اليوم بعد العصر في شهر شعبان من قصايد الشاعر بسيس رد على الشاعر عبيد ابن سلطان

اليوم بعد العصر في شهر شعبان=سمعت لي علم يصحي الرقودي
غافل وذكرني عبيد ابن سلطان=وقدح ضميري مثل قدح الزنودي
نويت اسوي لي من الشعر ديوان=وامشي مع الطيب واحب الردودي
ياعبيد كان انك مورد وبطران=الناس قبلك راسمين الحدودي
حنا ترانا في اول الهجر جيران=اقرب من اللي يحسبون الجدودي
ياعبيد تطري الشوف والشوف نقصان=مثل الشباب اللي مضى مايعودي
ان كان تبغانا ندور بالاحسان=وامشي معك ياعبيد لبو سعودي
واليا حصل من حط حنا وريحان=يصير نجمك مثل نجم السعودي
زين لها في الحي فله وبستان=وارتح وخل الخيمه ام العمودي
وان كان ضاع الجاه والحظ تعبان=منت على عوج العصي محدودي
ياعبيد ابن سلطان منته بفقران=عندك زهور الورد في كل عودي
واسلم وسلم لي على العم شامان=حب العرب ينقص وحبه يزودي
كم واحد بيته من الخير مليان=ويلفلفه مثل العقاب الحسودي
من يشتكي من حب سحاب الاردان=ماله ومال مبيحات السدودي
ومن يتبع المقفي على غير صفطان=مثل الصلاه اللي بليا سجودي
ياعبيد من يكتب قصايدك سودان=وقصايدي كتب الشباب الاسودي
ياللي توصف داعج العين غلطان=حيرتني مدري من اي البدودي
يومن لك في ناعم العود غرضان=وراك ماتعجل علاها الردودي
ماحطت الفرشه على بيض الاسنان=ولا ربطت في الراس مثل الورودي
ولاسيرت بين العرب مالها شان=ولاخذت عشاها من تميس الهنودي
ماقالت اشرو لي مسجل وشرطان=ولاطالعوا فيها وجيه القرودي
ولاتستمع في كل مطرب وفنان=ولاحط حمالات فوق النهودي
اديارنا منه اليا بطن سلوان=عقب النبات الزين راحت ضمودي
وراع البداوه صار ماهوب رغبان=وان جا يقود رعيته ماتقودي
واللي معه معزا وقطعه من الضان=واهل الديانه في طرفها قعودي
واصبر كما صبر ابن عمي سليمان=لو كان بعض الصبر ماله حدودي
ليته يخاويني لغامد وزهران=يومن بعض الناس مافيه فودي
واصبح غناوي عقب ضليت فقران=وارتاح عقب ملاوعات البرودي
مثايل تطرب لها اشكال والوان=هاذي نصدرها وهاذي ورودي
هذا وصل الله على نسل عدنان=عد النبات وعد وبل الرعودي

ياعبيد من يكتب قصايدك سودان
وقصايدي كتب العيال الاسودي
انحش جيتك اشكرك كل الشكر على نقلك لقصايد شاعرنا الكبير بسيس بن حديد الذي لم ياخذ ولوجز بسيط من حقه اعلاميا ...بيض الله وجهك وجمل الله حالك
تقبل تحياتي,,,,,,,,,,,

صح لسان بسيس الله يرحمة
إنحش جيتك كفييت ووفيت

الله يا أبو محمد
على قصائد أبو فواز الله يرحمه ويغفر له
مساجلاته مع عمي عبيد كثيرة وبينهم صحبة ما توصف

عسى الله يرحم أبو فواز ويطول لنا بعمر أبو عيد
والله يرحم شامان ويغفر له

واسلم وسلم لي علـى العـم شامـان

حب العرب ينقـص وحبـه يـزودي

بارك الله في مروركم الله لايهينكم
اوعدكم بالمزيد اخوي سلطان كلامك صحيح

الله يرحم ابو فواز
...
انحش جيتك
اشكرك كل الشكر على روائع الشاعر بسيس التي تتحفنا بها
وتقبل هذا المرور اللطيف

بشير الذيابي حياك الله يالطيب
تحياتي لك