قصيده للشاعر / بسيس الشدادي في عيد بن مسلط الشدادي

هذه القصيدة قالها / بسيس بن سفر بن حديد الشدادي الحارثي رحمه الله موجهها إلى / عيد بن مسلط بن سيف الشدادي الحارثي مدير أحوال جده سابقاً
طالباً منه حل مشكلته،، وفعلاً ابو فوزي ماقصر جزاه الله خير وهذا طبع الشدادين دايم يكرمون الضيوف ويعرفون المعروف..

قصيدة أطول من إبريم وسواميد=وإن كان ماتصلح قصبنا رشانا
إمشاركه للربع في فرحة العيد=من يوم جتنا الكهربا في قرانا
في كل حاره يركزون العواميد=ولا عاد نعرف سرعنا من بطانا
ونويت اوجه لي رساله بالبريد=عناونها باسم الله المستعان
وأكتب علاها سلموها بيد عيد=اللي مشى في لزومي ماتوانا
رجل فهيم ومن خيار الأجاويد=ننصاه يوم إن الظروف تحدانا
عند الطلب ماعقد البال تعقيد=لو كان نطلب من حلاله عطانا
والعد مايورد بليا مواريد=وليا وردنا به قطعنا ضمانا
وجانا الخبر من يم صنات وسعيد=وليا سمعنا بالمسير بدانا
وقابلت ابو فوزي بليا مواعيد=عند الرجال مدلهين الحزانا
ولو بمدحك تستاهل المدح ياعيد=والناس تعرف طيبنا من ردانا
على اسم ابن مسلط نسمي الأواليد=باعه طويل ولحيةٍ من لحانا
ولاترى بعض الأسامي تقاليد=كل درى عنها وحنا درانا
قالوا ذياب وقلت لامثل ابو زيد=مع جيته جانا المطر يوم جانا
إليا صفانا نآخذ الحق ونزيد=وإليا تفرقنا خرب مستوانا
وحنا من أول مانحب المقاعيد=وإليا مشى شيخ القبيلة مشانا
صدقان للي ماحدانا على الحيد=وعدوان للي يعترض في نحانا
إما كسرنا شوكته بالبواريد=ولا على خده بالأرجل وطانا
أنا بغيت أشرح لك الوضع ياعيد=لنا طلب حساس مار استحانا
الورع يبكي والصبايا مراميد=لولا الحياء ياعيد معهم بكانا
عقب الغلى صاروا صفوف ومجاليد=كثرت مشاكلنا وفرحوا عدانا
نبغى الرحول اللي قطع رجلها القيد=من يمها ياعيد تقصر خطانا
ياليت عبد الله وخالد مواجيد=آل السعد ياأهل السعد ياحمانا
قلت التريله كان ماجابها عيد=وإن جبتها ياعيد نور سمانا
والمعرفة ماخذتها بالتقاصيد=أعاف هرياها وأحب السمانا

أخوكم
أميـــــــــر بأخلاقي

رجل فهيم ومـن خيـار الأجاويـد=ننصاه يوم إن الظـروف تحدانـا
عند الطلب ماعقـد البـال تعقيـد=لو كان نطلب من حلالـه عطانـا

والله وسبعة أنعام بأبو فوزي

رجل المواقف والشهامة والسمعة الطيبة

ورحم الله شاعرنا بسيس وأسكنه فسيح جناته

وألف شكر لك أخوي ( أمير بأخلاقي ) على نقل القصيدة

بيض الله وجهك

ياهلا بالامير
ورحم الله الشاعر بسيس واسكنه فسيح جناته
وابو فوزي رجل يستاهل كل خير
وهو غني عن التعريف رجل له مواقف مع جميع ربعه 00
والله يكثر من امثالهم
لا هنت يالغالي على نقلك لنا هذه القصيده

رحم الله بسيس واسكنه فسيح جناته

والله في ابو فوزي رجال يستاهل المدح والطيب

مشكوور أخوي على نقل القصيدهـ

تقديري وأحترامي لكـ

ونعم بالشدادين كلهم

والله يرحم ابن حديد ويسكنه فسيح جناته

رحم الله بسيس رحمة واسعه...شاعر يستوقفك قصيدة..كل قصائدة اللي مرت عليه متميزه...
وهذي القصيدة في رجل يستحق المدح والقصائد تليق به...ترك سمعه وسيرة حسنه..مشكور على النقل

قصيدة أطول من إبريم وسواميـد=وإن كان ماتصلح قصبنـا رشانـا

من يفسر معنى سواميد في البيت أعلاه؟؟

إمشاركه للربع فـي فرحـة العيـد=من يوم جتنا الكهربـا فـي قرانـا

ما أدري ليش هلت العبرة يوم قراءت هذا البيت؟؟زمان ياقيا زمان...أستبدلنا الفانوس بالكهرب..ياحلو البساطه!!

إليا صفانـا نآخـذ الحـق ونزيـد=وإليـا تفرقنـا خـرب مستوانـا

بيت قمة..

والمعرفـة ماخذتهـا بالتقاصـيـد=أعـاف هرياهـا وأحـب السمانـا

والله ونعم يابسيس حي وميت!!

رحم الله بسيس بن حديد رحمة واسعة واسكنه فسيح جناته ورحم

الله اخيه سعد وابناءه 00 ولاتلوموني ولو ذرفت عيناي بالدموع

الاخ 00سعود بن سفر بن سليمان00

والله 00زمان ياسعود 00 ولو كاني عاتب عليك

اما بخصوص 00 سوالك عن بيت الشاعر بسيس

قصيده اطول من ابريم وسواميد000 وان كان ماتصلح قضبنا رشانا

وسواميد ابار للدعاجين 00 والعصمه 00 ويوضحها البيت الاخير

ان كان ماتصلح قضبنا رشانا 00 تقبل تحيات اخوك ((راس العرب))

		المشاركة الأصلية بواسطة : راس العرب اقتباس
	رحم الله بسيس بن حديد رحمة واسعة واسكنه فسيح جناته ورحم الله اخيه سعد وابناءه 00 ولاتلوموني ولو ذرفت عيناي بالدموع الاخ 00سعود بن سفر بن سليمان00 والله 00زمان ياسعود 00 ولو كاني عاتب عليك اما بخصوص 00 سوالك عن بيت الشاعر بسيس قصيده اطول من ابريم وسواميد000 وان كان ماتصلح قضبنا رشانا وسواميد ابار للدعاجين 00 والعصمه 00 ويوضحها البيت الاخير ان كان ماتصلح قضبنا رشانا 00 تقبل تحيات اخوك ((راس العرب))

حياك الله ياراس العرب..ومشكور على التوضيح!!
العتب لك العتب حتى ترضى!!
بس ليتني أعرفك...ممكن تراسلني على الخاص؟؟
سعود

الله يرحم ابن حديد والمسلمين جميعا
وصح السانه
ويستاهل ابو فوزي
ومشكور اخوي على النقل الرايع