..:.. مرحباً بك في شبكة الشدادين الرسمية ، ضيفنا الكريم يسعدنا دعوتك للانضمام والمشاركة معنا .. اضغط هنا لتسجيل عضوية جديدة ..:..


العودة   شبكة الشدادين > المنتديات الشعبية > بحور القوافي > المواهب والمحاولات الشعرية
 
أدوات الموضوع
إضافة رد
  [ 1 ]
قديم 10 Sep 2006, 03:23 AM
عضو متميز

بدوي فاهم غير متصل

تاريخ التسجيل : Jan 2006
رقم العضوية : 843
الإقامة : saudi arabia
الهواية : تسلق المرتفعات والتنزه في الأدغال
المشاركات : 3,295
معدل التقييم : 25
الملف الشخصي للكاتب
إضافة تقييم
الرد على الموضوع
ارسال الموضوع لصديق
طباعه الموضوع
تبليغ عن الموضوع
كيف تتعلم الشعر بسهوله ...؟؟!!



بسم الله الرحمن الرحيم

بقلم الشاعر الحي (( يوسف الشقران )) ابوعيسى

نظرت إلي بعض الكتابات حول نظم القصيده
وجدت انه بالاضافه إلى الأخطاء العديده في هذه المواضيع
أنها تتسم بالتعقيد للشاعر المتمكن قبل المبتدئ او من لديه رغبة لتعلم النظم

وبعد الاستعانه بالله

سأبدأ هنا سلسله دروس بعنوان

(( تعلم الشعر بسهوله ))

وهي اجتهاد شخصي بحت ابتعدت فيه قدر الامكان عن التعقيد
وابتكرت بعض الامور وكتبت أبيات وقصائد خصيصا لتوضيح بعض النقاط فيه

وستكون مواضيعنا كالآتي :

- كيف تكتب القصيده ؟؟ - ظوابط مهمه للكتابه الشعريه - خطوات عمليه لكتابه الشعر
- الفكره والقصيده - ماهي القافيه ؟! - المفرده واهميتها - الوزن بشكل صحيح

هذه السلسله موجهه لمن لديه رغبه حقيقيه ليتعلم نظم القصيده المقفاه الموزونه

وكذلك سيجد من يجيد الوزن والقافيه مايفيده ولن أطيل أكثر بالمقدمه



وباسم الله نبدأ



الموضوع الأول



كيف تكتب الشعر؟؟؟



تحتاج الي:

1- فكره .

2- مفرده (حاول تكون المفردات اللي تستخدمها سهله ومفهومه ولاتعقد الامور)

3- قافيه ( لاتفكر فيها في البدايه راح تجي بروحها بس بعد البيت الاول التزم علي الاقل بالحرفين الاخيرين ).

4- وزن ( لاتحاتي ) .


الخطوات:

1- اختر الفكره:

مثال :

(ابي اكتب للمنتدي ومولاقي كلام اقوله)

شلون اصيغ هالفكره ؟!؟!؟؟!؟!

اسال نفسي سوال شنو ممكن اقول؟!؟!

شلون ابدا ؟!؟!؟!

وشنو القافيه اللي اختارها ؟!؟!؟


- اجاوب

اول شي انسا مساله القافيه راح تجي بروحها
اهم شي فكر باللي ممكن تقوله حتا الوزن انساه وعبر عن اللي بخاطرك!!!

شلون ؟؟؟!

انت ودك تكتب للمنتدي بس مو لاقي كلام تقوله

قول مثلا :

ودي اكتب لي كلام ومالقيت اللي اقوله ؟؟!؟!!!

بدايه لشطر بيت حاول تكمله بنفسك
المطلوب انك تسترسل بالكتابه بس
لاتنظر للوزن في البدايه
الوزن راح يظبط مع الممارسه
بس شلون اظبطه من غير تعقيد او التزام بالتفعيله وبحور الشعر مثل



فاعلاتن مستفعلن فاعلاتن

او


فعلن فعلن فعلن فعل

وهلم جره


الاجابه سهله

في البدايه حاول تغنيها واذا جت بالغناء سهله وسلسه
فهي اقرب انها تكون موزونه

وحاول باغاني مثل :

لمني في محجر عيونك لراشد الماجد

او اسمحيلي يالغرام لمحمد عبده

او تناسيني بنفس الموعد اللي به ذكرتيني لمحمد عبده

وانا اخترت هالاغاني بالذات لان كل وحده فيهم تخدم وزن معين

ومو بالظروره هالاغاني

الاغنيه اللي تبيها
المهم شيلها بطاروق تفضله وترتاحله


بالنسبه للقافيه

حاول تكون نهايه البيت من حرفين او اكثر


مثال :

(ودي اكتب قصيده في حب الوطن الكويت)

شلون اصيغها ؟!؟!

انت تحب الوطن؟!؟!
قول مثلا



ودي اكتب لك قصيدة حب ياكويت وماقدرت اكتب=لقيت اصعب مواضيع الهوى كلمات فـي حقـك


لاحظ ان الشطر الاول مو موزون حاول اتغنيها

حاول اتغنيها بنفس لحن تناسيني لمحمد عبده
تناسيني بنفس الموعد اللي به ذكرتيني .............
ماراح تغنيها بسهوله
حاول تصلحها



ابي اكتب قصيدة حب ياكويت وعجزت اكتب=لقيت اصعب مواضيع الهوي كلمات في حقك


حاول تغنيها وراح تمشي معاك ميه بالميه

او ممكن اقول :


احبك ياكويت العز ياتاج الفخر والطيـب=احبك وارخص الغالي وابيع الروح لترابك

وعلي هالمنوال كمل

ولاحظ انك في البدايه ما اخترت قافيه
لكن هالقافيه راح تلتزم فيها بالابيات اللي راح تكتبها بعدين


ملخص الكلام

اختار الفكره واكتبها بطريقتك باي شكل كان
وكمل القصيده كامله مع الالتزام بالقافيه
وفي الاخر حاول توزنها مثل ماوضحت في البدايه




ظوابط مهمه للكتابه الشعريه

الموضوع هذا ماراح يفيدك
الا لما تكون طبقت الكلام اللي بالموضوع اللي قبله


واذا انت ماقريت الموضوع الاول اللي بخصوص

(كيف تكتب شعر)

فما راح يفيدك هالموضوع وراح اتضيع وقتك



الزبده :

بالموضوع الاول تعلمنا شلون نكتب شعر !؟!؟!

طبعا ماكو شي بدون ممارسه

ولا تتوقع انك قريت معلومه خلاص صرت تعرف لا

اسال نفسك لما تعلمت القراءه والكتابه

كم اخذت من وقت وممارسه علي ماعرفت تقرا وتكتب عدل
( انا عن نفسي اكثر من سنه )

واسال نفسك وانت قاعد تكتب علي الكمبيوتر هالسوال
هل انا اكتب الحين بالكمبيوتر بنفس صعوبة وسرعة اول مره ؟؟!؟!

ما اعتقد

لان كل شي مع الممارسه يكون اسهل ( حتي كتابة الشعر )


نرجع للموضوع

انا راح افترض انك قريت وطبقت اللي بالموضوع الاول

والنتيجه هنيه اهي انك الحين تقدر تكتب كلام موزون ومقفي

(هذا طبعا مع الممارسه والتطبيق!!)

لكن

هل الكلام الموزون والمقفى شعر ؟؟!؟!؟!؟!


طبعا لا


مثال علي هالشي
وهي سالفه معروفه عن واحد وفروا له كل الظروف انه ايصير شاعر
وقعدوه بمكان حلو ماء وخضره ووجه حسن وقالوله قول شعر
شوفو شنو قال


وكاننا والماء من حولنا =قوم جلوس حولهم ماء

؟؟؟؟

بالله عليكم هذا كلام ؟؟؟


اللي ابي اقوله ان مو كل كلام موزون مقفي شعر
لان الشعر مشاعر تترجم بصور جماليه واضحه
وانتبه لكلمة واضحه اهنيه
ولحد ايقولي لا المعنا في بطن الشاعر
لا هالمقوله كانلها مناسبتها وغير صحيحه

المهم

انت تعرف تكتب كلام موزون ومقفي
( وهذا شي خلصنا منه)

وينقصك اهنيه انك اتعبر عن مشاعرك
واللي يدور براسك وببساطه
وراح ايكون هالكلام الموزون المقفي المعبر المفهوم الواضح

شعر

بس ؟!؟!؟!؟!

لا مو بس

في امور ثانيه

( وهذا اللي خلاني اكتب الموضوع )

امور ثانيه لازم الكاتب يحاول يلتزم فيها
وانا اقول ايحاول
مو غصب


اتبع الاتي :
1-ابتعد عن الكلام اللي يمس الدين و والمقدسات

2- استخدم كلام مفهوم ( يعني مو تدور كلام قديم مو مفهوم وتكتبه)

3- استخدم معجمك الخاص ( راح اشرحها لكم )

4- عبر عن نفسك وبس ( لاتفكر براي الاخرين )

5- لاتناقظ نفسك وواقعك بصوره غلط ( هم راح اشرحها )

6- لاتكرر القافيه

7- لاتكرر الالفاض اكثر من اللازم

8- اكتب وانسا واي فكره تطري علي بالك سجلها ولو بكلام عادي هذا اذا مو مستعجل


نقاط شكثر علي الفاضي صح ؟!

( لا موصح )


نبدا من الاول مع الشرح :

1- ابتعد عن الكلام اللي يمس الدين و والمقدسات
واعتقد هذي الوحيده اللي ماتحتاج للشرح


2- استخدم كلام مفهوم ( يعني مو تدور كلام قديم مو مفهوم وتكتبه)
لان البعض يدور وين الكلمه القديمه ويحطها
يا اخي الشعراء القديمين كانوا يستخدمون الكلام الدارج بحياتهم اليوميه
وهذا اللي خلاهم يتميزون
( ماراح ازيد كلام اهنيه لان يمكن اطب )


3-استخدم معجمك الخاص ( راح اشرحها لكم)
لما تكتب استخدم الكلام اللي انت تتكلم فيه لا تتعمد تستخدم لهجه مو لهجتك
ولا كلام مو من بيئتك مثال علي هالكلام

تخيل شاعراو خل نقول تخيل شاعره مثقفه
وتعليمها عالي وحضريه وفري قالت هالبيت :


كل الاماني غاديه في يميني =مير الظروف القاسيه ضيعتها

علي طول راح تتساءل (ويمكن تشك)
وتقول من وين كلمه مثل غاديه وكلمة مير ؟؟؟؟!!!!!


يعني شفيها لو انها قالت


كل الاماني صايره في يميني =بس الظروف القاسيه ضيعتها

يعني استخدم وابحث في معجمك الخاص وكلامك اليومي العادي
لا ترد لكلمات غريبه عليك


4- عبر عن نفسك وبس ( لاتفكر براي الاخرين)

لما تكتب عبر عن نفسك
وتاكد اذا كنت عفوي وصادق بتعبيرك انه كلامك بيكون احلي
ولكن اذا كنت تبي يقال عنك الشاعر الفلاني
فاقترح انك تترك الكتابه


5- لاتناقظ نفسك وواقعك بصوره غلط ( هم راح اشرحها )

هذي بابداها بمثال وهو

تخيل مثلا ان هالابيات قالها شاعر مليونير او أمير ؟؟؟!!!!!!



شف حالتي فقران والحال دوني= والجسم من زود الفقر زاد سقمه
اقعد مع السكه وانادي عطوني=من مال ربي يالاجاويد لقمه

(راح تطق علي راسك وتقول الله يالكذب )

ولحد يقولي المعنا كيت وكيت انا لي الظاهر

وهذا اللي يفترض وانت تكتب تتبعه
يعني
بعد الكتابه الاوليه للقصيده
فكر بمعنا الكلام وتفسيره وبعدين اعتمده


6- لاتكرر القافيه
وهذي واضحه يعني لو عندي بيت شعر مثلا

اقعد مع السكه وانادي عطوني =من مال ربي يالاجاويد لقمه

مايصير نفس القافيه بالابيات الثانيه ( عطوني ) او ( لقمه ) !

وان حدث فيكون ضعف

او لاغراض متعمده ومقصوده بس



7- لاتكرر الالفاض اكثر من اللازم

لان تكرار اللفض الواحد بكثره يبعث الملل وكانك مو لاقي الا هالكلمه تعيد وتزيد فيها
يعني مره قول احبك ومره اهواك ومره متيم ومره اشتاقلك
كلها تعبر بطريقه او باخري عن الحب ولكن اللفظ اختلف


8- اكتب وانسا واي فكره تطري علي بالك سجلها ولو بكلام عادي
( هذا اذا مو مستعجل )

وهذا من واقع تجربه سو اللي اقولك علي مسؤوليتي





في الموضوعين اللي قبل عرفنا شلون نكتب شعر
( هذا المفروض يكون )


!!!!!

بس كل اللي فات كلام نظري

يعني نظريا صح

يفترض بان اللي طبق الكلام في الموضوع الاول والثاني
خلاص صار يكتب شعر

بس هالكلام لازال نظري !!؟؟!

انا ابي فعليا لما امسك قلم واكون ناوي اكتب شعر
هل راح اقدر اكتب شعر ؟!؟!؟!؟!؟




نعم تقدر




وهذا هو موضوعنا هالمره


وهو خطوات عمليه لكتابة الشعر

( وانا بطبيعة الحال افترض انك خلاص استوعبت اللي بالموضوعين اللي قبل )

خلنا اول شي نتفق علي هالامر واللي اهو

ان القصيده قسمين


1- الفكره (خمسين بالميه )

2- الصياغه والوزن والقافيه و .......الخ ( خمسين بالميه )

!!!!

هذا اللي انا شايفه


مسألة الفكره ما اقدر اسوي فيها شي
هذي ترجع لك انت
وترجع لحياتك وترجع للموضوع اللي تبيه


ولكن الامور الثانيه ممكن نتعامل وياها



الكتابه العمليه للشعر

وهالموضوع راح نقسمه لمرحلتين


1- الاستعداد والتدريب

2- مباشرة الكتابه



المرحله الاولي:

1- الاستعداد والتدريب

لما تبي تلقي محاضره او درس عن القدس مثلا
لازم تقرا تاريخ القدس
وتقرا السياسه وتجهز امورك ..... صح ؟!!!؟؟!


قبل لانكتب



ياليت اتحاول قد ماتقدر تسوي هالامور :

1- اقرا شعر فصيح
( اول شي لاحمد شوقي والشعراء اللي عاصروه وبعدين اقرا المعلقات حتا لو مافهمتها )

2- اقرا واسمع لهالشعراء
(خلف العتيبي - سليمان الهويدي - خالد الفيصل - محمدبن راشد المكتوم - سعود بن بندر - عبدالله الفيصل )بس هذولا وانا مختارهم بالذات متعمد مو معناتها مافيه غيرهم لا فيه
و يمكن افضل بس ابيك تسمع كلامي
واعتمد.


وارجووووك
اترك شعراء هاليومين لانهم راح يخربون مستواك
( شعراء هاليومين ذبحونا بهالكلام
نعنبوها ونعنبو جدها ويلعن خيرها والله ياخذ خالتها....
مادري أي غزل كله شتايم )



3- درب نفسك علي كتابة الشعر !!

شلون ؟!
انا اعطيك هالطريقه وحاول تسويها

اختار اي بيت شعر وحاول تكتب علي نفس منواله

وعلشان تسهل الامر علي نفسك
اكتب الكلمات اللي تخدم قافيتك براس الصفحه عشان تكون حاضره قدامك


مثال :
والبيت لسعود بن بندر الله يرحمه


ياليتني بينـك وبيـن المضـره=من غزة الشوكه الي سكرة الموت


براس الصفحه اكتب الكلمات اللي تساعدك

مضره : مسره - مبره - جره - مره - مجره .......الخ

موت : فوت - صوت - حوت - قوت - مكبوت - .........الخ


واقعد ركّب



ناديتلـك ياغايتـي الـف مــره=وان فات فينا الفوت ماينفع الصوت
ماشفت ياعمري بعمـري مسـره=والضيم فيني طول الازمان مكبوت

وهلم جره

تحدى نفسك بالكتابه وحاول تكتب 4 او 5 ابيات نفسه
واذا خلصت اختار بيت غيره واكتب علي شاكلته
( وكرر هالعمليه لان الممارسه مهمه)


المرحله الثانيه :


قول باسم الله


قبل لاتبدأ


- تاكد انك اذا لقيت الفكره ف خمسين بالميه من القصيده خلص

- حط في بالك ان الكتابه امرها سهل مو شي معقد

- اعتقد وآمن بانك تقدر تكتب شعر

- تأكد ان المساله مو الهام او وحي ينزل عليك

كل المساله حاله من الاستعداد الذهني والنفسي والعاطفي
فهيئ الجو المناسب للكتابه بعدين راح تلقا الامر عادي
يعني جو الهدوء والمكان الحلو والبراد ...

وصدقني مساله الجو المناسب بعدين تصير مالها داعي
يعني انا
ما اكتب الا وعندي ناس مزعجين يسولفون
او وانا اطالع مباراة كره قدم


المهم


صل علي النبي



2- مباشرة الكتابه

أ - الكتابه الاوليه
ب - تعديل المعاني
ج - ضبط القافيه
د - ضبط الوزن
ه -اعتماد القصيده


وراح نتكلم عن كل نقطه بروحها :

أ - الكتابه الاوليه
(اكتب بالفكره اللي تبيها و لاتعقد الامور
ولا تركز حيل علي المعاني لكن حاول تكتب اللي في بالك
وحاول تسترسل قد ماتقدر
وكثر ماتستبسط الامر راح تلقاه بسيط )

(قول بسيطه ماتستبسطهاش) ===>> مالها شغل بالموضوع )

ب - تعديل المعاني
( يعني مثلا لاتذكر المؤنث او تأنث المذكر ولاتجمع المفرد او تثني الجمع
وانتبه للمعني اللي انت كتبته مو المعني اللي في بالك)


ج - ضبط القافيه
( والقافيه تكون من حرفين او ثلاثه في الغالب
وانتبه للتشكيل
مثلا كلمه يختلف بكسر اللام وكلمة اختلف بفتح اللام !!
صحيح ان اخر ثلاث حروف نفس الشي بس التشكيل للحرف اللي قبل الاخير عفس الدنيا وخلاهم مايضبطون .
و ممكن تتبع الطريقه اللي قبل شوي
انك تكتب الكلمات اللي تساعدك براس الصفحه وتستخدم هالكلمات )


د - ظبط الوزن
( مسالة ظبط الوزن راح تكتسبها مع الممارسه
لكن الحين حاول تغنيها بنفس اللحن راح تجي معاك
و بالموضوع الاول سولفنا عنه)


هـ -اعتماد القصيده
( اذا كتبت قصيده واعجبتك اكتبها وانساها علي الاقل اسبوع وبعد الاسبوع اقراها طبق هالمسأله ولا راح تندم صدقني)



وانت تكتب

- حاول تبتعد عن القوافي الصعبه لانها راح تاذيك


- ولاتستعجل مسالة اتقان الوزن كل شي بالممارسه



بعد ماتكتب

- ابحث عن اخطاءك وانقد نفسك بنفسك

- قارن أي قصيده تكتبها بقصيده مشابهه لها

- اعرض محاولاتك علي ناس تثق انهم ينصحونك ولاتزعل من النقد ومو بالضروره ان اللي ينقدك شاعر يكفي أي متذوق للشعر انه ينقدك اهم شي يكون صادق


( وللعلم النقد فيه بناء وفيه غير بناء البناء هو اللي يقولك عندك خطا كذا وكذا ويبين شنو الخطا ووين صايراذا قدر والغير بناء اهو اللي يقولك انت عندك اخطاء ولايقول شنو او يقول لا فيها نواقص ولا يبين او يقول شنو هالنواقص )


شوف


القصيده اساسها الفكره

فاذا الفكره اخذت 4 ابيات في التعبير عنها

ف هالاربعه كفايه مو بالظروره اتمطط الفكره عشان اتصير طويله


عط كل شي قدره

ياما ابيات مفرده وبروحها تسوالها قصايد من مية بيت



4- الفكره والقصيده

بنكمل معاكم هالمواضيع وراح افترض انك قريت وطبقت اللي فات

واذا ماقريت المواضيع اللي قبل اقراهم


الفكره والقصيده :

الموضوع هذا ماهو إلا اضاءه لتوضيح الفكره بالأساس ومن باب المعرفه بالشئ
ومن باب قناعتي ان اي امر لما اعرف اجزاءه ، وشلون مركب وطريقة تكوينه راح يكون التعامل معاه اسهل وابسط .

الكثيرين يعتقدون إن الفكره مجرد موضوع للقصيدة وبس !!؟

لكن اقول
ان الفكره هي المخطط العام للقصيده اللي يبين الغايه والهدف منها ويوضح تسلسلها وطريقة بنائها

واذا انت حددت هالامور ,

مو المفروض انك تسوي مخطط يبين تصورك النهائي !؟!!!


انا ما احب اتفلسف او ادخل في متاهات مالها داعي
ولكن الموضوع هذا بالذات مجرد مافكرت فيه
لقيت افكاري تشعبت وتنوعت بشكل خلاني اتردد اني اكتبه بالاساس
ناهيك عن اني استفيض فيه

فلذلك وعلشان نصيب الهدف من هالموضوع ومن غير لانضيع


فراح نتناول هالموضوع كالتالي وبالظبط بهالترتيب :

1- مفهوم الفكره

2- أقسام الفكره

3- عرض أمثله

4- صياغة قصيده من الصفر



خلك معاي




1 – مفهوم الفكره:


قلنا في الموضوع اللي قبل هذا إن الفكرة تمثل خمسين بالميه من القصيدة<<<< قناعه كاملة


أول شي لازم تعرف ان الفكرة هي أساس للقصيدة

( وأساس الفكرة هو أنت)

سواء تبي تقول شي, توصف شي, أو تعبر عن أي شي

- لا تتوقع إني أعطيك فكره جاهزة وأقولك تفضل اكتب !! ما اقدر

- كل اللي اقدر عليه إني أعطي شرح عام وخطه للتفكير عشان تعرف أنت وين تمشي وشنو قاعد تسوي بس



شنو أو ماهي الفكرة ؟؟(حلوه ماهي )

الفكرة هي المادة أو الإحساس اوالتصور الواضح اللي تبي تكتبه

وخل ننتبه لهالشي ان الفكره مو معناتها إني أبي اكتب غزل، مدح ، هجاء، وصف، فخر.........الخ

(يعني مجرد إني بكتب قصيده غزل مو فكره ) !!


إنما الفكره مثل ماقلنا هي:

المادة أو الإحساس اوالتصور الواضح اللي تبي تكتبه

واهم شي ((( الواضح )))

ـــــــــــــــــــــــــــــــــــــ


2-اقسام الفكره
راح نقسم الفكره إلى 3 أقسام:

1- فكره أساسيه
2- فكره فرعيه
3- فكرة صياغه



1- الفكره الاساسيه:
وهي الخط الرئيسي للقصيده او مجموعة ابيات فيها وهي مثلا اني بارسل رسالة عتب لصديق
او ابي اعبر عن إحساس معين بخاطري او موضوع ابي اكتبه خلال قصيده ؟!؟!


2-فكره فرعيه:
وهي فكره البيت بحد ذاته او الصوره الشعريه الخاصه فيه اوالخاصه بمجموعة أبيات شعرية واللي تخدم المعني العام
و احيانا
واقول احيانا ممكن تنفهم بمعني ثاني لو قرأت البيت بدون باقي القصيدة
يعني مثلا قصيده مدح لشخص معين .......
ومن ضمن الأبيات شبهته بنور الشمس ! (هذي فكره فرعيه )


3- فكرة صياغه:
وهي الحبكة في القصيدة او طريقة العرض والسرد (وغالبا الابداع يكون اهنيه)

كلام مو مفهوم صح ؟!!


( إذا ما استوعبت هالنقاط لا تنزعج راح نشرحها بالامثله وراح تستوعبها عدل )



تراهن ؟؟؟!!!






3- عرض أمثله

خلال الامثله اللي راح نذكرها راح تبين اقسام الفكره وطريقتها انشاء الله

المثال الاول:
ابيك تقرا هالقصيده بشكل سريع
وبعدين راح انعلق عليها


عن مستواي اليوم تسأل شالاسباب =والاسئله في محتواها تشابه
دكتور تسأل والسبب عين واهداب=يوم امتحاني كنت احاتي غيابه
يوم امتحاني عشت في حلم كذاب= صرت اكتب اشعاري مكان الاجابه
وشلون تعبير الألم فيه جذاب = منية حياتي شوف حضرة جنابه
في ضحكته يعزف علي عود زرياب= يرفع بضحكِه كل معنى الكآبه
لو عذربوني مايهم التعذراب =الواقع اني عاشقن للذرابه
دكتور تسألني !! أنا مسكر الباب= حتى لدروسي ما ألقَّي مجابه
في هالمثال

الفكره الاساسيه :
غزل بطريقة اجابه علي سؤال دكتور بخصوص المستوى الدراسي

فكره فرعيه :
تشبيه الضحك بعزف العود
في ضحكته يعزف علي عود زرياب) <<<< ويمكن تكون هناك افكار فرعيه اخري)


فكرة الصياغه :
الجواب عن تدني مستوى الامتحان خلال التعذر بوجود محبوبه غائبه وصولا إلي عدم التفكير بالدروس اصلا


مثال ثاني وراح نشرحه اكثر

اقرا هالقصيده شوي شوي
وبعدين اقرا الشرح :


لو كان لون الورود اسـود =والشمس بالليل مألوفـه
والثور فوق الشجر غـرد =والفيل يزحف علي الطوفه
أو الفقع بالبحـر يوجـد=أو طارت أسراب منتوفـه
والصين كانوا عدد مفـرد =والثلج في صيفنا انشوفه
او عمر الانسـان يتجـدد =او السما بخيـط ملفوفـه
وابليـس للخيـر يتعمـد = والجن بالطيب معروفـه
او بوش يرتاح لاسم احمد = او اليهودي نسـى خوفـه
لايمكن العـرب تتوحـد =وان صار ماقيل بحروفـه

لو حاولنا نشرح هالقصيده

راح نلقا وبكل بساطه ان الشاعر يبي يقول ان اتحاد العرب مستحيل وعلشان يقول هالشئ فاختار انه يعرض ويقول عدد من المستحيلات ويوصل بالنتيجه ان حتا ولو حدثت هذي المستحيلات فاتحاد العرب مستحيل


والخلاصه

ان اتحاد العرب مستحيل <<<<<<<<< فكره اساسيه

كل مستحيل ذكره الشاعر <<<<<<<<< قكره فرعيه

عرض المستحيلات والوصول الي النتيجه بالنهايه <<<<<<<<< فكرة صياغه



وبشكل ثاني:

حسب التقسيمات اللي اتفقنا عليها فيمكن نقول ان

الفكره الاساسيه هي :
اتحاد العرب مستحيل

الفكره الفرعيه:
في هالقصيده 14 فكره فرعيه
(ولاحظ ان كل نقطه فيها صوره مختلفه)
وهي بالترتيب :

1- لو كان لون الورود اسـود
2- لو الشمس بالليل مألوفـه
3- لو الثور فوق الشجر غـرد
4- لو كان الفيل يزحف علي الطوفه
5- لو كان الفقع بالبحـر يوجـد
6- لو طارت أسراب منتوفـه
7- الصين كانوا عدد مفـرد
8- الثلج في صيفنا انشوفه
9- عمر الانسـان يتجـدد
10- السما بخيـط ملفوفـه
11- ابليـس للخيـر يتعمـد
12- الجن بالطيب معروفـه
13- بوش يرتاح لاسم احمد
14- اليهودي نسـى خوفـه


فكرة الصياغه :
وهي طريقه الشاعر في انه عرض المستحيلات ووصل للنتيجه اللي يبيها
فالشاعر اهنيه بدا في

لو كان .....
وبعدين ؟!؟!!
الشمس بالليل مالوفه-الثور فوق الشجر .........الخ

واخر شي انتهت في :
لايمكن العرب تتوحد ..............


راح اكتفي بهالمثالين عشان مايطول الموضوع

ولو ان في بالي امثله ثانيه فيها فكره اساسيه وحده ولافيها أي فكره فرعيه وفكرة صياغتها هي نفسها الفكره الاساسيه
يعني مثلا سرد قصه بطريقة قصيده
(نفس قصيده امير الشعراء احمد شوقي اللي في بدايتها يقول برز الثعلب يوما في شعار الواعظينا ...)

ومثال ثاني مليان افكار فرعيه وفكرة الصياغه فيه رائعه
(في قصيدة ايليا ابوماضي اللي اولها – قال السماء كئيبة وتجهما)


عموما اذا ماكو فايده من هالكلام فانشاء الله راح تلقا بالنقطه الجايه فايده


5- صياغة قصيده من الصفر :

مثل ماقلنا قبل
اكتب موضوعك بتعبيرك العادي وبعدين رتبه :


الخطوه الاولي :
اكتب الموضوع اللي راح تصيغه بطريقتك وحاول تسترسل وتكتب قد ماتقدر

الموضوع مثلا :

( القصيده تتكون من ابيات شعريه والبيت الشعري يتكون من شطرين صدر البيت وعجز البيت ولازم يكون للبيت قافيه نلتزم فيها تتكون من حرفين في الغالب وطبعا لازم كل بيت يكون موزون حسب البحر اللي ماشيه عليه باقي القصيده ولازم نختار الالفاظ اللي تساعدنا في التعبير المناسب والدقيق قدر الامكان عن الفكره اللي نبيها لان الفكره بالنهايه هي محور القصيده وموضوعها وبطبيعة الحال يختلف الشعراء في تناولهم وصياغتهم ونظرتهم للافكار ويكون تميزهم في طريقة التصور الكامل لهالافكار )

الخطوه الثانيه :
حاول تجزئ افكارك يعني تحطهم بطريقة نقاط بهالشكل:

- القصيده تتكون من ابيات شعريه
- البيت الشعري يتكون من شطرين صدر البيت وعجز البيت
- البيت لازم يكون له قافيه نلتزم فيها
- القافيه تتكون من حرفين في الغالب
- لازم يكون موزون حسب البحر اللي ماشيه عليه باقي القصيده
- ولازم نختار الالفاظ اللي تساعدنا في التعبير المناسب والدقيق قدر الامكان
- الفكره هي محور القصيده
- يختلف الشعراء في تناولهم وصياغتهم ونظرتهم للافكار
- ويكون تميزهم في طريقة التصور الكامل لهالافكار


الخطوه الثالثه
حاول تفهم هالنقاط وتستوعبهم عدل وحاول تضيفلهم
وابدا ببيت منهم اذا قدرت
واذا ماقدرت لو شطر بيت
ومو بالظروره بنفس الوقت
واسال نفسك اذا كتبت شطر بيت او بيت
هل ممكن اصيغه بشكل احسن او لا ؟!؟!
بعد ماتكتب البيت الاول اللي مقتنع فيه


خلاص الجزء الصعب انتهى

(لان القافيه تحددت ولان البحر (الوزن) اللي راح تمشي عليه صار موجود)

حاول تكمل باقي الابيات علي نفس منواله ونفس قافيته ولحنه
ومو شرط يكون ترتيب ابياتك بنفس الترتيب اللي حطيته بنقاط ((اللي بالخطوه الثانيه))
لكن استخدم النقطه المناسبه واللي تشوف انها ماشيه حسب حاجتك


الخطوه الاخيره
اكتب القصيده وحاول تراجع معانيها وبعدين حاول تشيلها (تغنيها) بلحن ثابت واذا مشت بهاللحن حاول تغير اللحن كذا مره واذا لقيت انها ماشيه بسلاسه بالاغنيه فهي تماااام (بس مو تعوج لسانك تمشيها غصب) .

النتيجه النهائيه اللي طلعت معاي لقصيدتنا :


البيت له صدرن وعجز وينتهي في قافيه=يحكم بوزن ايكون واجب نلتزم في وزنته
الصدر فيه اول شطر والعجز شطره ثانيه=والقافيه حرفين او اكثر باخر شطرته
والوزن له رنة جرس لابد تطلع صافيه=لابد ينساب الكلام ابنزلته او رفعته
ولانسيت المفرده ماظن هذي خافيه =من صاغ بيت ايدور اللفظ الحسن في لفظته
واهم من هذا وذاك افكار تكتب وافيه= روح القصايد فكرها ولكل شاعر نظرته
احلي القصايد ماتميز في معاني كافيه =والبيت صوره مبدعه في فن ترسم حبكته


(مشكلتي انا طلعت معاي موزونه من البدايه وصدقني هالامر بالممارسه( واللي يقولك علم العروض والتفعيله قوله استرييييييييح) ولاشي غير الممارسه )


ولاتظن هالنتيجه راح تطلع معاك من اول او ثاني او سابع محاوله ..

ولاتظن انك بعد فتره من الممارسه راح تكون مظطر اتسوي هالخطوات كلها ..

بالعكس راح تلقا نفسك مباشره رايح للخطوه الاخيره


((وكل شي مع الممارسه يصير))


وآسف على الإطالة والتقصير


توقيع : بدوي فاهم
التعديل الأخير تم بواسطة بدوي فاهم ; 01 Apr 2007 الساعة 03:59 AM

رد مع اقتباس
قديم 10 Sep 2006, 03:51 AM [ 2 ]


تاريخ التسجيل : Nov 2005
رقم العضوية : 680
مواضيع : 210
الردود : 4465
مجموع المشاركات : 4,675
معدل التقييم : 25متفائل is on a distinguished road

متفائل غير متصل




اخوي

بدوي فاهم

دروس في درس سهل وسلس

في اعتقادي ان الموهبه تلعب الدور الاساسي وهذه الموهبه لاتكاد تكتسب

بكل سهوله الابالحاح شديد وتدعمه رغبة عارمه

شكرا استاذنا على هذالشرح و الدروس المهمه وخاصة لمن يملك تلك الموهبه

تحياتي


الأعلى رد مع اقتباس
قديم 10 Sep 2006, 09:46 AM [ 3 ]
عضو مبدع


تاريخ التسجيل : Mar 2006
رقم العضوية : 1214
الإقامة : saudi arabia
مواضيع : 18
الردود : 374
مجموع المشاركات : 392
معدل التقييم : 25the surgeon is on a distinguished road

the surgeon غير متصل




موضوعك رائع اخ بدوي فاهم


بس يحتاج وقت للقراءه


لي عوده ان شاء الله


توقيع : the surgeon
OMAN_VOICE


:thumbup1:
الأعلى رد مع اقتباس
قديم 10 Sep 2006, 10:13 AM [ 4 ]
عضو متميز


تاريخ التسجيل : Jul 2005
رقم العضوية : 291
الإقامة : saudi arabia
الهواية : إِحْتِضاّن الـ غَ ـيمَ ..!!
مواضيع : 669
الردود : 16167
مجموع المشاركات : 16,836
معدل التقييم : 29عـــلاوي is on a distinguished road

عـــلاوي غير متصل




أخوي الغالي بدوي فاهم مووضووع رآئع جداَ


بس المشكله الي عندهـ موهبه في الشعر مو قادر يقول لاحـد



يا كثر الدفاتر اللي عندي مليانه ولا اقدر انشر منها شي




يعافيكـ ربي


توقيع : عـــلاوي
مثواك الجنهه يا ابو حسام
الأعلى رد مع اقتباس
قديم 10 Sep 2006, 04:45 PM [ 5 ]
نائب المشرف العام


تاريخ التسجيل : Mar 2005
رقم العضوية : 106
الإقامة : saudi arabia
مواضيع : 478
الردود : 33237
مجموع المشاركات : 33,715
معدل التقييم : 25عبدالله الشدادي is on a distinguished road

عبدالله الشدادي غير متصل




مشكور اخوي بدوي على نقل الموضوع

المفيد جداً نتمنى منك تثبته حتى يستفيد منه الجميع

وبالنسبه للموضوع جداً رائع وشرح مبسط ومفهوم

تحيتي لك


توقيع : عبدالله الشدادي
الأعلى رد مع اقتباس
قديم 10 Sep 2006, 09:33 PM [ 6 ]
عضو متميز


تاريخ التسجيل : Sep 2005
رقم العضوية : 503
الإقامة : saudi arabia
مواضيع : 220
الردود : 8325
مجموع المشاركات : 8,545
معدل التقييم : 25البرنس is on a distinguished road

البرنس غير متصل


مـجـمـوع الأوسـمـة : 5
المشاركة في احتفال المنتدى

الاحتفال بالعام السابع

الإداري المميز

التواصل

عضو مخلص




أخوي بدوي فاهم

يعجز اللسان عن الشكر والأمتنان لك أهي المعلم

لقد أبدعت بموضوعك هذا الذي فيه فائدة للجميع

والله يعطيك العافيه على ما تقوم به من أعمال


توقيع : البرنس









الأعلى رد مع اقتباس
قديم 11 Sep 2006, 09:03 PM [ 7 ]
مؤسس شبكة الشدادين


تاريخ التسجيل : Jan 2005
رقم العضوية : 1
الإقامة : saudi arabia
الهواية : رياضة + كمبيوتر وبس
مواضيع : 2072
الردود : 91526
مجموع المشاركات : 93,598
معدل التقييم : 4981السلطان has a reputation beyond reputeالسلطان has a reputation beyond reputeالسلطان has a reputation beyond reputeالسلطان has a reputation beyond reputeالسلطان has a reputation beyond reputeالسلطان has a reputation beyond reputeالسلطان has a reputation beyond reputeالسلطان has a reputation beyond reputeالسلطان has a reputation beyond reputeالسلطان has a reputation beyond reputeالسلطان has a reputation beyond repute

السلطان غير متصل


مـجـمـوع الأوسـمـة : 8
فعالية ضوء عدسة

فعالية طلباتك أوامر

شكر وتقدير

فعالية مجموعات المنتدى

يوميات الأعضاء

التميز في دورة الفوتوشوب

شكر وتقدير

أجمل خط 1434 هـ




ما ظنيت والله إني بتعلم الشعر دايم

لكن الحمد لله قادر على التعبير من دونقوافي وأوزان

تسلم يديك يا مشرفنا الرائع

متمنياً من جميع الموهوبين الاستفادة مما طرحت.


توقيع : السلطان
الأعلى رد مع اقتباس
قديم 12 Sep 2006, 08:39 AM [ 8 ]


تاريخ التسجيل : Oct 2005
رقم العضوية : 597
مواضيع : 119
الردود : 1287
مجموع المشاركات : 1,406
معدل التقييم : 25شذى is on a distinguished road

شذى غير متصل




يعطيك الف عااافيه اخوي

كفيت ووفيت
تسلم ربي يخليك

تحيااااااااااااااااتي

توقيع : شذى

الأعلى رد مع اقتباس
قديم 13 Sep 2006, 06:37 AM [ 9 ]
عضو متميز


تاريخ التسجيل : Jan 2006
رقم العضوية : 843
الإقامة : saudi arabia
الهواية : تسلق المرتفعات والتنزه في الأدغال
مواضيع : 109
الردود : 3186
مجموع المشاركات : 3,295
معدل التقييم : 25بدوي فاهم is on a distinguished road

بدوي فاهم غير متصل




 
 
المشاركة الأصلية بواسطة : متفائل
اقتباس
 

اخوي

بدوي فاهم

دروس في درس سهل وسلس

في اعتقادي ان الموهبه تلعب الدور الاساسي وهذه الموهبه لاتكاد تكتسب

بكل سهوله الابالحاح شديد وتدعمه رغبة عارمه

شكرا استاذنا على هذالشرح و الدروس المهمه وخاصة لمن يملك تلك الموهبه

تحياتي


 
 
فعلا اخوي متفائل كما قلت (( تدعمه رغبة عارمه ))

شكرا لك على مرورك وإضافتك

تحياتي


الأعلى رد مع اقتباس
قديم 13 Sep 2006, 06:39 AM [ 10 ]
عضو متميز


تاريخ التسجيل : Jan 2006
رقم العضوية : 843
الإقامة : saudi arabia
الهواية : تسلق المرتفعات والتنزه في الأدغال
مواضيع : 109
الردود : 3186
مجموع المشاركات : 3,295
معدل التقييم : 25بدوي فاهم is on a distinguished road

بدوي فاهم غير متصل




 
 
المشاركة الأصلية بواسطة : the surgeon
اقتباس
 

موضوعك رائع اخ بدوي فاهم


بس يحتاج وقت للقراءه


لي عوده ان شاء الله

 
 
يا هلا اخوي الجراح

واتمنى ان الموضوع يفيدك

ويا هلا بمرورك وعودتك


الأعلى رد مع اقتباس
إضافة رد
الذين يشاهدون محتوى الموضوع الآن : 1 ( الأعضاء 0 والزوار 1)
 
المواضيع المتشابهه
الموضوع كاتب الموضوع المنتدى مشاركات آخر مشاركة
سلام يا الغربي اللي له مع الشعر صيت..في منتدى الشعر والقالات وأهل السلوم عمر ابن دويس المحاورة والألغاز الشعرية 10 02 Jan 2011 08:42 PM
موقع رائع يصغر الصور بسهوله واحجام مختلفه احلى حاجه قسم برامج الماسنجر وملحقاته 8 22 May 2009 08:33 PM
احفظ أسماء الله الحسنى بسهوله (مرتبة مع العدد) ... أبو عايض الشدادي المنتدى الاسلامي 9 12 Jul 2008 01:08 PM
نزل البرنامج التعليمي للغة المفضلة وتعلمها بسهوله الشامخ جديد المواقع ـ شروحات البرامج ـ المشاكل والحلول 8 10 Jun 2006 03:07 AM
الشعر ياللي تطلب الشعر موجـود أبو راكان بحور القوافي 9 12 Feb 2006 09:11 PM
أدوات الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

09:32 PM
Powered by vBulletin® developed by Tar3q.com