بيت القزاز

يا ضلع لو ما اعتلى بحجاك وأخذ فيك مرواس=أن كان ما فادني فالهم حزمي واحترازي
افرح ليا كان ما به حول رجمك حي واوناس=ونيسي اللي توصل لا بعيدات المنازي
واذكر زمان مضى يوم الفرح عايش مع الناس=واقارنه مع زمنا اليوم ما هو بمتوازي
يا اللي وعودك مثل عرقوب تبني عايب الساس=البنى ينهد لن ما صادف الضلع العزازي
انته تغامر معي بالكذب وانا انسان حساس=لا تحسب اني مثل غيري سياسي وانتهازي
اما مشينا بصدق وكل علم يرفع الراس=والا أقبل العذر والميت تجوز به التعازي
حتى البنوك افلست وفروعها تعلن بالافلاس=وحتى الجيوش الكبيرة خاسرة بعد المغازي
نبت الحيا ينغري به لا سمع به كل عساس=يقطع مسافات من شأنه ويرقا فالنوازي
ما هو بشرط أن يجني ما ذرا به كل غراس=كم مزرعا ودعه عمه ولا بالزرع فازي
انا مدايه بعيد وما التفت وش بين الاقواس=وانته مع الوقت شنت وصاير صدرك حجازي
صاير كما اللي يبي يشرب مرق من طبخة الفاس=يرمي العرب بالحجار وناس أن بيته قزازي

صح بوحك شاعرنا حمد
ع مجزل الابيات ورائع وجميل السطور
وجمل ربي حالك وكثر ربي خيرك
ابدعت وطبت خيراً

صح لسانك اخي العزيز

ولاهنت ع القصيدة المميزه

أبو فيصل
صح لسانك على هذه القصيدة
الجزلة لاهنت

ارحب يا أبو فيصل
ولا هنت على هذه القصيدة
وبيض الله وجهك على طيب الحضور والتشريف
وصح لسانك ملايين

صح بوحك جميله جدا هذي الأبيات.

صح لسانك ولا هنت يا أبو فيصل
شاعر كبير ومميز حتى لو كان حضورك قليل
بيض الله وجهك

صح لسانك اخوي الشاعر حمد
وسلم بنانك وعاش قافك

صح لسانك شاعرنا أبو فيصل
وسلمت واعتلا شانك وما قصرت
وبيض الله وجهك على هذه القصيدة