يواسوني وانا الميت

الملف الشخصي للكاتب · توقيع : ابن طلحااان

قصيدة شاب كان مسرع على سيارته وصار عليه حادث وكانت معاه والدته

ونتيجة لهذا الحادث توفيت والدته نتيجة الإصابات الخطيرة أما هو فكانت إصابته خفيفه وانكتب له عمر ..

وللامانه..ماعرف اسم صاحب هالقصيد

هالقصيدة للعبرة وتستاهل إن كل واحد منا يعطيها من وقته ويراجع حساباته

قال :

يواسوني وانا الميت وحالي يجبر الدمعات
تسيل من الذي فيني ويبكي وهـو يواسيني

وانا ابكي واتنهد وارسم بالحزن لوحات
يجبروني عشان امشي ورجلي ما تمشيني

قتلت رعايتي بيدي قتلت الحب والرحمات
حرمت النفس من حقها وانا ابكيها وتبكيني

وكنه حلم قدامي يقيدني من الصرخات
أبي أصحى ولكني عجزت ألقى الي يصحيني

فداك القلب يايمه ومهما قلت من كلمات
صغيرة في كبر حقك بس اتمنى تعذريني

نهبت الفرح من بيتي صحيح اني خسيس الذات
صحيح اني ولد طايش وكل ما أسمعه فيني

تجول عيونهم فيني تفصل مني قياسات
وتشيح وجوههم عني وكني غيرت ديني

يظنوا حزنهم أكبر وهم أصحاب هالمأسات
وانا اتحدى إذا فيهم ربع ما يحترق فيني

نقص قدري بعد موتك وغابت نشوة اللذات
وصار الهم عكازي أباكيه ويبـاكـيـنـي

عطيتيني بدون حساب ولا سمعتك تقولي هات
وانا اشرب حيل من دمك ودمك ما يكفيني

يايمه ارجعي كافي أبجلس معك لو لحظات
واقبل إيدك ورجلك وافرش لك رمش عيني

يايمه ما تحملهم يقولوا فات ما قد مات
تعالي غيري هالقول واطيعك باقي سنيني

واترك عادة التدخين وانفذ ماتبي بسكات
واصلي الفجر في المسجد قبل منتي تصحيني

يايمه ارجعي تكفين وطفي شمعة الآهات
ابيك انتي ولا غيرك على موتك تعزيني

وضميني وداويني مثل ما كانت الهقوات
ما ابي احدن يواسيني ابيك انتي تواسيني

دخيلك بس لا تبكي إذا شفتي بي الدمعات
أنا مقوى أبكيك .. إذا أنتي تبكيـني

....اللهم احفظ لنا .أمهاتنا وأمهات المسلمين اجمعين...