الطائف

الاحبة بشبكة الشدادين،
سلام الله يغشى طهر ارواحكم النقيه.
عذر الغياب يسبق حروفي المتواضعه .

أنا وانت يالطائف نحب السماء والغيم=وأحس السماء في باحتك تنطق ابحاجه
وانا كل ماجيتك اسج القدم واهيم=واخايل جبالك عن محبتك هراجه
اجيك الحزين اللي ملا راحتينه ضيم=عطاك الهموم وفي يدينك لقى ابهاجه
فناجيل عشبك لا تقهوت دِلال الديم=تبختر شفاك وللهدا يضحك احجاجه
تبسام صبحك لاتهادى بوسط القيم=تبكي مساك وتجبره يطفي اسراجه
يود القمر يبقى معك للمساء ويقيم=وشعشاع صبحك يطلبه يكفي إحراجه
تسولف ورودك عن هواك وحكايا التيم=وانا اشوفها للبوح ماهي بمحتاجه
تقول ان وردك لا تنفس يغيض خريم=والا مثل وردك مع عذاك وتوهاجه
سحايب ضبابك لا عثت بالسماء تعتيم=مثل ليل عاشق فيه الافكار ولاجه
عن اسرار حبي لك يموت ابشفاهي جيم=والا يشبهك غير انت مايشبهك حاجه

الله الله
يا هاني الزنيد
وعودة بعد طول الغياب
لا يسعنا بعدها إلا أن نرحب بك أجمل ترحيب
ونهلي بمقدمك من جديد
سائلين الله أن يجعل في حضورك كل خير وسداد
وأهلاً بك في منتداك

ولا هنت يا بعدي
وصح لسانك

حياك الله أخوي

وصح لسانك ملايين

ولاهنت على القصيدة العذبة

كل الشكر والتقدير لشخصك الكريم

الله الله
ومن لها غير الطائف المأنوس؟
صح لسانك واعتلى شأنك
والله يحييك

ٍسلمت ولا هنت يا هاني
والله يعطيك العافية
على هذه القصيدة
وبيض الله وجهك

جزل جزل وشاعر قدير

صح الله لسانك

		المشاركة الأصلية بواسطة : السلطان اقتباس
	الله الله يا هاني الزنيد وعودة بعد طول الغياب لا يسعنا بعدها إلا أن نرحب بك أجمل ترحيب ونهلي بمقدمك من جديد سائلين الله أن يجعل في حضورك كل خير وسداد وأهلاً بك في منتداك ولا هنت يا بعدي وصح لسانك

الله يبقيك ويطول عمرك يالغالي.

صح بدنك واشكر لك ترحيبك وحروفك اللي تعني لي الكثير الله لايهينك.

		المشاركة الأصلية بواسطة : بنت النشامى اقتباس
	حياك الله أخوي وصح لسانك ملايين ولاهنت على القصيدة العذبة كل الشكر والتقدير لشخصك الكريم

ابقاك الله وصح بدنك.

الشكر لك ولمرورك الله لايهينك.

		المشاركة الأصلية بواسطة : عذب المعاني اقتباس
	الله الله ومن لها غير الطائف المأنوس؟ صح لسانك واعتلى شأنك والله يحييك

صح بدنك يالعذب والله يبقيك ويطول عمرك .

		المشاركة الأصلية بواسطة : درع الخوي اقتباس
	ٍسلمت ولا هنت يا هاني والله يعطيك العافية على هذه القصيدة وبيض الله وجهك

الله يسلمك ولايهينك وانا اخوك.

وجهك ابيض والله يعطيك العافية على مرورك.