ربعت غزال

صباح الخير للجميع قصيده اتمنا ان تنال اعجاب كل من شرفني بقراتها واعتذر عن الاطاله رغم انى ماكتبتها كامله,,,,

راكب اللى ربعته ربعت غزال=لاخطته بندق قوانيصٍ رموه
وقت ثارت راح طاويه الجفال=وفي عجاجه عقب ثارت ضيعوه
جمس حوض ابيض على كف الخيال=للجماهير الغفيره قدموه
وش فخامه وش وسامه وش دلال=وش بقا للذوق ويش اللى اتركوه
قبل اشوفه عنه اكذب مايقال=وعقب شفته لمت كل اللى اوصفوه
شي مايوصف ولايخطر ببال=نعلبوهم كيف بس اتخيلوه
بيني وبينه على الصامت وصال=حب بالنظرات وان مر انشدوه
حب حاديني عنه قل الريال=والمعاش اللى بساهر نتفوه
كل ماجالى على شوفه مجال=اءدرج حوله واسال اللى شروه
مقصدي ماهو جوابٍ للسوال=بس ابسمع حسه اليا شغلوه
لاهدر هدرت بعيرٍ في العقال=ودبللوله لئن يحما واطلقوه
منوة الطرقي وشداد الرحال=واحدٍ خاطره الاصحاب اكسروه
وان تولى طارته ذيب العيال=وقال ياهنود المحطه فللوه
نسف شماغه وميل في العقال=وودع اللى بالورود استقبلوه
وطق زر السيدي وغنا طلال=قولو للغالى وعنا خبروه
ثم سرا والليل من فرعه هلال=وانبرا مثل السهم لابعث ابوه
كنك مقهويه من صبح الدلال=وملحقه براد يابس لغموه
سج مايباريه ياكود الضلال=وعقب اللى من عصر زد عقبوه
وجهته دارٍ عن العارض شمال=لى بها طيرٍ وانا راضي خذوه
طيرٍلغيري غدا واصبح حلال=وثقو سبقه وعني برقعوه
قلبي ولساني على قطع الوصال=عاهدوه وليتهم ماعاهدوه
لاذكرته قلت ياطيفه تعال=وامسح دموع العيون اللى بكوه
واسلم وسلم عل سمح القبال=وعلمه لن كانهم ماعلموه
والله انى كل مامال الضلال=ادعى الله واطلبه مع من دعوه
يجعل اله من الهنا والسعد فال=ويرزقه ويعافي اللى وخروه
ولا جرحه في مراحه لايزال=لايحسب ان الدكاتر عالجوه
وسم مثل الوسم في رقاب الجمال=لو محوها وسم عينه مامحوه
وجمس يلى ربعتك ربعت غزال=كيف قلبي في بحر حبك رموه

فهد
صح لسانك وبيض الله وجهك
شاعر وقصيدك ينومس

أسأل الله لك حباً جديد مديد آمين ..

حياك الله يا بن رزيق ومرحبا تراحيب الأمطار ..

لقد عانقت حروفك ذائقتي وأعجبتني .

صح إلسانك مدد بلا عدد

ابو رزيق
مبدع وسجت الجمس تنشرى
وفقك الله لمايحبه ويرضاه
تقبل مروري وخالص تحياتي

الله واكبر عليك يافهد

والله اني عشت الاحساس معك لحظه بلحظه

صح لسانك لين يبيد كل شي فوق الارض

ولو اقول مبدع ماتكفي ولاتوفيك شي يافهد

الله يبلغ قلبك هواه ويوفقك ويستر عليك

تحياتي ومروري المتواضع والعاجز عن الوصف والتعبير

يا هلا والله وألف مرحبا بشاعرنا
الجزل والمبدع والرائع دوماً أبو رزيق
كفو والله
وصح لسانك ملايين
والله يحيي ويحيي ما جيت به

صح لسانك كلمات جميلة جزلة المعنى مغعمة بمفردة رااقية زادت من النص جمالا

وجميل الكلام هو ذاك الذي يحكي عن المشاعر ادام الله لك هذا الحب

اهنئك على تلك الموهبة وبأنتظار مايبوح به قلمك من عذب الكلام ,,


احترامي وتقديري

صح بدنك ياخيال الشدادين ووجهك ابيض واللى ينومس مرورك واشادتك بالقصيده ياذيبان
تقبل تحياتي,,,,,,,,,,

الله يسمع منك ويغليك يالنايف بندر والله يبقيك ياغالى وسلمت وسلم راسك
تقبل تحياتي,,,

هلا وغلا باستاذنا جزل البيان والله يسمع منك ويعطيك ال الف عافيه ياسنايدي
تقبل تحياتي,,