زحول القحاطين

.





تحية عطرة للجميع
هذه الشيلة من كلماتي وأداء المنشد
مرزوق القحطاني
أرجو أن تنال إعجابكم

تحزم يا ابن قبان يا المحزم المليان=خويي وما يعنيك فاﻻمر يعنيني
تهيض القريحة والمعاني كما الودان=على مسمع الوافين والكل يوحيني
علي الحرام اني لجملك يا بليهان=لاجملك في محفل زحول القحاطيني
سلامي على قحطان ما كتبت اﻻوزان=واخص العواطف سقم عين المعاديني
يدوم الفرح في حلة مقلط القعدان=معلوم الكرم والطيب طلق الحجاجيني
وريث المراجل والكرم والكريم معان=مواريث جود ما تغير من سنيني
وفي حفل ابن معلوم شان القصايد شان=وﻻني بمعفيها وﻻهيب تعفيني
نزف التهاني والفرح له من الوجدان=ومبروك يا نسل الشيوخ السلاطيني
حبابي ولد معلوم ومعرب الجدان=من اخوان زبنه محتمين المخليني
شيوخ لهم فالمجد ما يرجح الميزان=وسطواتهم تعرف بوقت المياديني
سلايل مظيم اللي لهم بالفخر عنوان=عناوين فعل ما حصتها الدواويني
لهم في قرارة ما يفرح الصدقان=رجال تضد الضد وتقضي الديني
وشعمت البيوت اللي لها ذوق واستحسان=على لسان مقعد صاحبي حي ذا العيني
اعده رفيق الجنب وبحسبة اﻻخوان=خوي على سلوم المراجل يجاريني
سهول المدايح ﻻبته من بني قبان=قروم تحشم الجار بالفعل وافيني
وانا في مديح الكفو طرب وفصيح لسان=ولي ﻻبة في وجه اﻻخصام صلفيني
ربوعي بن الحارث كما النايف المزبان=وانا واحد من سمو فخذ الشداديني
وكل القبايل وافيه ما بها نقصان=وﻻ ننقص حقوق الرجال المياميني
وعسى الله يديم اﻻمن والخير فاﻻوطان=وحكم السعود اللي على منهج الديني
ويحفظ لنا القايد زعيم العرب سلمان=زعيم الحزم خادم بيوت الحرميني
وصلى الله وسلم على القدوة العدنان=عدد ما تصف صفوف جمع المصليني

الله الله
ابداع وحماس هذه الشيلة
يا أبو عبدالعزيز
والله يعافيك ويبارك فيك
ويستاهلون القحاطين كل طيب ونوماس
وبيض الله وجهك شرفت قبيلتك

صح لسانك ياحمد وصح لسان المنشد ابدعتم بيض الله وجيهكم ماقصرتوا والله يوفقكم

صح لسانك يا حمد ودام ابداعك وفالك التوفيق

الله الله
شاش راسي يا حمد لا عدمتك
والله الشيلة حماسية وتهيّض
الله يبيض وجهك ويشرف مقدارك وصح لسانك

.


وتحايا الورد و العطر لك شاعرنا الفاضل
صح الله منطوقك لا هنت أنعم و أكرم بك و بالقحاطين
عِشت ولا هنت عساك على القوة و لا حُرمنا جمال الحضور و غزارته

اخوي سلطان ابو عبدالله بيض الله وجهك على الاشادة بقصائدي وانت علم من اعلام القبيلة وتشكر على ماتقوم به تجاه القبيلة في هذا المنتدى الراقي والمحافظة على موروث القبيلة واهتمامك به مايقارب عشرون سنة الله يبيض وجهك.

		المشاركة الأصلية بواسطة : السلطان اقتباس
	الله الله ابداع وحماس هذه الشيلة يا أبو عبدالعزيز والله يعافيك ويبارك فيك ويستاهلون القحاطين كل طيب ونوماس وبيض الله وجهك شرفت قبيلتك

اخوي سلطان بيض الله وجهك على الاشادة وصح بدنك وانت رجل راقي في جميع تعاملك ونستفيد منك.

		المشاركة الأصلية بواسطة : فيحان الشدادي اقتباس
	صح لسانك ياحمد وصح لسان المنشد ابدعتم بيض الله وجيهكم ماقصرتوا والله يوفقكم

صح بدنك اخوي فيحان والابداع ذوقك لاعدمتك

		المشاركة الأصلية بواسطة : أحمد الشدادي اقتباس
	صح لسانك يا حمد ودام ابداعك وفالك التوفيق

صح بدنك اخوي احمد والله يوفقنا وياك.