..:.. مرحباً بك في شبكة الشدادين الرسمية ، ضيفنا الكريم يسعدنا دعوتك للانضمام والمشاركة معنا .. اضغط هنا لتسجيل عضوية جديدة ..:..


العودة   شبكة الشدادين > المنتديات الخاصة > فرسان الشدادين وأبطالهم
  [ 1 ]
قديم 22 Jul 2005, 05:59 AM
شاعر

ابن مهرس غير متصل

مـجـمـوع الأوسـمـة : 1
عضو مخلص


تاريخ التسجيل : Apr 2005
رقم العضوية : 173
الإقامة : saudi arabia
الهواية :
المشاركات : 1,149
معدل التقييم : 25
الملف الشخصي للكاتب
إضافة تقييم
الرد على الموضوع
ارسال الموضوع لصديق
طباعه الموضوع
تبليغ عن الموضوع
أمراء قبيلة الشدادين (( المهارسة ))



بسم الله الرحمن الرحيم

السلام عليكم ورحمة الله وبركاته..

** المهارسه هم أمراء قبيلة الشدادين من بني الحارث..

وتعتبر أمارة المهارسه من أقدم وأقوى الأمارات في قبيلة ابن الحارث ومن أبرز أمارات القبائل العربية على مستوى الجزيرة وبرز منهم أمراء وفرسان كثر عرفوا بشجاعتهم وفروسيتهم الفذة وكانوا مضرب المثل في الشجاعة والإقدام..

ولكن هنا نتطرق إلى تأسيس بيت الأمارة وتسلسل أول من عقد وآخر من عقد في بيت ابن مهرس وبعض القصص المختصره لكل أمير..

والد المهارسه هو مهرس بن فواز بن قطيم بن ملفي بن مفلح الشدادي

وأنجب من الأبناء ثلاثة هم: باتل بن مهرس - سحمان بن مهرس - مسيّب بن مهرس


أولاً: تأسيس الأمارة (( النقيعه))

أول من أسس أمارة المهارسه هو باتل بن مهرس وأخويه سحمان ومسّيب حيث أختاروه ربعه لأنه تتوفر فيه جميع الخصال المؤهله للأمارة والمشيخه وقالوا ربعه : يا باتل حط شدادك أنت وأخوانك وحنا معك, ولابد من باتل ان يحط شداده ويحتميه ويأكل النقيعه..

والنقيعه هي أن يوعّد بالغزو ويغزون ربعه تحت رايته وعند الكسب من الأعداء يبات في ديار العدو يوم وليله ويذبح من خيار الكسب ويتعشى منها وهذه الوجبة تسمى النقيعه عند قبائل العرب ويحتمي الكسب من أهله..

وفعلاً فعل الأمير باتل بن مهرس متطلبات الأمارة وأصبح أمير للقبيلة والمهتم بشؤونها هو ومن بعده من نسل مهرس..


ثانياً: الأمارة وتسلسل الأمراء

1- الأمير باتل بن مهرس مؤسس الأمارة وأخويه سحمان ومسيّب كان لهم شأن عظيم بين جماعتهم حيث يقول الشاعر ولم أعثر إلا على بيت واحد والقصيدة قديمة قيلت على مطلع سنة 1200هجري

لا تاخذ ألا مثل باتل وسحمان = وألا سعيد اللي شبا السيف يرويه

ويقول فيهم الشاعر الحربي عندما أكرموه:

يا اهل الركاب اللي تعاجوا من الظماء = في لاهب الجوزاء وغادي ٍ دليلها
أنا لقيت الطيب في نزل (( باتل)) = و((سحمان)) و((مسيّب)) مزابن دخيلها
قوم ٍ على الجودات فزعة وجزعة = ودون العشاير ما تطاوع قبيلها

2-الأمير الفارس فاهد بن باتل بن مهرس والملقب(( شوكان)) كان رحمه الله صاحب هيبة وقوة وقد قتل في إحدى المعارك ضد قبيلة البيضان من قبيلة حرب وقالت إحدى شاعرات الشدادين فيه:

وا أميرنا محتمي القطعان = مروي مزاريق الرماح
السود مني على الجذعان = ما ريّعوا له يوم طاح
خيالة ٍ يجتلهم خيّال = أدعوا عساهم بالبياح

3 - الأمير الفارس مبارك بن باتل بن مهرس المشهور بـ(( أبو سعد)) والملقب (( غبقان مطوّي السقيان)) وكذلك (( غيمان)) وكان يلقب كذلك بـ(( مجوّز العزّب)) صاحب السيرة التاريخية والمواقف البطولية رحمه الله ومن مواقفه عندما إستنجدت به الشاعرة الدوسرية لرد حلالها بقصيدة تقول فيها:

من يركب المامون وينحره عن = ويلفي لابن مهرس زبون الونيه
اللي يرحب بالنضاء يوم يلفن = أبو سعد يا حامي الدوبليه
تلقى الشحم عنده مع الهيل والبن = وله دلة ٍ للنار دايم صليه
وان ثار عج الخيل في معتلجهن = صفراه يوردها حياض المنيه
ويضرب بحد السيف يوم ايتلاقن = وياما ثنى من دون راع الرديه
يا أبو سعد تكفى دموعي يهلن = وأرب ألاقي عندكم مفزعيه
وا حمس حالي يالشلي حمسة البن = ماهوب حزن مهاوي ٍ في هويه

إلى أن قالت:

قطعاننا خيل السبيعي بها أقفن = تكفون ردوا حبيّباتي عليه

وفعلاً أستطاع الأمير مبارك بن مهرس رد الحلال لأهله وإضافة 100 رأس من الضان عليه.

وتنسب له هذه الأحديه بعد إرجاع حلال الدوسرية, ولم يعرف عنه رحمه الله قول الشعر:

يا سابقي يوم الزحوم = نرخي لها حبل الرسن
وعمارنا للي يسوم = وقت الحرايب والفتن
ينخانا المجمول ونقوم = ونرد حلوات اللبن
عاداتنا نقضي اللزوم = في شامها وألا اليمن

وهو صاحب المقولة المشهورة: (( أهلنا وراهم والدرب ياطاهم )) وذلك عندما أتى بالغنائم من قبيلة العجمان وكان فرسان سبيع في العرق بإنتظار الأمير مبارك بن مهرس لكي يأخذوا غنائمه وعندما عرف الأمير مبارك بما ينويه فرسان سبيع قال: أهلنا وراهم والدرب ياطاهم.. وحصلت معركة بين الطرفين وأستطاع الأمير مبارك الحفاظ على كسبه من الأعداء وقال أحد قومه:

يا ويل اللي ماهوب منا= واللي منا يضحك نابه
شيخنا زبن المجنا = واهني اللي مشى به

ويقول الشيخ مقبول بن هريس الشلوي مخاطباً الأمير مبارك بن مهرس عندما نفذت القهوة من عند الشيخ مقبول مستحثاً إياه على الغزو للكسب والمغنم:

يا أبو سعد سج الركايب يسيرن = وأليا غدا شي ٍ على الله بداله
نركب على هجن ٍ للأبعاد يدنن = أكوارها تصرخ صريخ المحاله
حريبنا لو هو بعيد ٍ شكاهن = في المال وألا في شفايا رجاله
فاتن ثلاث ليال والنجر ما دن = البن باح ولا بقى ألا دلاله

إلى آخر القصيدة المعروفة..

ويقول فيه الشيخ سعد بن قطنان السبيعي بعد جواره مع الأمير مبارك بن مهرس وربعه:

وا جاري اللي كل يوم ٍ جديدي = ولا كثر حسوفه على فايت ٍ فات
راعي دلال ٍ ما شغلها الزهيدي = ونجره لأهل عوص النضاء يرمي الأصوات
أبو سعد حامي عقاب البليدي = زبن القحوم الجاذيه في المثارات
خيال شول ٍ ما يكفكف رديدي = وأليا أعتزى من دونها راحوا أشتات
يا ربعنا شوف الشدادين عيدي = وظعونهم لا أقفت يجي القلب حسّات

وتقول فيه الشاعرة هيا الشدادية في معركة سوقان مع قبيلة الشيابين:

أميرنا (( مبارك )) عمى كل ديّان = اللي لعدوانه يجر الجريره
من فعلنا راحوا الشيابين قطعان = وشاعت فعايلنا بكل الجزيره
الخيل أخذناها وهجن ٍ بالارسان = وجبنا بنادق ساحقين الذخيره
والبل أخذناها ولا فيه جحدان = ومن مات وافق كل شره وخيره

إلى آخر القصيدة..

ويقول فيه الشاعر رفيع بن هريس الشدادي في معركة البهاره:
(( أبو سعد)) يبري كما يبري الذيب = شيخ ٍ ليا وعّد يباريه لابه
صبيان قومي مثل سيل المناحيب = ومن يعترض في نحر سيله غدابه

ومن القصائد التي قيلت في الأمير مبارك بن مهرس قصيدة للفارس رفيع بن هريس الشدادي عندما كان رفيع بن هريس في الأفلاج وأرسل هذه القصيدة للأمير مبارك:

يا راكب اللي كنهن شرد الصيد = هجن ٍ هجاهيج ٍ ليا روّحنا
حراير ٍ بوسوط أهلهن عباريد = عليهن اللي يوصل العلم منا
تسرح من الأفلاج قطاعة البيد = والعصر عند شيوخنا بركنا
عند الأمير اللي لعوص النضاء عيد = عيد الركاب الوانيه لا لفنا
أبو سعد يوم السبايا عراجيد = مرك ٍ على العدوان رمح المطنا
زيزوم ربع ٍ للحرايب مواريد = حرّابهم في مرقده ما تهنا
قله ترانا بخير مامن تضاهيد = على النقاء نمشي ويمشي ضعنا

إلى آخر القصيدة المشهورة

وله الكثير من القصص المسجلة في تاريخ الجزيرة العربية وقيل فيه الكثير من القصائد ولكن نكتفي بهذا القدر من التعريف..


4- الأمير الفارس عجير بن مفلح بن سحمان بن مهرس ذائع الصيت(( ابو عذا)) وراعي حشرا هنا يطول الحديث والمجد الذي لا يموت..

ومن قصص الأمير عجير بن مهرس عندما أشتهرة بندقيته ( حشرا) يقول الفارس دليم الطر المرشدي من الروقة من عتيبه يحذر ربعه من الأمير عجير بن مهرس وبندقه:

يا اهل النضا سيروا عسى فالكم خير = لين اني اخذ مزة ٍ واتعميره
وان كانكم يم الشلاوى مغايير = تحسبوا للبر شره وخيره
اخاف من حشرا مع الصبح وعجير = هاذيك مذبوحه وهذي عثيره
وان كان عارضكم صبي المخاسير = والله لتضيق ابكم فجوج الجزيره

ومن القصص عندما كان الأمير عجير وربعه الشدادين وذوي حطاب في المقطان على العد وحسن جوارهم لجارتهم نوير الروقيه وعند رحيل الأمير عجير بن مهرس وربعه تقول الشاعر نوير العتيبيه:

أمسى الوطا كنه خلي ٍ من الناس = غير القطين وعد ورد القليبي
يا زينهم فوق المعاميل جلاس = الاد شداد ٍ والاد الحطيبي
ربع ٍ تحط الذيل مع فلغة الراس = ويقلطون الرز ويا الحليبي
شدوا يبون ( عجير) قطاع الأرماس = وياما خذوا قطعان بدو ٍ عزيبي

إلى آخر القصيدة المعروفه..

وقصائد النخوة/ هنا قصيدتين الأولى لشاعرة عتيبيه تنخى الأمير عجير بن مهرس لقتل زوجها وتخليصها منه تقول:

تكفى يابن مهرس معشي الذيابه = تراه يجيك مع المقيطع لزومي
ماريته هرش ٍ خبيث ٍ زهابه = والملح في كم الخميل امحزومي
أظن منكم فزعة ٍ يا شبابه = ارموه كود الله يقدي السهومي

وتمكن الأمير عجير بن مهرس من تخليصها...

والقصيدة الثانيه لشاعرة مطيريه عندما سمعة عن قصة الأمير عجير بن مهرس والعتيبيه وتخليصها من زوجها تنخى الأمير عجير بن مهرس لقتل ابن عمها ومن الأبيات تقول:

يامن يوصل لي كلامي لملفاه = لعجير بن مهرس بعيد الهقاوي
تكفى يابن مهرس زبون المخلاه = ابيك تفزع يا زبون الجلاوي

وإلى آخر القصيدة المعروفه..

ومن مغازي الأمير عجير بن مهرس على سبيع عندما غنم منهم يتمثل الفارس ناصر بن داغان يقول:

جاهم صباح عجير والطير ما طار = اخذ العشاير والحلايل دمرها

وفي كرم الأمير عجير بن مهرس يقول الفارس ضيف الله الكعاري العطاوي العتيبي:

لااوقع نصيت عجير ماني بغادي = بيت ٍ كبير ومجلس ٍ فيه الأوقار
بأطرافهم تسمع لصوت المنادي = ويكثرّون الزاد لو ماش خطّار
خيّال صفراً يوم تعطي السنادي = لا رفعن لأقطيّهن والملح ثار

ويقول الفارس شليويح بن ماعز العطاوي العتيبي مرسلها للأمير عجير بن مهرس:

يا عجير بن مهرس نبا الخيل تنصاك = أما هجاد الليل وألا صباحي
نبغا ربوعك حالف ٍ ما اتعداك = بمصقلات سيوفنا والرماحي
تضحك لنا لكن بانت خفاياك = وسقوى ليا جينا وصاح الصياحي
وبرز شليويح العطاوي وناداك = حتى تتوب عن المجي والمراحي

ورد عليه الفارس عبدالله بن عبود الصلاخي الحارثي بقصيدة منها:

ياللي تمنى واحد ٍ ما تمناك = ما أنته معين من هجاده صلاحي
يا مرحبا وأن جيت بالعين شفناك = وياما شربنا من هماج وقراحي

إلى آخر القصيدة المعروفه

وقصص الأمير عجير بن مهرس كثيرة ونكتفي بهذا..

5- الأمير الفارس عايض بن مفلح بن سحمان بن مهرس (( اخو صالحه)) ومن قصص الأمير عايض بن مهرس
عندما غزى ومعه بقمي صوب البقمي وطاح من فرسه وكانوا الأعدى قريبين منه للإجهاز عليه فهب الأمير عايض بن مهرس لإنقاذه مما فيه وهو يعتزي( اخو صالحه) وفعلاً أستطاع إنقاذه من مأزقه..

وبعد فترة نزل الأمير عايض بن مهرس لسوق رمدان في تربة ونادى المنادي يقول بيض الله وجهك ياعايض بن مهرس افتكيت فلان بن فلان من البقوم لا يذبحونه القوم..

ومن القصائد التي قيلت في الأمير عايض بن مهرس قصيدة مطلق بن معيوف الروم الشدادي:

ملفاه (( عايض)) والعيال المشاكيل = بالغاط والزلفي مباني شراعه
يلفالهم لفي الظوامي على البير = في حلةٍ مبنية ٍ للجماعه
رجّالهم ماهوب يحسب التخاسير = في حلته دايم يحط البراعه

إلى آخر القصيدة..

ومن حكمة الأمير عايض بن مهرس في الاشوار وحسن الرائ السديد في معركة صباح الحزم وشوره الموفق يقول الفارس ناصر بن داغان:

يا ظفرعايض يوم عمسن الابصار= اللي يرد شيوخها مع جبرها
يرجع له المركي ويرجع له الشار= ويرجع الشيخان صنعة جبرها
يازين عزله بين خلفات وبكار = هذا يطالعها وهذا بحرها

ويقول أحد شعراء البقوم في الأمير عايض بن مهرس بعد أن أخذ الأمير عايض بكرته:

وابكرتي يا زينها بأول الذود = طويلة النسنوس عفراً جليله
غدوبها من عقب طارد ومطرود = عايض وربعه محتمين الدبيله

وللأمير عايض بن مهرس القصص الكثيرة ولو تطرقنا لها لطال المقام وجفت الاقلام..

6- الأمير الفارس زياد بن فاهد بن باتل بن مهرس (( اخو طرافه)) له من القصص الكثير وخاصة مع قبيلة البقوم الذي يقول البقمي في اخوه مزيد بن فاهد:

يا مزيد يا شيخ الشلاوى = لا تحسبّنا هايبين
ان جيتنا ذقت المراره = والله لتجر الونين

فرد عليه أحد شعراء ابن الحارث:

ياللي تبا حرب الشلاوى = حنا عماكم من سنين
حريبنا يشكي الخساره = ومن فعلنا القاسي يلين

والأمير زياد والد المرحوم الشيخ فواز بن زياد الذي يقول في رثائه الشاعر عبدالله بن حديّد الشدادي رحمه الله:

اجروح قلبي قامت اليوم تزداد = وكل مابرت جتها جروح ٍ جديده
ياكبدي اللي عافت الشرب والزاد = قامت تداهمها هموم ٍ عديده
مرحوم يا شيخ ٍ من الاد شداد = لا والله اللي راح منا فقيده
يعوضنا فيك الصبر يابن زياد = وتعوضك الجنة هو اللي تريده

وإلى آخر القصيدة..

وعرف عن الأمير زياد بن مهرس الحلم والعقل الراجح وحسن الخلق ونكتفي بهذا...

7- الأمير الفارس شرار بن سعد بن مبارك بن باتل بن مهرس الملقب(( اخو فاحا )) و(( خيّال البواضا )) وكان من أشرس الفرسان وأعنفهم في ميدان القتال وهو قائد قبيلة الشدادين في عصر توحيد المملكة العربية السعودية الثالثة, وإذا أردنا التحدث عنه فنحن نعيش جو الفروسية وميادين القتال بين صهيل الخيل وأصوات البنادق..

ومن المعروف عنه أنه هو من أستطاع قتل الفارس سعد العطيّب في معركة الخرمة والذي يقول فيها الشاعر الشلوي:

وأما العطيّب في نهار الزحومي = ارداه (( اخو فاحا )) نهار اللقاء الشين
علاه طير الجو ظلاّ يحومي = وعلاه ترفات الصبايا محازين

ومن القصائد التي قيلت في الأمير شرار بن مهرس عندما أستلم الأمارة يقول الفارس ضفيدع بن جرار الشدادي:

وان سايلك عنا ترانا قبايل= في راي(( اخو فاحا )) بعيد المناطيس
يفرح بنا نشر ٍ على القفر مايل = بمسلبات ٍ كنهن المحاسيس
كم واحد ٍ نرميه للذيب مايل = ياكل وسوره للنسور المراويس

إلى آخر القصيدة المعروفة..

ومن مواقفه عندما كان كثير الإغارة على قبيلة البقوم قالت أحد نساء البقوم مستأه من الوضع وكان على مسمع من ولدها الذي كان شاباً وتقول:

ذيب ٍ عوا لديارنا = وديار حيّانه وراه
أن ما احتمانا دارنا = وش عاد نبغا بالحياه

فقال ولدها أنا ذبّاح شرار بن مهرس فنصحته أمه بعدم التهوّر فلحق بقوم الأمير شرار بن مهرس ووقع البقمي في الأسر فسأله الأمير شرار بن مهرس ما الذي دفعه على ذلك فأخبره البقمي بما قالته أمه فعفى عنه الأمير شرار بن مهرس وقال ردوا له أباعره..

ويقول الفارس دابان بن حمد الشدادي في الأمير شرار بن مهرس في أحداث التوحيد:

تغيب عين الشمس وإنا ما نغيب = والطير ابا الجنحان نرهي له عشاه
في راي ابن مهرس معشي كل ذيب = يامن به الخايف ويمشي في ذراه
ما غاب عنا غير من عاف النصيب = ذل ٍ من الهجره تغره بالحياه

وفي كرم الأمير شرار بن مهرس وشجاعته يقول الشاعر غانم بن مسعود من آهالي نجد متمنياً أنه لو ينصى الأمير شرار لكي يكرمه ويقوم بواجبه:

وألا هداني الله على شيخ الأظعان = شرار ريف اللي من الضيم لاجي
مقدم بني شداد حزات الاكوان = ويثني ليا ثار الدخن والعجاجي

ومما قيل في مدح الأمير شرار بن مهرس يقول الشاعر سعد بن بعيصيص الشدادي من قصيدة طويلة:

ملفاك أمير ٍ محله في الوطا باني = ولد سعد محتمي الشردان في الهيّه
لاجاه ضيفه ذبح له حايل الضاني = ويخلّط الكيف من هيل ٍ وبريه

وفي إحدى غزوات الأمير شرار بن مهرس والتي غنم فيها يقول الفارس ضفيدع بن جرار الشدادي مادحاً الأمير شرار:

شرار حمّاي الركاب = أميرنا سقم الحريب
أليا رمى عطب الصواب = يفرق صحيب ٍ عن صحيب

وكان الأمير شرار بن مهرس مشهوراً بكثرت غزواته وهذا الأبيات لأحد فرسان عتيبه أسمه الأشرم الشيباني قالها متمنياً لقاء الأمير شرار بن مهرس وقومه الشدادين:

يا سابقي قدرك رفيع = وأعديلك بدّر البكار
ولو زودوا لي ما نبيع = ماني بضاري بالثبار
ابغى ليا طاح المنيع = ألحق بها سربة شرار


وللأمير شرار بن مهرس من القصص الكثير ولكن نكتفي بهذا القدر..

وهذا هو تسلسل العقداء على القبيلة وسارت القبيلة تحت أمارتهم من بداية باتل بن مهرس إلى شرار بن مهرس, وقد غزت قبائل بني الحارث تحت بارق ابن مهرس السبع هؤلاء قبل الحكم السعودي...

وفي عصر الحكم السعودي لابد لكل قبيلة أن يكون لها ختم مصدق من الجهات الحكوميه وشيخ مهتم بشؤون القبيلة وأول ختم لقبيلة بني الحارث عموم كان مع
الأمير محماس بن عجير بن مفلح بن سحمان بن مهرس وأستمر معه حتى توفاه الله..
والآن الختم مع الأمير علي بن محماس بن مهرس حفظه الله ورعاه

وأعذرونا على الإطاله والإختصار في القصص والقصائد ولو كتبنا لطال المقام وجفت الاقلام..


التعديل الأخير تم بواسطة ابن مهرس ; 08 Dec 2013 الساعة 04:40 AM

رد مع اقتباس
قديم 22 Jul 2005, 02:33 PM [ 2 ]


تاريخ التسجيل : Jan 2005
رقم العضوية : 5
مواضيع : 127
الردود : 1509
مجموع المشاركات : 1,636
معدل التقييم : 25الوافي is on a distinguished road

الوافي غير متصل




تسلم يابوزايد على موضوعك الرائع

يعطيك العافية وعساك على القوة


توقيع : الوافي
دعواتكم لصاحب هذه العضوية
بالرحمة والمغفرة والدرجة العالية من الجنة
الأعلى رد مع اقتباس
قديم 22 Jul 2005, 03:15 PM [ 3 ]
شاعر

تاريخ التسجيل : Apr 2005
رقم العضوية : 173
الإقامة : saudi arabia
مواضيع : 161
الردود : 988
مجموع المشاركات : 1,149
معدل التقييم : 25ابن مهرس is on a distinguished road

ابن مهرس غير متصل


مـجـمـوع الأوسـمـة : 1
عضو مخلص




ياهلا يابن العم ولا يرفع الراس الا متونه وأنتم متونه يالاد شداد ومشكور على مرورك يالغالي

الأعلى رد مع اقتباس
قديم 22 Jul 2005, 04:44 PM [ 4 ]
عضو متميز


تاريخ التسجيل : Feb 2005
رقم العضوية : 10
الإقامة : saudi arabia
مواضيع : 209
الردود : 5324
مجموع المشاركات : 5,533
معدل التقييم : 25الشدادي is on a distinguished road

الشدادي غير متصل




مشكور أخوي ابن مهرس على هذا الموضوع الجميل
وهو بلاشك موضوع يستفيد منه كل شخص من أجيال هذه القبيلة العريقة السابقين منهم والقادمين بأذن الله تعالى ومشكور على هذا الجهد الرائع والملحوظ منك يا أبن مهرس
تحياتي لك
الشدادي


الأعلى رد مع اقتباس
قديم 22 Jul 2005, 04:51 PM [ 5 ]
شاعر

تاريخ التسجيل : Apr 2005
رقم العضوية : 173
الإقامة : saudi arabia
مواضيع : 161
الردود : 988
مجموع المشاركات : 1,149
معدل التقييم : 25ابن مهرس is on a distinguished road

ابن مهرس غير متصل


مـجـمـوع الأوسـمـة : 1
عضو مخلص




يا مرحبا يالشدادي منور الموضوع يابن العم ومرورك يشرفني يالغالي مشكور

الأعلى رد مع اقتباس
قديم 22 Jul 2005, 05:22 PM [ 6 ]


تاريخ التسجيل : Jun 2005
رقم العضوية : 259
مواضيع : 110
الردود : 675
مجموع المشاركات : 785
معدل التقييم : 25الضيغمي is on a distinguished road

الضيغمي غير متصل


الله يعافيـــــــــــــك


الله يعافيك على كل ماقلت الأمراء معروفين ونسلهم معروف ومشكور ياأبن مهرس .


توقيع : الضيغمي



CONNECTION

41986
الأعلى رد مع اقتباس
قديم 22 Jul 2005, 06:21 PM [ 7 ]
نائب المشرف العام


تاريخ التسجيل : Mar 2005
رقم العضوية : 106
الإقامة : saudi arabia
مواضيع : 478
الردود : 33251
مجموع المشاركات : 33,729
معدل التقييم : 25عبدالله الشدادي is on a distinguished road

عبدالله الشدادي غير متصل




مشكور اخوي ابن مهرس

وبيض الله وجهك يالامير

ماقصرت على الموضوع

الرائع واحترامي لشخصك الكريم


توقيع : عبدالله الشدادي
الأعلى رد مع اقتباس
قديم 23 Jul 2005, 03:22 AM [ 8 ]
عضوة متميزة

تاريخ التسجيل : Mar 2005
رقم العضوية : 115
الإقامة : saudi arabia
مواضيع : 398
الردود : 5378
مجموع المشاركات : 5,776
معدل التقييم : 25نــــــدى is on a distinguished road

نــــــدى غير متصل





ونعم فيهم والله


توقيع : نــــــدى
الأعلى رد مع اقتباس
قديم 23 Jul 2005, 05:10 PM [ 9 ]
شاعر

تاريخ التسجيل : Apr 2005
رقم العضوية : 173
الإقامة : saudi arabia
مواضيع : 161
الردود : 988
مجموع المشاركات : 1,149
معدل التقييم : 25ابن مهرس is on a distinguished road

ابن مهرس غير متصل


مـجـمـوع الأوسـمـة : 1
عضو مخلص




ياهلا يالضيغمي مشكور على مرورك يابن العم

الأعلى رد مع اقتباس
قديم 23 Jul 2005, 05:12 PM [ 10 ]
شاعر

تاريخ التسجيل : Apr 2005
رقم العضوية : 173
الإقامة : saudi arabia
مواضيع : 161
الردود : 988
مجموع المشاركات : 1,149
معدل التقييم : 25ابن مهرس is on a distinguished road

ابن مهرس غير متصل


مـجـمـوع الأوسـمـة : 1
عضو مخلص




يا مرحبا يا عبدالله منور الموضوع الله يعطيك العافيه ومشكور على مرورك يابن العم

الأعلى رد مع اقتباس
إضافة رد
الذين يشاهدون محتوى الموضوع الآن : 1 ( الأعضاء 0 والزوار 1)
 
المواضيع المتشابهه
الموضوع كاتب الموضوع المنتدى مشاركات آخر مشاركة
أمير قبيلة الشدادين البرنس شخصيات وأعلام 102 14 Apr 2012 04:38 AM
حديقة منتدى قبيلة الشدادين أماني القسم العام 6 12 Apr 2010 07:45 PM
أمراء قبيلة حرب حرب حرابة الدول القبائل العربية 6 04 Dec 2008 04:43 PM
إلى قبيلة الشدادين مهم جداً الهقاوي أخبار الشدادين 21 10 Jul 2008 02:18 PM
أدوات الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

09:40 AM
Powered by vBulletin® developed by Tar3q.com