خدمه الابراج والأرسالي

راكب اللي توها والليل توه توه=توها جت للوكاله في يد الدلالي
صممو ماطورها بعنايتآ ورهوه=لين صارت لاتنحت تقطع الارسالي
اخترعها واحد(ن)طبعه سوات البوه=مايعرف الطيب والنخوه وحاله بالي
لاشرب شقرا المهبل ثم ظبط جوه=ثم قام يرتب الالوان والاشكالي
العقل درة ثمينه مير وجه مشوه=والله انك ماتبي وجه بنص ريالي
حافها لين اصبحت في عيونا محلوه=اخذت الاول على التصميم ولاجلالي
زودوها لين صارت قوتآ في قوه=منوة الغالي ليا منه ذكر له غالي
لكزس(ن)خويه المشوار نعم الخوه=مانزلت عند الجميح ولا مع الجفالي
البدي كنه سبيكه بالذهب مطلوه=وكن داخلها زهر عشب(ن) بروضآ خالي
وكن ريحتها مثل ريح النفل في علوه=نبتتن دايم يلاعبها الهوا الميالي
فوقها اللي كل راسه طنختآ وحموه=واحد(ن) لامن زهمته سدني فالحالي
نصها شاعر من الشعار فيه مروه=شفت في وجه تباشير الزمان التالي
شاعرآ لامن وقف لشعر فيه جروه=يصخر القيفان تصخير الذهب للمالي
مثل غيثآ لاترازم والمطر في نوه=يروي القاع المحيل ويقطع الامحالي
هو سعد رجل الوفا لو ماحصلي خوه=مير ذكر الطيبين يبين يارجالي
ياسعد ليه عشيرآ صار منه جفوه=وفي قديم الوقت لو ماعنا لهم يعنالي
كان يرسلي ويزهمني وجيه متوه=ماتهنا لين اشوفه بالعيون قبالي
مير ذلحينه تغير ثم طفى ضوه=حط من بينه وبين العاشقين ظلالي
حال دونه من يقول اللي تريده سوه=واحد(ن) مايملك امن المرجله مثقالي
ان بغيت اطوعه ولياه شخص سبوه=وان تركته حط لي السم دون ايبالي
ودي اسمع ياسعد رايك ولو هو لوه=اتبع شورك عساها تضبط الاحوالي
والله اني عقب صوت حبيبي وسموه=اشرب السم السقطري واحسبنه حالي
والله اني من سببهم صار في الهوه=التقط فنجال جاري واحسبه فنجالي
افرح منول ليا دق المنبه توه=وليا رقمه معترض في شاشه الجوالي
مير ذلحينه على الصامت وطافي ضوه=محرمه من خدمة الابراج والارسالي

الشاعر/محمد سعيد الحارثي(محيسن)

^
^

قصيده تحمل الكثير والكثير ...


صح لسانك أخوي وماقصرت ^ ^

راكب اللي لامشى في الدرب هـوّه هـوّه منوة اللي شب في جوفه لهيب الصالـي

وجهـه يبشـر بخيـرة والسعـد فتلـوّه صممه عالم مـن الشكمـان لا التمثالـي

فيه قوة في الجبل والسهـل فيـه رخـوّه لاوقـف ماكـنـه الاقـايـد الابطـالـي

وان مشى على هوينه شفت فيـه زهـوّه وان مشى مسرع في لحظة يطوي الاميالي

داخله مجلس شيوخ وفيـه عـاج ممـوّه من ملك مثله يعيش العمـر كلـه سالـي

لولؤي اللون بـرّا سكـري مـن جـوّه جيب لاند كروز مقنى الحـل والترحالـي

النشامـا تعرفـه لكـن عـنـه انــوّه حشمته وصـو بهـا الشيبـان للاجيالـي

فوقه اللـي لازهمتـه قـام فيـه نـزوّه يحمل الرد السريع لصاحـب المرسالـي

ياعسى ربـي يكافيـه الزمـان وسـوّه مستعد يضحي بروحـه عريـب الخالـي

ياصل محمـد سعيـد الشاعـر المتـؤوّه الرفيـق اللـي بنـا بالمعرفـة منزالـي

شاعراً علـى طواريـق القصيـد مفـوّه الجزالة منهجـاً لـه والبيـوت جزالـي

شاعراً اليـا وقـف يختـال فيـه فتـوّه مثل ذاك اللي وقف يبكي على الاطلالـي

يشتكـي ويقـول قلبـه زاد فيـه غلـوّه من هوى سيد العذارى والهـوى قتالـي

من عشيره يشتكي والاجـل حـان دنـوّه والهـوى قتـال فيـه السـم والسلالـي

يامحمـد مـن جفاكـم لاتجـي فحـروّه عز نفسك لاتقـول ان الغـلا مـا زالـي

ان طوى حبل المواصل طو حبلـك طـوّه طو حبلك قبـل لاتاخـذ معـه مجدالـي

كـان يجفـاك الحبيّـب بالجفيّـا كــوّه مثل ما قال المثل خلـك علـى المنوالـي

وكانها اسباب الجفـا عدوكـم واعـدوّه لا تسمّـع يامحمـد هـرج قيـل وقالـي

الصبر طيب وخل الوضـع فيـه اهـدوّه ارسم اهدافك وحددهـا بـلا استعجالـي

وان بغيت الشور طالبهم نسـب وعنـوّه وفزعتي لك يا وسيع العرف جاه ومالـي

وبالحـلال اليـا حصلـك روّ قلبـك روّه من بعد طول الضماء تشرب قراح زلالـي

ســـعــــد الـعـضـيــانــي

صح لسانك يامحيسن وبيض الله وجهك

قصيده ممتازه ومعبره

والله أني صوت وأنا باقي ماقريتها لأني عارف محيسن مايجيب إلا الجزل

محيسن


إبداع إبداع إلى مالا نهاية


بيض الله وجهك مليون ولا تكفي



ودي

تقول يامحيسن
هو سعد رجل الوفا لو ماحصلي خوه
مير ذكر الطيبين يبين الرجالى
وتقول ياسعد
ياصل محمد سعيد الشاعر المتووه
الرفيق اللى بنا بالمعرفه منزالى
وانا اشهد ان ماقلتم في بعضكم اللى الصحيح شعار من العيارالثقيل كفو وقصايدكم جزله وصف ومعنا وسبك وحبك والقصيدتين قمه من شاعرين في القمه بيض الله وجيهكم وصح لسانك ولسانه مليارات والله يعطيكم الف عافيه
تقبل تحياتي,,,,,,,

يا هلا والله بشاعرنا العذب المبدع
محمد
والله يحييك بهذه الرائعة المتميزة التي بالفعل
أحسنت صياغتها ونظمها
فلك منا كل الشكر
وصح لسانك ملايين

صح لسانك يامحيسن

وعساك نجم للأبداع دايم

الله يعطيك العافية

صح السانك وعلا شانك اخي محيسن

دومّا مبدع ننتظر جديدك

محيسن

صح لسانك وصح لسان سعد

كفيتوووا ووفيتووووا

وكل القصيدتين ممتازه ومعبره

تحياتي