مدح في الشيخ عيد بن مسلط الشدادي

قيلت هذة القصيده في الشيخ عيد بن مسلط الشدادي عام 1414هـ ( أبو فـوزي )

يا الله يا مسير هبوب المعاصير=ياعارفٍ خلقك عجز ما عرفها
تجعلنا يا رب حسن التدابير=ونفسٍ رجتك انك تحقق هدفها
تعبت من كثر السهر والتفاكير=والنوم عيني ما دخل في طرفها
وطرى يا اللي ما يحسب المخاسير= من روس قومٍ عزها من سلفها
هذاك ابو فوزي ليا جو مناحير=اللاش يزري عن مواقف وقفها
قدامها يا شيخ جت بي مقداير= حلوٍ ملاقاها غريبٍ صدفها
با الغصب سمرني على الكيف تسمير=بشوك النخيل الي يبيسن سعفها
الصبح اهد الحلم والليل تعمير=النفس تهواها وقلبي ولفها
يا شيخ لك في الصعب حكمه وتدبير=وغيرك قصيره حذفته لو حذفها
اما تحررني من الاسر واسير=ويصدق لساني ميزةٍ لك وصفها
والا سعيت ولا حصل منك تقصير=وتبقى على عز الشيوخ وشرفها
وسعيي لمثلك في النشاما مداوير=ولد شيوخٍ ما يخيب خلفها
علاه لو تعب القدم للمداوير=وعلاه رجلي لو تزايد صلفها
واللي يا ابو فوزي زعم من فعل غير=على فعل غيره يمينه حلفها
يدور به وقته مثل دورة السيل=ويجي نهارٍ ما يفيده حسفها
ويقولون ما يحسب كريمٍ مخاسير=وراعي البخل يفنى وهو ما صرفها
ولا كل من وده وصل للمشاهير=ولا كل من كرب الذلول يعسفها

الشاعر: أبـو فــيصل

كفو والله يا أبو فيصل
ويستاهل أبو فوزي كل خير
والله يبيض وجهك انت وإياه
وصح لسانك

أبو فيصل
صح لسانك شاعر ومجدت ابو فوزي
لطيبه ومواقفه مع ربعه
وفقك ووفقه الله
تمنيت ان يكون مسمى القصيدة كامل
مدح في الشيخ مسلط ابو فوزي.

كل عام وانتم بخير
اشكر كل من تابع قصائدي واشاد فيها وكان التاخر بالرد لا نتظار جميع المتابعين

حياك الله يا سفر والله يبيض وجهك
ويشفي أبو فوزي ويقوّمه بالسلامة
رجل يستحق كل اعتزاز وفخر وصح لسانك