البارحة من ضيقة الصدر محسوس

الملف الشخصي للكاتب · توقيع : أبن مهرس Vip

.

البارحه من ضيقة الصدر محسوس=غابت عليّ الشمس بطراف قمه
رجلي على جمره وكبدي على موس=عامين والثالث على آخر متمه
صديت عن وادٍ به الحبل ممسوس=وعن وجه ابن عمٍ يهين ابن عمه
ماقلت جعل الروس تفدى لها روس=اقول وجهٍ تمدحه لاتذمه
لكنّ بيت النمل والذر والسوس=ماهوب بيت اللي كبيرٍ معمه
ادري مسيري عكس والدرب معكوس=وادري سلاح الداب نابه وسمه
ماكل جاسـوسٍ نسميه جاسوس=لو نعرف اللي كلفه بالمهمه
الناس نِبت ضروسها ريش طاووس=تفاخروا لين انكر العبد عمه
تنومسوا في شي ماهـوب ناموس=مثل الصلاه اللي على غير يمه
اللي معــه ثروة سنادات وفلوس=ويرهن مقابلها كرامه وذمه
يعطيك فالحِسناء نداوات ودروس=ويصرف لك الاخلاق من راس كمه
إن عاف ماكن الطمع فيه مغروس=وان طمِع في حاجه نسى ابوه وامه
مانوس يالوادي ولا انته بمانوس=مهم ولا فيك حاجه مهمه
اللي علـى جالك يصيدون جاموس=واللي وراهم ياكلـونه بدمه
ذيابتك نجسه وفيرانك نجوس=من طحت بين ايديه وداك فمه
اصنام تبنيها نصارى وهندوس=علــى قبور الانبياء والأئمه
يامملكة صدري من القوس للقوس=من لا يهمك لاتشيلين همه
جد الولد منحوس وابوه منحوس=جاء من ظهره وقال لبليس سمه
اهون عليّ اعيش منفي ومحبوس=ولا ينبعث ريح الخيانه واشمه
مانيب دايم رايق اخلاق وهجوس=إما ضويت بكارثه جبت طمه

الشاعر : مدغم ابو شيبة