سفر ريف الأكباد

.


السلام عليكم

يامل قلبٍ بالهواجيس يزداد=يسرح مع الهاجوس في كل وادي
هجوس في جوفي توقّد توقّاد =وان غاب هاجس جن هجوسٍ جدادي
هذي مصاديرٍ وهذيك ورّاد=واقول للمولى عليك اعتمادي
جتني علومٍ ما تبشر بالاسعاد=ما كنها الا طعنةٍ بالفوادي
ليل وغرير وسهم صاد الذي صاد=صاد الخوي اللي معي بالشدادي
عساه بالجنة يمهّد تمهّاد=ويعوض ابوه اللي نكاده نكادي
الله يعوضه جود ربه ليا جاد=ويشرح ضميره شرح صدر المهادي
رمية عيل من غير مقصد وميعاد=هذا الكلام اللي صحيحٍ وكادي
ربع وعواني بيننا الملح والزاد=ما بيننا سل السيوف الحدادي
ربعٍ لهم في ذروة المجد مقعاد=يشهد لهم حتى العدو المعادي
ربعي بني الحارث عريبين الاجداد=اهل الكرم والجود حضر وبوادي
تاريخهم يشكر ويذكر بالامجاد=قاله هل السيره بزاد المعادي
واخص وامدح منهم الاد شداد=جيران معنا في ربوع البلادي
مدحٍ على فعلٍ عن الكيل ما زاد=يشهد لهم سلوان يوم الطرادي
يتلون ابن مهرس متيهة الاذواد=اللي مع ابن هريس صد الاعادي
خاضوا مطاوي نجد لا حد بغداد=ومن الشمال اليا ديار ابن هادي
افعال ما يدريبها بعض الاوغاد=اللي عن اهله فالمتاهات غادي
واليوم يوم ان الرخا للوطن عاد=والمملكة من فوقها الامن سادي
في ظل حكامٍ لها الحظ منقاد=آل السعود مطرّحين الحنادي
خِدّام بيت الله وللشرع رواد=وحنا سندهم وان زهمنا المنادي
نشكر نعيم الله قيامٍ وسجّاد=ومن يشكر الله من نعيمه يزادي
والله يبطل كيد حاقد وحسّاد=اللي يبث الشر في كل نادي
بين الأخو واخوه يسعى بالافساد=وبين القبيله يحترف بالفسادي
واختم جوابي بالدعا لابن الاجواد=اللي طريح السجن رهن القيادي
ابوه ثاوي ويتجلّد تجلّاد=عودٍ عضيل ولا يذوق الرقادي
كلمة ياليت ولو ياسعود ما فاد=نرضى بحكم الله على ما يرادي
انته ورى البيبان محجوز بقياد=واجب عليك الصبر والانقيادي
تنقاد لامر الله وترفع له آياد=يغفر خطاك اللي بليا عمادي
صارت حياتك بين معتق وجلّاد=والامر لله مالكه بانفرادي
أما اعتق الحجري على روس الاشهاد=ودعى له اللي باقيٍ فالمهادي
وهذي ظنوني في سفر ريف الاكباد=حيثه ذكر بالخير واسمه ينادي
والا حكم ربك على كل الاجناد=وهذي عدالة حكم رب العبادي
يالله طلبتك في صلاة التهجّاد=في ساعة الطلبة ورفع الايادي
يالواحد اللي مالك اشباه وانداد=يامنجيٍ ذا النون وابقاه هادي
ترحم عضيد العود من سو الانكاد=وتنجيه بالدنيا ويوم المعادي
وصلاة ربي عد ما هلّ رعّاد=على نبي المرحمة والرشادي

سعود بن عواض الحطابي

وعليكم السلام
حياك الله وبياك أخوي
صح لسانك مليون ولايسدون
ولاهنت على القصيدة الأكثر من رائعة

حياك الله أخوي سعود
ويا هلا بك في منتدى ربعك الشدادين
لا هنت يا شاعرنا ولا هان غاليك
والله يرحم فقيدنا ويسكنه فسيح جناته
ويلهم أبوه وأمه الصبر والسلوان
ويكتب الخير للجميع وما يرتضيه الله سبحانه
للمسلمين من قدر لا يعلمه سواه

.


















اللهُمَّ صَلِ وَ سَلِمْ علىْ رسوُلنَا الكريِمْ
اللهُمَّ صَلِ وَ سَلِمْ علىْ رسوُلنَا الكريِمْ
اللهُمَّ صَلِ وَ سَلِمْ علىْ رسوُلنَا الكريِمْ


حيَّاكْ الله وَ أهلاً وَ مرحباً بِكَ بِمنتديَاتْ الشدادينْ
عَامَّةً وَ الأقسامْ الشعبيَّة خَاصةً صَّح الله بوُحكْ
وَ رَحِمْ الله المُتوُفيْ وَ ألهَّم ذوُيه الصَبر وَ السلوانْ
وَ رزقَّ السجينْ الصَبر وَ الفرَّج ’

# تَعتليَّ الثُريَّا