من قصائد الشاعر عبد الرحمن بن بديع

هذه قصيده لشاعر عبد الرحمن بن بديع واتمنى ان تعجبكم

ياسعود يامشكاي ويش التدابير=لاتشتكي جور السنين وشطفها
جور السنين يحن ويمر ويصير=راجع حياتك واكثر الناس شفها
الناس لاحقها من الوقت تاثير=وتصبر على باس السنين وصلفها
تميل ميلات المقادير وتغير=وان وصفت بتعذب الى وصفها
احرص على قرب الرجال المناعير=الى دروب المرجله تحترفها
تلقى لخوتهم معزه وتقدير=ومجالسن مادنست من عرفها
لا قدر الله ثم رمتك المقادير=الرجل منهم وقفته لاوقفها
تسوى لها فزعت صفوف وطوابير=ماهو ليا شاف الصمايل حرفها
يقلط على الشده كما سالم الزير=وتأمن به الديرة وهو في طرفها
لامن زهمته قام يشقح كما الطير=لا ضف جنحانه وكفه عكفها
واهل الردى مالك وراها مداوير=جنب مجالسها وجنب ولفها
لو ضحكت لك في السنين المياسير=لابد في وقت القسى تكتشفها
تفرح بك الشمات لو ذنبك صغير=وتحتار في اصغر غلطه تقترفها
يصير همك كبر هضبه شمنصير=لاكن جنب معرفتها وعفها
الانذال رفقتها مهونه وتقصير=وتكثر عنى نفسك وتكثر حسفها
فالرفقه الى ماتدلك على خير=الله يلعنها ويلعن جدفها
ولا ترادع جاهلين المحاضير=لو تعترضلك كلمه اللاش طفها
احفظ لسانك لا بلوك المعاثير=والكلمه الى دون ميزان خفها
يجوز ترمي كلمه دون تفكير=والصبح سودان القلوب تخطفها
وعذر الرجال الوافيه خله يصير=ابيك تعذرها وتقبل اسفها
العذر يقبل لاحصل فيه تبرير=من الرجال الى صريحن هدفها
وفي كل شي قد تجوز المعاذير=الى على اعراض الرجال وشرفها
اقولها وانا الى سلوتي غير=البعد عن ضيق البيوت وكنفها
اسج في خبتن كسته النواوير=حيثه هوى روحي وحيثه نصفها

صح لسان شاعرها
وسلمت يمين ناقلها
لاهنت ولاهان غاليك ياابومشعل

لاهنت أخوي
ع الايراد الرائع
شكري وتقديري

شكرا لك اخوي ياسر وشكرا لأختي بنت النشاما على مروركم والله لايهينكم

إنتقاء جميل ..
يعطيك العافية وَ مشكور يا أخوي ..

اهلا بك يا اخت نوف شكرا لك على المرور ولك كل تقدير واحترام