يا ليل

ياليل ماعاد ابك ممسا وممراح=ولاعاد فيك النوم يطري علينا
تضيق لاصكيت ياليل الارواح=وماغير لاضاقت علينا سرينا
ماغير سجتنا عن الضيقه سلاح=ألّا نخفّفها ليا من بكينا
والدمع وألّا شي للضيق فضاح=عيبٍ علينا نستره لايبينا
ونسري لعل إنا نروق ونرتاح=واما يروح الضيق ولا نسينا
وكم بالبشر ياليل من هم وجراح=وانته ظلامك يستبيح الكنينا
نلقى كثير اللي عن الضيق نزاح=ومبلي على المسرا مثل مابلينا
واكثر من يسولف ويضحك ومزاح=هو أكثر اللي ضكه الهم فينا
ويطلع علينا الصبح ياليل وضاح=والشمس تدخل دُورنا مالفينا
ويكون بعده موعد النوم والراح=لو كان ماهو مرقد الغانمينا
نرقد بوقت أبواب الارزاق فتّاح=وتسرح لها اللي للغنا طامعينا
ونفوسنا ماهي بخيلات وشحاح=متوارثه حب العطا باليمينا
عطا الفدا ماهو رجا كسب الارباح=ونسكت ولا كنا لحاجه عطينا
ياكثر ماجانا وياكثر ماراح=ولاتستضيف جيوبنا اللي يجينا
مانعشق الدنيا ولو عطرها فاح =ولا به عدو لجيوبنا ألا يدينا

صح لسانك سائر
شاعر مبدع مافيك حيله.
فالك التوفيق

صح لسانك وارتقى شانك يا أبو علي
شاعر كبير ومشهود لك بالجزالة
وعساك على القوة ولا هنت يا بعدي

الله الله
يا أبو زيد
شاعر مميز وجميل ورائع ومبدع
لا هنت ولا هان غاليك وصح لسانك ملايين
ودائماً بانتظار جديدك وفقك الله

صح أبدانكم جميع وسلمتوا ولا هنتوا

هلابك شاعرنا وقصيدة مميزه وجمليه تدوم بهذالابداع والجمال بكل ماهوجديد وجميل

كفو والله يا ابو علي
ولا هنت وبيض الله وجهك
هذا اكثر من قصيد
هذا طرب طال عمرك

صح بوحك على جميل الابيات الرااقيةة منك

طاب تواجدك وابداع قلمك شامخ

طبت بخير

ما نعشق الدنيا ولو عطرها فاح
ولابه عدو لجيوبنا الا يدينا

الله الله ابدعت يا سائر

صح أبدان الجميع والشكر الجزيل على مرورهم واطرائهم