آخر 10 مشاركات |
مختارات | قال تعالى: {سِيمَاهُم في وُجُوهِهِم} |
|
||||||||||||||||||||||
يا ما أسهل الدنيا :: مهما تعاندنا {الفصل العاشر }
شرفتني والله رسالتك وأسعدني إن روايتي وصلتك ولها متابعين من خارج المنتدى أيضاً وكلي عذر إني ماوفيت بوعدي وطوّلت عليك بهالجزء وللظروف أحكامها ××××× / / / بعد ماعرف سعود سبب تعب ريوف بسبب وفاة صديقتها حط بباله إنها يبغالها نزعة دينيه وتذكير بالصبر وهو يقدر يقنعها ويغير تفكيرها للأفضل وعارف حجم تأثير كلامه عليها وريوف قدام ابوها تحاول تتماسك ولكن دمعتها مارضت تجف وتحس بتعب وساكته لأنها ماتقدر تصارح احد بالسالفة ويتدخلون الكبار ويكبر الموضوع وتتفرق العوائل وكل ماتذكرت الموضوع تصدع وتدخل بنوبة بكاء لين ماتفرّغ عن اللي بقلبها حس سعود إن وجودها بالمستشفى ماله داعي لأنها بتتأزم أكثر وطلّعها ............. أحداث غياب فيصل صارت الحديث الشاغل للجماعه اللي يقول : سعود يكذب يداري ع ولده وإلا هو مسجون ومايبون أحد يدري واللي يقول : ارهابي وحتى أهله مادروا عنه مغيبين شمسه واللي يقول : داشر وصايع ويسكر وراح عقله بالخارج وتتضارب السوالف ومحد من بيت سعود قال السبب لأنهم مايدرون وينه فيه ومحد مصدق الوضع من الجماعة لأنه مستحيل يغيب شخص سنتين وماجا خبر موته وهم ساكتين ولالقوه للحين سالفه تحيّر ! ( دائما في حزة الشدة لما عائلة كاملة تصير بمصيبه مثل عائلة سعود بفقدانهم لولدهم راكان ينطرون خبر يفرحهم وإيد تشد ع أزرهم ويتفاجأون ببعض الناس همهم سوالف وليه غاب وكيف غاب وسوء ظن بدال مايمدون يدهم ويساعدون ويبحثون صار البعض يتشمت بتربية سعود وهذولا عياله اللي يقولون متربين وهذي نتيجة السفر للخارج وهذا اطيب عياله راكان فيه كذا وكذا شلون الباقين وأرض خصبه للسوالف وللنفوس الرديه وكعادة الناس في أي مجتمع يطلعون الحساد والأعداء حزة أزمتك وقمة حزنك وبالمقابل تكتشف ناس يحبونك وماكنت متصور وقفتهم تكون هالقد معك وتنكشف أقنعة البشر بحزة حزنك وشدتك لأن حزة فرحتك الكل حواليك ) في بيت سعود : غاليه بدت تتماسك بعد ماتعبت ريوف وتحاول ماتضايقها أكثر وهي حزينة لوفاة صديقتها كما تظن ريوف طالعه من المستشفى لها أسبوع وماطلعت من غرفتها ع السرير غالية : مايصير ياريوف بتموتين من الجوع والمغذي اليوم الدكتور قال إن وريدك ممكن يتجلط لأن السوائل ماتروح وتبغينهم كل يوم يحفرون بلحم أصابعك عشان يدورن اورده جديده طلعتي ومااستفدتي كل يوم انخفاض ضغط وابرة مغذي حرام عليك ارحميني اكلي أي شي لو زبادي بس لاتجلسين كذا ريوف ساكته ومالها خلق تتكلم تحس إن الكلام يبغى له مجهود كبير وهي تعبانه وعيونها كلها هالات سوداء لأنها ماتنام إلا ساعه باليوم وإذا حست بدوخه من الجوع شربت رشفة عصير وطاحت عليهم وودوها للمستشفى وجلست ع الحالة هذي شهرين وماتبي تجلس بالمستشفى سعود : أنا بكلم لها دكتور نفسي حالتها ماينسكت عليها غاليه : لا والله ماتدخل مستشفى نفسي لو على موتي تبغى الناس تقول عنها مريضه نفسياً ويحطون عليها سوالف ومايخلونها بحالها بنتي مافيها شي هذا من دلعك لها ماتهاوشها ومحد يزاعلها وبنتي وبنتي وخليت عودها طري أي موقف يهزها شلون عاد تموت صديقتها انا توقعت حالتها اردى من كذا لكن ماتوديها للنفسي سعود هذا احنا مستشفى نفسي يساوي مجنون وحالته ميؤوس منها ويتبرون منه المجتمع ماتدرون إنكم كلكم ممكن تحتاجون زياره له مثله مثل دكتور الأسنان لكن وين العقول اللي تستوعب انه مافيها شي استشارة الطبيب النفسي وعرض الحاله عليه والاستفسار (سعود بحكم دراساته وثقافاته وسفراته متشبّع بقناعات متحضره وتتصادم مع مجتمعه ) سعود :أنا بجيب لها الدكتور للبيت ومحد بيعرف من الجماعة إذا انتي خايفه من كلامهم ولا إني اشوف بنتي تذبل كل يوم ورى الثاني غاليه : خل بنتي علي ومانبي دكتورك وزعلت وراحت لريوف وعلمتها السالفه عشان تخاف وتآكل وماتتعالج نفسيا ريوف : قولي له دكاترة الدنيا ماراح يشافوني لايتخسر ولا يتعب نفسه انا مالي نفس آكل ومعدتي توجعني وهنا بدت ريوف تفكر بنفسها وحست ان فعلاً فيها اوجاع ماكانت منتبهه لها من كثر الحزن اللي هي فيه غاليه : معدتك عشانك ماتاكلين ريوف : انا أحس بشي غريب بتصدقيني يمه لو اقولك غاليه وخافت من كلام ريوف : أكيد وش تحسين فيه ريوف وبعيونها الدموع : انا لما أسكر اللمبه واقولكم بنام عشان محد يجلس عندي كنت أبكي سبع ساعات ثمان وقت طويل واتعب وانام مااكمل ساعه واصحى عشاني احس قلبي فيه برودة يمه والله كأن عروقه فيها ثلج شفتي القفص الصدري أحس مافيني ضلوع تخيلي من كثر ماهو متعبني اتخيله ينبض وهو برى ومافيه دم يجري بعروقه شفتي الهواء البارد لما يلفح وجهك وعليه ماي مو يكش جسمك أنا كذا أحس عروقي خاويه مافيها دم بس هواء بارد ومو جسمي اللي يكش احس قلبي يهتز واخاف يطيح مني وأمسك مخدتي واضمها عليه بقوه وابكي ولما ابكي احس الدم يتحرك بعروقي والله شريان قلبي لما يوزع الدم احس بالدم لما يمشي بعروق ايدي اليسرى يمه تعبت والله تعبت مقدر اتحمل وضمتها غاليه وبكت على صدر امها وتحاول تطرد خيال جوزاء وريان من ذاكرتها ....... ×××× مرت الأيام صعبه على ريوف كلها تعب وأبر مهديه عشان تنام واستعادت صحتها بعد 3شهور بعد مافقدت وزنها ونضارة وجهها وضحكتها وسعادتها لكن بدت تآكل وتنام وكل من شافها ماعرفها وشلون تغيرت وين جمالها وين هبالها وين وين صارت انسانه ثانيه شاحبه وماتضحك وماتنكت وأحياناً وهي جالسه معهم تتذكر ريان وتنزل دمعتها وتقوم كل شي يذكرها فيه ورسالته ترن براسها آه ياريان انا حقيره انا ماتربيت انا خاينه ياقساوة قلبك شلون حطمتني كذا معقوله ماتأثرت من اللي صار لي بسببك معقوله حتى انت مشت عليك كذبة وفاة صديقتي ياخسارة سنين حبي لك انا ماانجرحت من احد ويوم انجرحت انجرح منك وتمسح دموعها وتحاول ماتفكر فيه مابقى في هالدنيا هذه شيءواحد اخسره .. من بعد ما انا خسرتك كل شيء بعدك يهون والله لو أخسر حياتي من بعد حبك ترى .. عادي جداً يا حبيبي خل يكون إللي يكون ليه عايش ؟ والله مدري ليه عايشيا ترى .. وانا كلما فيني ميت حتى مدري من أكون من أنا ؟ وين المشاعر ؟ وين إحساسي سرى ؟ .. وين حبي وين شوقي وين ودي والشجون وين ذاك الطايش اللي باع فيالدنيا وشرى .. وين ذيك الشاعريه وين كل ذاك الجنون وين قلبي مدري وينه وش حصل له وش جرى .. أذكر انه كان طيب مخلص ووافي وحنون مدري والله لو نسيته أو بعدنيأذكره .. راح وخلاني لحالي بين كل هذه الطعون كل شيء في الدنيا يبرى إلا جرحي مابرى .. كلما له الجرح يكبر كم بداري كم بصون مشكله لا صرت كاتم جرح محدٍ بكدرى .. لو خفيته وسط قلبك تفضح الجرح العيون في القرية : جوزاء من طلعت ريوف من المستشفى تحاول تتصل فيها وريوف تقول لأهلها جوزاء صرفوها مابي اكلمها وأحيانا امها تضغط عليها وبنت خالك وعيب وعشان ماتحس بشي توافق تكلمها ع الثابت ومن تسلم جوزاء وترد عليها دقيقه وحده وإذا حست ريوف ان جوزاء بتبدأ بسوالفها تفصل السلك وتخلي الجهاز فوقه عشان امها ماتلاحظ انها تتجاهل الاتصالات وجوزاء تفهم انه عطل بالأسلاك او أي شي لين تمل وماتتصل لأن الجوال مقفلته وماعندها الا الثابت ومخلينه بغرفتها واذا شافت رقمهم تفصله واذا امها موجوده وتوهقت ردت بدون نفس واذا بدت جوزاء بالعتاب وليه مالك نفس هنا ريوف تموت غيض من جوزاء تغلط وتجرح وتسوي كل هالسوايا وتجي تعاتب تبغاها ترحب فيها وماتتغير وحضرتها حتى مااعتذرت او قالت انا غلطانه وحست بالذنب واللي يحرقها اكثر اذا قالت ريان يسلم عليك ودها مو تسكر السماعة ودها تسكر فم جوزاء وتقول كافي ترى ذبحتوني مابقى فيني شي عشان تنتقمين بسبب ياسر اللي مالي ذنب فيه ريان ومتأثر انه ظلمها ويرسل جوزاء تكلمها وماتعطيه جواب : انتي مامنك فايده للحين ماجبتي لي خبر عنها هذا انتي بالخراب أول من يجي واذا بغيتك تصلحين شي مانفعتيني حسبي الله عليك انتي السبب باللي انا فيه وباللي شافته ريوف انا ارسلت لها عشان ترد علي مالي وجه اعتذر منها لكن مااقدر اسكت وهي تعبانه بسبتي وماوصلني تقرير ثلاث شهور وأكثر قافله جوالها اكيد نفسيتها دمار اعرفها ماتتحمل جوزاء : اقول ياقيس فكني من شرك واستح ع وجهك مهزأها برسايلك وتتصل عليها وجهك مغسول بمرق انت ريان وعصب عليها : أخ بس يارب تصبر قلبي انتي ماتحسين والا ماتستحين والا وش سالفتك زود على وقاحتك وكذبك وتفريقك وظلمك لها بمقلبك اللي مثل وجهك جايه تحطين اللوم علي وانتي السبب بكل شي انتي تحبينها مثل ماأنا اتخيل وإلا تكرهينها جوزاء : اقول الله يرحم والديك ريوف اللي ماعندها احساس حرمتني من ياسر وهي تدري اني احبه < ريان عارف ان اخته تحب ياسر وهو مايحبها لأن ياسر دايم يقول مواصفات بعروس المستقبل ماتنطبق ع اخته ويعرف تفكير خويه ويحطم جوزاء كل ماجابت طاريه ريان : ياسر يحبك انتي قولي يارب فيه احد يقبل يتزوجني انتي وشحومك من شاف جسمك حتى بالعبايه بيقول الله يرفع عنها ولايبلانا هذا جسم بنت بعمرك جوزاء تعشق السمنة والوزن اللي مو فوق الــ 95 عندها مو جسم وكل مالها تبلع وتزيد وصل وزنها ميه وعشره وتقول ليه تحطموني فيه ناس اسمن مني جوزاء : ههههههه من زين عظامك كأنك بمجاعة لا وعاجبتك ريوف انت لو تتزوجها عيالك بيصيرون مساويك تدري ان وزنها 58 وتقول ودي انحف هي فيها لحم عشان تنحف ههههههههه ريان : شوفي ياأوم الشحوم لاتخلين العجز اللي تفطرين معهن الضحى يلعبن بعقلك وتجلسين على تسبودنا بسبب هالخبال اللي معبي راسك انتي لو مانحفتي ابشرك خمسين سنة لقدام بتخيسين ببيتنا جوزاء ولاهمها وتغني : قول عني ماتقول صوبي كم صعب الوصول وياويلك على الشحوم انت وعروس الهنا وريان حب ظهر كفه وحطها ع جبهته بحركه تبين لها الحمدلله ع العقل وطلع وخلاها في افريقيا : راكان تحسنت حالته لكنه ماتشافى وباقي على جلسات الرقيه واالشيخ اللي يقرا عليه يتعامل مع جن مسلم وطلع كل الأسحار الموجوده وبقى واحد ببيتهم ماأتضح مكانه بالضبط وقبل يفك الأسحار جلس مع راكان الشيخ : راكان أنا بكون معك صريح السحر اللي فيك كان يؤدي للجنون وأنت وصلت مرحلة الجنون ومن بعدها للموت والحمدلله إنك بديت تتشافى لكن الطلاسم هذي لو بفكها الحين ممكن تأثر على حياتك راكان ومصدوم : شلون يعني اللي فيني مابدأ يخف الشيخ : سحرك انت مشروب ومأكول ومدفون ومرشوش اللي بجسمك هذي نهايته لكن اللي معي تعتبر أنواع خطيره وحياتك ماأضمنها لك إلا 1 % لو بفكها موتك أكبر من نسبة حياتك لكن أمك وأبوك وأخوك بينتهي منهم أشياء كثيره لأن السحر لما ينفك كل جسد فيكم يسكنه جن ومايبي يطلع لأنه لو طلع الساحر بيقتله وكل سحركم مرتبط ببعض وأنت أكثر واحد متضرر وحياتك ميؤوس منها ولازم أفكها الآن قبل يوصل خبر للساحر وأنت عارف الملايين اللي انصرفت على هالسحر لو جاهم خبر بينهون حياتك لو بالقتل ولايخربون شغل سنوات وانا أقول لازم توافق وتنقذ أمك لأن السحر اللي بأمك مثل سحرك لكن ع مدى سنوات يعني بتوصل للجنون ونهايته موت وممكن محد يدري انه سحر أنت الله أرسلك لنا وعرفنا سالفتك أنت الوحيد اللي بتنقذهم ياراكان وراح تتعب أمك حتى لو فكيناه لأن اللي فيها كبير وهي حرمه ماتتحمل مثلكم ويمكن يطلع اللي فيها بدون مايأثر فيها ع حسب جبروته ××× راكان وهموم الدنيا على راسه شلون بيستحمل هالكلام الكبير وممكن تكون هذي آخر ساعه له بالحياه يضحي بحياته عشان يسلمون أهله أو يرفض ويترك فرصه للساحر يلعب فيهم أكثر إذا عرفوا إن راكان بدأ يصحى كانت أصعب ساعات بحياته كلها شلون يرجع لأهله وهو ممكن يموت يفرحون وينصدمون بنفس الوقت تعبت أعصابه ومو قادر يتخذ قراره وبهاللحظه جت صورة أمه وأبوه وأخوانه واشتاق لحضن أمه غاليه اللي مايدري شلونها الحين وقام وهو يدعي الله يهونها عليه الدنيا ضاقت عليه على كبرها وده يكلمها ذبحه الشوق وده يسمع صوتها قبل يموت بيفديها بروحه وده يقولها يايمه بموت عشان تعيشين أنتي يايمه أدري تنطرين شوفة ولدك ماتدرين عنه مات وإلا حي حاس فيكم كلكم لكن مابطلع بحياتكم وأنا بموت أنا بنقذكم وبخليه يفك السحر وأخلي حزنكم واحد مابي أفرحكم بصوتي وأترككم آآآه ياكبرها مصيبتي الله ينتقم منك ياقماشه أنا ودي أعيش عشان بس أقتلك بيديني يالمجرمه عايشه بيننا وتلعبين فينا ويحطونك على الراس انا بدوس عليك برجولي بحط خشمك بالتراب وأنا ولد سعود وهنا بدت رجولة راكان وشجاعته ونسى إنه بيموت وبدون تفكير وهي يمشي شاف كبينة اتصال ودمعت عيونه وقرر يكلم أمه وأهله ويسافر لهم ومايخلي الشيخ يفك السحر لين يوصل لأهله بيموت بينهم وبينتقم من قماشه قبل يفك الشيخ السحر وقبل يوصل للكبينه حس باختناق ورجع لعند الشيخ وبدأت رقبته تتحرك حركات لاإراديه وفقد وعيه وهذا راكان يكون صاحي نص يوم وبعدها يفقد وعيه ساعه ساعتين ويقرأ عليه ويصحى واستمرت معه حركات رقبته وهذا دليل تعب الجن اللي يسكنه ومحاولته المقاومه بالسيطره على عقله ساعه ساعتين ومن ثم التعب لأنهم زمان مسيطرين ع عقله شهور عديده ومايفوق أبد ... الشيخ : الحمدلله ع سلامتك ياراكان الجن اللي فيك نطق الشهادة وأسلم وبيكون حامي لك بعد الله وماراح يعلم الساحر عن شي لين نفك السحر وبرسل جن مسلمين يحمون بيتكم عن السحره ومحد بيعرف أي تطورات بحالة أهلك من الجن الكافر حتى لو مت ياراكان ماتقدر قماشه ولا السحره اللي متعاونين معها يتكهنون بأخبارك وأخبار أهلك بيكونون على عماهم وعلى إنك ميت وأمك بتلحقك وأبوك بجيبها وفيصل بيدها ويصفى لها ابوك وأمواله ( معلومات غريبة عرفتها إن أي سحر لازم يرتبط بجن في جسد الإنسان ومايطلع السحر إلا إذا نطق الجن ويايسلم ويطلع أو يحترق من القراءة وحزة خروجه لازم الشيخ يطلب منه يطلع من اصبع الرجل أو اليد لأنه لو طلع من العين تنفجر والسحر القوي مايتأثر صاحبه بالقراءه إلا بعد شهور يبدأ الجن بالتأثر لأن السحره مايبون شغلهم ينتهي بسرعه لما يقرأ الشخص كم أسبوع ومايحس بشي بيقول مافيني شي وهذا اللي صار مع راكان مانطق الجن معه إلا بعد كم شهر مع إن سحره من أقوى الأسحار على وجه الكون ويارب تحفظ الجميع عن كل سحر وكل شر) راكان ارتاح بعد ماعرف إن أمه وأبوه وفيصل ماراح أحد يعرف عنهم شي وبكذا ماراح يزيدون عليهم السحر وإذا انفك منه ومات ع الأقل هم بيعيشون مرتاحين كل العمر ويقدر يسافر لهم بما إن الجن اللي بجسده أسلم وماراح يفقد وعيه وسبحان الله لما جاه الفرج وصار طبيعي من بعد جنونه والشلل اللي خلاه طريح الفراش سنتين مجنون ومشلول من يصدق إنه صحى وصار طبيعي وبلحظه يقولون له تراك بتموت وحياتك ميؤوس منها ولله في ذلك حكمته اللي مايعرفها إلا هو راكان طلب من الشيخ يفك السحر اللي عنده بعد ثلاث أيام لأنه بيكلم أمه وأهله اليوم ومن باكر بيسافر بالباخره لأنه بمنطقه نائيه بأفريقيا ومايقدر ينتقل للعاصمه إلا بباخره ومن بعدها طيران يوم بالبحر ويوم بالطائره عشان يوصل السعوديه واليوم الثالث بيكون عند أهله وإذا مات ع الأقل يندفن عندهم ويعرفون انه مات ... وطلع للكبينه بيكلمهم وتذكر انه فقد حتى جواله يوم كان تايه بالشوارع فاقد عقله وناسي ارقام أهله مايتذكر إلا رقم الثابت لأنه سهل وماانمسح من ذاكرته...................... في بيت سعود كان يوم جمعه وبعادتهم كل البيت يصحون من بدري ويطلعون العيال قبل الصلاة للمسجد بعد ماخلصت الخطبه وكبر الإمام بيصلي رن تليفون بيت سعود وهو كالعاده بغرفة ريوف بسبب اتصالات جوزاء عشان تقدر تسيطر ع الوضع وتسحب السلك بدون ماتسمع نصايح امها وبنت خالك وعشاني وتضطر تكلمها ريوف وكانت بتصلي وسمعت صوت التليفون وطفشت ريوف : أوف شكلها جوزاء من بيتصل الحزه إلا هي وأصلا محد يتصل ع الثابت إلا قماشوه عجوز النار وتحرق قلب أمي وإلا جوزاء وماقامت من السجاده وهي تتخيل انها جوزاء وإلا قماشه وتكش ع السماعه وتقول مالت عليكم ماراح أقوم عشان اسمع اصواتكم اللي تجيب لي كآبه وسكت التليفون وبعدها رن من جديد راكان ضاق صدره اتصل كم مره محد رد عليه وخاف عليهم وريوف طفشت وماشافت حتى الرقم فصلت السلك وراحت تكمل صلاتها ومانست تدعي إن راكان يرجع وتطمن قلوبهم عليه وبعد ماخلصت صلاة حنّت على جوزاء وحست إن الدنيا ماتسوى وإنها بتسامحها وإن الجرح اللي فيها ماراح يطيب حتى لو فارقتها وبتضطر تشوفها بكل المناسبات وبتضطر تسافر لهم وتنام عندهم وإذا بقلبها شي ماتقدر تخبيه وبتكبر نفسها وبيكتشفون أهلها وهي ماتبي أحد يدري لأنه كفايه طاحت من عينها جوزاء وأخوها وأكتشفت إنها حسوده وأخوها ظالم فماتبيهم يطيحون من عيون أهلها بعد وتنقطع العلاقات بتستر عليهم ولا كأن شي صار بتخلي جوزاء كـ زميله مع انها عدوه لبست قناع الصداقه والحب لكن بحكم القرابه اللي ماتبيها ريوف تنقطع بسبب جرحها من حبيبها وخيانة من كانت تؤام روحها لأنها لو صارحت أهلها ماراح تدخل بيت خالها وبيضطرون مايروحون ويتركونها وتكون علاقتهم هشه بسبب هالمشكله ففضلت مصلحة العائلة ع حساب نفسها ونفسيتها وبتتحمل أي شي ولاتكون سبب فراق امها مع عيال اخوها لأن أمها بتكون بصف بنتها وبتعادي أي شخص يأذيها مهما كان ومنها توصّل لجوزاء إنها يوم كانت تحبها مو عشان ريان بدليل إنها مجروحه منه وكرهته ولازلت بتتواصل معها لأنها كانت بيوم من الأيام أخت وعشرة عمر ماتهون ومابتوقف عند غلطه لأنها حسوده وصار اللي صار وماينفع فيها أي كلام أو تصرف لأنها وصلت للي تبينه وفرقتهم ومتأكده إنها الحين بتحس إن ريوف مثلها وخسرت ريان مثل ماخسرت ياسر والأفضل لهم بتفكير ريوف علاقه سطحيه وتثبت إنها قويه بوجهها وماأنكسرت مثل ماكانت تبي وتثبت لريان إنه خسرها لأنها عافته ومو هي اللي خسرته بتنتقم لكرامتها بأي طريقه الأهم توصل له إنه ماهمها ولاأهتزت لفراقه ماتبي جوزاء تتشمت فيها لأنها لو قاطعتهم وبعدت عنهم وتأزمت نفسيتها بتكون طيحتها قويه بعين ريان وجوزاء وبنت سعود لايمكن تستسلم لأحد بهالطريقة البشعه لازم تنتصر لنفسها وتصير قويه كفاية الضعف اللي ذاقته بسببهم والحزن اللي كسرها وفي خضم تفكيرها المتشعب شبكت التليفون وتنطر صوت جوزاء ولازم تتماسك وماتبكي وتكون إنسانه ثانيه واثقه وقويه وخاليه من مشاعر الحب لجوزاء وريان ورن التليفون وخذت نفس عميق وردت : ريوف بصوت بعيد عن الحزن : ألوووو راكان ومو مستوعب إنهم ردو عليه : ساكت ريوف سكرت بوجهه لأنها حست بصوت وشوشه ومحد رد عليها وراكان الاتصال دولي وبمنطقه نائيه ومامسك معه زين .. ويعيد الاتصال من جديد ريوف معصبه : نعم راكان : ريوف ريوف مصدومه انه رجال و قال اسمها وماعرفته صوته متغير : منو معاي (راكان من التعب صوته مبحوح ولها سنتين ماسمعت صوته وماجاء ببالها انه راكان أبد وهي معصبه وماانتبهت للنبره) راكان ويبلع ريقه يحاول يتكلم : أنا راكان اخوك ماعرفتيني ريوف سكرت السماعة بكل قوتها وكأنها فقدت عقلها ومو مستوعبه أي كلمه وماتدري ليه تصرفت كذا وانصدمت انها سوت كذا ومو مصدقه أي شي من اللي صار لين فاقت ع صوت رنين التليفون من جديد وكأن مشاعرها صابتها صدمه من سمعت اسم راكان افقدتها كل شعور راكان وماسك اعصابه : ريوف لاتسكرين أنا راكان أنا عايش وبجيكم و مشتاق لكم ولأمي وينها وبكى راكان ومايوصل لريوف إلا صوت شهقاته ريوف وهي مو قادره تسمع ان راكان يبكي ومو قادره تستوعب انه بخير ومامات وبتحاول تسأله وينه وماقدرت تقول حرف وانهارت بالبكاء وهي ع السماعه راكان صار أقوى منها وبعد دقايق وهو يداري دمعاته وحاول يستهبل كعادته: ريوف للحين أنتي تبكين عطيني أقرب وحده عندها روح رياضيه وصوته مخنوق ومايدري وش يقول أو كيف يعبر ريوف وهي تبكي : راكان وينك لاتخلينا تكفى كلنا نبغاك راكان وفرّحها إنه بيمشي باكر ويجيهم واختلطت دموع حزنها عليه بدموع فرحها وطلبها تنادي امه بيكلمها ريوف وهي تركض وبيدها التليفون بتبشر أمها إن راكان ع الخط يبغاها وغاليه كل حزن الدنيا فيها من فراق راكان وكأنها كبرت عشر سنوات قدام صارت ماتهتم حتى بشكلها كل أيامها تعب وحزن وقفت ريوف وبيدها السماعه بنص الصاله ودموعها تنزل بغزاره يوم شافت أمها جالسه ع سجادتها بعد ماصلت ورافعه يدينها وتدعي وشافتها غاليه وفزت مرعوبه لأن شكل بنتها وهي تبكي وبيدها السماعه خوفها غاليه وتنطر خبر وفاة تسمعه من بنتها : من اللي مات من اللي ع الخط ريوف : يمه معي راكاااا وماكملت الاسم إلا غاليه ساحبه السماعه وهي مصدومه غاليه : ابوي راكان راكان : يمه شلونك من سمعت صوته طاحت السماعه من يدها وماقدرت تشيل نفسها وطاحت ع الأرض وتبكي خذت ريوف السماعه وماسمعت إلا شهقات راكان وبكت وامتلا المكان بدموعهم ودخلت نوال وشافت امها تبكي وريوف ضامتها بتهديها وتبكي معها والسماعه طايحه وماتدري شنو السالفه نوال برسميه : ألووو راكان من بين دموعه ويحاول يستهبل : أبله نوال ( نوال قويه وتقدر تتحمل المواقف وماتنهار بسهوله مثل أمها واخواتها ) نوال بفرحه : راكان أخوي ماأصدق وخنقتها العبره وسيطرت عليها وينك يالظالم سنتين معذبنا لاحس ولاخبر متى ترجع ترى أمي تعبت من فراقك توها الحين سكتت وتقول مابي اسمع صوتك أبي اشوفك قدامي راكان : والله إنك شنب عندك روح رياضيه ريوف وأمي قطعوا قلبي ماقدرت اتكلم معهم وسحبت السماعه أختها مها وكلمته وع طول قالت : ياقاسي يااللي ماعندك قلب توك تتذكرنا اشتقنا لك والله وهي تمسح دموعها بدون ماتحسسه انها بكت عشان مايتأثر راكان : يابعدي يامها ايوه هذولا خواتي اللي اعرفهم أم لسان ولسانين سلفو أمي وريوف من ألسنتكم وخليهم يكلموني ترى ماسولفت معهم والله مشتاق لكم وسلموني ع ابوي واخواني لارجعوا من المسجد وعطيني أمي وكلم أمه بعد ماهدت وحلفت مايسكر لين يحلف لها بالأيمان إنه بيجيها بعد ثلاث أيام وماسكرت لين تأكدت إنه صادق لأنه حلف بأغلظ الأيمان انه جايهم وانه كان بغيبوبه بعد ماطاح من بناية وتوه يفوق منها لأنه مايقدر يقول شي والشيخ محذره ومالقى عذر يشفع لهالغياب إلا انه طاح وقال لاتعلمين أحد إني متصل إلا ابوي واخواني وحذريهم محد يدري من الجماعه ومقدر اعلمكم لين اواجهكم وخافت امه وحست ان في كلامه شي كبير وطمنها عشان مايشغل بالها بإن قصده يرتاح معهم كم يوم لأن لو أحد درى إنه بيجي كل الناس بيستقبلونه وبيجونه وهو بيجي بهدوء وسكر منهم وهي مو قادر يبلع غصته ولاهو قادر يلفظها وأأأخ يايمه لو تدرين شنو اللي بينتظرني لافرحت بشوفتكم لو تدرين وشلون انا صابر للحين وانا انطر الموت يجيني لا كحلت عيني بشوفتكم كلها كم ساعه بعيشها معكم ماأبغى أحد يشاركني فيكم ××× وانتشرت الفرحة ببيت سعود وعادت له الحياة وتكتّمو على سالفة اتصال راكان لين يجي ويعلمهم بكل شي والبنات اجتمعوا وبيسوون له حفله من الفرحه وماكانوا يدرون إنه ممكن يكون موعد موته بحفلتهم اللي بيجهزونها له ببيتهم وبيفاجأوونه من أول مايدخل من الباب بيصورونه فيديو وبيخلون الشغاله تمسك الكاميرا ومن يشوفون السيارة عند الباب بالشاشه الداخليه بيصورونه لانزل من السيارة لأن قصر سعود فيه كاميرات خارجيه والشاشه عند مدخل الصاله وبيطلعون يستقبلونه والشغاله بتصور كل الموقف لين يدخل ويقطع التارت اللي طابعين عليه صوره لهم كلهم وهم صغار وكاتبين عليه نوّر البيت برجوعك يالغالي ويافرحة أيامي تعالي لاتآخذك عني الليالي جاء اليوم الموعود ووصل راكان من افريقيا واتصل عليهم وقال أنا بالمطار وراح له أبوه وأخوانه وكل شوق الدنيا بعيونهم ويتمنون الطريق يقصر عشان يوصلون له بسرعة وياماأسهل الدنيا حزنتّهم سنتين وأهدتهم الفرح ساعة ! أفارق هم وأعانق هم ولاأدري وين مشواري ، ، ، هل استمرت فرحة اللقا براكان أم أن الأحزان ستلازمهم من جديد نظراً لطول هذا الجزء سأضع التفاصيل الباقية بجزئي الأخير الذي كنت سأعتمده الآن ولكن غداً سيكون أنسب حتى يأخذ هذا الجزء حقه من الذين يتابعون هذه السلسه وتصلني رسائلهم ولاعدمتهم والله ، ، ، تــرف
|
06 Jan 2011, 06:22 AM | [ 2 ] | |||||||
|
رد: يا ما أسهل الدنيا :: مهما تعاندنا {الفصل العاشر }
صباح الخير ترف و يسعد لي ربي صباحك يالغلا ما شاء الله كاتبة قصص الله يحفظك دوبي أعرف و الله قصتك هذي برجع لها بعد أقل من ساعة يبي لي أسوي لي نسكافيه و أمخمخ عليها ع فكرة أحب القصص كثير خاصة اللي تدخلك اجواء و تربطك بالحدث الله لا يحرمني منك دوم يا ترف ههههههههههههه طلع منك شي غير المقالب لبى روحك و قلبك و الله |
|||||||
06 Jan 2011, 06:39 AM | [ 3 ] | ||||||||
عضوة متميزة
|
رد: يا ما أسهل الدنيا :: مهما تعاندنا {الفصل العاشر }
^ ^ مو كأنها سبه طلع مني شي غير المقالب أجل ماعرفتيني عدل للحين خذي لفه ع الملف الشخصي وتعرفين إني وحده ثانيه غير اللي ببالك توك جديده علينا بالمنتدى ماشفتي الدرر اللي مخبينها نخاف من العين هلا وغلا فيك وتشرفني متابعتك للجزء العاشر وعقبال ماتقرأينها كامله |
||||||||
06 Jan 2011, 07:31 AM | [ 4 ] | |||||||
|
رد: يا ما أسهل الدنيا :: مهما تعاندنا {الفصل العاشر }
يااااااااااااااااااااااااااااااااااه يا ترف ما شاء الله عليك الله يحفظك ربي أبي أسألك فين الأجزاء الأولى علشان أفهم القصة صح وشو المقلب اللي سوته جوزاء بريوف حسبي الله عليها و ليه ريان سب ريوف برسايله و مين قماشه وش سوت هالعجوز ؟ أقسم بالله اني أقرأ و دمعتي على خدي خاصة لما اتصل على أهله و أخواته و طريقة الردود تخيلت الموقف و هلت عبرتي ترف عيوني لا هنتي و الله يسعدك على مثل عالإبداع فديت روحك أنا |
|||||||
18 Mar 2011, 12:15 PM | [ 5 ] | ||||||||
مؤسس شبكة الشدادين
|
رد: يا ما أسهل الدنيا :: مهما تعاندنا {الفصل العاشر }
يا الله يا مشرفتنا ترف بالصدفة مريت من هنا وما صدقت إنك منزلة الفصل العاشر ومن فترة طويلة وحنا يا غافل لك الله ما انتبهنا له لكن من حقك علينا الاعتذار والتنبيه عليه أنا ما قرأت هذا الفصل لكن بأقوم بطباعته كالعادة وقراءته بهدوء واسترخاء تسلم يديك والله يعافيك وعذراً لأننا لم نتواجد هنا من البداية |
||||||||
|
|||||||||
18 Mar 2011, 01:37 PM | [ 6 ] | ||||||||
عضوة متميزة
|
رد: يا ما أسهل الدنيا :: مهما تعاندنا {الفصل العاشر }
للمفضله أكيييد وقليل بحقها لاهنتي ياترف الأبداع والله يحفظك |
||||||||
19 Mar 2011, 12:43 AM | [ 7 ] | ||||||||
عضو متميز
|
رد: يا ما أسهل الدنيا :: مهما تعاندنا {الفصل العاشر }
باين عليها قصة محزنة لكن بصراحة ماقريتها صح إلا على السريع شكراً تروفه |
||||||||
|
|||||||||
19 Mar 2011, 04:10 AM | [ 8 ] | ||||||||
๑.•[عُذِبُـةے الأطَبُـاعُـ]•.๑
|
رد: يا ما أسهل الدنيا :: مهما تعاندنا {الفصل العاشر }
مابي أقرأ رواية ماأنتهت للحين وأجلس أنتظر الأجزاء الباقية ألين تنزل ترف كم باقي !! المهم لاتنسين إذا شطّبتيها حطيها بملف مضغوط يعطيكِ العافية قلبي .. .. |
||||||||
|
|||||||||
19 Mar 2011, 04:56 AM | [ 9 ] | ||||||||
شاعر
|
رد: يا ما أسهل الدنيا :: مهما تعاندنا {الفصل العاشر }
يسلم راسك ياترف ولاهنتي تقبلي مروري المتواضع |
||||||||
19 Mar 2011, 11:12 PM | [ 10 ] | ||||||||
شاعر
|
رد: يا ما أسهل الدنيا :: مهما تعاندنا {الفصل العاشر }
الاخت ترف يعطيك العافية على هذا الموضوع الرائع اشكرك على كل ماتقدمين للمنتدى من جهد بارك الله فيك تقبلي مروري وتحيتي |
||||||||
|
|||||||||
الذين يشاهدون محتوى الموضوع الآن : 1 ( الأعضاء 0 والزوار 1) | |
أدوات الموضوع | |
|