مخطي

يا الله يا الله تهدينا طريق السراط=ما مدّ مدّك ولو أن الأكارم عطوا
خلقت خلقك وحاشا ما خلقت اعتباط=ما طار واللي على وجه البسيطة وطوا
تغفر ذنوباً لها قلب الحزين استشاط=غلط وقصر مع اللي فالحياة اغلطوا
انا بشر والبشر له بالخطايا ارتباط=يخلط مع الزين شين وكم عباد اخلطوا
يا الله دخيلك ليا جاء في قيمنا انحطاط=واجتاحنا السوء مدري غصب والا سطوا
البارح العين فيها مثل شوك الحماط=زاروني الهم والأحزان ثم اقلطوا
وشغلت جيبٍ يجيه مع المساري شباط=ما حدّه البعد حدنه عيون القطو
ما دابل الكبد كود الا كلام الهياط=مهما يخفون والا للمنافق غطوا
يبنون بالكذب قصراً من كلام وخراط=لا بد ينزال سرع وقتهم أو بطوا
كم عالما وضعها مزري وتحت البلاط=اللي بسلم الجدود ونهجهم بلطوا
اللي ليا صادفوا للحزن قوة نقاط=لا وصلوا نقاط قوات الحزن صفطوا
اشوفهم مثل ما اشوف الحجل والغطاط=و أعدهم مثل ما عد الدجن و البطو
صحيح والصح ما ينغط ماني بغاط=للصح وان غطوا المخطين يا اللي غطوا
مخطين وإن ما تعمدتوا فمن شال حاط=وعوا من اللي تفحل من خلاف وحطوا
قدام لا تبلشون بجرح صعب الخياط=ها دوروا وقتها خياط و ألا خطوا

انا بشر والبشر له بالخطايا ارتباط
يخلط مع الزين شين وكم عباد اخلطوا


صح لسانك اخي العزيز رائعه جداً

بعد أذنك بنقل الموضوع الى مكانه المناسب

ارحب ارحب
يا شاعرنا العزيز أبو فيصل
ويا هلا والله وألف مرحبا بتواجدك وحضورك
وصح لسانك ملايين ولا هنت يا بعدي


وتراك وعدتني بالحضور والمشاركة المستمرة
وحنا ما نستغني عنك وعن تواجدك معنا
لا تخليها فقط سحاب صيف وتعدي

ارحب يالسلطان
وابشر بسعدك
ترا الجديد هنا على طول
والتقصير حاصل
وانتم خير من يدمح

حياك الله يا أبو فيصل
وصح لسانك وارتقى شانك
وبيض الله وجهك على هذه القصيدة

ارحب يابو ماجد
شرفني مرورك الكريم
وبعض مما عندكم
طال عمرك

صح لسانك أبو فيصل
وتشكر على هالقصيدة
الطيبة. لاهنت

صح بوحك شاعرنا رووعاتك الجميله

الدائمه طيب الحرووف وجمال السطور
طبت بخير العافيه استمر

صح لسانك ولا هنت يا أبو فيصل
وبيض الله وجهك على هذه القصيدة