مثل وجه الغدر في ثوب الصديق

السلام عليكم ورحمة الله وبركاته

مساكم الله بالخير أخواني زوار وأعضاء ومشرفين منتديات الشدادين

أعلم ان التكرار والا طاله في غالب الأحيان تكون ممله ولكن قدر الله

ان تكون هذه القصيده بهذا الحجم أتمنى ان تحوز على رضاكم :

البارحـه ليلـي هـذاري وهـنـداب=مليـت نـوم خاطـري مـا اهتنـابـه
اغـض طـرفـي وتقـلـب تـقـلاب=واسـال نفسـي ويـش فكـري غدابـه
ومللـي عنـاه القلـب ورداه منصـاب=منـدون سابـق ذنـب ضاقـه وصابـه
يسوق فيـه السـم مـن راس مشهـاب=سـم الحريـب اللـي سميـم حـرابـه
فـي ليلـة بـان القمـر ودبـح وغـاب=وانـا مـع الهاجـوس اعانـي واجابـه
قامت هجوسـي ليلـي اذهـاب ويـاب=شـي صـواب وشـي فيـه التشـابـه
ويوم اعتلت شمس الضحى كـل مرقـاب=وانــا مقـيـم مـابـدا ونتـهـابـه
مـن بعـد تحليـل الهواجيـس بحسـاب=ويضافة اللـي معـرض عـن حسابـه
ركـزت تفكيـري وميـزت الاسبـاب=عن سر جـرح فـي ضميـري عنابـه
سابق زمانـي حـول ضنـي ومرتـاب=ابيـح صــوت مايمـكـن صـوابـه
الصبر مفتاح الفـرج قهـر الاصعـاب=والصمت في بعـض المواقـف صلابـه
منهـا تسكـر بـاب واشـي وطـلاب=وفيهـا تسجـل طـب راعـي غلابـه
كبرت وهانـت بمـر فكـاك الاكـراب=والنـطـق دون ادراك وش ينبـغـابـه
يـارد علـى جالـه مناحـي وجــذاب=ساحـة مـزاد ومكـرويـف الجـلابـه
انتاجهـا محصـول توتيـر الاعصـاب=وحقوقهـا تـنـزع بحـرفـة نهـابـه
والصبـر والادراك مـن رب الاربـاب=اللـي عطـانـي ماكفـانـي جـوابـه
يضيقه اللي يرتـدي ثـوب الاصحـاب=يرضى مشاكلتـي وانـا اسـف لمابـه
حيثه ضعيـف مـع رفيعيـن الاشنـاب=ماينـذكـر عـلـمـه ولا ينـبـدابـه
ضنـه يخالفـن وضنـي معـه خـاب=عليـه سـتـرك يامنـشـي سحـابـه
يرسل هجومه من تحت ستـر وحجـاب=والخافـي اظلـم بعـد شفـف حجـابـه
لوحال من دونه عـن الشـوف ظبظـاب=يبيـح صوتـه مـن ورى مـا اتقابـه
واضح دليلي حول مضمـون الاغـراب=شخصـيـة فيـهـا ونـهـج وشـابـه
مرفـوع يامفتـاح مقـفـل يــادولاب=مفهـوم ياموضوعـه الـلـي غـزابـه
يلقى نصيبه كانـه اخطـاه ون صـاب=علـى مـدار مثـل قــوس الربـابـه
في حجم مـا مشـاه محمـول بركـاب=ذاهـب وعايـد والوسيـلـه اركـابـه
مازيدهـا بالـوزن مـايـازن ثـقـاب=انهيـه واعيـده مـثـل مــا بـدابـه
كـل الـذي فـاده وكـل الـذي جـاب=مغـزاء جبـان صاحـبـه مـادرابـه
كم والخبـر نلقـاه مـن عـدة ابـواب=نـا طـاه مانكتـب علـيـه الاجـابـه
من شيمـه نرفـع بهـا روس ورقـاب=دام الحيـا مـاحـزن اهـلـه ذهـابـه
الطيـب لهلـه طيـب والاش لاطــاب=اخـر مطافـه عـض راس السبـابـه
ياعـارف المظمـون مانـي بهـيـاب=اهــاب شــان جــاوزه مايهـابـه
حيـث الحيـاه الـهـا قوانـيـن واداب=وستـاذي الاســلام واحــب ادابــه
صبري على صحـب زجـور وعيـاب=نامـوس يـدرى هيبـتـي والحـلابـه
وصدي عن اللي فطرتـه حقـد وعتـاب=يـدرى علـى نفسـي سلـوب المعابـه
وبعض النفوس الطـب فيهـا التجنـاب=واللـي حصـل ماصالـح لـي غدابـه
مافـاد فيـد ولاكسـب غيـر الاتعـاب=واللـي جهـل مضمـون سـره قرابـه
حتـى توحـد وجتمـع طـب الاطبـاب=عليـه بالـجـوده خـتـوم الطبـابـه
يحكم بعزلـة مـن بـه الحقـد شبـاب=طـوال عمـره شيبتـه مـع شبـابـه
ويرح مـن حولـه غيابـه الـى غـاب=وايضـى يريـح البـال فرقـى عتابـه
والله حسيبـي فـي خطـا كـل مغتـاب=ولله شانـه فــي جــزاه وعقـابـه
سميـت بسـم ملجـم الهـام والــداب=اللـي علـى الشيطـان يرسـل شهابـه
ياجاهل الدنيـا بهـا اغـراب واعجـاب=وياجاهـل الاصحـاب فيهـا انقـلابـه
صاحب صدوق وصحب يضحك بالانياب=وصاحب يبي غلطتـك قبـل الاصابـه
وصاحب ينسق لـك مواويـل نصـاب=كنـه علـى شانـك موضـف رقـابـه
اعلم ترى الاصحـاب محمـود وعتـاب=وعتـاب مـع محمـود يلبـس ثيـابـه
وعلم تـرى ثلثيـن الاصحـاب كـذاب=والدهـم مــن يتـصـف بالغـرابـه
يلعـب علـى كـل المعانـي تلـعـاب=مايبخصـه غـيـر العـقـول البـابـه
والا صديـق عاصـره مثـل الاقـراب=خبيـر ميـلاده وعـصـر انتسـابـه
درست شخصه عبـر تمييـز واللبـاب=متـوسـطٍ بالمـعـرفـه والكـتـابـه
ياغالـي الاصحـاب ياعـز الاحبـاب=الـداب لليـن لمـس والـسـم نـابـه
ابحث عن الاصحـاب اذا كنـت طـلاب=صحـبٍ تنومـس رفقتـه وصطحابـه
وعرف صديقـك قبـل تنقـد وتنعـاب=وتـزل عـن نهـج النبـي والصحابـه
إمـا حسبـت الكـل خطـوه تحـسـاب=مجبـور ماحولـك تـحـط احتسـابـه
وقتـك تمـر احداثـه الشيـخ والشـاب=علـى طريـق كـل حــي مشـابـه
من حاصـل الايـام راس الفتـا شـاب=وشكـى مـن ايامـه مشاكـي اتعـابـه
الصقر ماينـزل علـى ماكـر غـراب=رفـيـع منـزالـه ووكــر رقـابـه
له همة ترفـع ولـه ضـرب مخـلاب=ماهـي علـى يمنـى الحـدا والغـرابـه
وقـر مقامـك عـن مهابيـط الانشـاب=لوكـان مهمـا كـان حضـرة جنابـه
لاتامنـه لـو منطقـه مـن عسـل ذاب=ماعـاش قلبـه صـدق قــد الذبـابـه
ولارفقـتـه نـامـوس ولاتـكـسـاب=ولالك شـرف فـي ماقـف عنـد بابـه
قلبه سـواد الصـاج وهروجـه اعـذاب=بحـدث طــراز للـخـداع المـذابـه
شب الشبـاب ورشـه الشيـب ماتـاب=واغـرب مقالـه رايمـن طبـع سابـه
كـم هويعانـي كيـف يسلـك وينسـاب=والمنتبـه يكشـف خـلـول انسيـابـه
ارمه مثل رميـك لمرسـات الاسـلاب=لاترتـجـي فــجٍ تقـطـع سـرابـه
مقطع ضماء لاشجار لامنبـت اعشـاب=معروفـه الوحشـه وغــدر الذيـابـه
ولاسـمـوم حـرهـا يـلـهـب اللهاب=علـى غشـيـم ظــل درب سعـابـه
فيـده همـوم تلفـي ازفـال واسـراب=فـي ذنـب غيـره لابـسـه بالنيـابـه
هـاذي وصاتـي ياعزيزيـن الانسـاب=كـم جاهـلٍ فـي صاحبـه وقتـدابـه
حتـى وصـل بـاب يقفـل ورى بـاب=والا طلـيـب واصــلٍ بالـطـلابـه
الاصل غايب والجزاء حـق مـن نـاب=هـذاه محصولـه وهــاذي أسبـابـه
وصلاة ربي عـد مـا عجـت اطيـاب=في سـوق راع المسـك بـاع وشرابـه

عواض بن بريكان الشلوي

صح لسانك ياااااعوااااض جزله

من راااااس جزل لاهنت يالنشمي

وانت شاعر كبير شهادتي فيك مجروحه

لاتحرمنا من جديدك يالغالي نطالبك بالمزيد

صـــــــــــــــــــــح لسانك عواض...
الايام ذي الناس كلها تتلون يكسون بهرج ويصبحون براي ثاني ..
ماعاد تبخص الثمين ولا تعرفه ..
الكل اصبح مزيف يمشي باكثر من نيه ..ذهبوا من هم كالذهب لا تغيرهم المصائب ..
قصيده جزله .. وفتحت جروح كنت ناسيتها..
سلمت يابو بريكان ..

الشاعر/ عواض بن بريكان

تسلم والكلام الطيب ما أحد يمله

هذه قصيده جزله الله يبيض وجهك

صح لسانك وعلى شانك

تقبل تحياتي

		المشاركة الأصلية بواسطة : عبدالله الشدادي اقتباس
	صح لسانك ياااااعوااااض جزله من راااااس جزل لاهنت يالنشمي وانت شاعر كبير شهادتي فيك مجروحه لاتحرمنا من جديدك يالغالي نطالبك بالمزيد

مشكور أخوي عبدالله على مرورك الرائع وتواجدك المميز

صح بدنك ونتشرف بتعليقك

لاهنت طال عمرك

		المشاركة الأصلية بواسطة : المستحيلة اقتباس
	صـــــــــــــــــــــح لسانك عواض... الايام ذي الناس كلها تتلون يمسون بهرج ويصبحون براي ثاني .. ماعاد تبخص الثمين ولا تعرفه .. الكل اصبح مزيف يمشي باكثر من نيه ..ذهبوا من هم كالذهب لا تغيرهم المصائب .. قصيده جزله .. وفتحت جروح كنت ناسيتها.. سلمت يابو بريكان ..

مشكور اختي المستحيله على مرورك وتعليقك الرائع

وصح بدنك

		المشاركة الأصلية بواسطة : خالد الحارثي اقتباس
	الشاعر/ عواض بن بريكان تسلم والكلام الطيب ما أحد يمله هذه قصيده جزله الله يبيض وجهك صح لسانك وعلى شانك تقبل تحياتي

حياك الله أخوي الشاعر والأستاذ خالد الحارثي

أشكرك على مرورك وتعليقك الرائع

كل حرف خط قلمك يشرفني واتشرف ان احمله وسام شرف على صدري

صح بدنك ومن قال وجهه ابيض

لاهنت طال عمرك

صراحة كل ماقريت بيت لقيت الي بعدة احسن منه حيرتني
صحيح ان من الكلام لسحرا بارك الله فيك

اخووي عوااض صح لسانك على القصيده الجميله والرائعه فعلا
كل الشكر لك على قصيدتك الجميله جدا
ننتظر المزيد اخوي عواض
يعطيك العافيه .

اخووي عوااض صح لسانك على القصيده الجميله