..:.. مرحباً بك في شبكة الشدادين الرسمية ، ضيفنا الكريم يسعدنا دعوتك للانضمام والمشاركة معنا .. اضغط هنا لتسجيل عضوية جديدة ..:..


آخر 10 مشاركات وفاة اللواء سلطان بن عايض بن حسين    <->    حصرياً لقاء الكبار مع سعادة اللواء / سلطان بن عايض الشدادي    <->    القليل عن اللواء / سلطان عايض الشدادي أبو ثامر    <->    Reyadh رابطة جمهور العالمي (18)    <->    نشاط كريستيانو رونالدو CR7    <->    وردة محشي بطاطس    <->    وردة شوربة اش رشته الايرانية    <->    وردة تكساس فرايز    <->    وردة شوربة الشوفان    <->    كيك امريكانا    <->   
مختارات   يا باري القوس بريًا لست تحسنها ‏ لا تفسدنها وأعط القوس باريها ‏   
مواضيع ننصح بقراءتها وفاة اللواء سلطان بن عايض بن حسين
العودة   شبكة الشدادين > المنتديات الأدبية > منتدى القصص والحكايات > كتّاب المنتدى في القصص والرواية الأدبية
 
أدوات الموضوع
إضافة رد
  [ 1 ]
قديم 25 Oct 2009, 06:48 AM
عضوة متميزة

تــرف غير متصل

مـجـمـوع الأوسـمـة : 15
المشاركة في الاحتفالية السنوية

المشاركة في احتفالية العام التاسع

المشرفة المتميزة

المشاركة في احتفال المنتدى

فعالية تذكر واتربح

الاحتفال بالعام السابع

الاحتفال بالعام السابع

كيدهن عظيم

يوم الضحك العالمي

العضو المميز


تاريخ التسجيل : Feb 2009
رقم العضوية : 18230
الإقامة : kuwait
الهواية : أساهر الليل
المشاركات : 14,299
معدل التقييم : 767
الملف الشخصي للكاتب
إضافة تقييم
الرد على الموضوع
ارسال الموضوع لصديق
طباعه الموضوع
تبليغ عن الموضوع
يا ما أسهل الدنيا :: مهما تعاندنا {الفصل الأول}



,,,
,,
,

افترقتوا مو هذا اللي تبونه

ليه طيب كل واحد في ألم

ماتعبتوا من شعور تكتمونه

وإلا هيه مسألة عزة بإثم

ياما قلنا اتركوا الكبر وجنونه

المحبة والثقة فيها أهم

ان بغيتوا ارجعوا لذكرى حنونه

واستفيدوا درس من يوم الندم

اسأل اللي كوّن الكون بسكونه

يرجّع اللي طاح واتكسّر عدم


,,
,,
,,


قلوب أبطالنا في هذه الرواية بين

تأرجحات الزمن الغادر وبين أطباع

البشر المتناقضة ..

قسوة وظلم وحرمان وحسد ,,حب وغرام واشتياق وعهد ,,

حياة يملؤها التفاؤل وحياة في بؤس وشقاء ,,

تمرّد على العادات والدين يقابلها انحباس في بوتقة الجنون ..

دموع وآهات وويلات من جرّاء ظلم ولعنة على مدار سنوات تتفتق

بصدفة من رحمة أُنْزِلت من رب السماوات ,,صرخة من الخاطر ,,

ضياع خارج أسوار الحياة ,, فراق ولهفة أم أضناها الوجع والتحسّر

انكسارات فضيعة وتحطم جُدر النقاء والإيمان ,, شعوذة وخروج

عن المألوف في عادات القبائل العربية ..

الأقارب عقارب كثيراً نسمعها لــكن ماأشد وطئتها عندما نجترعها بأخس

الأفعال وأحقرها ,, نار وجمر وآآآآآه يالصبر ..

مابنكسر صابر .. لو فرصتي تمضي
والحظ لو عاثر .. بصنع أنا حظي

لوتنثر أحلامي .. برجع أرتبها
ولو تصعب أيامي .. بعيش وماأحسبها

"يامسهل الدنيا مهما تعاندنا "

عادي التعب عادي .. والهم هو ملحه
ولو مالحزن بادي .. مانفهم الفرحة


تلك هي صورة بسيطة عن ماسوف تواجهونه في إبحاركم في محيط روايتي وباكورة إنتاجي الأدبي فــ لأول مره أكتب رواية بلهجة عامية بعدة فصول "

وأجعلها حصرية هنا بين أرواحكم الغالية عندي"
فلكل زاوية هنا في المنتدى عشق لدي ,, فأستميحكم عذراً أن أستوطن هذا المتصفح وأحتشده بجيوشي الفكرية والإحساسية بكل فرح وبكل ألم وبكل لحظاتي وأن أرتمي بين صفحاته حاملة معي رواية تصوّر أحداث واقعية لذاكرة حيّة بنزعة خيالية وقد خللتها ببعض كلمات الأغاني الخليجية تعزيزاً للحدث "
لايهمني كثرة الردود هنا بقدر مايهمني قراءتكم لها وانطباعاتكم الأولية النقدية لبناء روايتي الأولى ..

,,,
,,
,

// الفصل الأول //


(غيمات الفرح تعانق أنفساً طاهرة لطفولة بريئة ليس لها همٌ سوى الحب لكل الناس والنقاء اللامحدود ولكن هناك قلبين لفتتاتين تعشقان السهر لمعانقة النجوم وعدها وفي لقياهم تهل تباشير الفرح والسرور وتبتديء رحلة أحاسيسهم الطفولية بأغاني قد حفظوها ومقاطع
قد أتقنوها ولف شرطان الذهب فوق المتون * لفها يوم التوت فوق البياض *خاف غضات الصبايا يزعلون * سيدات البيض مافيه اعتراض *ان حكى غصب عليهم يسكتون *وإن سكت تسكت معه كل الرياااااااض
)

تربعت الشمس في وسط السماء في أحد أيام عام 1419هـ في قرية سيمساس,,

واقترب موعد الغداء ,, وكانت زوجة مساعد مزنه مشغولة في المطبخ تجهز غداهم ....

مزنة (أم ناصر) : جوااااااااهر ياجواهر

جواهر : هاااااااااااااااااااااااه

مزنه : هواة تهويك تعالي حطي لبن المعزى وغسلي الأكواب وودي السفرة

الغداء برد ..

جواهر : اللي يشوفك يقول مافيه إلا أنا بالبيت جويزان بس أكل ومرعى وقلة

صنعه وكل شي فوق راسي ..

مزنه : أقول سوي اللي قلت لك وجوزاء ماهي بنتي بنت أبوها والله ماينفعني

إلا أنتي هي قاطعة الرجا فيها العوبا ..

وكالعادة ترضخ جواهر لأوامر أمها لها بحكم قربها من أمها واحترامها لها وبحكم

إنها ماتقدر على جوزاء وعوابتها فلازم تشتغل هي وتساعد أمها ..

وفي الغرفة المقابلة للمطبخ ..

جوزاء : نايمة على الأرض وتحتها بطانية زرقاء ورجل يمين ورجل يسار وحاطه تحت

راسها ثلاث مخدات ومتلحفه ببطانية خضراء مخططه ببني وحاطه نص

البطانية على بطنها والنص الثاني على الأرض جنبها ولافه شعرها كبه ورابطته

ببكلة أم دوائر القديمة منتفخه وكل ماأوجعتها نامت على جنب ورجل وراها ورجل قدامها

ومايجي الصبح إلا وهي عند الباب تتدربى وتزحف وهي نايمه محد ينام عندها

تكسر ظلوعه بحركاتها العشوائية هذا غير شخيرها فتحت عيونها والشمس صاكتها

براسها لقت نفسها تحت الدريشة بدون فراش وراسها كبر المخدة من الازعاج اللي برى

والشمس بحكم إن دريشتها مافيها ستارة هي عكس بنات القرية اللي ينامون بدري ويصحون

بدري هي بالليل تسهر وتقول الحب مايرحم حتى الحمير السود يلعن أبو جدفها وشلون قلبي

وتنام للظهر وسمعت أصوات عيال القرية تحت دريشتها وهم اللي مزعجينها من صباح الله

تصحى وترجع تنام بسببهم وقلقهم وجلست تتثاوب وسمعت ضربة على شباكها وعصبت

وعقدت نواظرها وبداخلها تغلي غلي وبتلعنهم لعن وبتخليهم يحرمون يزعجونها

فتحت الدريشه اللي بدون حديد ولا ستاير إلا الكورة طايرة وضربت خشمها اللي مو ناقص

خراب هو خلقه يبيله تعديل وعصبت وطلعت شياطينها وفتحت باب غرفتها ولقت قدامها

المكنسة فكت عصاها وحذفت المكناسه بآخر السيب وراحت ركض لبرى فتحت الباب

وشوشتها طايره حتى ماغسلت وشافت صنهات ولد نشمية لابس ترنق رياضي البلوزة أسود

وأصفر اتحادية والبنطلون أزرق بأصفر نصراوي ومسلط كاشخ لابس كاب أسود وبلوزته

طقم مع السروال كلها أسود وصايره لايقه مع وجهه الأشهب اللي يشوفه يقول عجوز محاده

على رجالها وزيد لابس ثوب أبيض وماسكه من تحت ومدخله بسرواله من فوق

ومخلين المرمى شباك جوزاء وركلات الترجيح تضرب بشباكها من ربع ساعة

جوزاء : أيا السرابيت يالتسلاب يالملاعين أنت وياه أنا ماكفاني المكيف اللي من الفجر يطفي

والكهرب الزفت والحر والشموس تجوني أنتم صنيهيت أنت وسلطلط والزيدي الله ياجعلي

ماأحدّر فطوري إن تركتكم ومامسطتكم بهالعصا ياتسلاب وتلحقهم وهربوا وهي تصايح

انقلعوا لبيوتكم يامال الماحي اللي يمحاكم ويريحني منكم يالدشير ومامسكتهم ورجعت للبيت

وهي تتحلطم الله يكنسكم كانكم فضحتوني وخليتوني أطلع بشوشتي ووجهي ماغسلته

وأكيد شافوني الرياجيل والله معد أعرس بسببكم أوووف ومشت للمغسلة

بتغسل وشافت وجهها بالمرايه .........

جوزاء :وعيونها بالمرايه وتكلم نفسها أخ بس ياحظ ريوف ماهي مثلي محد يزعجها وتنام

على سرير وغرفتها ظلام مو أنا الشمس تصك راسي ماأتهنا بالنوم حتى شعري صار أشهب

مالت على حظي شعري يابس أمشط وإلا ماأمشط يصير واقف ويابس مافيه

حيويه الله ياخذها ريوف ماعمرها مشطت شعرها تجلس شهور ماتمشطه تغسله

وتخليه يجف من نفسه ويصير ناعم مو مثل شعري اليابس كله منك يايمه

حطيتي عليه حنا لين وقّف وتقول يصير ناعم هذي ريوف ماعمرها حطت حنا

وشعرها ناعم وتعاندني هي يطير حتى من هوا مكيفنا الخربان وأنا حتى العجاج مايطيره

أصلا هم كذا اللي يعيشون بالرياض حلوين بس فاصخين الحياء يلبسون

بناطيل بدون قمصان روز ويطلعون يدينهم وكراعينهم يووووه الله لاتفضحنا

على الأقل أنا أحسن من ريوف ماألبس قصير زيها بس هم ياحظهم ماعندهم

شمس تقومهم من النوم وتخربهم أتذكر يوم رحت لهم ذيك الأيام ماشفت

الشمس ثلاث أيام ويوم سألت ريوف قالت إحنا كذا دايم شمسنا ما تدخل البيت

خلاص معد أنا رايحه الرياض كلها فساد وعندهم أشياء غريبة ماعمري شفتها بحياتي

وراحت مع تفكيرها الطفولي وخيالاتها البريئة المغمورة بالغيرة .......

ويقطع حبل أفكارها أمنها مزنه وهي تمشي وبيدها طاسه فيها حنا

وباليد الثانية مشط ومتوجهه للحوش ...

مزنة : جوزاء تعالي يالله أحني شعرك دام فيه شمس عشان يجف وتفرش الزولية

جوزاء وهي ماده بوزها : الله يصبرني على الماخوذ يايمه تكفين فكيني منه

مزنه : أقول اجلسي وانتي ساكته لاصرتي ولد قولي مابي حنا البنت عيب

ترادد أمها وتجلسها على الأرض وتصبخ راسها بالحناء وتجدله اثنين وتحط

بكله بيضاء والثانية سوداء وقالت اجلسي بالشمس لين يجف شعرك

جوزاء : حتى البكلات مختلفة وين أخت البيضاء مابي السوداء لو ريوف

هنا كان تضحك علي هي تضحك إذا شافت علي الحنا وتقول أمك توصخ شعرك وهذا قذاره

ومايحطه إلا الوصخين وتعلم صديقاتها ...


مزنه : يابنت الحلال ريوف تخسي وتعقب أنا شوف عيني وسماع أذني

نهار هنيا تقول لأمها ياحلو شعر جوزاء ياليت شعري مثلها وسألتني أمها وش أحط عليك

وماعلمتها منقهرة منك ماعليك منها ياويلها على شعرك مير مو حاصل ( طبعا تأليف من

راس مزنه لبنتها ريوف ماقالت شي بس حتى الأم تغار من ريوف ماتبيها تكون أحسن من

بنتها بأي شيء )

جواهر : يمه خلي جوزاء تكمل المواعين ماسوت شي من قامت أنا بكنس البيت بمكناسة

السعف يبغى لي وقت أرتب وأكنس خليها تنظف المطبخ ..

مزنة : يالله ياجوايز قومي عاوني أختك

جوزاء : تمشي بتثاقل وطفش للمطبخ (تكره التنظيف ورفله ويومها بسنة)

لقت القدر بالأرض وراحت تغسله بماي من برى وحطت جواته ماي حار

وتركته وتحس بتعب نفسي لاقالوا لها رتبي وإلا نظفي وتجي تاخذ الأكواب

بتغسلهم وتذكرت تيسها الصغير اللي مسميته سودان ماتت أمه وهي ترضعه وشاريه له

رضاعة دبل إكس مدري من وين شاريتها ..

وخلت المواعين وطلعت ورى البيت لشبك الغنم تدور سودان بتطلعه وترضعه

جايبه معها الرضاعة وشاقتها من فوق عشان يشفط الحليب بسرعة وتدخل بين

الغنم وتسحبه مع آذانه والجميع من حولها إمبااااااااع إمباااااااااااااااع

والشمس صاقعه وريحة الغنم تدخل الرئة من قوها وهي ياسودان ياسودان

يابعد كل التيوس ياسودان ياسودان ياهنا وقتي العبوس (تطرب مع الغنم وصوتها)

وتحمله على أكتافها وتدخله جوى بغرفتها وتتربع وتدخل الرضاعة بفمه

ويوم خلص تقوله ياعين أمي عينك وأموووووووة تبوس خشمه بكل حب وعطف

وتمر جواهر عند الغرفة سمعت صوت شيء غريب وفتحت الباب وانهبلت شافت

جوزاء يد فيها الرضاعة واليد الثانية تمشط فيها التيس ولاعنه أبو الغرفة

جواهر : جويزان يالسلقه يامال السلال اللي يسل عظامك أنا أكنس وأنتي

تدخلين مروحك هنا طلعيه يالسلقه وتجرّه جوزاء لين طلعته برى والود ودها تنومه عندها ..

ودته وسكرت الشبك ودخلت للبيت

جوزاء : يمه شعري يحكني يبس من الحنا بغسله

مزنه: هه ,, إيه خلاص روحي اغسليه

وتدخل جوزاء الحمام وتلقى ورى الغسالة الشامبو الأحمر أبو قارورة

وبهذه الأثناء حست إن جسمها كله يحكها شكل الحناء تفتت عليه وإلا الغنم عادي عندها

كأنها عطور حتى لو تمسكها وتتحضنها ماتتسبح فري عندها وتكلم نفسها

أمممم شكلي بتروش أحسن يمكن يجينا ياسر وإلا شيء هم دايم يجون

فجأة ماعندنا تليفونات يعلمونا فيها إيه خلاص بتروش آه ياياسر حتى بالحمام

أفكر فيك ياجعلي ماخلى من زولك وياوجه أبوي يالغالي (هذي قمة رومانسيتها )

وجلست تدندن كعادتها بالحمام على أغنية بشير شنان


مسكين راعي الحب محدن يسره ... لامن بكى ولا شكى ماله انصار
ياما شكيت وزاد في القلب حره ... وياما سهرت وهلت العين بعبار

وتتفرك بالشامبو الأحمر وتكمل :

وانا اشهد ان الحب كله مضره ... وراعي الهوى دايم معرض للأخطار
جربت انا حلوه وجربت مره ... له لذة وحده ولوعاته امرار

طلعت بعد ساعة هالبنت بطيئة بكل شيء وتتسحب بأي شغله تسويها ..

يازين النظافة زينها ياواحلالاه إن ياسر يجينا اليوم ونذرن علي يايمه لويجي

إني لأسوي الذبيحة واللي تبيني أسويه أصلحه ..

مزنه : خلي الخبال عنك وإن علمتي ريوف إنك تحبينه ياويلك والبنت

عيب تحبحب الرياجيل ..

جوزاء : هههههههههههههههههه ياقدمك يايمه حتى ريوف تحب ريان

مزنه : وانتي من وين تجيبين هالعلوم يالفاصخة هي قالت لك شيء

جوزاء : لا ماقالت بس هي تستحي منه وإذا لعبنا فريقين ريان يختارها تجي معه

مزنه : إي والله ريان أنا شاكه فيه مايهذري إلا بريوف وقالت وحطت ومتى

تجي ياويلي عنك ياوليدي ريوف مهي من ثوبك ومدلعتن من خلقتها والله

مالكم إلا الضعوي من بنت غالية وولدها ..

جوزاء : هههههههههه ياحليلك يايمه بقولك سر بس ماتعلمين ريوف علمتني

إنها تحب ريان جواهر حشرتها وخلتها تعترف وياسر بيحبني غصب إذا درى

إني أحبه يعني لاتشيلين هم ريوف وريان تراهم يحبون بعض بسكات

ريوف ملعونه ومن تحت لتحت ونسحب منها الكلام تسحيب وولدك ألعن وألعن

بس الضعيفه أنا لاطلت أرض و لا سماء بس ماعليك لاطاحت ريوف ألعب

فيها براحتي وأخليها تخلي ياسر يحبني وإلا ماخلي ريان يعطيها وجه ..

(طبعا جوزاء تكذب على أمها عشان تخليها تتقبل الوضع لاصار معها أحد

وإلا ريوف قاهرتهم ماتعلم وش براسها بس هي شاكة فيها وبحركات ريان الواضحة

واهتمامه فيها )

جوزاء وريوف كانت أعمارهن عشر سنين ريوف تدرس خامس ابتدائي بالرياض وجوزاء

ثاني ابتدائي تدرس ببيت مفيليح اللي قلب بيته مدرسه وصارت ابتدائية للبنات وبآخر القرية

وتمشي على رجولها هي والبنات وعندها اختبار الدور الثاني بالتوحيد والفقه مابينها وبين

ريوف إلا يوم واحد كبر بعض بس على قولة جوزاء أنا مستعجلة على الدنيا وطلعت من بطن

أمي قبل ماتطلع ريوف من بطن أمها بيوم وريوف تقول أنتي أكبر مني بسنة لأن اللي أكبر

منك بيوم أعلم منك بسنة وتزعل جوزاء من ريوف وتنقهر لاقالت كذا..

جوزاء تلعب لعب بريوف بحكم قوتها وجلافتها وسيطرتها على ريوف بالكامل

تحبها وتغار عليها وتمنع أي بنت تصادقها تقول ريوف لي لوحدي وإذا شافتها

تسولف مع أحد تعصب وتزاعلها وتهاوشها لين تخليها تجي وتعتذر منها وتقولها

آخر مره حتى لو تسولف مع أختها تزعل وتنتفخ غيض ..

وفي المكان الآخر وفي دنيا ثانية وفي عاصمة المملكة الرياض .............

ياسر : ههههههههههههههههههه الله يقطع بليسك ياريان هذي صورة والله

إنك ماتديرها يالوح خذ لك زاوية التقاط حلوة ..

ريان : ياخي خلاص جرب أنت وعلمني وشلون التصوير يالفنان تعالي

ريوف أنا بجلس وأنتي تعالي وراي ولفي يدينك حوالين رقبتي وخلي حنكك على كتفي

اليسار وابتسمي وعينك على عدسة الكاميرا لياسر وياويلك إذا طالعتي في عيوني قدام

ترى خربتي الصور علي قبل شوي كل ماجيت بلقطكم طالعت عيونك وسلطت الفلاش عليها

وخربت أبو الدنيا ..

ياسر : ريوف لاتخربينها مابقى بالفيلم صور كثيرة سوي اللي نقولك عليه

يالله بسرعة ..

ريوف : وهي ماسكة ضحكتها كل شوي تخليهم يحرقون الصورة تقلب عيونها وترمش فيها

وهي ماتدري إن بحركتها هذي تضيّع ريان ويتوه في عيونها ويصرفها قدام ياسر أخوها هو

يبغي يتصور معها وجته الفرصة ..

ريوف : كانت ماسكه شعرها كله على جنب بوردة حمراء ونازل على كتفها اليمين بحركة

جنان ولابسه تنورة قصيرة لركبتها لونها أحمر وفيها ورود صفراء وبلوزة كات لونها أصفر

وهلالوب أحمر وجزمتها صفراء كانت تكشخ من هي صغيرة بحكم تفتحهم بدري قبل

جماعتهم (هم أول من جاهم تليفون وأول من سكن الرياض وأول من دخل التليفزيون يعني متطورين بقوة كانوا يسافرون خارج المملكة ولدول الخليج لحد ماوصلوا للثانوي وهم كل نص سنة بمنطقة عشان شغل أبوهم وجماعتهم جلسوا سنين يتعايبون السفر الخارجي ولكن مع تطورهم وحضارتهم إلا إنهم متمسكين بعاداتهم وتقاليدهم)

ياسر : يالله ماصارت ياريوف بسرعة وقفي عدل

ريان : لااااااااا خلها تسوي اللي قلت لها عشان تطلع الصورة أحلا

ريوف جت ورى ريان ومدت يدينها على أكتاف ريان وهو مسكهن من قدام

لحد ماصار وجهها على كتفه وابتسمت لأخوها ياسر وصورهم كم صورة ..

ريوف : طيب الحين أنا بجلس وخل ريان يحط يدينه على كتفي ويسوي

مثل اللي سويت ..

ريان : ههههههههههههه ريوف ياخبله مايصلح أنا طويل وعريض وأنتي

فطفوطة لاجلستي لازم انبطح عشان توصل يديني لكتفك ..

ريوف : وتحط يدها على خصرها وتتمايل بجسمها على جنب وماده بوزها

وش قالوا لك بزر تراي كبر أختك جوزاء عمري عشر بس هي دوبا وأنا

حجمي أصغر منها ولو ماتصور معي وتسوي زي الحركة ماني معطيتك الصور

باخذها كلها ..

ريان : خلاص ,, خلاص يالله ياسر تحملنا آخر صورة تعالي يالله أجلسي

وتجي ريوف وتجلس وتحاول ترفع نفسها عشان مايمشي كلامه عليها

وريان وراها فاطس ضحك ويقول بباله ياهي عنيده ولازم يمشي رايها

ياسر : ماسك الكاميرا وقال يالله ياريانوه حط يدينك على كتوفها يالفيل

عشان نتمصخر عليكم سنين فيل حاط يدينه على أكتاف نملة وتم نقل

النملة لمستشفى بحالة حرجة وكسور بليغة ..

ريان : بين نارين ماوده يزعل ريوف هالبنت ساحرته مايقدر يقولها لا

وبين نار إن الصورة بتصير مضحكة بين عمته غالية وأبوه وعمامه

لاشافوها لأن هالعائلة مهووسين بالتصوير مايشوفون بعض إلا مصورين

ويجمعونها بألبوم كبير عند كل واحد منهم للذكريات ..

وجته فكرة ..

ريان : ريوف تتحديني أشيلك وماتصارخين أتحداك تخليني أشيلك

ونخلي ياسر يصورك وأنا رافعك أمممم أصلا أنتي خوافه خلاص بس

ياياسر صورنا كذا أختك تخاف حتى من صحية الليل ..

ريوف كلش ولا أحد يقول أنتي ماتعرفين أو أنتي خوافة أو فلانة أحسن منك

وريان عارف نقطة ضعفها ..

ريوف : أنا أقبل التحدي وماني خايفه وماني بزر عشان أصارخ وهي قلبها

يضرب من الخوف بس ماتحب أحد يعرف نقطة ضعفها ويضحك عليها ..

ريان : يالله تعالي وقفي فوق الكنبة وجت ريوف ووقفت وجلس ريان بالأرض

وقال يالله حطي رجولك على أكتافي وتمسكي براسي وبوقف وبمشي

فيك هاه صح هونتي وخفتي ..

ريوف باصرار : خلاص ماني خايفه بس لاتتحرك لحد ماأتمسك عدل عشان

ماأطيح وأتكسر وهي ترتجف خوف بس عنيدة وماتبين خوفها لأي أحد

وحطت رجلها اليمين وبعدها اليسار وماقدرت ترفع جسمها من الخوف

والرجفة رجولها على أكتافه وجسمها على الكنبة وهو ميت ضحك ويقول

شفتي خلاص بطلنا أنتي خفتي ..

ريوف : وتشد جسمها وتمسك راسه بيديها وتعدلت ومسكت جبهته وجلست تضحك

ومستانسه إنها غلبته وماصارت خوافه ..

ريان : واحد ,, اثنين ,, ثلاثة هوب ويقوم وهي متمسكة بيدينها الثنتين

مره يد تدخل عينه مره تصير على فمه مره على خدته وهي كل شوي يعدلها

عشان يصلب طوله ويوم وقف مسك يدينها وإلا ياسر طالع ويطلع فيها ريان

ويدور على ياسر بالحوش ويلقاه بالحديقة حقت البيت ويلعب كورة

على الثيل وتطيح وردة ريوف وينفك شعرها وينتثر على أكتافها ويغطي وجه

ريان هي شعرها طويل إلى نهاية ظهرها وكثير وناعم ويجلس وينزلها وياخذ

وردتها ويجلسها بحضنه ويحاول يربطه لها

ريان : يابلشتي وياكم ياياسر ياخي صرت أم ريوف وأنا ماأدري

ياسر : عجبه الموقف ولقط بالكاميرا ريان وهو ماسك نص شعر ريوف وهي بحضنه

ومايعرف يمسكه كله من كثره ونعومته يتناثر غصب ويتطاير من الهواء

وطاحت عين ريان على ياسر بيقوله لاتصور ياحمار ولقطهم ياسر لقطة

ولا بالأحلام عند ياسر عشان يمسكها على ريان ويساومه عليها ..

الكاميرا فورية ويوم نزلت الصورة وياخذها ياسر ويحطها تحت أباطة

من فوق ملابسه ويمسحها عشان بسرعة تضبط الصورة وتطلع اللقطة

وشويات فتحها وشافها (ريان حاضن ريوف وماد رجوله وهي جالسه بين رجوله وحاطه

يد على ركبته اليمين ويد على ركبته اليسار وشعرها نصه بيدينه ونصه طاير على كتفه ووجهه
)

ريان وبعد مافك شعر ريوف نقز على ياسر

ريان : تكفى ياسر عطني الصورة لحد يشوفها خلها عندي الله يرحم والدينك أنت مهبول ترى

إن شافها أحد آخر مابيني وبينك ريان يستحي مره وخجول وطيب حيل ومحترم ومايحب أحد

يدري عنه بأي شيء مثل ريوف وافق شن طبقه ..

(ياسر يصير ولد عمة ريان وأخو ريوف ,, وريان أخو جوزاء وهو وياسر كأنهم اخوان

وأكثر ريان كل ماشاف أحد يجي من الديرة للرياض يركب معه ويروح لبيت عمته غالية

وينام عندهم ليالي وأسابيع لحد مايلقى أحد بيرجع للديرة ويرجع معه عشان كذا كأنه واحد

من البيت وهم يعاملونه مثل ولدهم ياسر)

وعطى ياسر الصورة لريان وأخذها ودخل وفتح كيسة ملابسه طبعاً ماكان

يجيب شنطة لاشاف أحد بيجي للرياض من الديرة يمسك طبلونه للبيت ويسحب كم لبسه وياخذ

أقرب كيسه ويحط ملابسه فيها أحيان كيس بقاله أحيان كيس صيدليه وهو وحظه واللي

يشوفه قدامه (بس عند ريوف كأنه أمير وماتشوف مثله )..

وأخذ الصورة ودخلها بجيب ثوبه ولفه كم لفه ودخله وطلع لهم ...

ريوف دخلت جوى البيت ولقت خواتها اللي أصغر منها مها ونوال منسدحات ويلعبون

بكمبيوتر العائلة وكل وحده رافعه رجولها على طاولة التلفزيون وبجنبهم كيسة الفش فاش

الأحمر وبسكوت ميزان وأكواب الشاي نصها ذايب فيها بسكوت ميزان وتاخذ من الفش فاش

والبسكوت لريان وتروح لأمها وتاخذ المارس حقها ماتاكل إلا هو وتاخذ العزبه

كلها عصير سنتوب ,, بسكوت ريكو ,, وريكا الأزرق ,, وبسكوت أبو ولد

وبسكوت ديمة بكريمة الفراولة ,, وبسكوت بالزبدة عشان ريان يحبه

وتطلع ريوف وهي شايله الأغراض بكيسه وتلقى ريان وياسر منسدحين

بالحديقة وراشين ماي على الزرع وتجلس عندهم وتطلع الأغراض وتعطي

من كل نوع لريان وتخلي الباقي بالكيسة وتطلع المارس وتفتحه ....

ياسر : ريوف وين أغراضي وش معنى ريان تمدين له وأنا ماتعطيني

ريوف : أغراضك بالكيس وأحمد ربك إني مانسيتك مثل كل يوم وأجيب

لريان لوحده هذاني ذكرتك اليوم ويديك مو متكسرة عشان أمد لك ..

ريان بعباطه : أفا يعني أنا يديني متكسرة عشان كذا مديتيهن لي

ريوف : حمّر وجهها واستحت وتوهقت وقالت : لا بسم الله عليك يدينك فيك بس أنت غير

عن ياسر بتكحلها وعمتها ..

ياسر : هيه تراني أخوك مو هو ..

ريان : وبدينا غيره ياخي خلها على كيفها تحبني البنت ويغمز لريوف بحركة

يستفزها ويعاندها ..

ريوف : أصلا أنا ماأحبك إعجاب أحبك في الله "حافظتها في المدرسة وانقذتها" وعشانك

ضيف عندنا أجيب أغراضك ( مع إنها صغيرة بس ذكية وماتجي بسهولة على وجهها )

ياسر : ههههههههههههه نقطنا بسكوتك ياريان البنت تحبك في الله هههههههههه

ريان : سكت وكاتم ضحكته موقفه غبي ..

وجلسوا ياكلون وشافها تاكل المارس وقال وش معنى ماتجيبين لي مارس

مثلك وطلعته من فمها وباقي نصه

ريوف : فكت القرطاسة اللي تحت في المارس ومدته لفم ريان على طول

بدون ماتشاوره أو تعطيه بيده هي متعودة كذا مع اخوانها أحيان تشربهم الماي

ريان : انصفق وجهه من الحركة وفتح فمه ببلاهه وسحبت يدها على إنه بيسكر فمه

ويمسك القطعة الباقية بيده الأخ أكل اللي جت بفمه والباقي طاح بحضنه

ريوف وحاطه يدها على فمها وتضحك عليه لين دمعت عيونها ..

يعجبها بكل شي بطيبته وبتعامله وبتفضيله لها من بد البنات كلهم وبحركاته

وبلعبه معها حتى لاصار مبلوه تتخبل عليه تحس إنه أغلا حتى من الدنيا كلها وتستغفر

بقلبها تقول حرام أخاف أحبه أكثر من الله والرسول وإلا أمي وأبوي غطى عليهم هواه

وماعليها من الناس كلها أهم شي هو بس محد كان يعرف بمشاعرها لاهو ولاغيره بس

شعور يراودها وكاتمته بصدرها وتفكيرها البريء صار هو ملهمها ومثلها الأول بالحياة

تفرح لاجا وتتضايق لاغاب ..

حتى قسوته تعجبها لانافخ على جوزاء إذا هاوشتها ودها تقوم وتبوسه بس تمسك نفسها

تحس إنها كبرت عن زمان يوم كان يمسكها وهي بأول وثاني وثالث ورابع ابتدائي ويبوسها

مع خدودها وجبهتها وحنكها وخشمها ويخليها تبوسه مثل حركاته وبالترتيب بس هي تجي

تبوس حنكه بكل براءة الطفولة ونقاوتها وبعدين تبوس خشمه بقوة تقول عشان يزين ويطلع

حلو مثل خشمي وبعدين تبوس جبهته وبعدين تبوس خدوده والحين تتثاقل تحبه بعد ماتحركت

مشاعرها بس تبوسه لاجاهم ولاجا بيروح تحط يدينها حوالين رقبته وهي متعلقه وتعطيه

بوستين مع خدوده وهو لاحظ إنها ماتبوسه مثل زمان وسكت وكأنه فهم رسالتها وإنها بدت

تستحي وتخاف يكشف مشاعرها وتنفضح قدامه ..

عيب ريوف إنها لابغت تخبي شيء وماتبي أحد يكشفها تفضح نفسها بنفسها

من تغيراتها المفاجأة الغير مبررة هي تفكيرها على قدها وهو أكبر منها بسبع

سنين وذهين خابزها وعاجنها وأي حركة تسويها يدري هي ليه سوتها ..

وفي بيت العم ناصر (عم عيال سعود ريوف وياسر و.....):

ناصر : سلطان لاتبطي علي خذ الأغراض وودها للسيارة تأخرنا ورانا سفر للديره

قبل الليل ..

سلطان : طيب يبه بس ريان عند عيال عمي ويدور أحد يرجعه للديره بروح

أقوله يجهز وناخذه معنا لأهله ..

ناصر : بسرعه وأنا أبوك أعجل علينا ..

راح سلطان لبيت عمه اللي بجنبهم ولقى ريوف بوجهه(
وهو أكبر منها بأربع سنين ) :

وقالها إن شفتك مع ريان ياويلك مني ماتمشين مع عيال تراك كبرتي عمرك عشر وتجلسين

مع العيال ترى والله لأعلم عمي وأخليه يلتفت لك ..

ريوف : مالك شغل ياأبو خشم رح تحكم بخواتك أنا مو أختك وماني متغطيه منه حتى بالثانوي وكيفي وبمزاجي ونعم وش تبي ؟

سلطان : زين ياريفوه بعدين أأدبك أقول وين ريان ترى بنروح الديرة وبناخذه معنا وينه

خليه يجي ...

ريوف تترك سلطان وتركض لغرفتها هي وأختها مها وخلته ماعلمته وين ريان خلته يدوره

في بيتهم الكبير

ريوف : مهاوي تكفين بسرعة عطيني قلم وأخذت كرسي وقربته للدولاب

وصعدت على الدولاب عشان توصل لملفها في درجها العلوي ومسكته بيديها

وانقزت من الدولاب للسرير وهي مستعجله عشان تلحق تكتب رسالة لتوأم

روحها جوزاء وتعطيها ريان ياخذها معه وتتناثر أوراق ملفها الطفولي أوراق

وردية وحمراء ومرسوم فيها دببه وصور سالي وفلونه وهايدي وأخذت ورقة

وبدت تكتب رسالتها بعد ماخلت مها تقول لريان ينتظرها لايروح بتعطيه الرسالة

ريوف : متربعة على السرير وبحظنها ورقة تحتها كراسه وبدت تكتب:

كل كلمة بلون :

بسم الحب والوفاء والشوق

السلام عليكم ورحمة الله وبركاته "

كيف حالك جوزاء , وش أخبارك , وكيف خالي , وأخبار جواهر , وكل اخوانك

ومامتك إن شاء الله تكونون بخير ..

أبشرك
بنجيكم بعد أسبوع وقولي لجواهر وبجيبمعي كل أغراض السهرات

ووعد أجلس عندك كل الأيام وماأروح مع أهلي يم خالتي وترى ماما واخواتي يسلمون

عليكم وأبله أمل نقلت من مدرستنا وبكيت يومين عليها وجتنا بدالها وحده وصرت شيطانيه

عندها عشانها خلت أبله أمل اللي أحبها تنقل

حبيبتي وتوأم روحي وأختي في الله << ماسكه معها أختي في الله

توأمتي جوزاء : أرسل لك مع الطيور الجارحة كل الأشواق

وأكتب لك بالقلم الأحمر علامة الحب الأكبر
أكتب لك بالرصاص علامة الحب والإخلاص
أكتب لك بالمقلوب علامة الحب والقلوب

وتذكريني كل مارأيتي الغروب

وتذكريني كل مارأيتي حبيبي (ريان )

ياأغلى من كل الناس ويا شمعة الديرة

إهداء لك يالغالية : (ريوف تفتح شريط خالد عبد الرحمن وتكتب كلماتها )

ياحبنيلك دون كل المخاليق
يالي تساوي كل شي بحياتي
لا شفت زولك ينجلي عني الضيق
وان غبت عني تزايد عبراتي
دايم عيوني من فراقك غواريق
وطلعتك ترسم بسمتي في شفاتي
وفي النهاية مع السلامة
وخلاص ريان ينادي

محبتك وبنت عمتك : ريوف سعود
كتب في الساعة ست بالمغرب
12 // 11 // 1419 هـ

R+G =Love


ريان : خلاص ياريوف مو لازم تحطينها بالظرف

ريوف : احلف إنك ماتفتحها ترى حرام تكذب فيها أشياء خاصة عيب تقراها

ريان بضحكه : حلفت بس يالله عطيني ياها

ريوف وتطالع بوجهه بعناد : وتمسك الصمغ وتصمغ الظرف وتكتب من برى

يصل بيد الحبيبة جوزاء والرجاء عدم الفتح (ماتبيه يدري عن حبها له)

وتعطر الظرف وتلتصق ريحة العطر بيدها ويد ريان يوم أخذ الرسالة منها وراح مع عم

ريوف وولده للديرة وأول ماركب السيارة فتح الظرف وجلس يقرأ الرسالة

ويوم وصل لكلمتها تذكريني كل ما رأيتي ريان أنصدم

ريان : راح مع أفكاره معقوله ريوف تحبني وسلطان ولد عمها غريبة

هو يقول ريوف تحبني وأحبها وبتزوجها معقوله يكذب

سلطان : ريان وش تقرأ أكيد رسايل البنات حرام عليك تقرأ أسرارهن

ريان : عادي إذا ودك تقراها خذ مو أسرار سوالف تسلينا بالطريق

وريان قاصد سلطان يقراها عشان لاصار براسه شي يعرف إن ريوف

تحبه هو وماتبيه ومدها لسلطان

سلطان : بعد ماقراها عصب وارتفع ضغطه

سلطان : يبه

ناصر بعالم ثاني يسوق وباله مع غنمه ونياقه وحلاله اللي بالديره:هاه وش بغيت

سلطان : ترى إذا كبرت بتزوج ريوف بنت عمي قل لعمي سعود

تراها لي بنحجرها من هي صغيره ..

ناصروهو داري إن سعود مستحيل يرضى بالتحجير : يصير خير

ريان : ساكت وهو مقهور من حركة سلطان ووده يتوطى ببطنه لولا

إنهم محشورين بددسن غمارة مسك نفسه وحط راسه ع الباب وسكر

عيونه يتصنع النوم واللا مبالاة وهو يشتعل نار من جواته ..


....

نرجع للرياض عند باب الشارع قماشه زوجة ناصر طالعه من بيتها و رايحة لبيت سعود

حماها بتعلمه عن ولده فيصل وش مسوي ذيك الليلة ....

قماشه : وهي رافعه الغطوة وعيونها طالعة من ورى البرقع قدام حماها ويدينها مطلعتها

وعبايتها مفتوحه ومبينه لبسها سعود ولدك فيصل شوف عيني البارح واقف بالليل مع ولد

محمد الداشر وبيده زقارة من وراك يطلع لانمت بالليل ويسربت انتبه له لايصيع ..

(قماشه : حية من تحت تبن ,, كلمة كلبة حرام تنقال لها يبي لها شي أوطى من كذا ,, ملعونة وفتانة ,, وعلى كثر فلوسها لكنها طماعة ويعميها الجشع ,, عندها
تجارة ومحلات ماكأنها بدوية ,, داهية وذكيه ,, طوال الأشناب يخافون منها
ويعملون حسابها ,, هي الآمره الناهية في الجماعة ,, ماتجلس إلا مع الرجاجيل
التجار وتستفيد من وراهم ,, زوجها ناصر ماكأنه يشوفها رايح راد للديرة وهي
تمكر براحتها وحاطه عينها على سعود كانت تتمناه زوجها بدال ناصر لأنه ملياردير
وتكره عيال سعود وبناته وزوجته ودايم تبلاهم وسعود يصدقها ويعاقبهم)

سعود : مغرقها بالفلوس شيكات بالهبل يوقعها باسمها هذا غير الظروف اللي

يسلمها لها بيدها وفيها ميات الآلآف (ويقول ضيعفين حرمة أخوي وعيالها

مع إنهم كانوا ماعليهم ناصر موظف وعنده حلال وبيته ملك وحرمته عندها تجارة وحالهم

فوق العادي بس سعود مايعطي أخوه يعطي قماشه ويقول لأخوي وأخوه أصلاً مايدري

قماشه تستلم مبالغ هائلة من سعود التاجر بوقت كانوا جماعته فقرانين بس هو

عنده شركات للنقل والمعدات الثقيلة غير وظيفته ومنصبه الكبير كان كل سنة يوزع على

رجاجييل جماعته زكاة مع عطيه توصل مبالغها للمليون وقماشه حاطته براسها وحاسده

حرمته غاليه وعيالها عليه وعلى غناهم والحسد ياكل قلبها وكرهها للخير للناس مالي

عيونها )

سعود : حياك الله ياقماشه تفضلي تقهوي داخل وفيصل علمه عندي الكلب .

قماشه: لاوالله أنا مستعجله وبروح (أصلاً ماتحب تجلس عند غاليه زوجة سعود

تبي سعود لوحده وماتبي تفتح الأنظار عليها سعود يجيهم كل ظهر وكل مغرب مرتين باليوم

ويرجع لبيته وهي معبيه راسه سوالف كذب عن عياله )

تروح قماشه ويدخل سعود البيت وهو واصل حده من فيصل وعيونه يتطاير الشرر

منها وأول مافتح باب الصالة مها ونوال يدخلون غرفهم يخافون منه ومايجلسون عنده

إلا ساكتات ونادر يجلسون عنده وريوف كانت جالسه ومتضايقه لأن ريان راح ويوم سمعت

صوت أبوها وقفت بتهرب فوق حتى هي تخاف منه تحس إنه عسكري ومدير مدرسة

وشافها ...

سعود وهو ماسك عقاله بيده : ريوف وين فيصل

ريوف : طيب ليه (تخاف إنه بيضربه مثل دايم وهي ماتتحمل تشوفه كذا )

سعود بصوت يلج الصالة كلها : لاسألك أبوك تجاوبينه وينه بسرعة

خافت ريوف وقالت مدري ماشفته

سعود بصوته الجهوري العالي اللي يخوف بلد مو بنت دلوعه وصغيرة: تكذبين

ريوف وجهها يفضحها دايم لاكذبت يكشفونها

سعود : وقسم إن ماقلتي وينه لأقطّع العقال فوق ظهرك بداله

ريوف بربكة ونظرة كلها خوف : نايم بغرفته ومدري قام وإلا لا ..

سعود بخطواته الطويله يصعد للدور الثاني وهو عيونه حمر من كثر ماعصب

وريوف تروح وراه بخطى متثاقله وقلب يرجف

سعود : فييييييييييييييصل وصمخ فييييييييييييييييييصل

فيصل : يفز من نومه ويطلع لأبوه اللي مسوي له رعب


سعود بدون تفاهم يمسكه ويجلده بالعقال أأأأأخ يالسمرمدي يالسلوقي

ويضرب فيه وفيصل يحاول يبعد مايقدر قبضة سعود قويه وفيصل

نحيف ومايقدر يبعد عنه

سعود : تماشي الدشير وتدخن تووووف على وجهك وبعده يجلده وكل ضربه

يذوقها فيصل بقلب غاليه تنزف بس مابيدها حيله زوجها وتعرفه مايرحم لاضرب عياله


فيصل : يبه فكني والله ماسويت شي والله ماطلعت (فيصل مظلوم مثل كل مره ينضرب

وهو ماسوى شي بسبب الخنزيرة قماشه ) ويضربه زياده مستحيل يكذب قماشه ولعنه في

عياله يموتون عادي بس هم خطأ وهي صح

ويصرخ فيصل :

يبااااااااااه بموت اختنقت فكككككككككني ويخف صوته وأبوه ماسكه برقبته

ريوف واقفه بالزاوية وتبكي ويوم شافت فيصل شوي ويموت تركض لأبوها

وتمسك يدينه وتحاول تفكها وهي ضعيفه دفه تكسرها ويبعدها سعود :

ريوف ابعدي ويدفها أنا بذبحه لين يتأدب

ريوف : تككككككككككفى يبه خله خلاص بيموت تكففففى وتبكي وتروح تضم أمها وتغمض

عيونها خلاص فيصل بيموت

شوي إلا ضربة قوية على الجدار ورمت غالية ريوف وراحت تركض لولدها فيصل

وجن جنونها وانشلت رجولها من المنظر و ........






انتهى الفصل الأول


وراح أكون معكم الخميس الجاي في البارت الثاني

الرواية واقعية لــكن الأسماء كلها مستعارة حفظاً

لخصوصية الأبطال وحتى اسم القرية مركب وموصحيح

كذلك حفظاً للخصوصية ..

وتحياتي لأرواحكم "








بقلم // تـــرف







توقيع : تــرف


وأنا الذي .. لو جِئْتَ تطلُبُه الفؤادَ .. لقُلْتُ : لَكْ ..!
عَجَبِيْ لهُ مِنْ سَائِلٍ .. أنْ جاءَ يطلُبُ ما مَلَكْ ..!!
"إنيْ أحبُّكَ" .. قُلْتُها .. فبَنَتْ بقلبِي مَنْزِلَكْ !
وزهدتُ دَهْري .. واعتزلْتُ الناسَ .. كي أتأمَّلَكْ !!
قلبي اصطفاكَ على البرايا .. واصْطفاكَ .. وفَضَّلَكْ !!
كُلُّ الحكايةِ أننّي .. أَيُّوْوووهْ .. ! كمْ أشتاقُ لَكْ !!

التعديل الأخير تم بواسطة إحساس واثق ; 25 Oct 2009 الساعة 01:05 PM

رد مع اقتباس
قديم 25 Oct 2009, 08:34 AM [ 2 ]
عضوة متميزة


تاريخ التسجيل : Feb 2006
رقم العضوية : 1067
الإقامة : saudi arabia
الهواية : لايوجد
مواضيع : 53
الردود : 1326
مجموع المشاركات : 1,379
معدل التقييم : 25رنة الخلخال is on a distinguished road

رنة الخلخال غير متصل




تسجيل اول حضور
عملت نسخ وارسال للجوال هههههههههههههههه
علشان اقرا وانا رايقة
ترف انتظر كل خميس


توقيع : رنة الخلخال
الأعلى رد مع اقتباس
قديم 25 Oct 2009, 01:53 PM [ 3 ]
مؤسس شبكة الشدادين


تاريخ التسجيل : Jan 2005
رقم العضوية : 1
الإقامة : saudi arabia
الهواية : رياضة + كمبيوتر وبس
مواضيع : 2071
الردود : 91524
مجموع المشاركات : 93,595
معدل التقييم : 4981السلطان has a reputation beyond reputeالسلطان has a reputation beyond reputeالسلطان has a reputation beyond reputeالسلطان has a reputation beyond reputeالسلطان has a reputation beyond reputeالسلطان has a reputation beyond reputeالسلطان has a reputation beyond reputeالسلطان has a reputation beyond reputeالسلطان has a reputation beyond reputeالسلطان has a reputation beyond reputeالسلطان has a reputation beyond repute

السلطان غير متصل


مـجـمـوع الأوسـمـة : 8
فعالية ضوء عدسة

فعالية طلباتك أوامر

شكر وتقدير

فعالية مجموعات المنتدى

يوميات الأعضاء

التميز في دورة الفوتوشوب

شكر وتقدير

أجمل خط 1434 هـ




يا هلا والله بمشرفتنا ترف وروايتها الأولى
والجديدة هنا في منتديات الشدادين
والتي أكيد بتكون حصرية لنا
ونفخر بكونها لنا فقط وفي منتدانا
ونشكر أختنا ترف عليها وننتظر بقية الأجزاء
والآن سأقوم بطبع الجزء الأول منها وقراءته على روقان
وتسلم يديك يا أديبتنا ترف


توقيع : السلطان
الأعلى رد مع اقتباس
قديم 25 Oct 2009, 02:04 PM [ 4 ]
ابن جبري


تاريخ التسجيل : Mar 2007
رقم العضوية : 2376
الإقامة : saudi arabia
الهواية : الرحلات والمقناص
مواضيع : 101
الردود : 2935
مجموع المشاركات : 3,036
معدل التقييم : 30النايف is on a distinguished road

النايف غير متصل


مـجـمـوع الأوسـمـة : 5
عضو مخلص

يوم الضحك العالمي

العضو المميز

الحضور المميز

التواصل





ـ^ـ
إطلاع سطحـــي وعلى عجــــل

لاهنتي يا الترف على سرد هالرواية
وتمّ طباعتها وبإذن الله يتمّ قراءتها بعد الرجعة من الدوام ..
لكن إذا خلّص ورق الشركة أنتي المسئولة :icon_mrgr !

يعطيكِ العافية والصحة وننتظر الأجزاء المتبقيّة .....


توقيع : النايف
........................................
...............................
..........،,..........
..............................
...........................................
الأعلى رد مع اقتباس
قديم 25 Oct 2009, 08:13 PM [ 5 ]
عضو متميز


تاريخ التسجيل : Dec 2007
رقم العضوية : 4862
الإقامة : saudi arabia
مواضيع : 406
الردود : 11870
مجموع المشاركات : 12,276
معدل التقييم : 25حاتم الشدادي is on a distinguished road

حاتم الشدادي غير متصل


مـجـمـوع الأوسـمـة : 5
عضو مخلص

الاحتفال بالعام السابع

الاحتفال بالعام السابع

مسابقة تعرجات قلم

الإداري المميز




أحرقتي قلوبنا كذا
<< متحمس يبغى يعرف وش صار في سعود



رواية مشاعرية 100%
ليست سرد وحشو لأحداث
بل مشاعر وأحاسيس تروى


هكذا هي الرواية التي تستحق أن تقرأ



تــــرف
لكِ من الشكر أبلغه وأعظمه
أنا من ضمن متابعيك


توقيع : حاتم الشدادي


الأعلى رد مع اقتباس
قديم 25 Oct 2009, 09:20 PM [ 6 ]
بيوكيميائية


تاريخ التسجيل : May 2008
رقم العضوية : 7151
الإقامة : saudi arabia
الهواية : التصميمـ و التصميمـ
مواضيع : 23
الردود : 2844
مجموع المشاركات : 2,867
معدل التقييم : 33شدادة الوزير is on a distinguished road

شدادة الوزير غير متصل


مـجـمـوع الأوسـمـة : 7
الاحتفال بالعام السابع

الاحتفال بالعام السابع

العضو المميز

المشرفة المميزة

التواصل

الحضور المميز

المصمم المميز




^
^

ماعندو اووف ولحق يقراها <<ماشاء الله

,’

تم أخذ نسخة .. بس يارب ماتكون تحزن ..قلوبنا مو ناقصة

اسم الرواية ..يخلي الواحد يتفاءل ^_^

Go On

ترووفه ويديكي العافية و تكمليها

,’


توقيع : شدادة الوزير
.
الأعلى رد مع اقتباس
قديم 25 Oct 2009, 09:34 PM [ 7 ]
عضو متميز


تاريخ التسجيل : Feb 2006
رقم العضوية : 1001
الإقامة : saudi arabia
الهواية : القراءة والسفر
مواضيع : 61
الردود : 1585
مجموع المشاركات : 1,646
معدل التقييم : 207مطارد سراب has a spectacular aura aboutمطارد سراب has a spectacular aura aboutمطارد سراب has a spectacular aura about

مطارد سراب غير متصل


مـجـمـوع الأوسـمـة : 5
وسام المؤسس لعام 1435

المشاركة في الاحتفالية السنوية

الكاتب المميز

عضو مخلص

التواصل






قــــــــــــــــــــارئ فقــــــــــــــط



توقيع : مطارد سراب

لا تتعلقوا بي فأنا عابر سبيل !
الأعلى رد مع اقتباس
قديم 25 Oct 2009, 11:10 PM [ 8 ]
عضوة متميزة


تاريخ التسجيل : Oct 2006
رقم العضوية : 1959
الإقامة : saudi arabia
مواضيع : 186
الردود : 4155
مجموع المشاركات : 4,341
معدل التقييم : 222شموخ شدادية has a spectacular aura aboutشموخ شدادية has a spectacular aura aboutشموخ شدادية has a spectacular aura about

شموخ شدادية غير متصل


مـجـمـوع الأوسـمـة : 14
فعالية طلباتك أوامر

فعالية طلباتك أوامر

المشاركة في احتفال المنتدى

فعالية تذكر واتربح

الاحتفال بالعام السابع

الاحتفال بالعام السابع

عضو مخلص

كيدهن عظيم

فعالية لقطة ومقاديرها

الخطوط الشدادية




ماشاء الله ياترف
أحب الشيء الحصري
بقسمهما على اسبوع عشان ما أحترق وانتظر الخميس
أخذت عبرة من حاتم


توقيع : شموخ شدادية



فَـآنـِيَة ْ !
مَهْمَا طـَآلَتْ ...
سّآعَاتــُهَآ وَأَيـَّامـُهّا وَشُهُورُهَا وَسـِنِينِهَا !

الأعلى رد مع اقتباس
قديم 25 Oct 2009, 11:32 PM [ 9 ]
شاعر


تاريخ التسجيل : May 2006
رقم العضوية : 10390
الإقامة : saudi arabia
الهواية : الغياب
مواضيع : 688
الردود : 19496
مجموع المشاركات : 20,184
معدل التقييم : 2155رعد الجبوب has a reputation beyond reputeرعد الجبوب has a reputation beyond reputeرعد الجبوب has a reputation beyond reputeرعد الجبوب has a reputation beyond reputeرعد الجبوب has a reputation beyond reputeرعد الجبوب has a reputation beyond reputeرعد الجبوب has a reputation beyond reputeرعد الجبوب has a reputation beyond reputeرعد الجبوب has a reputation beyond reputeرعد الجبوب has a reputation beyond reputeرعد الجبوب has a reputation beyond repute

رعد الجبوب غير متصل


مـجـمـوع الأوسـمـة : 12
فعالية رضاب القوافي

فعالية رضاب القوافي

يوميات الأعضاء

يوميات رمضانية

عضو مخلص

المراقب المتميز

مشارك في مسابقة القرآن الكريم

العضو المميز

وسام الربيع

المشرف المميز





ما شاء الله تبارك الله بكل صراحه ابداااااع
الله يوفقك في هذا المجال الي انتي متميزه فيه

روايه رائعه لكي كل الشكر


توقيع : رعد الجبوب
,
| استغفر الله واتوب إلية

بعيد عن هذا
الأعلى رد مع اقتباس
قديم 26 Oct 2009, 12:44 AM [ 10 ]
عضو متميز


تاريخ التسجيل : Oct 2007
رقم العضوية : 9692
الإقامة : saudi arabia
الهواية : ..
مواضيع : 161
الردود : 6249
مجموع المشاركات : 6,410
معدل التقييم : 797إحساس واثق is a splendid one to beholdإحساس واثق is a splendid one to beholdإحساس واثق is a splendid one to beholdإحساس واثق is a splendid one to beholdإحساس واثق is a splendid one to beholdإحساس واثق is a splendid one to beholdإحساس واثق is a splendid one to behold

إحساس واثق غير متصل


مـجـمـوع الأوسـمـة : 10
مسابقة الشدادين الكبرى

المراقب المتميز

وسام لمن الكأس؟

فعالية تذكر واتربح

الاحتفال بالعام السابع

الاحتفال بالعام السابع

الإداري المميز

العضو المميز

المشرف المميز

التواصل




شخصيات تحمل الكثير من المعاني

الحب

الوفاء

الطيبه

الغيره

الحقد

الحسد

تختلف كل شخصيه عن اخرى في التفاصيل

و

لكن جميعها تكون قصه ادهشتني جدا

تحكي واقع و صراع حضارات

الكائن بين المدينه و القريه قديماً

ترف

في انتظار البقيه


توقيع : إحساس واثق

لكم حرية الكتابة هُنا
https://mukh1id.sarahah.com/
الأعلى رد مع اقتباس
إضافة رد
الذين يشاهدون محتوى الموضوع الآن : 1 ( الأعضاء 0 والزوار 1)
 
المواضيع المتشابهه
الموضوع كاتب الموضوع المنتدى مشاركات آخر مشاركة
يا ما أسهل الدنيا :: مهما تعاندنا {الفصل التاسع} تــرف كتّاب المنتدى في القصص والرواية الأدبية 14 04 May 2011 09:56 AM
يا ما أسهل الدنيا :: مهما تعاندنا {الفصل السابع} تــرف كتّاب المنتدى في القصص والرواية الأدبية 22 13 Feb 2010 06:43 PM
يا ما أسهل الدنيا :: مهما تعاندنا {الفصل السادس} تــرف كتّاب المنتدى في القصص والرواية الأدبية 17 13 Feb 2010 06:38 PM
يا ما أسهل الدنيا :: مهما تعاندنا {الفصل الخامس} ‏ تــرف كتّاب المنتدى في القصص والرواية الأدبية 14 13 Feb 2010 06:18 PM
يا ما أسهل الدنيا :: مهما تعاندنا {الفصل الرابع} تــرف كتّاب المنتدى في القصص والرواية الأدبية 20 13 Feb 2010 06:17 PM
أدوات الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

09:29 AM
Powered by vBulletin® developed by Tar3q.com