معوض خير يا حيٍ تهقوى في الزمان ومال

معوض خير ياحيٍ تهقوى في الزمان ومال=سنينك لو رقيت بعدلها يطرحك مايلها
تعلم واعرف ان الدرب قدامك سهل وجبال=جبالٍ تطولها وجبال بعيونك تخايلها
ومعوض خير ياحيٍ وردت الما بدون حبال=يطول بك الوقوف وشربة الما ماتحصلها
وقوفك عند راس البيرمايسقيك لو فنجال=ولا ينفعك شوف الجمه اللي منت طايلها
ومعوض خير ياحيٍ خدعك من الرجال اشكال=تشوف اشكالها وتحطها ارفع من منازلها
تعلم من زمانك لاتصير من اجهل الجهال=ترى في كل يوم تجيك عبره لاتجاهلها
إذا ربي وهب لك عقل تلقى في الرجال رجال=تعرف اللي يطلع قيمتك واللي ينزلها
ترى من بعض مايندي الجبين ويحرج الرجال=لياساق الميانه في نفوسٍ ماتقبلها
ومهما شفت في صاحبك من نخوه وطيبة فال=ترى بعض السجايا كثرة الالحاح يقتلها
معاريف الرجال ديون وديون الرجال ثقال=لياصرت متعافي ليش تغرق في جمايلها
رصيدك في حياتك سمعتك مع طيبين الفال=رجال الطيب والمعروف بالمعروف عاملها
ولاتبدي بجاهك في مقامٍ مايسر الحال=ولاتشفع لناسٍ ماتنومسك بفعايلها
لياجاتك تعذرها مدام العذر له مدخال=ووقت الجد قول الها الصحيح ولاتجاملها
وخذمني نصيحه لاتصدق كل ماينقال=يجرك للنميمه لين يطرحك بحبايلها
يجيلك ناقل النمات بهروجٍ تغث البال=سوالف في قفاك وحظك اطيب يوم تجهلها
يبرر بالحميه والصداقه شينة الافعال=يجمل صورته بعلومه اللي ماتجملها
ولو كانت حميه فيك رد المخطيه في الحال=ولكن استمعها في قفاك وجاك شايلها
ترى من جاب لك ودى وهذي عادة النقال=يحاول يقتنص من فمك كلمه لجل ينقلها
ومثل ماقال عندك راح عنك وعند غيرك قال=وزوُد عشر فوق الكلمه اللي كنت قايلها
تجنب مجلسه لاتجلس الا مع كريم خصال=تحمل ميلته وان ملت ميلتك ينقلها
ولاتصبر على الجار الردي لوهي ثلاث ليال=تضرك جيرته لو كان بيبانك تقفلها
وبيع الدار بأول سومةٍ تعرض على الدلال=ورزقك عند ربٍ كاتب اللقمه وكافلها
وبنتك لاتزوجها الردي لوهو كثير المال=تربيها على الطالات وتشوّه سلايلها
وكم من لاش يرمي خيبة ابنه فوق راس الخال=لو ان الخال من روس الرجال ومن دلايلها
ليامنك عرفت تَميز الطيب من البطال=وفادتك التجارب في الحياة وفي مسايلها
وكشفت الفرق مابين الصحيح وحيلة المحتال=وتعلمت الفراسه في الوجيه اللي تقابلها
بعد هذي ترى مالك غنى عن صحبة العقال=يدلونك برايٍ ينقض الدعوه ويفتلها
يقولون الرجال اللي سوالفهم حكم وامثال=ليامن ضاعت الحيله يدل القوم عاقلها
نصيحة واحدٍ جرب وشاف من الزمان اهوال=يقدم لك خلاصة هجرةٍ جرب هوايلها

لا هنت يا شاعرنا العزيز
أبو سلطان
ولا هان غاليك
والله يحييك وصح لسانك

قصيدة رائعه ، شكرا لك وماقصرت ..

ابو عبدالله
فارسة الاحلام
مشكورين على المرور

صح لسانك يالطيب ولا هنت
ابيات رائعة تحوي توجيهات
قيمة ..

صح الله لسآنك
- قصيده وآفيه في معآنيها
- نصآئح تؤخذ بعين الأعتبآر
- الله يكفينا و أياكم كل ما فيه شر

تحيآتي لكـ

ام وريف
علي القحطاني
مشكورين على مروركم