شيخة القصيد لمصلح بن عياد

يا روحي اللي عن الهفـوات مانعهـا=لو كان من صوبها يحدانـي الحـادي
هي ودها تمشي بدربٍ مـا ياسعهـا=وأنـا مـاودي بـدربٍ فيـه نقـادي
أجاهد النفـس ليـن تصـد وأقنعهـا=عن زاد ماهـو بقـدر لـي ولازادي
مطاعـة الله فـي دربـي تطوعهـا=اليا هدى الله روحي صحصح فـؤادي
روحي على اللي خلق روحي مودعها=عسى وأنا أبو فهد يهدينـي الهـادي
يازين صوت المـؤذن يـوم ينشعهـا=اللـي يكبـر بـآيـات الله ويـنـادي
الله أكبـر علـى الأفـاق ماأوسعهـا=الخير والشر فيهـا صـار متـلادي
المؤمن اللـي يفكـر فـي موادعهـا=عنده يقين إن بعد الـزرع حصـادي
والجاهـل اللـي يباريهـا ويذرعهـا=يرصد لها في خلايا مخه أرصـادي
ماهمـه إلا مـن الأمـوال يجمعهـا=ويعانق الطايـرات وجوهـا الهـادي
من طاوع النفس قامت به على أربعها=وأومت به وماي لين يحـدر الـوادي
إليا انحدر حولت به فـي مصانعهـا=مصانـع الـذل والخبيـة والأنكـادي
أمسى مع البوم وأصبح في مواقعهـا=تحول الصقر بـوم وصـار ينقـادي
ياصقر عود بروح الصقـر وأرفعهـا=العار والـذل مالـك فيـه مقعـادي
الروس ماعابـت الإ مـن تصدعهـا=خيب رجاها السموم وسـم الأكبـادي
اللي من الغـرب وزعهـا موزعهـا=وعربيا تشتريهـا كـاش وأقصـادي
القبح فـي وجهـه شاريهـا وبايعهـا=قطاعـة الديـن لا قـوة واعـتـادي
الله وأنـا مصلـح العيـاد يقطعـهـا=قطع الرشا فـي قليـب جـاه ورادي
النفس تبغـا لهـا رجـل يصارعهـا=رجال ماهـو قليـل ديـن وربـادي
تـرى الرياجيـل معروفـه طبايعهـا=صدق ونزاهة وديـن وزاد وزنـادي
غض النظر واقصر الخطوة وسنعهـا=احفر بها حفـرة الميـت والإلحـادي
ادخل بهـا منـزل الميـت وسمعهـا=صياح الأحفاد والزوجـة والأولادي
اخذ الجنازة علـى متنـك وشرعهـا=بالقطن والشاش والكافـور والكـادي
اربـط كفنهـا وجودهـا وشيعـهـا=على النعش لين تاصل بيتهـا العـادي
اليا طويـت اللحـد مندونهـا دعهـا=اسحب عليها تراب القبر من غـادي
رح للعنايـة وعايـن فـي ودايعهـا=جسم بلا روح وأرواح بلا أجسـادي
تعيـن الأجهـزة واسمـع لعالعـهـا=لاتنشـد أحـدٍ ولا ينشـدك نشـادي
حتاك تروي خـدودك مـن مدامعهـا=تشوف ماشاف غيرك يابن الأجـوادي
ورح للمساجين وانشدها وش أودعها=في منـزلٍ ماتهنـت فيـه مرقـادي
السجـن ضيقبهـا والقيـد موجعهـا=سد الحراسات من ضبـاط وأفـرادي
رح للفقراء وعايـن فـي مضاجعهـا=وأعلم ترى الخافيات أدهى من البادي
العسر خلى الرجال تعض أصابعهـا=ياما كسر من مقـام وكسـر أوتـادي
مايطعـم المـرة إلا مـن تجرعهـا=انشد مجرب يجيك بعلـم الأوكـادي
الطيبة في المكـان الطيـب ازرعهـا=انفق من المال لاتطغيـك الاعـدادي
ابعد عـن الشـر والفتنـة ومولعهـا=النار تمسي شرار وتصبـح رمـادي
ارفق على النفس واحذر من تراجعها=خلك مجاهد جهـادٍ صـدق ومفـادي
على الهوى واصل الرحلـة وتابعهـا=ارجع كمـا كنـت ماعنهـا تلـدلادي
أصل المحـلات الأربـع لاتقاطعهـا=حتى لو صدفةٍ مـن غيـر ميعـادي
ميصالـك إلهـا يذكـرك بمنافعـهـا=فزعـة وجزعـة وتذكيـر وتعبـادي
ترى الوداعة بترجـع عنـد مودعهـا=والصفحة تبيـن الممتـاز والعـادي
لابـد مـن يـوم ينزعهـا منازعهـا=تـدور اللـي يذكرهـا التشـهـادي
مهما تطول العمار اللحـد مرجعهـا=رعيان الأدباش وإلا ملوك وأسيـادي

الشاعر \ مصلح بن عياد

ولد شالى
قصيده رائعه وجميله للشاعر الكبير مصلح بن عياد

استمعت فيها كثير

تقبل تحياتي

صح لسان الشاعر الكبير /مصلح بن عياد

وسلمت يمينك على طرحها

قصيده رائده وفيها من الحكمه الشيء الكثير

تحياتي لك ياولد شالي

أخوك

نواف الشدادي

ولد شالي يعطيك العافيه وبيض الله وجهك وصح إلسان الشاعر بن عياد

صح لسان شاعرهااا

مشكور اخوي على نقل القصيدة الرااائعه

لشاعرهاا المبدع مصلح بن عياد

اخوي

ولد شالي

حياك الله وياهلا والله فيك وفي ماجبت

الروس ماعابـت الإ مـن تصدعهـا = خيب رجاها السموم وسـم الأكبـادي
اللي من الغـرب وزعهـا موزعهـا = وعربيا تشتريهـا كـاش وأقصـادي
القبح في وجهـه شاريهـا وبايعهـا = قطاعـة الديـن لا قـوة واعـتـادي

عز الله انه صادق في كلمة وحرف في القصيدة

صح لسان الشاعر مصلح بن عياد ملايين

وتسلم يديك على النقل

ودمت

البدر
نواف الشدادي
بنــــ( H )ـــــدر
عبدالله الشدادي
متفائل

مشكورين جميعا على الردود الطيب
والله لايهينكم

تحياتي

:؛:


صح لسان الشاعر مصلح بن عياد ..

وتسلم يمناكـ عالنقل ..

والذائقه العذبه ..

ما ننحرم من جديدكـ ..




:؛:

ولد شالي مشكور على الطرح

وصح لسان شاعرنا الكبير

مصلح بن عياد

دلوعة أمها

صح لسان الشاعر الكبير ابو فهد

مصلح بن عياد

والله يعطيك العافيه ياولد شالي

على النقل والاختيار الرائع

تقبل مروري الغربي