وصف الطبيعة

بسم الله الرحمن الرحيم

السلام عليكم ورحمة الله وبركاته

مساكم الله بالخير جميع وكل عام وأنتم بخير وعافيه


******

سبحـان ربٍ كـور الارض تكويـر=أوحـده مـا دامـت النفـس حيـه
هاض الضمير أسطر القاف تسطيـر=لجـل الطبيعـه والحيـاه الشلـيـه
الارض فيهـا لـو نديـر التفاكيـر=شفنا العجايب كـل صبـح وعشيـه
واليوم نجم سهيل بَيِِـن علـى خيـر=يلمـع جنـوب ولا يوصـف حليـه
لابان نحسـب عـدة أيـام ويصيـر=الجـو غيمـه والوطـاء مزهـريـه
يازين شوف العشب وقت المخاظيـر=فـي فيضـةٍ مـا داج فيهـا رعيـه
فيها الخزامـى والنفـل والنواويـر=وأنواع عشبٍ زاف ما شفـت زيـه
ويازين شوف الشمس مع حزة عصير=لا غربـت ثـم الشجـر مـال فيِِِـه
لا نسنس الغربي وغرد لـه الطيـر=والجـو غَيِـم وأمـطـرة ببـرديـه
هتاف حتـى صـار لصبـح تسفيـر=وأضحى الضحى منه الخباري مليـه
وشفنـا ورد يـم الخبـاري مغاتيـر=ذودٍ يهـيـض كلـبـوهـا نـقـيـه
ثم صدرة وأبهل جميـع المصاغيـر=وحلب لنا الراعـي ورحـب ياحيـه
وشبيـت ظـوي للـدلال المباهـيـر=وزليت فـي الدلـه مـن الشاذليـه
وقهويت أخوياي الرجـال المناعيـر=أصحـاب لا بـار الخـوي بخويـه
عـن العبـاده مـا يحبـون تقصيـر=ونفوسهـم بالدين دايم غنـيـه
وعلى الوفاء مـا حسبـو للمخاسيـر=معامليـن الطيـب مـن طيـب نيـه
هذي طـراة العمـر قبـل المقاديـر=تومـي عليـنـا باليـديـن قـويـه
يالادمي لا تحسـب العمـر تعميـر=لابـد مـن يـومٍ تجـيـك المنـيـه
ولا ينفعك كثـر الذهـب والدنانيـر=الا عمـل خيـرٍ تحصـل جـزيـه
وإختام قولـي عـد وبـلٍ شخاتيـر=صلـو علـى الهـادي محمـد نبيـه

******
وسلامتكم
أخوكم / فارس بن عايض الشدادي .

يالادمي لا تحسـب العمـر تعميـر=لابـد مـن يـومٍ تجـيـك المنـيـه
ولا ينفعك كثـر الذهـب والدنانيـر=الا عمـل خيـرٍ تحصـل جـزيـه
وإختام قولـي عـد وبـلٍ شخاتيـر=صلـو علـى الهـادي محمـد نبيـه

اللهم صلي وسلم عليه

صح لسانك يا فارس
وأبيض وجه


تقبل تحيتي

صح السانك يافارس
بيض الله وجهك

صح اللسانك وبيض الله وجهك

قصيدة جميله لاهنت اخوي فارس






دمت بخير


,,,,,, عناد القـــــــــاف

الارض فيهـا لـو نديـر التفاكيـر
شفنا العجايب كـل صبـح وعشيـه

صح لسانك يا أبو عايض ولاهنت