طال الصبر

مـجـمـوع الأوسـمـة · توقيع : عيد الشدادي

السلام عليكم ورحمة الله وبركاته
.
.

.
.

الشعر في نهجي له فروع واقسام=تعبير عن شي لمح في خيالي
استرسله من عبر موجات الاوهام=واتنفسه لاصار بالصدر صالي
واشرح به ظروفي على مر الاعوام=وازبنه ظلعٍ منيفٍ وعالي
واوصف به الواقع وافسر به احلام=ويصير له مفعول في كل حالي
امدح به اللي فالمواقيف مقدام=وارضي هل الاذواق لا جاء مجالي
وان ضاق صدري قلت للقاف قدام=ويطيع لامن المزاج استوالي
واليوم بقلب بدعتي مشهد افلام=وابا اتفلسف بالبيوت الجزالي
واشكي وانوح بقافي العذب والتام=والقاف غامض يارجال المعالي
ماهمني هرج الصحافه والاعلام=الطيب والناموس هو راس مالي
يامستشار الشعر وش حال الايام=اللي تصافقنا جنوب وشمالي
نغض عنها الطرف وتزيد الاجرام=وتبذنا كثر العقد فالحبالي
هذي ثلاث سنين والصدر منضام=كن الشقاء مخلوق لجلي لحالي
في كل ليل ارسل ملفات وارقام=واقول يالله تجعل الصدر سالي
لكن هم الوقت في خافقي هام=قدام ربعي محتمين التوالي
ياربعي اهل الطيب كان الشقاء دام=وش عذركم لاصار هذا سوالي
اليوم ولا العام واللي ورى العام=ماتسمعون الصوت والصوت عالي
السالفه مضمونها شخطة اقلام=تسعد لها قلبٍ على الناس غالي
تبغى لها فزعة طحاطيح واقرام=يمشون بعلوم الجماله اقبالي
اما افزعوا لي وانجزوا علمي الهام=ولا اتركوني للدروب الطوالي
وان ماحصل تغيير من بد الانام=صدر الحجازي مايعود شمالي
بشاهد المقطع وابا اشغل الكام=اللي يجيب الوضع في كل حالي
والله يستر لايزيدون الاقزام=في وسط عيني مع مرور الليالي

.
.
عيد الشدادي