ابا اسج رجلي واتمشى مع الحزمان

اشوف المطر خيل على اوبارق الحيران=عسى يديم الخير والغيث ومزونه
ليا جاء سحاب الصيف كلن طلع فرحان=يبون الخلا والبيت ماعاد يبغونه
وانا اقول يالله يا الهي عظيم الشان=الهٍ جميع الناس والخلق يرجونه
تهل المطر يالله من غره الامزان=وتسقي شعيبٍ دايم البدو يرعونه
تهل المطر وتسيل الارض والوديان=وينبت شجرها والورق باطرف غصونه
ومن قو سيله تصبح الارض كالغدران=وتلقاء الحيا والعشب ينبت على هونه
ومن بعدها يصبح سهلها كما البستان=وعنها الخبر بين القبايل يردونه
جميع العرب فرحوا وانا خاطري زعلان=ابا التمشيه في واديٍ كثرت فنونه
ابا ديرهٍ فيها العشب من شكل والوان=وفيها النفل زاهي ومايختلف لونه
ابا اسج رجلي واتمشى مع الحزمان=واخيل سحابٍ كل ابوكم تخيلونه
وبعض العرب في روسهم ثرثره وجنان=ومن خلقتي مارحت مع ناس مجنونه
انا متبع الا اهل الوفاء ربعي الشجعان=رجالٍ ليا راحو للازم يسدونه
وفي مدح ربعي ياعرب ماني بغلطان=انا اعزهم والراس يعتز بمتونه
واببداء ببويه واذكر عبيد بن سلطان=كريم مع اهل الطيب دايم يحسبونه
وابو علي رجل للوفاء والكرم ميزان =عويض ليا غنى تهيضني لحونه
وزياد يابن عيد يافارس الفرسان=شجيعٍ وكل ناس دايم يهابونه
وتركي سفر للطيب والمرجله عنوان=عسى كل رديان السواليف يفدونه
ونواف بن عواض لهل الوفاء مزبان=علومه وفيه والخلايق يعرفونه
ولاانسى رفيق الدرب سلطان ابو سريان=شجيعٍ على الطالات والطيب يطرونه
نبي نركب الموترونمشي مع البران=على موترٍ يسعدك قضبه دركسونه
على جيب تايوتا مورد ماهو نيسان=جديد المديل وتو حطو شطرطونه
على جيب اببو مشبب مصمم على البرهان=ولاكل ريجيل الدراهم يجيبونه
شراه الكريم اللي دفع غالي الاثمان=ومشاه من باب الوكاله على هونه
مشابه مع الرقه طلعبه مع الضلعان=وإذا جود السكه بداء يعد طبلونه
ولامن سرى داس العقارب مع الديبان=يدوس الخطر يوم الردي عميت عيونه
ولا شفت انا مثله مع الحضر والبدوان=ولا يشتريه اللي كثيراتٍ غبونه
مدحته وانا في مدحته ماني بخسران=وهرج الحقيقه دايم الناس يقلونه
تهيض ضميري ثم جاب اجزل القيفان=تهيض وجاب الجزل والناس يووحونه
كتبت القصيده والفكر رايقٍ طربان=وزينت معناها ووضحت مضمونه
وابا العذر كان ان القوافي بها نقصان=قوافي كتبها عيد بفكار مجنونه
قوافيٍ معانيها كما الدر والمرجان=ولا سطر واحد في القصيده يعيبونه
قصيده خطيره لو سمع قافها غسان=ترك شاعر المليون يقعد بمليونه
قصيده تساوي من قصيد العرب ديوان=ولكن شاعرها ظبتها بمكنونه
وحنا على الطالات مانتبع الرديان=على العز نمشي والشياطين ملعونه
ندوس الخطر كله وناطى على العدوان=ونمشي بدرب الطيب ماننثني دونه
نعز الرفيق ونكرم الجار والضيفان=وميقاف ربعي دايم الدوم يحمونه
وباختم قصيدي واطلب الواحد الرحمن=يشافي ضميري بعد ماكثرت طعونه

تقبلوا تحياتي اخوكم الغربي

ونعم فيك يا ابو عبيد

ويستأهلون المدح اللي مدحتهم ونعم فيهم جميع

صح لسانك ملايين وما قصرت وبيض الله وجهك قصيده جزله تسلم يا القرم

وأن شاء الله ما تكون المصافحه الأخيره

عميق ودي لك

وانا اقول يالله يا الهـي عظيـم الشـان
(( الاهٍ )) جميـع النـاس والخلـق يرجونـه (( الهٍ )) عدل الكلمة التي بين الاقواس الاولة خطاء والاخيرة صح

ابوعبيد صح لسانك وبيض الله وجهك
قصيدة رائعة بمعنى الكلمة تحمل من الكلمات الراقية والمعاني الجزلة الكثير
والنعم فيك وفي ربعك الذي مدحتهم واهم اهل للمدح وانت كذلك الله يعطيك العافية
ولايحرمنا منك ومن قصائدك الرائعة ايها الشاعر المبدع ودمت بحفظ الله ورعايته
وتقبل تحياتي واعجابي ومتابعتي لكل قصائدك وفقك الله

للمره الثانيه تعلن الرحيل من منتداك ...

عساها تكون الاخيره وتصلح الاحوال ..

ابا اسج رجلي واتمشـى مـع الحزمـان=واخيـل سحـابٍ كـل ابوكـم تخيلونـه

سج رجلك ..وتمش مع الحزمان ..

ولكن عود علينا جاي .. يابو عبيد ..

محتاجينك ..مابقي مشرفين .. جزا غياب

وبدوي راح وتركنا .. وزعيم لحاله ...يد وحده

ماتصفق ..

بيض الله وجهك يا ولد عمي

عز الله إنك مدحت ويستاهلون المدح اللي مدحتهم

ودنا لو كان لنا معهم نصيب يا أبو عبيد لكن الظاهر ما لنا حظ ونصيب

المهم

الله يسهل لكم دروبكم ويردكم بالسلامة

القصيدة من أجزل القصائد وأجملها وتستحق كل إطراء وثناء

صح لسانك ، وصح بدنك

قصيدة جميلة ، وزاد اعجابي بها في ها البيتين

قصيده خطيره لو سمـع قافهـا غسـان
تـرك شاعـر المليـون يقعـد بمليونـه
قصيده تساوي من قصيد العـرب ديـوان
ولكـن شاعـرهـا ظبتـهـا بمكنـونـه

وسبعة أنعام والله بك يا عيد وباللي ذكرتهم في القصيدة
وصح لسانك يا ذيبان وعلا شانك

صح لسانك يالغربي ولاهنت

قصيده في قمه الجزاله والروعه

بروعها شاعرها

صح لسانك ياالغربي

وبيض الله وجهك

قصيده جزله ورائعه

هلالالالالا

على جيب اببو مشبب مصمم على البرهان
ولاكـل _ريجيـل )الـدراهـم يجيبـونـه

رياجيل


ونعم فيك وفي ربعك


عزالله قصيده كايفه وافضل قصيده قرأتها للغربي


بس وش له الغياب ؟؟؟؟


ارجع وراجع التوقيع زين ياشاعرنا !!!

البيت الثالث والرابع والخامس

ولاتخلينا الله لا يخليك



اخووووك الرهاوي