حدد موقعك

بعض العرب ماينعطى وجه بالحيـل
وليا عطيته وجه صـار إلـك علـه

وبعض العرب ماله سنع لكـن حليـل
بالضبـط كنّـه لاتمعـنـت ظـلّـه

وبعض العرب شقرا وشقرا مع الخيل
ماينفعـك لـولا الرمـوش المظـلّـه

وبعض العرب من وين ماجيت كوكتيل
في زعمـه انـه يفهـم الكـون كلـه

وبعض العرب فقري وله نفس زنقيـل
ويعـد نفسـه دولــة(ن) مستقـلـه

وبعض العرب لويعجبك ثرثـرة ليـل
وباكر تـرى ماقـال لـك شـيء لله

وبعض العرب مرسال مدري مريسيل
يسايـر العالـم وهـو حاصـلٍ لـه

وبعض العرب تلقاه بالحـط والشيـل
امـا بغيـر الحـط والشيـل زلــه

وبعض العرب يسلخ وينفخ وهو ريـل
سيفـه نهـار الكـون يعجـز يسلـه

وبعض العرب من غير بندق ودربيل
ومنيـن ماهـب الهـواء جايـزٍ لـه

وبعض العرب يطلع كما طلعة سهيـل
ويغيـب نجمـه قبـل دربـه تدلّـه

وبعض العرب يوذيك بالقـال والقيـل
تجلس معه ساعـة والأخـرى تملّـه

نذل وخسيس يفصل الهـرج تفصيـل
ولـيـا لقـالـه طيـبٍـا يسْتغـلـه

وبعض العرب نمام ملعونـن ابخيـل
يـروح مـن شلـه ويرجـع لشلـه

وبعض العرب مايمسك الا مع الذيـل
امـا بغيـر الذيـل مانـت ابلقـلـه

وبعض العرب منظر وكشخة وتحليـل
شبح بحال.. وحـالا اخـرى كورلـه

لاشفت زوله مـن خيـار الرجاجيـل
واليـا عرفتـه ماتجـيـه بمحـلـه

وبعض العرب ماضيه ليلٍ على ليـل
قـد بصّمـوه وصـوروه الأدلــه

وبعـض العـرب لاوالله إلا تهاويـل
مهمـا عقـدت الحبـل لازم يحـلّـه

قـد دربـوه ولكّعـوه الرجاجـيـل
ومن قبل لايصيـر الحـدث حاسبلـه

والوقت هذا وقـت بزنـس وتضليـل
وتعـاف لابرقـت دقــه وجـلـه

وصـل الفـروض ويقبلـن التنافيـل
وحافظ على حلتك كـان إلـك حلـه

وكانك شجاع صحيح حارب اسرائيل
قبـل اليهـود القـدس لا تستحـلـه

وكلش يهـون إلا الثـلاث المهابيـل
المهـزلـة والمسكـنـة والـمـذلـه

من طول الغيبات جاب الغنائم

وكلش يهـون إلا الثـلاث المهابيـل
المهـزلـة والمسكـنـة والـمـذلـه

مشكوووور اخوي ساري

وعساك على القوة

بيض الله وجهك ياساري على هالقصيدة

قصيدة جزلةوتحمل معاني جليله
.....................

وبعض العرب من غير بندق ودربيل
ومنيـن ماهـب الهـواء جايـزٍ لـه
..................
وكانك شجاع صحيح حارب اسرائيل
قبـل اليهـود القـدس لا تستحـلـه

صح لسان قايلها
وتسلم يمينك.....ولاهنت يالنشمي.

لاهنت يالوافي ولاهنت ياسهم القصيد وشكرا على مروروكم