قصيدة الجادل

بسم الله الرحمن الرحيم
بمناسبة عيد الفطر المبارك أزف أجمل التهاني والتبريكات إلى جميع أعضاء وشعراء ومشاركين منتدى الشدادين.
وأضع بين أيديكم هذه القصيده المتواضعه على أمل أن تحوز على رضاكم:

البارحه يوم كل(ن) نام وأرخى السدال=والناس كل(ن) هنى الهجعه على حينها
والنوم من مقلة العينين شد الرحال=رحل وخلا السهر يحرق هدا بينها
إن قلت للنوم عود قال هذا محال=عينك تبي قطع وصل(ن) بيني وبينها
ياعين قولي سبب قطع الرجاء والوصال=قالت سبب حزنها فرقى محبينها
لين أذن الصبح وأنا في هموم وجدال=ليله وشنت على عيني سكاكينها
مير الحقيقه معاها حق فيما يقال= إن المحبه تعز النفس وتهينها
ياوجد حالي ليا هبت هبوب الشمال=وطرى على الروح ذكرى ناس مغلينها
طرى على الوليف اللي يفوق الخيال=الجادل اللي سهوم الموت في عينها
أم الترف والدلع والذوق وأم الجمال=من راسها لا قدمها كامل(ن) زينها
لا ما حكت حكيها عذب(ن) فرات(ن) زلال=تروي بحلو الكلام قلوب مضمينها
وليا مشت كنها غصن من الريح مال=تميل لا ذعذع النسناس من لينها
مثل الفرس لا حداها شوق صوت الصهال=تقصر خطاها ليا مرت بغالينها
والخد برق(ن)سرى ليله ينوض إشتعال=مع ليل(ن) أسود على الأكتاف كاسينها
والعين عين الوحش والعنق عنق الغزال=وأرموش عينه جنود(ن) في ميادينها
إستوطنت في خفوقي وأعلنت الاحتلال=وأصبحت أنا أول أسير(ن) من مساجينها
إن قالت إجلس جلست ولا أشرت لي تعال=أفز لاما أشرت بإصبع من إيدينها
لا شفتها لو بحر الصيف كني بضلال=والارض كنها أزهرت قدمي بساتينها
وإن غابت أعيش عن باقي البشر فانعزال=كني فقدت الحياه ولذت سنينها
أخذت معها ثمان سنين عز ودلال=كن السعاده هبة رحمان بإيدينها
واليوم ياشيب راسي وأح وأخو العيال=عزوة قهر يوم قفت ما أوفت بدينها
ماودها مير للعذال قيل(ن) وقال=أهل الحسد والضغينه دوم مخفينها
من بيني وبينها حلو ضعاف الرجال=نقالة الهرج والكلمه مودينها
وأصبحت في جال(ن) والغالي غدا له بجال=ياشين لحضات فرقا الزين ياشينها
قفت وأنا أشوف مدمعها على الخد سال=وقفيت وجروح قلبي صعب تهوينها
وأيقنت شمس المحبه مايله للزوال=وأن المحبه تعز النفس وتهينها

صح لسانك يامنصور

أبيات جميله وكلك ذوق ونظر

والله أن الحب يعز الناس ويهينها

لاهنت على ماقدمته

الله الله
يا شاعرنا محمد المريري

والله يحييك وعسى عيدك سعيد
وعمرك مديد
وصح لسانك ملايين
وكل عام وأنت بألف خير

نزف مؤلم مع إطلالة العيد
صح لسانك يا محمد ملايين
ولا هنت على هالإبداع ..

صح اللسانك

يامنصوري وكلام كله درر

وكل عام وانت بخير

صح لسانك ملايين
وكل عام وأنت بألف خير

صح لسانك وعلا شانك
قصيدة رائعة جداً لاعدمناك


شكراً لك وكل عام وأنت بخير

عمي العزيز


تقف الكلمات امام هذا النص خجلاً


فما عساي أن اقول وأنت من ابدعت وارتقيت على سلالم الإبداع


لله درك ودر قلمك





(( توضيح ))



القصيدة اعلاهـ بإسم منصور المريري

لإني اللاحظ اسمي في الردود " ركزوا "

صح



لسانك












وعساك بخير





وينعاد عيدك

قصيده راقيه برقي احساسك المشع كلماتك تتفتح لها ابواب القلب فتستقر فيه طابت انفاسك..وكل عام وانت بالف خيرر ودي