قصيدة رائعة من أجمل القصائد التي قراتها عن الفكسار

يا سعيد بن عياد يا واف الأشبار=يا كاسب الطالات برسلك مشوار
برسلك لليابان وأرسل مترجم=لا تعتذر يا سعيد مافيه معذار
دوك الجواز وفيه ختم السفارة=ورحلتك بكرة لا تحير وتحتار
اركب على اللي تسبق الصوت والريح =فزت كما اللي فز من كف صقار
وان جيت لليابان من ليلك ارتاح =اسكن بفندق مستوى فايف ستار
والصبح غادر طوكيو يا صديقي=سير ألف كيلو شرق مع سكة قطار
وتلقى جزيرة واسمها صعب نطقه=هنشو كيوشو جوها ماهو بحار
دور مصانع صانعين المواتر=ومصنع تويوتا حوله أسوار وأشجار
قابل كبير مهندسينه وقله=صمم على حسب الطلب جيب فكسار
مكينته عشرة سلندر وبخاخ=والسير ما يسمع له أصوات لادار
سلاسة بلوفه وصوت المكينة=كنه عبادي يعزف ألحان الأوتار
ثلاث دفرنسات ست كفراته=يفتح طريقه في تغاريز وأحجار
بيبانه العشرة تصمم بدقة =على التساوي جنبه يمين ويسار
وتوايره يا سعيد ضد البناشر=ماهي بخنزير يبنشر بمسمار
زجاجه مصمم على الكمبيوتر=لا يحجب الرؤية ولا يعكس أنوار
تمثال كبوته على شكل حرباء=سيفين والنخلة على شبكه شعار
صدام قدامه كما القوس شكله=والونش في الصدام عشرات الأمتار
وصدامه الخلفي بوسطه مجسات=عند الخطر تشر بلمبات الإنذار
توانكه منها اثنين لوقوده=واثنين للماء عند حزات الأسفار
وثلاجته في شنطته ركبوها=تبريدها ينقص ويزداد بعيار
كبينته في الصيف قطعة من الثلج = لو كان جو المملكة حر وغبار
وكبينته وقت الشتاء يا دفاها=لو كان جو المملكة برد وأمطار
باللمس تكييفه وباللمس نوره= ويشغله من بعد ريموت بأزرار
يحدد مسافاته ويكشف طريقه=طبلونه مجهز بشاشات رادار
وجهاز ماجلان وجهاز هاتف=إرسالها ما ينقطع عبر الأقمار
قيره توماتيك وعصا القير فضة=دفعه سداسي للمشاوير صبار
أربع شكامينه ولا دست أبنصه=لو كان له جنحان قلنا لكم طار
تسعة عشر كرسي وكرسي زيادة=وكرسي لسواقه مصمم لطيار
مقاعده واحد وعشرين من جلد=والجلد شغل يدين عمال شطار
وفصل قطيرة تتبعه في طريقه=للعفش لو كانوا يزيدون الأسعار
ابيض بياض الثلج يا سعيد لونه=واليا جهز سجل على المصنع إقرار
إقرار حتى ما يسوون غيره=وعطهم حسابه ين والا بدولار
ثم اشحنه في البحر وارجع مع الجو=يامرحبا والعفو يالصاحب البار
واليا استلمته من جمارك بلادي=دقيت سلفه ابتداء عد الاصفار
لا فر ويلة فالخطوط السريعة=كن التواير تحكي أسرار للقار
سيد الصحاري والدروب العسيرة=مركب مريح وللمهمات جبار
بأخذ شهر مقناص وسط الجزيرة=نمسي بدار ونصبح الصبح بدار
شرق وجنوب وغرب والا شمالا=حليب بل وصيد مع شبة النار
لكن أنا ماني برايح لحالي=بأخذ معي صفوة الناس واختار
أبوي وأنت وكاسبين الجمايل=شيوخ الغراميل الحشيمين الأخيار
شباب وثنيان عنوان للطيب=أهل الكرم والجود والمجد والكار
وان حل طاريهم بوسط المجالس=كلن يقول ونعم تكرار ومرار
وفهد الحطيم اللي علومه جزيلة=صقر تعلا في منيفات الأوكار
والشيخ أبو صافي وأبو ستر معنا=ومعنا رجال تكرم الضيف والجار
منهم سعد وأيضا شليان منهم=ومنهم جري راع الوفا سر وجهار
والشيخ أبو نادر وعايض سفير=والمهدي اللي ينظم أبيات الأشعار
وبطي ولد سلطان وحمود غنام=أهل الوفا والعرف وافين الأشبار
واحمد ولد متعب وتركي عطاالله=أصحابي اللي مايبيحون الأسرار
والشيخ بن محفوظ والشيخ فيحان=والشيخ أبو سلطان لا صار ماصار
صديقنا يفرح ولاهي غريبة=وعدونا نسقيه كاسات الامرار
والمعذرة من كل من لا ذكرته=الكل له حشمه وقيمة ومقدار
ولو كنت اباخذ كل ربعي والأصحاب=لازم مع الفكسار ميتين فكسار

وسلامتكم

صح لسسسسسسسانك

ويعطيك الف عافية

مشكور يامستريح البال على المرووووووووووووووووووووووووووووووووووووور

صح لسان شاعرها

واشكرك على الاختيار لكن اتمنى تنسيق

القصيدة

كل الود

كرا على المرووووووووووور
وابشر من عيوني

الصقر الجريح
صح لسان قائلها وتسلم يدين ناقلها

فعلا من اجمل القصائد اخوى بيض الله وجهك وفالك الطيب



تقبل مرورى

صح إلسان شاعرها وصحت أناملك يالصقر الجريح

صح لسان شاعرها

ولاهنت على النقل الرائع

لا هنت أخوي الصقر الجريح

على حسن الانتقاء وقوة الاختيار