التصويت لشاعر المنتدى لعام 1430 هـ

	بسم الله الرحمن الرحيم الحمد لله رب العالمين والصلاة والسلام على أشرف الأنبياء والمرسلين يطيب لنا في هذه الليلة المباركة أن نطرح بين أيديكم القصائد المشاركة في مسابقة شاعر منتديات الشدادين لعام 1430 هـ والتي قامت بطرحها مشرفتنا ( فاقدة أبوها ) وكان غرضها لهذه المرة ( الرثاء ) وقد شارك بها عدد طيب جداً من المتسابقين لا يسعنا إلا تقديم الشكر لهم ولحضورهم ومشاركتهم فكانوا بحق أعلام هذه المسابقة حين أعرض عنها من توقعناه لا يعرض لكن من أتى كفّى ووفّى واستحق منّا كل شكر وتقدير. التصويت هنا للأعضاء وسيشكل نسبة 30% بإذن الله من نسبة الاختيار وسيستمر بإذن الله لمدة 10 أيام من هذه الليلة وستبقى ال 70 % لشعراء كبار سأقوم أنا باختيارهم ووضع القصائد بين أيديهم بدون أسماء وأترك لهم حرية اختيار القصيدة الفائزة بدون اسم وبكل أمانة وصراحة ولن يكون هناك أي ميل أو تحيز لأحد وفّق الله الجميع لكل خير

---

القصيدة الأولى

الحزن عذبني وزود شقاتي=والدمع يجري في محاجر عيوني
حزنٍ تفجر وسط قلبي وذاتي=كسر مجاديفي وزود طعوني
من بعد ما ماتت هناي وغلاتي=عشت بجحيم وصار فالحال هوني
اكبر مصيبه شفتها في حياتي=يوم ان نور العين سافر بدوني
على النعش ماهو على الطايراتي=شالوه عني وسط بيض الكفوني
محدٍ بقالي بعد ماتت غناتي=اللي منو حاكمه كل كوني
ضاعت حياتي عقبها وامنياتي=وصارت هموم القلب من كل لوني
راحت هنا دنياي راحت طراتي=وجتني المصايب كلها والشجوني
اليا ذكرت ايامنا الماضياتي=ينهار حالي بالقهر والغبوني
ياموت ليش تكب كل البناتي=وتسدد بجثة غلاي الديوني
تكفون ياهل الطيب لبو وصاتي= لا مت في جنب الحبيب ادفنوني
من عقبها صرت اترقب وفاتي=ولا نمت شفت الموت في وسط نوني
ادعيك يارب البشر في صلاتي=تسقي ثرى جثمانها بالمزوني

---

القصيدة الثانية

الله لا يسقي نهار الربوعي=تسعة وعشرين احدعش يوم الأحزان
جاني خبر حطم محاني ظلوعي=وأشعل على قلبي مشاعيل نيران
خبر وفاة أبوي طفى شموعي=وأصبحت في ظلمة وعمين الأعيان
يا ما على فرقاه سالت دموعي=في كل لحظة تنحدر فوق الأوجان
ويقلون لا تبكي ولوك جزوعي=هذا قدر ربٍ حكيمٍ ومنان
وأقول كبوني ترى القلب يوعي=منطوقكم ما فيه شكة ونقصان
لكن عيا القلب ما هو بطوعي=والموق جف وحالي اليوم مرضان
عليك يا رجلٍ شجيع وبتوعي=أبكي وأصيح صياح من صابه اجنان
الجود ويا العرف حبله مزوعي=من يوم وافاك الأجل يا كحيلان
راعي كرامه دلتين وقدوعي=وصحون رز وفوقها ذيال خرفان
رايه سديدٍ يوم الأرياء تتوعي=ويقنن الأرياءعلى كف ميزان
متبوع دايم ما خبرته تبوعي=قضى حياته ما مشى درب حقران
يا جعل قبرٍ يسكنه بالرجوعي=عسى على ترابه يديمن الأمزان
ويا الله طلبتك في نهار الجموعي=تكتب له الرحمه وللذنب غفران
حيثه تقي إن حل ذكرك خشوعي=ظله بظلك لين تسكنه في جنان
آمين أقوله وأمنوا يا السموعي=ولا خاب من هو يرتجي عالي الشان

---

القصيدة الثالثة

واقلب يالي صار للضيق ديوان = خطرٍ من الضيقه تحطم ضلوعي
اليوم يمضي وأقضي الليل سهران = أون وعيوني تهل الدموعي
على عزيزٍ غاب عن كل الاوطان = إختاره الله وإختياره يروعي
عليك يارجل المواجيب حمدان = يالنادر الوافي حسّين الطبوعي
هذاك أبو مشعل نعرفه كحيلان = ريفٍ على ربعه للأعدا بتوعي
قدوة هل الطولات في كل ميدان = حكيم وأهل العرف لأمره تطوعي
فقده على ربعه شبابٍ وشيبان = وعلى الرجال إلي تعرف السنوعي
لكن قدر ومقدره رب الانسان = والمؤمن إلي بالمّقدر قنوعي
وأكبر مصيبه موت ذربين الايمان = وألا الردي ياجعل عمره سبوعي
يارب تجعله بجنتك مسكان = وتغفر ذنوبه يوم جمع الجموعي

---

القصيدة الرابعة

ياهل القصايد جنبوا عن طريقي=قصة حياتي كل ابوها تهاويل
برثيك ياحظٍ عجز لايفيقي=من مهمة دنيا القسا والغرابيل
حزنت حتى جف ياناس ريقي= ودموع عيني ماكفتها المناديل
والقلب همه شب وسطه حريقي=والحال بعد الملعنه شايله شيل
ماونست صدرن بهمه يضيقي=دق الطبول وجر صوت المواويل
دنياي خلتني بحزني غريقي=دايم عليه ياعرب تدبل الكيل
رغم ان نجمي قام يبرق بريقي=ورتني التعذيب والهم والويل
مرحوم ياحالن مع الوقت سيقي=ساقه عذابه لين ضعف له الحيل
الحزن في طول الليالي رفيقي=طول الليال الماضيه والمقابيل
وان كان تبغون الكلام الحقيقي=دنيا النكد دايم على العالم اتميل
ياهل القصايد جنبوا عن طريقي=قصة حياتي كل ابوها تهاويل

---

القصيدة الخامسة

قبرٍ بريع النجد يبرق ترابه=تقول من فوقه تخيل المخايل
اليا تنحى الليل كأنه سحابه=وإليا اسفر الضوء نور شمس القوايل
مرحوم يا عزوة قبايل شبابه=يا اللي بصفق الدم سوى الهوايل
رجلٍ بحد الطيب محدود نابه=لا حانت الشدة يحل المسايل
رجلٍ تشكى منه مضراب بابه=للضيف ما ولى ولا قال حايل
حتى بعد موته جزيل المهابه=تاقف على ذكره وتعطي الجزايل
قليل اللى مات غالي جنابه=كتلة وفا غطت جميع الدلايل
واتل قلبي يوم وفده مشابه=في كفن كنه من فنون الخمايل
والجفن دمعه فوق خدي انسكابه=راحوا عناوين الوفا والجمايل
مات النبي وماتوا جميع الصحابه=واللى بقى سيره وعدة رسايل
والموت سنه والخلايق تهابه=لا حان ما يعرف طروش وقبايل

---

القصيدة السادسة

فقدت عساف المهار الاصايل=ابوي وان جانا بلا جا وصده
الله واكبر كل مخلوق زايل=خبر وفاته شد حيلي وهده
واللي تلقى عن طريق الموبايل=رما بجواله على طول يده
مرحوم يا راع الوفا والجمايل=يا رب من عفوك بلطفك تمده
يا كر ماني من جميله بشايل=الله يبرد لبنة تحت خده
الموت ما عنده خيار وبدايل=كان انثني للموت دونه واسده
ابوي مات ابوه وافي الخصايل=ما أحدٍ قدر قبلي عن ابوه رده
وش هي اسباب الموت ماني بسايل=الموت واحد بس الاسباب عده
جونا يعزونا شيوخ القبايل=والحزن عندي واصل فوق حده
مع كثر ما أونس من غبون وغلايل=شفت الصغير اللي على باب جده
شفته وانا دمعي على الخد سايل=ينتف شعر راسه يصيح ويشده
كان الولد وشلون ماني بقايل=ذراع ابويه للصغير مخده
حياة ابويه كان صايل وجايل=ميزات وايزها رفيقه يوده
رحل وخلف له عيال وعوايل=والك منهم ما نخلف فيه كده
يالله عساها من صدوق الخايل=تمطر على قبر سكن فيه قده

---

القصيدة السابعة

يا سيفي اللي في يميني نصابه=يا محزمي لا صرت ضايق ومشحون
الحزن جوّد في عزومي صوابه=وأمسيت ليلي فاقد العقل محزون
عليك يارمز الوفا والمهابة=وعليك ياللي للعسيرات مضمون
وعليك ياراع الكرم والذرابة=وعليك ياللي بالجزيلات مرهون
وعليك ياللي للقرابة لبابة=وعليك ياللي للمعادين مسنون
هذاك ماجد سِعْد من هو ذرا به=طلق الحجاج وعز من كان مغبون
سيف المنية جر فوقه ذبابه=وأمسى عليه الخام والناس يبكون
وجينا على قبرٍ غشته السحابة=وقلت أصبروا لحظة موادع وتمشون
وهليت دمع فراق عسر الصخآبه=والناس قاموا فوق رأسي يلجون
وحطوه في بيت جديد ترابه=وقاموا عليه من النثايل يهلون
من مات عقبك ما حسبنا حسابه=الموت سنه والخلايق يموتون
مرحوم ياللي راح روح السرابة=وأصبحت من فرقاه تايه ومطعون
يا لله يا معبود تجزل ثوابه=وتجعل مكانه بين جنات وعيون
وتحسن عزا سلطان مما صطابه=يا مهلكٍ ناس وناس يعيشون
وصلاة ربي للنبي والصحابه=إعداد ما ينبت من أوراق وغصون

---

القصيدة الثامنة

قالوا تشــارك بالرثاء قلت لا بـــاس = لو الرثاء دائم على القلب قاسي
لكن ابا شارك وبأبني علــى ســاس = ابيات شــعر ٍ يـبـعـد ٍ العمـاسـي
مرحـوم ياعدل ٍ تــذاكــربه النــاس = رسمه مثبت كالجبال الـرواســي
عدل ٍ ماطاوع لاهل الشرك هوجاس = ولاطاع غير الله بكل الحــواسي
اللي على رؤس الطغى بالقـدم داس = بأمر الولي على هل الغي داسـي
في عهد زاهر بالمكـارم ونومــــاس = نوماس للمســلم بكل القيـــاســي
ماهو بعدل ٍ صـار يكـتم لـلإنـفــاس = ضد الضعيّـــف يفتخر بالمـأسـي
وضد العداله قـام يقرع بالاجــراس = قول وفعل ماهي هروج وحساسي
الوضع يأهل العرف لاشك حســاس = للـظلـم عـوانه وقـصر ٍ رئاســـي
والقلب كنه عود للنار محســــــاس = وشارب لكأس الضلم للمر كأسـي
وإلا سوات البن في وسط محمـاس = لــوجيــت ابنـسا قال ماني بناسـي
وصـلاة ربي عد مـاهـب نســـناس = على الـذي مرسـل لجن ٍ وناســي

ماشاء الله تبارك الرحمن

قصايد حروفها راقيه

تسلم مشاااعر من نظمها

وان شاء الله نسمع حروفكم بالأفراااح....,,

سامحكم الله :’(

أثرتم مكامن الوجدان .. وأيقظتم الحزن الدفين بنزفكم

قصائد مؤثرة جداً

واحترت في التصويت بين قصيدتين .. كلاهما لامس شيئاً في داخلي

بحق .. الجميع ترك بصمة مختلفة

.
.

تم التصويت

وموفقين جميعاً

رآآآآآآآآآئعين و اكثر


جميعكم تألقتم ولكن يبقى الصوت نصيب لشخص واحد

مع العلم ان جميعكم تستاهلونه

السلطان

مسابقه كبيره وشريفه ومن لديه موهبه شعرريه ولم يشارك فقد قصر

ولن نجبر أحد على المشاركه وبالذات إذا كان من القبيله أرى

أنه لم يشجع منتدى ربعه بقصيده واحده ولم يحط رحاله هنا


فلكل من شارك مني كل التقدير والا حترام ومن لم يشارك نقول

المره الجايه لاتفوتك حياك الله ومن شارك نقول له وفقت.

صح للسان الشعراء

تم التصويت

وننتظر أعلان النتائج

....................................

السلام عليكم ورحمة الله وبركاتة
ماشاء الله تبارك الله
كل المشاركين شعرآآآء وكبار بعد
احترت بين الأولى والثانية
وابهرتني

		المشاركة الأصلية بواسطة : السلطان اقتباس
	القصيدة السادسة فقدت عساف المهار الاصايل=ابوي وان جانا بلا جا وصده الله واكبر كل مخلوق زايل=خبر وفاته شد حيلي وهده واللي تلقى عن طريق الموبايل=رما بجواله على طول يده مرحوم يا راع الوفا والجمايل=يا رب من عفوك بلطفك تمده يا كر ماني من جميله بشايل=الله يبرد لبنة تحت خده الموت ما عنده خيار وبدايل=كان انثني للموت دونه واسده ابوي مات ابوه وافي الخصايل=ما أحدٍ قدر قبلي عن ابوه رده وش هي اسباب الموت ماني بسايل=الموت واحد بس الاسباب عده جونا يعزونا شيوخ القبايل=والحزن عندي واصل فوق حده مع كثر ما أونس من غبون وغلايل=شفت الصغير اللي على باب جده شفته وانا دمعي على الخد سايل=ينتف شعر راسه يصيح ويشده كان الولد وشلون ماني بقايل=ذراع ابويه للصغير مخده حياة ابويه كان صايل وجايل=ميزات وايزها رفيقه يوده رحل وخلف له عيال وعوايل=والك منهم ما نخلف فيه كده يالله عساها من صدوق الخايل=تمطر على قبر سكن فيه قده

صح السانك ياشاعرنا /شاعرتنا
ابكيتونا وربي

لكل من حضر هنا وشارك معنا بالتصويت نقول له:
وفقك الله ورعاك وحفظك من كل سوء
وشكراً لطهارة ونقاء قلوبكم

أخوي أبو مشعل:
من جانا وشارك يا هلا ويا مرحبا به
ومن قفى نقول له : دربك خضر

مسابقتنا بتستمر به أو بغيره ولله الحمد وكل عام بإذن الله
واللي في قلبه شيء يجي يقوله
واللي في كبده سم يموت بسمه في كبده ما أحدٍ درى عنه.

ابوعبدالله


لك كل الشكر والعرفان على جهودك الجبّارة في إخراج المسابقة بهذا الشكل الرئع
ومساهمتك في إنجاحها


بوركت جهودكـ و أسئل الله أن يوفقنا لكل مافيه صلاح وخير لهذا المنتدى


وايضا الشكر لكل اخواني الشعراء على تفاعلهم واتمنى للجميع التوفيق

وفالهم البيرق

	عجبتني ثنتين ., يمدي أصوّت لـ قصيدتين ^_^ ., آآممممـ و الله قصآيد جميلة و شعّـآر مُتمكنين ., و توكلنآ على الله , سـ يتمّ الختيآر بين القصيدين : 5 و 7 شُكرا ً أختي فآقدهـ , و السلطآن و كلّ من قآم على هذهـ ِ الفعّـآليّه الجميلة جدا ً , شُكرا ً لِـ كلّ الشعرآء ., و صحّ ألسسسسسسسنتكم ., دمتم بخير ., . , .