قصيدة موجهه لجزاء بن سفر

يالله ياللي للمخاليق غفّار=ياواحدٍ كل المخاليق ترجيه
البارحة بالفكر لفّه وفرّار=من هاجسٍ بالصدر وازريت لا أبديه
من هاجسٍ مابين ليلي و الأنهار=مرٍ يعنّي القلب ومرار أعنّيه
قالوا جزاء شاعر وقلنا له اقرار=إن الشعر يصخر بيوته ويبنيه
يبني على السيسان ما هو بدمّار=يومٍ بعض الناس مالله باغية
بعض العرب شعره خرابيط واهذار=وإلا جزاء شعره ثمينة معانيه
مابين جدانه طويلين الأشبار=يوم إن كلٍ فزعته من يمانيه
شارع و سفر بن حديد هل الكار=وبسيس شاعر والشجاعة مناويه
واليوم يابن سفر جار الدهر جار=البعض خلى درب ربعه وماضيه
بعض الشباب اليوم أشوفه بالأعثار=لا نافع نفسه ولا فاد عانيه
إما سرق وإلا مشى درب الأنكار=وإلا انعثر في السجن والأم تبكيه
وبعض الرجال يربي الدقن غدّار=مربيٍ دقنه يبي الناس تغليه
مقصرٍ ثوبه له أهداف وأنظار=هذاك لا لي به ولا لي بطاريه
وبعض العرب جبان ما يوقد النار=ما ينعرف بيته ولا الله بحاليه
يشين وجهه إن لفى البيت خطّار=ومقفلِ بابه ولا أحدِ بناصيه
وأشوف لي في الناس غيرات وأشرار=الجار فوق الجار ينفخ علابيه
وعن الطريق يمين راحوا لك يسار=والرأي فيهم يا جزاء اليوم عطنيه
وأخذت لي مع ديرة البدو مشوار=والبر درته والبلد فاهمٍ فيه
بقول قول الصدق بالسر وجهار=ماشافته عيني لساني يبديه
رجّال وإن جات المواقيف مابار=ذكر البطل وإن جات الأمجاد يكفيه
نعطي الرجال حقوقها بكل الأقطار=ونقدّر الطيب ونمشي مماشيه
كفاك ربي يا جزاء شر الأقدار=بجاه من له كل فرضِ نصليه

الشاعر المعروف
ابو عيد
لست بحاجة لشهادة على شاعريتك
فانت اشهر من ان يعرف بشعرك
ومساجلات مع كبار شعراء الشدادين مشهوره وتتناقلها الرواه
حياك الله في منتداك

صح لسانك يا بوعيد

قصيدة جزله ليست بغريبه عليك فأنت راعي الجزلات

تحياتي لك وسلمت ودمت

وبعض الرجال يربي الدقـن غـدّار=مربـيٍ دقنـه يبـي النـاس تغلـيـه
مقصرٍ ثوبـه لـه أهـداف وأنظـار=هذاك لا لـي بـه ولا لـي بطاريـه
وبعض العرب جبان ما يوقـد النـار=مـا ينعـرف بيتـه ولا الله بحالـيـه
يشين وجهه إن لفـى البيـت خطّـار=ومقفـلِ بابـه ولا أحــدِ بناصـيـه

صدقت والله يا عمي .... ياكثرهم

وخاصة من ينطبق عليه قول الشاعر : صلى المصلي لأمر كان يقصده ..!!!

أصبح للنفاق اليوم رجال يرفعون رايته ويعتزون بها .....!!!


صح لسانك ولا هنت يا أبو عيد

وجزاء شاعر كبير وما عليه خلاف ويستاهل كل مدح وكل ثناء

صح لسانكـ يا أبو عيد

ولا هنت على القصيدهـ


يعافيكـ ربي يالغالي

صح لسانك ..قصيدة مميزة..
من شاعر مميز..
مسندة على شاعر مميز..
واتوقع الرد أكثر من مميز...
تحياتي لك

لاهنت يابو عيد

صح لسان ولاهنت وبيض الله

وجهك قصيده راااائعه من شاعر جزل