصل وقت التشرشيح.. اول ما قال خلاص المحاضرة خلصت لف صوبي وقال :"aren't you going to talk with me in a minute???"
سالته :" in a minute or now??"
ضحك تقول قنبلة ذرية انفجرت في بطنه :"no.. in a minute

قلت له " خلاص بس تعدي المنت بكلمك..
المهم لما رحت له.. سالني بكل رقة و لطف : ليش ما قدمت العرض..
انا عاد على اساسا اني حاولت بس شفت انه ما ينفع قلت له: لان الموضوع محدود ..5 دقايق تكفي زميلتي تشرحه كله..يعني تضييع وقت لو عدت و زدت في كلامها..
طبعا هني انا توقعت تكون اللحظة الحاسمة...و استعديت نفسيا و طلعت كلينكس عشان لو جرح شعوري يكلمة ولا شي (ترا انا وايد حساسة).. لقيته بكل برود يقولي : خلاص خذي نفس موضوع الي بيعرض بعد اسبوعين و دوري ملخصات لاعمال الكاتب و اشرحي علاقتها بالقصة..
انا من الصدمة احتجت 3 ثواني لين استرد وعيي.. وين الشرشحة وين انتي طالبة مستهترة؟؟ وين الصفر؟؟ بصراحة كانت صدمة.. المهم قالي هالكلمتين واذا ابي اي مساعدة اسالة.. سبحان الله.. لااااا شكله راضي عنا اليوم.. شو هالرقة .. و الله ما تناسبه.. بصراحة.. كنت ابي يشرشحني عشان احصل فرصة واروح اشتكي عليه و يفصولنه .. بس شنسوي .. قدره انه يتم كابت على نفسنا بالجامعة.. الله يعين..
تذكار يذكرني بسحنته ..


تحياتي..
كانت معكم أرجوان.. اخصائية تعذيـ .....الخ


توقيع : orgwan

Just Face North When U R Sad,
Breathe the Clean Air,
Eat Some Chocolate
And you Will Get Your SMILE Back

---------------------------------------------------------------------

رد مع اقتباس
قديم 04 May 2005, 01:34 AM [ 2 ]
عضوة متميزة


تاريخ التسجيل : Feb 2005
رقم العضوية : 7
الإقامة : united arab emirates
مواضيع : 206
الردود : 4584
مجموع المشاركات : 4,790
معدل التقييم : 30بنت زايد is on a distinguished road

بنت زايد غير متصل


مـجـمـوع الأوسـمـة : 2
التواصل

عضو مخلص




واخزياااااااااااااااااااااااااااااااااااااه فضحتي الريال فضحتي الريال ,, بخبر مدير الجامعة بخبره :yikes3:







هئ هئ


توقيع : بنت زايد

الأعلى رد مع اقتباس
قديم 04 May 2005, 09:44 AM [ 3 ]
عضو ألماسي


تاريخ التسجيل : Apr 2005
رقم العضوية : 129
الإقامة : saudi arabia
الهواية : اي شي فيه مغامرة
مواضيع : 156
الردود : 1026
مجموع المشاركات : 1,182
معدل التقييم : 25orgwan is on a distinguished road

orgwan غير متصل




انا ما فضحته.....
ما قلت اسمه ولا حطيت صورته....هذي صورة واحد يشبهه.. يعني ما سويت شي اعاقب عليه.. بعدين مدير الجامعة لو فيه خير خليه يسير يحل المشكلة اللي امس البنات مسوين مظاهرات عشانها... اكيد تعرفينها..ما يحتاج فضايح...


الأعلى رد مع اقتباس
إضافة رد
الذين يشاهدون محتوى الموضوع الآن : 1 ( الأعضاء 0 والزوار 1)
 
المواضيع المتشابهه
الموضوع كاتب الموضوع المنتدى مشاركات آخر مشاركة
يامغيث أغثني .. أدعية الشًٍُّدآديهـًٍُّْ~ِ المنتدى الاسلامي 8 23 Dec 2009 10:20 PM
ويش عذر العسكري ليحب بنتٍ جامعية ؟! أبن مهرس Vip قصائد مختارة 27 19 May 2008 01:38 PM
سالفة نوره ( معاقة ) مقهورة !! غريب بدياره مرافئ البوح 30 16 Mar 2008 02:44 AM
توبة فتاة جامعية انسان المنتدى الاسلامي 7 23 Apr 2006 03:45 PM
أدوات الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML متاحة

الانتقال السريع

02:35 AM
Powered by vBulletin® developed by Tar3q.com