ابني هجوسي واسطّر بالاقلام=وللسطر بالشطر جمله مفيده
ابصم على محتواها بالابهام=ابيات ماشابها الزيف اكيده
طير بليّا جناحين ماحام =وجمله بلا نظم ماهي قصيده
والوقت يطويه عام بعد عام=واللي مضى مستحيل نعيده
زاغت عقول الخوارج بالاوهام=تسعر فتنها بنار وقيده
نحمي يمن وابلشونا من الشام=منّا وفينا العدا والمكيده
لاجل الفنا رفرفت سود الاعلام=واحتال بالغدر ناس تجيده
تهتف شعاراتها باسم الاسلام=واهدافها من وراها بعيده
النهج معلول والفكر هدام=والنقص يلقا فلول تزيده
عكس المسارات تضليل الاعلام=يرسل مراسيلها في بريده
وبعد المسافات في عصر الارقام=قريب رغم المسافه بعيده
اسرع من القوم لا قيل قدّام=وتسابقو والمواتر جديده
عدو يلقا من اعداه خدام=لا ضللت من حماها شريده
يغرر الغرّ وتغر الاحلام=ولا يهلك الهالك الا عضيده
بحماه محكوم في يوم الاعدام=عن المخاريج يحداه قيده
لاهو تهنا بفطره ولا صام=ولا هو رجا وجه ناوي يبيده
عطيّته في ضحى العيد الاجرام=وعيديّة العيد طلقه سديده
من معتقد لا قرابه ولا ارحام=لعيون الاغراب يرديه بيده
غنايم اقوام في عهدة اقوام=واحداث في مستواها فريده
تعجز ببعض المفاهيم الافهام=وتحير الافكار منها شريده
اغرب من اللي نشوفه بالافلام=نهج الغوى واختلال العقيده
كم ليل عدّا وكم سارت اقدام=وكم غاب تحت الثرى من فقيده
لاطال مخطي ولا فاد لوّام=حلّ القضا والقضايا عديده
والحال من حال الى حال مادام=كم هانت المعضلات الشديده
مابين الامال وحلول الالام=واللحظه المحزنه والسعيده
للصبر فرجه لمن كان عزّام=يرضى ولو نال ما لا يريده

المشاركة الأصلية بواسطة : نورة (المشاركة 1481093) ياهلا ويامرحبا سفيروشاعر وياهلا بجديدك لله درك ابيات جمليه ورائعه تقديري واحترامي

أبدعت .. ما قصرت .. و قوآكك الله

صح لسانك
ولا هنت أخوي
كل الشكر والتقدير