قصيدة في ارتفاع الأسعار

السلام عليكم ورحمة الله وبركاته ..
هذي قصيدة للشاعر عايض ابن سعود بن عياد الشدادي يصور فيها معاناة الشعب وخاصة الشياب من إرتفاع الأسعار أتمنى أن تنال إستحسانكم..
أترككم مع القصيدة ..

بديت بسم اللي خلقنا من الطين=ربي الوحيد اللي عليم بحالي
الوقت هذا شين وأشين من الشين=من يوم صار السعر أغلى الغوالي
السكر الماخوذ زايد ملايين=والرز صار يقول ياهملالي
منهو يقاوم غيبتي يامساكين=كل العرب يبكون يوم إرتحالي
والبن صاح يقول مالي عناوين=متجولن بين اليمن والشمالي
والمزرعة معاد فيها بساتين=يبس ورقها يوم غاب الخيالي
منع مطرها لجل كل الحسودين=ولولا البهايم كان وقف الهمالي
والناس ذولي كلبوهم حزينين=على إنخفاض البورصة والريالي
يوم الخسارة فل دار المجانين=ويوم المرابح يسهرون الليالي
نص المكاسب روحت في الفساتين=والنص الآخر مايكفي عيالي
الورع يبغى له جهاز إن سبعين=ويبغى شريحه شحنها براس مالي
ياويل حالي عندي عشرة بزارين=أكلو جميع اللي قعد من حلالي
وياحرمتي أرجوك لا لا تصيحين=ترى جميع اللي جرالك جرالي

وسلامتكم ..

صح لسان الشاعر على القصيدة

والله يعين المسلمين

واشكرك اخي على النقل

مودتي

سلمت يدك على النقل وصح لسان الشاعر
والله يرحم العباد والبلاد ويعطينا من فضله الواسع
وتقبل تحياتي

صح لسان شاعرها
وتسلم يمين ناقلها

صح لسانك وبيض الله وجهك ياعائض

الغريق سلمت يدك على النقل

صح لسانك

والله يزينها بزينٍ من عنده

كل الموده

صح لسان ابو سعود

وبيض الله وجهك يالغريق على النقل

تحياتي

أبو عزة الشدادي

صحت اناملك للنقل وصح إلسان أبو سعود

وصحيح والله إننا نعاني إلبارح رحت أشتري بطاطس أخبر بأربعه ريال لقيته ب 13 ريال وربي قامو يدخلون يدينهم في جيبونا وينهبونا وينك يا حكومتنا تكفين فكينا منهم ...

يا رب سترك

:؛:



قصيدة قمة في الروووعه ..

لامست واقع مؤلم ..وصورت حال و معاناة يعيشها الكثيرين ..!!

بيض الله وجهك عالنقل الرائع ..

وصح لسان شاعرها مليووون ولا يكفوون ..

الله يعدل الـــحال ..!!




:؛:

يا مرحبا بالخال عايض وقصيدته

غلا الأسعار مشكلة يعاني منها جميع المواطنين

نسأل الله العلي العظيم أن يهون على الجميع

صح لسانك وما قصرت

وألف شكر لك يا الغريب