راعي الجمايل

ياذيب يلي ماتهاب المساري=جر العواء ببدع على لحنك ابيات
لني ليا قررت مخلف قراري=ولاني من الي يخلفون القرارات
قرارنا مرسوم مهوب اداري=قرار تمشيبه جميع الوزارات
ولياعطيت الدرب مرجع اجباري=اصل وغيري كل دربه عطالات
احفر نفق ولا جسور وكباري=ومن اجل غايه بتستبيح الوسيلات
ثابت ولو هبت علي الذواري=مخاف غير الي فطر هالسماوات
ولاقلت علم الا وانافيه داري=مخلف كلامي واختم العلم بأثبات
والادمي قالو تجيه الجواري=والموت ماخلا عيال البشوات
ماضاقت الدنيا وفيها صحاري=سج القدم عندي يزيل الصعيبات
خصن اليا غنت طيور القواري=غب المطر ولين بعد سبع سيلات
منها الشجر كاسيه ثوب الخضاري=نبتن نبت نبته ونبتن جديدات
لمسا علي الليل شبيت ناري=هذا هوايه ياغريب الهوايات
يلي تهجا الحرف خله لقاري=القصد لازم تنتخيه العبارات
للمرجله سوقن وللنعم شاري=زبونها الي مايهاب الخسارات
احدن من الجزله يخاف ويداري=مافاد ربعه لين جته الفراغات
عاش الحياه ومات موتت غباري=اسمه بعد موته رقم فالسجلات
واحدن ليا احتجته يصير انتحاري=كنك علاها دافعله الوفات
هذا قرارن مايقرر لغاري=ياخذ فعول الطيب لقصى المسافات
ولقيت رجلن للجميل استشاري=واثبتلي التصويت فوزه بالاصوات
صوت الرفيق اللي روته الغداري=وصوت البعيد الي بلته البليات
فزعة بدو بأسلوب فن وحضاري=ولاهي غريبه لن عنده مهارات
عرفت منهو يوم سقت البشاري=وقلت اشهد انه يستحق الشهادات
ذا عيد ابن مصلط لفعله مواري=محدن جهل باسمه يكود الخواجات
افرح لياجاله مع النفس طاري=واضحك ولو اني بأخس المزاجات
يلي لنجم سهيل نجمك يباري=مكتوب ابو فوزي زبون المهمات
اقول ياطيبك على الطيب ضاري=يبقا مقامك غير كل المقامات
ترفعلك البيضا بروس السواري=علم تعليه الدول للسفارات
وسلامن احلا من حليب البكاري=واحلا من ارياق العذارا البنيات

صح لسانك والله يا نفال

ويستاهل أبو فوزي كل القصائد

ونتمنى منك المزيد بإذن الله

اول شي صح لسانك مليون والله يحييك يانفال شاعر مميز

وثانيا ونعم بعيد بن مسلط ومن منا لايعرفة .

ولك كل الود

.قلمك رائع يا سيدي
ولي الشرف أنني عانقت حروفك

من أجمل الى أجمل يا قلمنا الماسي

دمت بخيـــــــــــــــــر

:؛:



صح لسانك وعلا شانك ..

والنعم بك وبمن مدحت ..

ماننحرم من جديدكـ ..



:؛:

يستاهل عيد بن مسلط
وصح لسانك عل القصيده الجميله اخوي نفال

تقبل مروري

صح لسانك والنعم في المداح والممدوح

دمت بود

صح لسانك والله يا نفال

راعي الجمايل والله أبو فوزي ويستاهل المدح

وصح لسانك وبيض الله وجهك يا نفال قصيدة جزلة

نفال
صح لسانك وبيض الله وجهك
وتقبل تحياتي