الديوان الثاني للشاعر متعب الشدادي

بسم الله الرحمن الرحيم

اخواني الاعزاء يسرني ان اقدم لكم بعض قصائدي التي لم تنشر امل ان تحوز على رضائكم

ارسل الي اخي الشاعر جزاء بن سفر الشدادي قصيده غزليه وقمت بالرد على هذه القصيده واليكم القصيدتين


قصيدة جزاء بن سفر الشدادي
يالله يامطلوب

يالله يا مطلوب علام ماخفا = يامن بتدبيرك سريع انفراجها
تفرج لعبد حرق البين ضامره = دنياه قلبته على حر صاجها
صبرت صبر ايوب عامين كامله = ولا لقت بالصبر نفسي خراجها
ودورت للاصحاب لاجل اشتكي لهم = وقول روحي لايج الهم لاجها
ولا لقيت اللي يقدر مشاعري = ناس سريع في اللزوم انمراجها
ياكود ابو فراج والنعم اذا ذكر = زبونها ساعة يثور عجاجها
متعب ليا ضاقت علي المسالك = بالراي والحكمة يوسع فجاجها
بالحب يابن العم روحي تولعت = وبالحب نفسي دوم تشكي خلاجها
حبيت يابن العم بنت صغيره = منها مرض روحي ومنها علاجها
بنت يشابه مطلع النور خدها = والورد شفتها وقوس حجاجها
والعنق عنق الريم والوسط ضامر= واللطف والاخلاق والزين تاجها
ولابها من عيب مثقال ذره = الا تغليها وسرع انزعاجها
عامين جنبه ماروت منه مهجتي = ميرادها الصافي وتشرب هماجها
ذكرتها يوم اظلم الوقت وابعدت = وهي منول لليالي سراجها
واليوم حال البعد بيني وبينها = من يوم ماوافق مزاجي مزاجها
تكفى يابن فراج روحي تولعت = احبها والله وقصدي زواجها

وهذا ردي على القصيده

حي الجواب

حي الجواب اللي لفاني وسرني = ولـــع هوى نفسي وروا مهاجها
من ابن عم يشتكيلي وانا اشتكي = وقـــدامنا من عايج الحب عاجها
قدامنا عــــــــنتر وبو زيد قدمنا = وقيس الملوح طرقة الحب باجها
انته كـــما اللي مولع في نياقه = غـدت ويتذكر على الماء دياجها
لكن تريث واخذ دنياك بالصبر = صبر البدو على فقّــيه ودجاجها
الحـــب عله والتلاقي هو الدوا = لابد مـن لقياً !! بها النفس ناجها
ولابد للاحياء التلاقي على الشرف = ولابد للانفــــــــس يزيد ابتهاجها
ولابد للقاسي مع الوقت ينعوج = قـــوس الربابه صوتها بنعواجها
واللي تغلى خلـــــــها والليالي = كفـــــــتيله بتعويدها وانصياجها
بكره تجيلك تطلب الصفح والعفو = مثل المــرايه يوم تكسر زجاجها
وانته بكيفك بعد جتلك حبيبتك = اما العفــــــو ولا بكيفك هجاجها
والناس لو تنصتلها ضاق خاطرك = لكــــــــن خل الناس تكثر لجاجها
ياما وياما قالت الناس وكذبت = اتروج الكـــــذبه وتضبط رواجها
يوم راعي الحب يصدق ولا كذب = الحب سلعة خير ينجــــح حراجها
الحب صدق احساس خالص وتضحيه = مثل العـــــدود اللي عذيب هداجها
جزاء عسى تفرح ويلتم شملكم = عــسى الولي يكتب ويسر زواجها

وهذه القصيده قلتها في والدي شفاه الله


ليت الشباب

ليت الشباب وطولة العمر في الســـوق = تنباع وشريها بنقد الريـــالي
حرام لشري كاش ماهوب مفهــــوق = حتى لو القيمه دبل مانبـــالي
لشريه للي رافع هامته فــــــوق = على النقاء ومميزات الرجــالي
ابويه اللي للكرم هزه الشـــــوق = شوق النبات لوبل مزن الخيـالي
لا جاه ضيفه بالتراحيب مسبــــوق = والعود في المجلس يجيله ظلالي
له عادة(ن) ماعايقه دونها العـــوق = ذبح السمان وكيف صفر الدلالي
يفرق عن اطباع الرياجيل بفــروق = بالطيب ولا الخبث ماله مجــالي
اخذ من الحكمه معاهيد ووثــــوق = وخذ من سلال الشجاعه سلالي
يسوق روحه في نهار الوغى سـوق = يسوقها للموت والحظ عــالي
وخذ من علوم الشكلات له طـــوق = طوق الشكاله للفتى راس مالي
وخذ من الرفقه مفاهيم وحقــــوق = حق الرفيق وحق جار(ن) مـوالي
مايلحقه بالسب والنم والبــــوق = ولا يستمع في قول قيل(ن) وقالي
اما نصيحة خير وارشاد بالــــذوق = ولا السكوت وقول مالك ومالي
قلبه لكتم السر قفل(ن) وصنــدوق = ماباحت بسده هبوب العــوالي
وبيت الشعر والنار ومراود النــوق = اهوايته من ماضيات الليــالي
واليا اتجه للصيد مع كل طــاروق = يجيب صيده من عسير الجبالي
قلبي عليه اليوم ضايق ومحــروق = مثل الحريق اللي لناره يصـالي
يصيح لكن ما حواليه مخلـــوق = النار تـأكل فيه والدم ســالي
لو الشباب لتالي العمر ملحــــوق = ان كان زان الوقت ياهملالي
ماصـار ابويه فوق كرسي وموثوق = موثوق لو مانربطه بالحبـالي
لكن يامنشي سحايبك ببــــروق = يا محيي عظام الهشيم البوالي
تشافي الشايب وترفقبه رفـــوق = الشافي انته ياعزيز الجلالي

وهذه القصيده (حكم ومواعظ )

ظروف الحياه

اللـــــــــه من قلب(ن) عليل(ن) ومهموم = مالتبه ظــــــــــــــروف الحياه وعللها
اثر الرخاء لـــــو طال في الوقت مايدوم = واثر الحمـــــوله مالـــهــــا الا جملها
ولايأخــذ ابن آدم ســــــوى كـــل مقسوم = لــــــو ســــار في سهل الديار وجبلها
كـلــن الــــه وجهـــه ومنحى ومفهــوم = اللــــــــــــه خلق خلقـــه وبامره كفلها
وكـلــن بمـــا ينطــــق ويعـمــلــه ملزوم = محــــــاسبا باعمالــــه اللـــي عملــها
آخــــــرتك يالانســــان ماتقـــبل الســوم = ودنياك تـتـفــــــه من تـفاهــــــة اهلها
مــــار اعبد اللــــي دوم غفار(ن) رحوم = رب البشـــــــر عقالـــــها مع جهلــها
اد الصــــلاه بـوقتــــها وزك والصـوم = فــــــــريضة(ن) اللـــــه عليـنا جعلها
والحــــــج للــــي يستطيعــــه بــــه يقوم = عبـادتــــه حـــــذرا يــــــدور بــدلـــها
وترى الـــــــوفاء لصا ر من عادة القوم = كـلــــــن يقـــــــدرها وكـلــــن دهــلها
وترى الصـــــــــــدق يجنبك معمه اللوم = والكـــذب لـــــــرخوم الرجال وخبلها
وخــــــل الكرم منهجك يوم(ن) ورا يوم = والبـــــــخل عــــــــاده سيئه لاتحملها
وخويك الـــــــه حــــق (ن) وقدر معلوم = اقــــــــف معه بصعب الامور وسهلها
ودخيلك احمــــه واسهــــر اللـيل لاتـنوم = لينن مـيـــــــلات الــــــــــزمان تعدلها
والجـــار لـو جـــارك مقــــدر ومحشوم = وان جــــــــــــاب زله فاعتبر مافعلها
وصل الرحــــم من يقطع الوصل مذموم = والـــــوالدين أيــــــــاك تـقـرب زعلها
والصـــبر والعفـــه مع انصاف مظلوم = صفـــــــات(ن) الله في النشاما عزلها
طـــــــبع العرب الهــــــم مناهيج وسلوم = اسلـــــــــــــوم يخلط حرمها مع حللها
وهـــذي العــرب فيهم شجيعين ورخوم = ودنياك فيـــــها مــــــــرها مع عسلها
والطــــــير لــــو حلق ولــو كثر الحوم = مصـــــــــيره يعـــــود لدار(ن) نزلها

امل ان تحوز على رضاكم

	الشاعر : متعب بن فراج الشدادي

صح لسانك يابو فراج

وبيض الله وووووجهك

ياهلا والله بالمزيد من ... قصائد شاعرنا شاعر المنتدى الاول ..

الحب

دق قلبي من ورى حني الضلوع = من هوى شخص تورطت بغلاه
واحد حـبه يـلوع القلب لـوع = لـوعصا قلبي عليه ما عصاه
لو يحب الرجل ويهاوي ا سبوع = كان هـذا الحب مقدور علاه
لكن ان المشكله ماني قنوع = حب خمس سنين جربنا عناه
اكتم العبرات وكف ا لدموع = ورسم البسمه وترفضها الشفاه
صرت لاصحابي وخويايه قطوع = من سألني قلت في هاذي الحياه
وان غفوت اقوم من نومي فزوع = ورفع ايديني لجل تمسك يداه
واكتشف اني بالاحلام مخدوع = وان هـذا حلم ماكنا معاه
وان كل الناس نيّام وهجوع = غـير أنا والنجم مايوجد سواه
ماوقع في حب زينات الطبوع = كرمه ربه وزينـبه سماه
اما أنا والحب عالمنا يروع = اثر راعي الحب ملعون ثواه
لانصح قلبه نصيحه مايطوع = مايطوع القلب عذال الهـواه

	الشاعر متعب بن فراج الشدادي

اخوي الطرقي صح بدنك ووجهك ابيض يالغالي
اختي المستحيله يعجز اللسان عن شكرك .

صح لسانك يا متعـــــــــــــــــــــــب
وبيض الله وجهـــــــــــــــــــــــــــك

صح لسانك يابو فراج

وبيض الله وووووجهك

الاخ ماجد
الاخ ابوعزه
صحة ابدانكم وبيض الله وجيهكم وهذا اقل ماقدمه في خدمة قبيلتي .

صح لسانك يامتعب شاعر
كبير ولافيك شك وشعرك يحمل في
حروفه اعذب الكلمات وجلها ولك
مني جزيل الشكر

صح لسانك يابو فراج وبيض الله وجهك

تحيااااااااااااتي