قص الفيديو والصوت مع KM player

السلام عليكم ورحمة الله وبركاته ..


طبعا الكل يعرف البرنامج المجنون الـ KMPlayer بس كثير ما يعرفون الخصائص القوية اللي فيه واللي تغنيك عن برامج كثير..

برنامج الـ KMPlayer فيه خصائص قص الفيديو وقص واستخراج الصوت والصورة من المقاطع .. بس المشكلة ان بعض الاصدرات ما تعطيك هالخصائص بطريقة مباشرة يعني لما تحمل البرنامج يمكن ما تلقى خيارات قص الفديو والصوت واستخراج الصور مباشرة ويبغالك كم حركة تسويها عشان تطلع لك الخيارات كلها ..

أول شي عشان فيه إختلافات صغيرونه بإصدارات البرنامج راح اشرح على آخر نسخة واللي يبغى يشوف نفس الشرح وما يختلف عليه شي يحمل النسخه الأخيرة وان شاء الله الكل يستفيد..

حمل النسخة النهائية من هـــنـــآ






بس فيه حركة مفيدة ودي اقولها قبل نبدا وهي, اول ما نحمل البرنامج ونشغل السيت اب .. احسن اننا تختار Full Install .. زي الصورة هذي:



بعدين نكمل السيت اب للنهاية عادي لحد ما يشتغل البرنامج وتطلع الواجهه حقت البرنامج.

اوكي نبدا




أول شي عشان نلقى الخيارات المتقدمة ومنها خيارات القص والإستخراج يبغى لنا كم خطوة والصورة هذي توضح كل شي: ( بس نضغط رايت كلك بوسط الواجهة حقت البرنامج ونختار نفس اللي بالصورة):



بعد ما نطبق اللي بالصورة ونضغط رايت كلك مرة ثانية على واجهة البرنامج بنحصل القائمة تغيرت وصارت كذا:






اوكي الحين خلاص صارت الخيارات المتقدمة موجود علطول عندنا بالبرنامج ونقدر نستخدمها.

هنا نحصل خيارات القص والإستخراج (Capture) :






الشرح حسب الارقام اللي بالصورة :

-1هذا لقص واستخراج الصوت.. حتى لو الملف اللي فاتحينه فديو نقدر نقص بس الصوت منه.
2- هذا لقص الفديو من ملفات الفديو ..
3- هذا لأخذ صورة من المقطع الحالي بالحجم الاصلي للفديو يعني لو انت مكبر شاشة العرض وحطيت هالخيار بتنحفظ الصورة اصغر وبحجمها الاصلي.
4- هذا لأخذ صورة من المقطع الحالي بالحجم اللي انت تشوفه الحين.. يعني لو انت مكبر الشاشة وحطيت هالخيارت بتنحفظ الصورة بالحجم اللي انت حاطه لما اخترت هالخيار.
5- واخيرا هذا لأخذ صور ورى بعض يعني صور على شكل سيريز.. يعني مثلا أحدد عدد الصور اللي ابيها بالثانية وعدد الصور اللي نبي نطلعها بعدين يسردها لك.. وراح نشوف كيف بعد شوي.

اوكي الحين نمسك الخيارات اللي فوق وحده وحده ..





الخطوه 1: استخراج الصوت:



1- هنا نختار مكان الصوت اللي نبي نقصه. وعند كلمه ِِِAudio encoder 1 و Audio encoder 2 نقدر نختار صيغة الصوت اللي نبي ..
2- هنا نضغط عليه عشان يبدأ يقص الصوت من اللحظة اللي نضغط فيها هالخيار. طبعا انت تسوي كذا والصوت او الفديو شغال.



الخطوه 2: قص الفديو:



1- -مثل اللي قبله هنا نختار مكان حفظ الملف.
2 -صيغة الفديو اللي بيطلع لنا بعد القص.
3 و 4 - هذي خيارات متقدمه للي يبي يغير صيغة الصوت المدموجه مع ملف الفديو او مثلا يقص الفديو بدون صوت .. ( اللي يبي يقص الفديو بدون صوت يختار Disable اللي عند رقم 4 )
5- هنا يبدا القص من اللحظة اللي نضغط فيها على هالزر.

الخطوه 3 و 4 : لأخذ صورة من المقطع الحالي بالحجم الاصلي والحجم الحالي:
هذي ما يبيلها شرح أول ما تضغط على هالخيار بيطلع لك مربع حفظ الصورة على طول (الصورة اللي بتنحفظ هي الصورة اللي كنت تشوفها وقت ما ضغطت على احد هالخيارين).



الخطوه 5 : صور على شكل سيريز



1- مكان حفظ الصور.
2- صيغ الصور اللي نبيها.
3- هذا الخيار اللي يسلمكم اذا بغيت تحفظ الصورة مع الترجمة اذا كنت حاط ترجمة او مع رسايل البرنامج اللي تطلع لما تضغط بعض الخيارات وانت تناظر الفديو.
4- هنا السنع كله :
في Number to extract :
نحدد Continuously اذا بغينا يسرد لنا الصور بدون ما يوقف عن عدد معين الا لما حنا نوقفه. او نحدد Numbers اذا بغينا نحدد عدد معين من الصور نبيه. ونحدد Seconds اذا بغينا عدد الثواني اللي خلالها يسرد لنا الصور.

وفي Frame to extract:
نختار Every Frame اذا بغينا كل فريم يطلع لنا صورة منه .. (والفريم هو صورة كل حركة تتغير بالفديو واللي مجموعها يمثلنا الفديو كامل) يعتبر صغيييير مرة تقريبا اجزاء من الثانية.. وبإختصار لما نختار هالخيار كل حركة تتغير يسجلها ويطلعها على شكل صورة..
نختار Every # Frame او Every # ms إذا بغينا نحدد عدد الصور بالفريم الواحد أو عدد الصور بالملي الواحد ..
نختار In 1 sec... أو In 1 min إذا بغينا نحدد عدد الفريمات بالثانية او الدقيقة الوحده ,


6- هنا اذا خلصنا من الحوسه اللي فوق نضغط ويبدا يسرد الصور على حسب الخيارات اللي حطيناها ..
هذي الخاصية ترى مهيب شينه للي يحبون يسوون صور gif المتحركة حسب الرغبة .. مع ان فيه برامج اقوى بهالسوالف.

عالعموم هالمميزات هذي جزء وموب كل شي بهالبرنامج...

للمعلوميه الشرح بعضه منقول للفائده .. وفيه أضافات بسيطه من عندي ..

تحياتي لكم

>> جاري التحميل


شغوبة برنامج رائع


عندي كذا مقطع أبي أفصل الصوت عن الفيديو


يعافيك ربي

شغب ..
أعجز عن شكرك غاليتي ..
ما قصرتي .. أبدعتي في الشرح ووفيتي وكفيتي ..
يعطيك ألف ألف ألف ألف ألف عافية وزود ..

		المشاركة الأصلية بواسطة : شوق شداد اقتباس
	>> جاري التحميل شغوبة برنامج رائع عندي كذا مقطع أبي أفصل الصوت عن الفيديو يعافيك ربي

هلا وغلا شوق .. فعلا برنامج حلو وبديت أجربه ..


الله يسلمك ويعطيك العافيه

شغب انثى
يعطيكي الف عافيه
على الطرح الجميل
وفي انتظار جديدك

		المشاركة الأصلية بواسطة : بنت الزين اقتباس
	شغب .. أعجز عن شكرك غاليتي .. ما قصرتي .. أبدعتي في الشرح ووفيتي وكفيتي .. يعطيك ألف ألف ألف ألف ألف عافية وزود ..

هلا وغلا بنت الزين الله يعافيك ويسلمك ..

ممتنه لك

		المشاركة الأصلية بواسطة : مجدي الشدادي اقتباس
	شغب انثى يعطيكي الف عافيه على الطرح الجميل وفي انتظار جديدك

هلا أخوي مجدي الله يسلمك ..

شكرا لك

شرح جميل ومرتب لهذا البرنامج الرائع
المتعدد الخصائص والذي نحتاج غليه
في الكثير من تنسيقات الملتيميديا
تسلم يديك يا شغب على حضورك الراقي
المتميز وخاصة في هذا القسم

^
^
أهلين يالسلطان .. الله يسلمك ..

شكرا لك ..

شرح برنامج الرائع وجميل وخصائص رائعه
يعطيك العافيه
تحياتي

^
^


هلا وغلا خفوق .. الله يسلمك ..

شكرا لك ^^