قناعات إنما إيه !!

( 1 )


المثالية بهالزمن ما توكل عيش يعني لازم تكون همجي و جاهل عشان تسلك مع العالم


أحس فيه فرق واضح بين الناس المتعلمة و الناس الجاهلة بتعاملها في المواقف و تجاوبها مع الأحداث



( 2 )



فيه أشياء اعتقد بوجودها لكني لأ أضعها ذا أهمية قصوى في مجريات الحياة

مثلاً : العين ,, الواسطة ,, العلاج بالكي ,, الأدوية الشعبية ,, و غيرها كثير لا تحضرني الآن


مثلاً : لو يصاب أحد بوعكة صحية بعد أحد المناسبات تجده أول ما يتبادر إلى ذهنه ( شكل فلان عطاني عين ) ما يقول قدر الله و قضاءه و تخفيف ذنوب


و إلا لما الواحد يقدم على كلية عسكرية و إلا و ظيفة و ما ينقبل و تسأله ليش ما انقبلت يا فلان ,, تلقى أول رد على لسانه ( ما عندي واسطة ) طيب قول التوفيق بيد الله و ما اتوفقت


أو إذا راجع بالمستشفيات و قالوا حالتك مزمنة وما فيه علاجات تزيل المرض بالكامل ولكن يوجد سوى بعض المسكنات تخفف المرض

تلقاه يتجه للكي و للعلاجات الشعبية و لأم فلان في الديرة الفلانية يقولون أنها مداوية و تعرف تكوي




يا ناس العلم و الطب تطور و أنتم تدورون أم فلان اللي ساكنة في بيت شعبي تقول مشعوذة

يعني هالطبيب يدرس فوق 15 سنة و خبرة و ممارسة فوق 20 سنة و فيه أدوات طبية متطورة و يقول لكم ما فيه جدوى إلا أن الله يشفيه


يعني أم فلان اللي ما تعرف حتى تقرأ و تكتب بتفيدكم مثلاً !!



( 3 )


أنصح أي شاب يبي يتزوج أنه يتزوج من فتاة ( شينة ) أو بين قوسين مقبولة الملامح

لأن ما يتطلق هاليومين إلا المزيونات , لأنهم يشوفون أنفسهم و يبهذلون أزواجهم وكل يوم و الثاني عند أهلها زعلانة بنت اللذين


أوكيه حلوة و دلوعة بس ترى سمير ( اسم الزوج ) لما تزوج يبي بنت تهتم فيه و يبي استقرار ما يبي بنت شايفة نفسها كأن ما فيه بالهدنيا بنت حلوة غيرها



( 4 )



بطاقات الدعوة في الزواجات ( كروت الأفراح )


صراحة من الأشياء اللي تؤرقني و اللي الى اللحين مو مخليتني اتزوج أكثر من تكاليف المهر و الأمور الأخرى هي كروت الزواجات


يعني لو بأطبع 1000 كرت دعوة , هذا يعني إني بأدور على تقريباّ 500 بيت في مناطق و أحياء مختلفة ,, غير البيوت اللي ما تدلهاا و بتحوس لين تلقاها


أنا أشوف الحل أحد أمرين : إما يتم أرسال بطاقات الدعوة عير الإيميل و يتم وضع الكروكي وكل شي في الإيميل وكل عائلة لها إيميل معروف في دليل محدد لإيميلات القبيلة


أو إرسال الدعوة من خلال ( البرودكاستات ) يا ناس خلونا نواكب التطور و يكون عند كل رب أسرة ( بي بي ) و تجيه الدعوة قبل الزواج بيوم بدون أي مشقة أو تكاليف





هذي بعض القناعات وما أدري توافقوني فيها أو لا << مع ذكر السبب إن وجد ؟

^
^

هلا بك ياعادل ^ ^


صدقت كلام تقريبا كل يوم نسمعه ومتداول بين الناس كبيرهم وصغيرهم

ونلاحظ الكل مقتنع فيه ولو مااقتنعوا ترى كثر الترديد يزيد التصديق ..

		المشاركة الأصلية بواسطة : اقتباس
	مثلاً : لو يصاب أحد بوعكة صحية بعد أحد المناسبات تجده أول ما يتبادر إلى ذهنه ( شكل فلان عطاني عين ) ما يقول قدر الله و قضاءه و تخفيف ذنوب

سبحان الله صاروا يعلقون كل شئ بالعين ! أوكيه ماننكر ان العين ثابته بالقرآن والسنه


لكن هل من الممكن أن نترك زمام أمورنا بحجة العين ! والمصيبه ياعادل تلقاه اذا فعلا فيه عين من شيخ لشيخ ونسى ان قراءته لنفسه انفع وادعى للشفاء ..!


والطامه الكبرى اذا دوّر علاجه عند السحره والمشعوذين !

		المشاركة الأصلية بواسطة : اقتباس
	و إلا لما الواحد يقدم على كلية عسكرية و إلا و ظيفة و ما ينقبل و تسأله ليش ما انقبلت يا فلان ,, تلقى أول رد على لسانه ( ما عندي واسطة ) طيب قول التوفيق بيد الله و ما اتوفقت

للأسف ياعادل هذا الكلام ترسّخ في أذهان الكثير من شبابنا !

يهدمون مستقبلهم بحجج واهيه !

		المشاركة الأصلية بواسطة : اقتباس
	أنصح أي شاب يبي يتزوج أنه يتزوج من فتاة ( شينة ) أو بين قوسين مقبولة الملامح لأن ما يتطلق هاليومين إلا المزيونات , لأنهم يشوفون أنفسهم و يبهذلون أزواجهم وكل يوم و الثاني عند أهلها زعلانة بنت اللذين أوكيه حلوة و دلوعة بس ترى سمير ( اسم الزوج ) لما تزوج يبي بنت تهتم فيه و يبي استقرار ما يبي بنت شايفة نفسها كأن ما فيه بالهدنيا بنت حلوة غيرها

تقوله صادق

وموب كل حلوة مغروره وشايفه نفسها

بالعكس اكثر الرجال أول شروطهم نبيها حلوة ودلوعه






طرح راقي

وقناعات اتمنى ان تزول بأقرب فرصه ..!

يعطيك العافيه اخوي عادل واحترم رأيك

لكن اختلف معاك في مسألة الطب

لا تقول اطباء لهم 15 سنة قول 20 او حتى 30 سنة

والله اغلبهم فاشلين وعندنا اطباء حدث ولا حرج

وانا اقول فيه حالات عجز عنها الأطباء
والحل كان عند مداويه زي ماذكرت
صحيح ان المداويه على قولتك مادرست ولا تعلمت
لكن عندها الخبره اللي تنقص هالدكاتره اللي تتكلم عنهم
والله جعلها سبب في انهاء المشكله

اشكرك اخوي عادل

		المشاركة الأصلية بواسطة : عادل الحارثي اقتباس
	( 1 )

		المشاركة الأصلية بواسطة : عادل الحارثي اقتباس
	المثالية بهالزمن ما توكل عيش يعني لازم تكون همجي و جاهل عشان تسلك مع العالم أحس فيه فرق واضح بين الناس المتعلمة و الناس الجاهلة بتعاملها في المواقف و تجاوبها مع الأحداث مو لازم تكون مثالي عشان تصبح من فئة الناس المتعلمة والا؟؟!! ( 2 ) فيه أشياء اعتقد بوجودها لكني لأ أضعها ذا أهمية قصوى في مجريات الحياة مثلاً : العين ,, الواسطة ,, العلاج بالكي ,, الأدوية الشعبية ,, و غيرها كثير لا تحضرني الآن مثلاً : لو يصاب أحد بوعكة صحية بعد أحد المناسبات تجده أول ما يتبادر إلى ذهنه ( شكل فلان عطاني عين ) ما يقول قدر الله و قضاءه و تخفيف ذنوب مو قلت تعتقد بوجودها يعني موجوده وبقوه عَنْ جَابِرِ بْنِ عَبْدِ اللهِ رَضِيَ الله عَنْهُ أَنَّ رَسُولَ اللَّهِ صَلَّى اللَّهُ عَلَيْهِ وَسَلَّمَ قَالَ: "أَكْثَرُ مَنْ يَمُوتُ مِنْ أُمَّتِي بَعْدَ قَضَاءِ اللهِ وَقَدَرِهِ بِالعَيْنِ". و إلا لما الواحد يقدم على كلية عسكرية و إلا و ظيفة و ما ينقبل و تسأله ليش ما انقبلت يا فلان ,, تلقى أول رد على لسانه ( ما عندي واسطة ) طيب قول التوفيق بيد الله و ما اتوفقت أوكي قدر الله وماشاء فعل بس الواسطات داخله بنسبة كبيرة جدا ومحد ينكر واحد متخرج بامتياز والثاني بمقبول يدخل اللي بمقبول والامتياز مايدخل وش تفسر ماشاء الله حظه بالدنيا ضارب لا طبعا هنا يدخل موضوع الواسطة أو إذا راجع بالمستشفيات و قالوا حالتك مزمنة وما فيه علاجات تزيل المرض بالكامل ولكن يوجد سوى بعض المسكنات تخفف المرض تلقاه يتجه للكي و للعلاجات الشعبية و لأم فلان في الديرة الفلانية يقولون أنها مداوية و تعرف تكوي يا ناس العلم و الطب تطور و أنتم تدورون أم فلان اللي ساكنة في بيت شعبي تقول مشعوذة يعني هالطبيب يدرس فوق 15 سنة و خبرة و ممارسة فوق 20 سنة و فيه أدوات طبية متطورة و يقول لكم ما فيه جدوى إلا أن الله يشفيه يعني أم فلان اللي ما تعرف حتى تقرأ و تكتب بتفيدكم مثلاً !! ماينلام يبي الحياة .. مو الحين كل من هب ودب دخل الطب (وهذا الشيء يندرج تحت مسمى الواسطة ) ( 3 ) أنصح أي شاب يبي يتزوج أنه يتزوج من فتاة ( شينة ) أو بين قوسين مقبولة الملامح لأن ما يتطلق هاليومين إلا المزيونات , لأنهم يشوفون أنفسهم و يبهذلون أزواجهم وكل يوم و الثاني عند أهلها زعلانة بنت اللذين أوكيه حلوة و دلوعة بس ترى سمير ( اسم الزوج ) لما تزوج يبي بنت تهتم فيه و يبي استقرار ما يبي بنت شايفة نفسها كأن ما فيه بالهدنيا بنت حلوة غيرها قال تعالى (ولقد خلقنا الأنسان في أحسن تقويم ) كل بنات حواء زينات المشكلة مو بالحلى والشين المشكله في عقل أدم وحواء وانت الصادق ( 4 ) بطاقات الدعوة في الزواجات ( كروت الأفراح ) صراحة من الأشياء اللي تؤرقني و اللي الى اللحين مو مخليتني اتزوج أكثر من تكاليف المهر و الأمور الأخرى هي كروت الزواجات يعني لو بأطبع 1000 كرت دعوة , هذا يعني إني بأدور على تقريباّ 500 بيت في مناطق و أحياء مختلفة ,, غير البيوت اللي ما تدلهاا و بتحوس لين تلقاها أنا أشوف الحل أحد أمرين : إما يتم أرسال بطاقات الدعوة عير الإيميل و يتم وضع الكروكي وكل شي في الإيميل وكل عائلة لها إيميل معروف في دليل محدد لإيميلات القبيلة أو إرسال الدعوة من خلال ( البرودكاستات ) يا ناس خلونا نواكب التطور و يكون عند كل رب أسرة ( بي بي ) و تجيه الدعوة قبل الزواج بيوم بدون أي مشقة أو تكاليف لازم تحس بوناسة وتلف وتدور عشان تحس وراك عرس :MsgPlus_Img0297: وهيصه وبعدين وش ايميلات الله يهديك واللي ماعنده ايميل هذي بعض القناعات وما أدري توافقوني فيها أو لا << مع ذكر السبب إن وجد ؟

مشكور أخوي على طرحك

تقبل مروري

جمــــــــــيله

		المشاركة الأصلية بواسطة : اقتباس
	والطامه الكبرى اذا دوّر علاجه عند السحره والمشعوذين

و الله ما استبعدها هالزمان لأن مع التطور يزداد الناس جهل و هذا اللي حاصل

		المشاركة الأصلية بواسطة : اقتباس
	وموب كل حلوة مغروره وشايفه نفسها بالعكس اكثر الرجال أول شروطهم نبيها حلوة ودلوعه

بكل تأكيد ما نعمم

و جمال المرأة من دواعي نكاحها كما جاء بالحديث لكن الجمال يزول و تبقى التربية الطيبة

سديم الشدادي


ممتن لك على تواجدك و إبداء رأيك

هلا و الله أبو غدي
شرفت و نوّرت

		المشاركة الأصلية بواسطة : اقتباس
	لكن اختلف معاك في مسألة الطب لا تقول اطباء لهم 15 سنة قول 20 او حتى 30 سنة والله اغلبهم فاشلين وعندنا اطباء حدث ولا حرج وانا اقول فيه حالات عجز عنها الأطباء والحل كان عند مداويه زي ماذكرت صحيح ان المداويه على قولتك مادرست ولا تعلمت لكن عندها الخبره اللي تنقص هالدكاتره اللي تتكلم عنهم والله جعلها سبب في انهاء المشكله

أنت يبو غدي متحامل على الأطباء و المستشفيات و شكل جايك منهم موقف وما ألومك لأن ما بعد الخطأ الطبي إلا الإعاقة أو الموت


لكن تقول أغلبهم فاشلين و اعتقد هالشي فيه مبالغة و خصوصا اصحاب الخبرة من الاطباء

الآن يبو غدي الإمكانيات تطورت و المعدات الطبية أصبحت ذات تقنية هائلة و تقول لي مداوية !!

الآن فيه عمليات المناظير و عمليات الليزر

و فيه عمليات الريبورت اللي يتم فيها إدخال قطعة صغيرة في جسم المريض تحاكي حركة الطبيب بالخارج

يعني الجراح يحرك يده بالهواء كأنه يريد أن يخيط شي أو يقطع شي و هذا المجسم يقلده داخل جسم المريض << يعني ما تبي خطأ بهالعملية مثلاً !!


و إلا تقصدون أن المداوية إن ما نفعت ما ضرت !!

بقولك شي يبو غدي , الطب كان من أسوء المهن وكانوا بالسابق يبعدون عنها لأنها تتعامل مع مخرجات الجسم من دم و قيأ و تقيؤ و فضلات و كانت مهنة لا تقابل أمامك إلا مرضى و طريحي الفراش

فابتعد الناس عنها ,, فتم رفع المكانة الاجتماعية للحكيم ( الطبيب ) و رفع أجره المادي للترغيب فيها

و قدَرُ الطبيب أن خطأه يكلف الحياة , حتى في آخر تقرير عن صحة الملك عبدالله تم ارجاعه للمستشفى لاكتشاف تخثرات من الدم تؤثر على الأعصاب فالخطأ وارد أمام الملك أو الشخص البسيط

		المشاركة الأصلية بواسطة : اقتباس
	مو لازم تكون مثالي عشان تصبح من فئة الناس المتعلمة والا؟؟!!

و ما فائدة أن يكون متعلم ولا يرشده ذلك إلى المثالية في التعامل ؟

		المشاركة الأصلية بواسطة : اقتباس
	مو قلت تعتقد بوجودها يعني موجوده وبقوه عَنْ جَابِرِ بْنِ عَبْدِ اللهِ رَضِيَ الله عَنْهُ أَنَّ رَسُولَ اللَّهِ صَلَّى اللَّهُ عَلَيْهِ وَسَلَّمَ قَالَ: "أَكْثَرُ مَنْ يَمُوتُ مِنْ أُمَّتِي بَعْدَ قَضَاءِ اللهِ وَقَدَرِهِ بِالعَيْنِ".

اعتقد بوجودها لكنها لا تشغل حيّز في تفكيري

مثلاً نجد من أشغل نفسه في تفسير الرؤى و الأحلام فتجده متسمراً أمام قنوات تفسير الرؤى

أو كلما رأى رؤية اتصل بشيخ يبحث عن تأويلها


وهذه أيضاً اعتقد بها لكن لم اعمل بها يوماً من الأيام

		المشاركة الأصلية بواسطة : اقتباس
	أوكي قدر الله وماشاء فعل بس الواسطات داخله بنسبة كبيرة جدا ومحد ينكر واحد متخرج بامتياز والثاني بمقبول يدخل اللي بمقبول والامتياز مايدخل وش تفسر ماشاء الله حظه بالدنيا ضارب لا طبعا هنا يدخل موضوع الواسطة

لذلك لا بد أن نعلم الناس أن قضاء الله و قدره أقوى من أي واسطة لما جاء في الحديث

( واعلم أن الأمةلو اجتمعت على أن ينفعوك بشيء لم ينفعوك إلا بشيء قد كتبه الله لك , وإن اجتمعواعلى أن يضروك بشيء لم يضروك إلا بشيء قد كتبه الله عليك ) فكل شي مقدر ومكتوب في قضاء الله و قدره

		المشاركة الأصلية بواسطة : اقتباس
	قال تعالى (ولقد خلقنا الأنسان في أحسن تقويم ) كل بنات حواء زينات المشكلة مو بالحلى والشين المشكله في عقل أدم وحواء وانت الصادق

يوجد فوارق بين البشر من حيث الجمال و إلا فإن الله قد خلق الإنسان و صوره في أحسن تقويم و أحسن صورة و الدليل على ذلك قوله تعالى (فلما رأينه أكبرنه وقطعن أيديهن وقلن حاش لله ما هذا بشر إن هذا إلا ملك كريم )


و الجميل يرى ما حوله جميلاً و بكل تأكيد أن التعامل بين الزوجين تحكمه العقلية الناضجة

لكن غرور الجمال قد يدفع المرأة إلى مالا يحمد عقباه

		المشاركة الأصلية بواسطة : اقتباس
	لازم تحس بوناسة وتلف وتدور عشان تحس وراك عرس :MsgPlus_Img0297: وهيصه وبعدين وش ايميلات الله يهديك واللي ماعنده ايميل

ما حسيتوا باللف و الدوران و زحمة الشوراع و تضييع البيوت

ولازم تجيه في رسالة الايميل ممنوع دخول المغاتير و يجب طباعة هذه الصحفة حتى تتمكن من الدخول للقاعه خخخخخ




يعطيك العافية جميلة أثريت الموضوع

		المشاركة الأصلية بواسطة : اقتباس
	( 1 ) المثالية بهالزمن ما توكل عيش يعني لازم تكون همجي و جاهل عشان تسلك مع العالم

أنا مع المثالية في التعامل عشان محد يلقى عليك درب يعني مع المجتمع
علاقة سطحية مع تعامل مثالي لكن أكون جاهله وهمجيه مثلهم لا بالعكس
حلو الشخص يكون متميّز بتعامله مع الناس وبالأخير مايصح إلا الصحيح

		المشاركة الأصلية بواسطة : اقتباس
	( 2 ) فيه أشياء اعتقد بوجودها لكني لأ أضعها ذا أهمية قصوى في مجريات الحياة مثلاً : العين ,, الواسطة ,, العلاج بالكي ,, الأدوية الشعبية ,, و غيرها كثير لا تحضرني الآن مثلاً : لو يصاب أحد بوعكة صحية بعد أحد المناسبات تجده أول ما يتبادر إلى ذهنه ( شكل فلان عطاني عين ) ما يقول قدر الله و قضاءه و تخفيف ذنوب

العين والعلاج بالكي مالها في حياتي أي وجود أو اقتناع مع إن العين حق
لكن أنا أخليها من آخر الحلول يعني جاك مرض أول شي تتعالج منه إذا ماشفيت
ومالقيت طب وهو شي غريب ويجيك بوقت معين ويروح ويرجع ذيك الساعة تفكر إنه عين
مو ع طول من يجي الواحد شي يقول جتني عين هذا وسواس "
أما الكي آخر العلاج ومو كل من هب ودب قال بكوي راسي يوجعني بكويه
بطني يوجعني بكويه وتلاقيها عند الشياب ظنتي إنهم موسمين بكل مكان

		المشاركة الأصلية بواسطة : اقتباس
	و إلا لما الواحد يقدم على كلية عسكرية و إلا و ظيفة و ما ينقبل و تسأله ليش ما انقبلت يا فلان ,, تلقى أول رد على لسانه ( ما عندي واسطة ) طيب قول التوفيق بيد الله و ما اتوفقت

هو فيه أحد يقدر يمشي بدون واسطه ياخي الحين حتى لو بغيت تصفيف شعر بمشغل
تعرف أحد ماراح تمسك طابور فمابالك بالوزارات والجامعات ماتمشي أمورك إلا بواسطه
وماأبالغ أخوي تخرج من الثانوي وتقديره ممتاز وبيدخل هندسه ماأنقبل مع القبول العادي
صار احتياط مع إنه كان واثق بالقبول ومابحث عن واسطه تعقدت أموره بدون سبب
بمكالمه وحده من مدير الجامعه خلتهم يدخلونه حتى بدون طوابير ومراجعات
صارت الواسطه حتى للي تقاديرهم حلوه مو بس للي مايستحقونها لأن أغلب الموظفين
يصفطون المقاعد للي يعرفونهم وهاتك ياتعقيد ويمشي سوق الواسطه لأننا شعب نبغى كل شي بسرعهمانبي تعقيد ولا انتظار ولاقلق "

		المشاركة الأصلية بواسطة : اقتباس
	يعني هالطبيب يدرس فوق 15 سنة و خبرة و ممارسة فوق 20 سنة و فيه أدوات طبية متطورة و يقول لكم ما فيه جدوى إلا أن الله يشفيه يعني أم فلان اللي ما تعرف حتى تقرأ و تكتب بتفيدكم مثلاً !!

ممكن تفيد مع إني مع الطب 95% وماأقتنع بالأعشاب ولا بالعجايز

لكن ياعادل عمرك شفت دكتور يقول : ده يعاني من ( أبو صفيط ) < متعوب عليه هالمرض ههههه

الطب إلى الآن ماعرفوا هالمرض وطبيب مصري حايز على شهادات عاليه

وحرمته دكتوره كنت أراجع عندها وكانت جايبه معها بنتها عمرها أربع سنوات

وحاطه جبيره ع رقبتها وظهرها فيه تقوس ع بالي صاير لها حادث تحمدت لها بالسلامه
وقلت لها كيف تخلينها تمشي ورقبتها مكسوره قالت : ماصار لها حادث
ورقبتها مو مكسوره لكن ماتقدر تثبتها فيها ليونه وظهرها سوت فيه خمس عمليات
بأكثر من بلد ومانفع فيها وأنا آخذ وأعطي معها أكتشفت إن هالمرض جاء هالبنت
وهي عمرها ثلاث شهور يعني كانت طبيعيه قبل ومافيه أي دكتور أكتشف شنو هالمرض
يسوون لها عمليات وماتعدل شي وقلت سالفتها للوالده وجلست تقص علي إن هالمرض
عند البدو اسمه أبو صفيط ويعيّب الشخص إذا مااكتشفوه من بدري يعني يايدخل
القفص الصدري أو يتقوس الظهر أو ليونه بالرقبه ولازم يتعالج قبل لايوصل عمره سنه
ومافيه علاج طبي له بس كوي وزيت يدهنونه يقوي العظام لحد ماتعتدل والشواهد
كثيره ع مثل هالحاله تقدر تقولي ياعادل هالأطباء اللي يتفلسفون ويسوون يعرفونه
وكسروا عظام هالبنت ومن عمليه لعمليه وبدون فايده عطيتها رقم مداويه عندكم بالخرج هههه
وبالأرطاويه وتكلمت لها عن الطب الشعبي وراحت لها وكلمتني وهي تبكي وقالت إن الحرمة شافت بنتي
وقالت حرام عليكم هذي لو جبتوها لي قبل لاتبني عظامها حتى بدون كوي مجرد تدليك وتعريض للشمس يرجع عظمها ويشد وهالعمليات ماتنفع لحالتها لكن الآن مالها علاج
لأن الكي ماراح ينفعها بهالعمر
بنت دكتور ودكتوره كان وجود علاجها عند طبيبه شعبيه فما ننكر جهد بدوياتنا

		المشاركة الأصلية بواسطة : اقتباس
	أنصح أي شاب يبي يتزوج أنه يتزوج من فتاة ( شينة ) أو بين قوسين مقبولة الملامح لأن ما يتطلق هاليومين إلا المزيونات , لأنهم يشوفون أنفسهم و يبهذلون أزواجهم وكل يوم و الثاني عند أهلها زعلانة بنت اللذين أوكيه حلوة و دلوعة بس ترى سمير ( اسم الزوج ) لما تزوج يبي بنت تهتم فيه و يبي استقرار ما يبي بنت شايفة نفسها كأن ما فيه بالهدنيا بنت حلوة غيرها

هههههههههه حلللللوه ياخي لاتخرب سوق البنات المزيونات < أول شخص يسب المزايين

المهم السبب مو البنت لاهنت لأنه لو هو رجال قول وفعل كان عسفها ووطى ع خشمها

بجد استغرب شلون الحريم يقدرون يجيبون روس رجاجيلهم مع إنهم أصعب وأصعب من البنات

والرجاجيل يعجزون عن اللي شايفه نفسها كلها شخصية قويه مع شوي حنيه يقدر يشكلها ع كيفه

		المشاركة الأصلية بواسطة : اقتباس
	أو إرسال الدعوة من خلال ( البرودكاستات ) يا ناس خلونا نواكب التطور و يكون عند كل رب أسرة ( بي بي ) و تجيه الدعوة قبل الزواج بيوم بدون أي مشقة أو تكاليف

ياسلام شلون الحريم يتجهزون ويفصلون ويحجزون كذا بتتسبب ع الرجال لأن بناته وحرمته

بيقلبون البيت انكار وعدم رضا وبيجيك ونفسه بخشمه وأهله مايحضرون لأنهم ماأستعدو

وبيزعلون عليك < شهرين وعسى الحريم يخلصون أشغال العرس اللي بيحضرونه


شكراً عادل موضوعك رايق وبقوه وملامس لأرض الواقع

وقناعات يتملكونها اشخاص كثارين ويعارضونها أشخاص ثانين

يعطيك ألف عافيه ولاهنت "

المشكلة تمسكنا بقناعات قد تكون خاطئة
فكثير من المرضى في هالزمن صاروا يوسوسون بالعين والسحر

والبعض إذا حس بألم يرقي نفسه وبعد ما يتحسن يتوقع إنها عين لأنها ما راحت إلا بالرقية !!
مع العلم إن الرقية تكون للأمراض وليست مقتصرة على العين والسحر

بعض القصص اللي سمعناها حول هالقناعات :

امرأة تقول أني تعبانه وفيني عين
وألحت على ولدها يجيب لها مويه من شيخ في منطقه بعيده عن منطقتهم
والولد عجز وهو يقنع أمه أنها مافيها غير وسواس وتتوهم .. بس ما أقتنعت
وراح ولدها لربعه وسهر معهم وهو راجع مر البقاله وجاب كم علبه مويه وفتحها قبل يعطيها أمـه
وفرحت بها وشربتها وجا من بكره وهي زي الحصان وتقول لولدها طبت الحمدلله
والولد عارف طبع أمه ونوع مرضها

أمرأة ثانية عجزت تنام من ضيقه في صدرها وكان الكهرب طافي
فقامت فتحت درجها وخذت منه عزيمة ( ورقة مكتوب عليها آيات من القرآن بالماء والزعفران )
ونقعتها بكاس مويه عندها وشربتها
وماشاء الله من شربتها وهي نايمة
المهم يوم اصبحت لقت الورقة اللي هي نقعتها وشربت مويتها وخلتها تنام فاتورة التليفون !


أما قناعات الواسطات وغيرها .. فكلها أمور مقدرة .. والأرزاق من عند الله ..


( ... ولو اجتمعت الأمة على أن ينفعوك بشيء لن ينفعوك إلا بشيء ٍ كتبه الله لك ، ولو اجتمعوا على أن يضروك بشيء لن يضروك إلا بشيء قد كتبه الله عليك .. رفعت الأقلام وجفت الصحف )


قناعتنا بهذا الحديث تجعل من حياتنا أمل واستقرار ..

شكراً عادل على هذا الطرح ..

أهلاً بك أخي العزيز
عادل

ذوق رفيع في اختيار المواضيع
أعجبني اختيارك لهذه النماذج من القناعات
ويكفي أنك هنا وصفتها بالقناعات
إن لم تقتنع بها أنت اقتنع بها غيرك
وللناس فيما يعشقون مذاهب
ولا خط أو طريق موحد لمزاجاتهم وهواياتهم
فسبحان من خلق وفرق وله المثل الأعلى