الرجم

امس العصر في عالي الرجـم عديت=ـوقمت اتذكـر فالزمـن واصطفاقـه
ياكثـر ماصاحبـت والله وخـاويـت=تبرى الجـروح الاجـروح الصداقـه
وهليت دمعـي ياعـرب ثـم غنيت=صوتـآ يفجـر فالشراييـن طـاقـه
اقـــــــــول .....................=..............................
عز الله اني من غثـا الناس مليـت=وملـت عيونـي كـل عقـاب ساقـه
اللـي علـي تلحـم البيت فالبيـت=ومشهابهـا يلحـق عليـه لحـاقـه
ياكثـر مـا كابـدت نفسـي وكنيـت=ابغـى الرفاقـه ماحصلـي رفـاقـه
امحاربتنـي رحـت ولا بعـد جيـت=كنـي عـدو الهـم وراع انشقـاقـه
علـى طريقـي كلبوهـم عفـاريـت=وعلـى طريـق الغيـر وردآ وباقـه
تشمتني ان شافت عيون الشواميـت=ومتنـي لازاد الحمـل عـزم وطاقـه
تحـارب الطيـب بصبـره وحلتيـت=ولا الـردي تتعـب تـدور عنـاقـه
جنوبهـم يمـي جـبـالآ جرانيت=وعلى ضعيف الـراي دايـم ارقاقـه
يامـا رأت عينـي ويامـا توحـيـت=والصبـر سجلتـه معـي فالبطـاقـه
بغيـت فيهـم ميـر ياعالـم ازريـت=سمـآ يغـث الجـوف حلـوآ مذاقـه
همآ مرافقني لن اصبحـت وامسيـت=بينـه وبيـن الـروح مثـل العلاقـه
ان جبتها في الصح قالو لي اخطيـت=لـو انهـا للبيـت تشبـه رواقــه
وان جابها غيـري يقولـون حييـت=لـو انهـا عوجـا عليهـا الاعاقـه
واليوم بـان العلـم ياطيـب الصيـت=مالـك وراى طـرد المقفـي شفاقـه
ان جاء هلابه وكـان قفـى ماناديـت=مـادام معجبتـه ذراعــه وسـاقـه
ماهو خشيرآ في صلاتـي لا صليـت=مادامـت علومـه علـيـه دقـاقـه
وانا مانـي خبـلآ يحـب الختاخيـت=ولا ارخيت راسي تحت موس الحلاقه
وصيت قبل افطم عن الديـد وصيـت=قـدام رجلـي تـعـرف الانطـلاقـه
من ظمنهـا لاجـاك خبـلآ مفيليـت=يقول انـا طـب الصـدور الضياقـه
قلـه صدقـت وجمـده لا تنحـيـت=خلـه يقـول انـا بوقـت الحمـاقـه
خله يولي لـه مـع النـاس توقيـت=وهو مايسـوى واحـده مـن نياقـه

الشاعر/محمد سعيد الحارثي(محيسن)

صح لساااانك ملايييين يامحمد

وبيض الله وجهك

والله يحييك منور المنتدى بحضورك

تحياتي

صح لسانك

وبيض الله وجهك يامحمد قصيده جزله

بس ليتك كملت الفراغات اللي فيها نقاط

بس هذا من باب الفضول وإلا روعة القصيده لم تذهب من النقاط

أشكرك على ماقدمت وإن شاء الله نشوف إبداعاتك وقصائدك هنا في منتدانا

محمد



إبداع إبداع إلى مالا نهاية


صح لسانك وبيض الله وجهك


ولا تبخل علينا بجديدك



تقديري لك

		المشاركة الأصلية بواسطة : الغربي اقتباس
	صح لساااانك ملايييين يامحمد وبيض الله وجهك والله يحييك منور المنتدى بحضورك تحياتي

صح بدنك ياالغربي
ووجهك ابيض
والله يعافيك ويطول مهاليك
والمنتدى منور بمثلك وشرواك

صح لسانك يامحيسن وقصايدك

مميزة وانت من المبدعين الي بينورون اقسام الشعر بكل جزل وطيب

تحياتي

عزالله اني من غثا الناس مليت
وملت عيوني كل عقاب ساقه
اللى عليه تلحم البيت فالبيت
ومشهابها يلحق عليه لحاقه
الله واكبر يامحيسن لله درك ودر كل شاعر يكتب بهالقوه وبهالجزاله قصيده على اقل تقدير من افضل خمس قصايد قراتها في المنتدي ويعلم الله اني قراتها اكثر من عشر مرات وفي كل مره استمتعت اكثر واكثر لانها من القصايد اللى مايملها قاريها ابدعت وابدعت وابدعت ......وصح لسانك مليارات ولاعاد تبطي علينا يالجزل
المنتدي بحاجه لامثالك من الشعرا العمالقه
تقبل تحياتي,,,,,,,

		المشاركة الأصلية بواسطة : فهد بن رزيق اقتباس
	عزالله اني من غثا الناس مليت وملت عيوني كل عقاب ساقه اللى عليه تلحم البيت فالبيت ومشهابها يلحق عليه لحاقه الله واكبر يامحيسن لله درك ودر كل شاعر يكتب بهالقوه وبهالجزاله قصيده على اقل تقدير من افضل خمس قصايد قراتها في المنتدي ويعلم الله اني قراتها اكثر من عشر مرات وفي كل مره استمتعت اكثر واكثر لانها من القصايد اللى مايملها قاريها ابدعت وابدعت وابدعت ......وصح لسانك مليارات ولاعاد تبطي علينا يالجزل المنتدي بحاجه لامثالك من الشعرا العمالقه تقبل تحياتي,,,,,,,

حياك الله يابو رزيق ومرورك وشهادتك يعلم الله
مانزيدني الا فخر ودافع للامام خصوصآ ليا كانت الشهاده من شاعر
مثلك اسعدني مرورك بحق ياشاعرنا وشهدتك عقد ازين به القصيدة
والله يحفظك لنا وللمنتدى

واليوم بـان العلـم ياطيـب الصيـت=مالـك وراى طـرد المقفـي شفاقـه
ان جاء هلابه وكـان قفـى ماناديـت=مـادام معجبتـه ذراعــه وسـاقـه
ماهو خشيرآ في صلاتـي لا صليـت=مادامـت علومـه علـيـه دقـاقـه

محيسن
جزلة من راس ما يجيب الا الجزل
قصيدة فيها احساس بالوحدة وطول نفس شاعر
لايتقنها الا المبدعين
والله يعين على كثير من العينات الذي ذكرت
سجل اعجابي بما يخط قلملك دمت كما تحب

ان جبتها في الصح قالو لي اخطيت لــــــو انـــهـــا لـلـبــيــت تــشــبــه رواقــــــه

وان جـابـهـا غـيــري يـقـولــون حـيـيــت لــــو انــهــا عــوجـــا عـلـيـهــا الاعــاقـــه