قاط قاط .. والحسد موب زين..

الله يحييكم ياعييلي <<مو لايق الدور ابد

اليوم جايبة لكم قصة خطيرة مررره<<ايو أطلعي على حقيقتك:icon_mrgr


هذه السالفة موجود بكتاب
أساطير شعبية لـ عبدالكريم الجهيمان الجزء الأول

و كانوا الأولين يقصونها عشان يعلمون عيالهم ان الحسد موب زين .. ونهايته شينة ..

.
.

السالفة:

السالفة سالفة بنية اسمها فاطمة .. أمها عجيز ماتمشي وابوها شويب عميّان .. وهي البنت الوحيدة لهم .. وهي اللي تصرف عليهم .. وعلى انهم فقراء عمرها ما مدت يدها لأحد .. كل يوم تطلع وتشتغل وتجيب لها ولهم رزقهم ..

قعدت البنت على هالحاله .. فترة طويلة الين ملت من المدينة .. فصارت تطلع للبر .. تجمع الحطب ..
وتاكل اللي ينوكل من الزرع .. الين جا يوم وطلعت الحالها للبر تحتطب ويوم جت بتعود على بيتهم ما دلّت .. وأظلمت الدنيا وهي ما برحت ضايعة .. تلفتت حولها تدور احد .. نار او أي شي يدل على ناس .. ما لقت شي .. وارتاعت البنت ودرت انها تورطت !!

والجو كان بارد .. عشان كذا جمعت ملابسها على جسمها واطبقت على نفسها بزنبيلها <اللي طلعت تحتطب به وتجمع فيه عشب هو شي يشبه السلة > حاولت تنام بس ما قدرت ..
لأن الوضع كان يخوف الدنيا ظلام ولا حولها أحد وبرد ..وزاد الهم هم ..يوم سمعت أصوات عالية جايتن لها .. فانرعبت زود وقامت تعوذ من ابليس لأن الأصوات ميب اصوات أوادم

وبدت تقرب الأصوات أكثر وأكثر الين ما وقف وحش كبير عند راسها وسألها وهي تحت الزنبيل : من هنا ؟
فردت البنت وهي مرتاعة : أنا يا عميمي !
فقال لها: تعرفيني ؟
فردت : ايه نعم اعرفك ..
فقال : طيب من انا ؟ ..
فقامت البنت وتمدحه : انت ملك الوحووش ومصدر الخير واحسن من على هالأرض ..
فقال لها .. طيب وش رايتس انا زين ؟
فردت عليه : زين وبس الا قمر قمر ..
قال لها : طيب وجنودي ؟
قالت : ونعم والله جنود أقوياء وكثيرين وشجعان ..
فقال لها من أي بلده انتي ؟
فقالت : من هناك <قالت اسم البلدة > ..
فأمر على واحد من جنوده انه يشيلها لأقرب مكان لبلدتها ويملا لها زنبيلها ذهب وفضه وجواهر ..


ودخلت على أهلها في هالليل وهي معها هالزنبيل اللي بيغير حياتهم من فقر الى غنى وعيشة ما حلموا بها ولا حتى خطرت على بالهم ..وعلمت ابوها وامها عن القصة .. فقال لها أبوها : انتس توفقتي بجوابتس يا بنتي.. هاللي شفتيه وحش يقاله < قاط قاط >
وهو دايم يمتحن اللي يلقاهم بالبر ويسألهم هالأسئلة وبعضهم مثلتس يتوفقون وبعضهم يذبحهم ..

حمدت البنت ربها انه وفقها تجاوب بحكمة وان انجاها من هالوحش ..


مع الأيام الناس لاحظوا الغنى اللي فجأة جا لعايلة ابو فاطمه وكلن يتفكر فيهم وش قصتهم .. ناس قالوا ان الأبو حالمن بهالكنز وانهم حفروا ولقوه ..
وناس قالوا ان هذا قريبن لهم كان مسافر للهند مات وورثوه ..
وبعضهم قال ان الله رزقهم لأن الله الرزاق ويرزق من يشاء بغير حساب ..


المهم ان فيه عايلة اغنى منهم بس حاسدين عايلة فاطمه على هالغنى اللي جاهم فقامت بنتهم اللي بعمر فاطمه تسألها وش القصة .. من وين لهم هالثروة .. وأصرت عليها كل يوم كل شوي تسألها ..
الين ما جاء اليوم اللي ملت فيه فاطمه فعطتها السالفة بس مقلوبه يعني بدل ما تمدح قاط قاط بأجوبتها قامت وسبته .. وعلمتها عن المكان اللي لقوها فيه وكلش ..


عاد وخذت بنت الجيران هالسالفة المقلوبة وراحت بزنبيل معها للبر بدون ما يدرون عنها اهلها ..
وفي نفس المكان اللي قالته فاطمه قعدت تحتريه ..
ويوم جاها الوحش وسألها من انتي ؟
قالت : انا فلانة ..
وقالها من انا ؟
قالت انت العدو الشين اللي فيك وفيك ..
فقام الوحش عصصصصب منها وقال لجنوده يالله اذبحوها قطعوها قدامي الحين الحين .. فقاموا وكلوها وما بقى منها الا ثيابها وزنبيلها ..


يوم اصبح الصبح قاموا اهلها يدورونها وسألو عنها الجيران وما من خبر ..

وطلعت عليها اشاعات انها منحاشه مع واحد تحبه واهلها معيين تاخذه ..

وناس قالوا انه مغررن بها ..وانحاشت خوف من اهلها ..

الين بعد ايام لقوا اغراضها في البر وخذوهن لأهلها ودروا انها ماتت ..
بس ما يدرى وش السبب..

وكلن طلع عليها قصه ..
..
..
وإن شاءا لله عجبتكم السالفة..

الله الرزاق سبحانه
مشكوره سيدة الاشجان

		المشاركة الأصلية بواسطة : حمد زياد قاعد اقتباس
	الله الرزاق سبحانه مشكوره سيدة الاشجان

ونعم بالله..
شاكرة لك طيب مرورك أخوي حمد..

مشكوره ياسيده على القصه

تحياتي لك الغربي

		المشاركة الأصلية بواسطة : الغربي اقتباس
	مشكوره ياسيده على القصه تحياتي لك الغربي

وأشكر لك روعة تواصلك مع مواضيعي ..

يعطيك العافية..

والله هذي من قصصكم ياحقون جدة هههههههههههههه

مشكور اختي على هالطرح

كل الود

قصه حلوه.. يعطيك العافيه

سيدة الاشجان... بس حرام الى سوته في بنت الجيران

تقبلى مروري

		المشاركة الأصلية بواسطة : عبدالله الشدادي اقتباس
	والله هذي من قصصكم ياحقون جدة هههههههههههههه مشكور اختي على هالطرح كل الود

لا والله ماحزرت ياخوي ماهي لجدة ولا شي ..:icon_mrgr

اهل جدة مايعرفون هالقصص

أسعدني مرورك

تحب هالقصص >
بس مسكينه صدقت وماتت
يعطيك العافية ياسيدة الاشجان مواضيعك كشخه :icon_mrgr

هلا جدتي سيدة الاشجان ههههههههههههه

> ذكرتني بقصص جدتي

بس والله القصة روووعة

إلا ياجدتي ماتعرفين وين الديرة اللي فيها قاط قاط

بروح اقط معه يمكن يحصل لي زنبيل ذهب بعد موته ههههههههه

يعطيك العافية على القصة