|
[قصة] و [قصيدة]
.. بسمــ اللهــ الرحمن الرحيم .. اعزائي اعضاء منتدى الشدادين .. اطرح لكم هذاآآ الموضوع .. وهو عباارهـــِ~ عن قصه وقصيدهــ .. حدثت بالحااضر اوو سوئ بالماآآآآضيـــِ .. ومصاادر هاذي القصص والروايات والقصائد نجدهاا مع اجدددناا وجداتتنا .. ومنهاا نستفيد وناخذ الصفاات الجيده .. وعلوم الرجااجيل ومنهاا ما تسلينااآآ عند سمااعهاآآ واتمنى من الاعضاء المشااركه×× .... ... |
رد: قصة............... وقصيدة
...
الشاعر المعروف بندر بن سرور العتيبي رحمه الله شاعر فحل وتحفظه كتب التاريخ للابد كان بندر في حياته مشاغبا ومزعجا للسلطات في المملكة اثناء حكم الملك فيصل حيث كان يهرب البضائع من الكويت ليكسب من خلال ارباحها لاختلاف السعر في ذلك الوقت .. وكان أمير المنطقة الشرقية سعود بن جلوي غاضبا من بندر حيث قبض عليه اكثر من مره ويخرجه أمير عتيبة تركي بن ربيعان امير الفوج التاسع بالحرس الوطني وهو من شيوخ قبيلة عتيبة اللي لهم كلمة عند الملك والحكومة وكان ياخذون تعهد على بندر بعدم التهريب الا انه مطنشهم ولا يسمع الكلام .. المهم وصل للامير بن جلوي ان بندر هرب بضاعه ولا قدروا يمسكونه فحلف بن جلوي ان يقتل بندر اذا قبض عليه ومعروف عن بن جلوي قسوته وشدته وجبروته اثناء حكمه للمنطقة الشرقية .. ووصل لبندر كلام الأمير وتهديده بس ما ارتدع .. وفي يوم وبعد المغرب بشوي كان بندر نازل مع النفود بسيارته الونيت وتفاجأ ان حرس الحدود مخيمين اسفل النفود وأيقن انه مقبوض عليه لا محاله فهو لا يستطيع العودة لأن النفود عالي وإذا نزل معناها مسكوه فأوقف السيارة وترجل منها ورجع على أقدامه وصادف سيارة وركب معاه وطلب منه يوصله لبيت الشيخ تركي بن ربيعان ووصل له حوالي الساعة وحده بالليل وقام يطق الباب بقوه والليل هادىء وصحى كل اللي بالبيت وكان الشيخ بن ربيعان بالدور العلوي وراحت بنته تفتح الباب وبندر يطق الباب بقوه وفتحت الباب وهي ما تعرفه ولا قد شافت بندر وقال لها ابوها من اللي عند الباب يا بنت قالت رجال كنه مرجوج يبغاك ( وسمعها بندر وهي تصفه بالمرجوج ) قال خليه يدخل للمجلس وغير الشيخ ملابسه وقامت البنت تسوي القهوه ولما دخل المير تركي بن ربيعان وخلفه بنته معها القهوه التفت عليها بندر وقال يـا سهيّـف الذرعـان مانيـب مـرجـوج ================= رجّـتـنــي الأيــــام جـتـنــي بـحـيـلـه يا بنت لـولا اللـي علـى تاسـع الفـوج ================= تـركــت نــجــد وعــــزوةٍ بالقـبـيـلـه لاشــك حاديـنـي عـلـى نـجـد هـيــدوج ================= مسقـي الفيافـي ليـن يـدرج مسيـلـه تركـي ليـامـن الـبـلاوي غــدن عــوج ================= حـمــله عتـيـبـة كـلـهـا مـــا تـشـيـلـه يرسي كما مينا البواخر علـى المـوج ================= ومنـيـن مــا صــك البـحـر يرتكيـلـه مـــادام تـركــي حـــيٍ مـــا ودي أدوج ================= وإن غاب غبت من الرجوم الطويله عرف الشيخ بن ربيعان من الأبيات ان بندر في مشكلة ويبي الفزعة وأبتسم الشيخ وقال أبشر يا بندر وش طلبك وأخبره بالسالفه وأنه خايف ينمسك ويبيه يشفع له عند ابن جلوي قال له أبشر يا بندر وركب بندر مع الشيخ بن ربيعان بسيارة الشيخ وراحوا للدمام ووصلوا لقصر الأمير بعد صلاة الفجر بدقايق وكان الامير سعود بن جلوي متعود كل يوم بعد الفجر يجلس بالمجلس يتقهوى ويسمع صفحتين من كتاب الحديث فأوقف بن ربيعان سيارته مقابل المجلس بس بعيد وكان الوقت لا زال ظلام ونزل لوحده وسلم على الامير وجلس بجانبه ولما صب المقهوي الفنجال للشيخ بن ربيعان انزل على الأرض ووالتفت عليه بن جلوي وقال وش فيك نزلت الفنجال قال بن ربيعان لي طلب قال اشرب فنجالك واللي تطلبه جاك فشرب بن ربيعان الفنجال وقال طلبه وزعل بن جلوي وقال والله لو اني داري انك جايه علشان بن سرور كان ما عطيتك طلبك وأنت تدري اني غاضب منه لكن دامك شربت الفنجال فطلبك جاك |
رد: قصة............... وقصيدة
حكايه هذا البيت
" اللي يبينا عـيّـت النفـس تبغـيـه &&& واللي نبي عيا البخت لا يـجيبه " القصة والابيات للشاعرة نورة الحوشان ...وهي شاعرة معروفة وشهيرة عند اهل التراث ونوره الحوشان شاعره معروفه. ويشهد لها بكرمها وعطفها على الفقراء والمساكين بشهادة كبار السن ومايتناقلونه من اخبار عنها وقد تزوجها عْبود بن علي بن سويلم الشلواني العازمي ورزقت منه بولد اسمته حوشان ... من قصائدها المشهوره وقصتها كانت تعيش مع زوجها عْبود بن علي بن سويلم وقد وقع بينهما خلاف أدى الى طلاقها طلاقاً لا رجعة فيه وبعد طلاقها تقدم الكثير طالبين الزواج منها حيث انها امرأه جميله ومن عائله معروفه ومحافظه وقد رفضت الزواج بعد زوجها عبود وذات يوم كانت تسير على طريق يمر بمزرعة مطلقها وبصحبتها اولادها منه وعندما مرت بمزرعته رأته فوقفت على ناصية المزرعه وانطلق الاولاد للسلام على ابيهم وبقيت تنتظرهم الى ان رجعو من ابيهم فأخذتهم واكملت مسيرها وقد تذكرت ايامها معه وتذكرت من تقدم الى خطبتها بعد طلاقها ورفضها له فقالت هذه القصيده الّتي تحتوي على اخر بيت اصبح مثلاً دارجا يقال على ألسنة الكثير من الناس ياعين هللي صافي الدمع هليه &&& واليا انتها صافيه هاتي سريبه ياعين شوفي زرع خللك وراعيه &&& شوفي معاويده وشوفي قليبه امـنـولٍ دايـم الـ رايــه انـمـالـيـه &&& والـيـوم جـيتهـم عـلينا صـعـيبه وان مرني بالدرب ماقـدر احاكيه &&& امصـيبتٍ يا كبـرها من مصـيبـه اللي يبينا عـيّـت النفـس تبغـيـه &&& واللي نبي عيا البخت لا يـجيبه |
رد: قصة............... وقصيدة
قصة استغفري يا بنت يا ام العشاشيق على الله تعجبكم ...الشيخ خلف بن دعيجاء له معشوقة وتقاوم هو واهلها وكثرت الغزوات عليهم ، وقال أبو معشوقته " أن قضبت خلف بن دعيجاء انه بجزور وضحاء وسمعت البنت كلام والدها وأرسلت لخلف مرسال مع ساعي يوصل الأخبار بينهما وقالت "أن أبوها ناذر انه أن أمسكك يذبح جزور ولكن أحذر لا يصيدونك " ويوم عرف بالخبر نوى أن يغزو عليهم حتى لا يقولون امتنع لانه خايف وانه مو شجاع والشجاع تأبى نفسه الخوف . وبعد ذلك غزا وصبح أهل معشوقته وصارت المعركة دامية وذبحت جواده واسروه ويوم أسروه أنكروه على انه متغير شكله بعد المعركة وجابوا معشوقته بنت شيخهم لتتعرف عليه هل هو خلف ! فضحكت لأنها قد حذرته ولكنه ما أطاع قولها ، تريد من ذلك أن تنجي خلف من هذا الموقف الحرج فقالت " يا حيف والله هذا عبد من عبيد الموالي وتقولون هذا خلف وأنا عايفة كل عيال جماعتي من اجل خلف !" وعندما قالت هذا القول أبت نفسه هذا القول فلم يستطع أن يخفي نفسه أردف يقول : [دسن بدا لي ذوق سكر ولا ذيق بمفرق القذلة يشاد الهلالــي استغفري يا بنت أم العشاشيـق عن قولك اني من عبيد الموالـي حنا عبيد الرب سيد المخاليــق ومما جرى يا بنت هذي أفعالـي أنا خلف زبن العيال المشافــيق يا حل في تالي الركايب جفالـي أردها في ساعة تيبس الريــق ومن دورن يلقان عند التـوالي يا بنت حماي النضا ساعة الضيق شيخ دلال معبسات الشمــالي خزايزه منا طوال السماحــيق خزايزي شمط اللحاء والعيـالي وعندها قالوا له : أنت خلف !! فقال : نعم ! قال له : سلمت وأنا سابقا كنت ناذر عليك نذر ولا يوفي نذري إلا الوضحاء من الإبل ولكن الحين عفيت عنك والجزور اللي أنا ناذره نذبحها لك كرامه .. وبعدها تم الصلح وانتهت مشاكلهم مع بعض .. |
رد: قصة............... وقصيدة
في يوم من الايام جاء شاب اعمى ودخل على الشاعر
الامير بدربن عبد المحسن وقاله قصته ... كان خالد و ساره يشكلان أحلى ثنائي على وجه الأرض وكانت السعاده تغمرهم من كل جهه ولاكن كما نعلم السعاده لاتدوم يقول الشاب انة يحب بنت عمة موت وراح خطبها من ابوها طلب منه مهر خرافي او ما ياخذ بنته وبما ان الشاب يحب بنت عمة راح وجمع دراهم الي يبيها عمة ورجع تقدم لها مررة ثانية رفض بشده بإحتجاج أن قبيلته لا تؤمن بالحب قبل الزواج (من النوع اللي مالك الا ولد عمك ) فعاد خالد با ئسا لايعرف ماذا يفعل ومانهاية هذا الحب وعندما علمت ساره عن رأي والدها أصيبت بخيبة أمل البنت من كثر ما تحب ولد عمها والاب حارمها جاها المرض الخبيث الله يكفينا شرررره جميعا فمرضت بعدها وعرضت على أكثر من طبيب ولاكن دون جدوى فكان علاجها يستوجب السفر إلى الخارج وفي هذي الحظة حس الاب انة ما لة حق وندم وقرر انة يعالجها بس البنت رفضت العلاج وقالت لية اعالج ولية اعيش من دون ما اخذ الي انا ابي ؟ الاب وعدها ان شفت انة يعطيها الي تبي فرحت البنت وخلاص تبي تسافر المفاجأة وفي الطائره توفت ساره وعندما علم خالدولدعمهاعن وفاتها لم تتوقف عيناه عن البكاء حتى إختفى لون عينه وصار اعمى؟ كتب الامير كلمات تشيب الراس صراحه وهي كلمات المسافر راح اسمعوها وخصوصا لما يقول يا الله يا قلبي سرينا ضاقت الدنيا علينا وبعد لما يقول هذا وجهك يالمسافر لما كانت لي عيون وينها عيوني حبيبي سافرت مثلك حبيبي يقصدعندما يتذكر خالد وجه محبوبته ساره أنه صار أعمى ************* وهذه الكلمات التي تمثلها ************** لا تلوح للمسافر المسافر راح ولا تنادي المسافر المسافر راح يا ضياع أصواتنا في المدى والريح القطار وفاتنا والمسافر راح يالله يا قلبي تعبنا من الوقوف ما بقى بالليل نجمة ولا طيوف ذبلت أنوار الشوارع وإنطفى ضيّ الحروف يالله يا قلبي سرينا ضاقت الدنيا علينا القطار وفاتنا والمسافر راح مادري باكر هالمدينة وشتكون النهار والورد الأصفر والغصون هذا وجهك يالمسافر لما كانت لي عيون وينها عيوني حبيبي سافرت مثلك حبيبي القطار وفاتنا والمسافر راح ثانكس شيهانه موضوع أكثر من رائع |
رد: قصة............... وقصيدة
موضوع رائع ومفيد جداً
كل الشكر |
رد: قصة............... وقصيدة
لبيت المشهور لمسلط بن شعيفان ابو اثنين السبيعي . وهو اقرب خوي للوليد بن طلال الامير هو من قال له انت مهبول وليس الاخويااء اللي معهم .. قصة هذه الابيات هو انهم كاانوا مجتمعين فسأل الوليد بن طلال مسلط من اطيب جدك ولا جدي ومن المعروف ان سبيع لهم دور كبير في فتح الرياااض .. رد عليه بن شعيفان وقاال جدك ونعم فيه لكن مارساه على الحكم الا جداااني.. بعدهاا زعل الوليد وقاال انت مهبووول وضجره في الكلالام .. بعدهاا زعل مسلط وارسله هالابياات ومااكان من الوليد الا ان ارجعه مع مبلغ كبير من المااال .. وهذه هي القصه الحقيقيه...
وهذي الابياااات بالضبط : يا أمير أنـا عنـدك حشيـم وغالـي "" ولا احب انا شئ يمـس الكرامـه نفسي تـروم المرجلـه والعوالـي "" هـذا هـدف نفسـي وهـذا مـرامـه تاجرت في بـاب الشكالـه بمالـي "" بعت الرخامه وأشتريت القرامـه انــا مهـبـول وجايـزلـي هـبـالـي "" هبال طيـب ولا صحـاوة رخامـه هـذي تفاصيلـي وهـذي خصالـي "" يقول اللي مـا زهـف فـي كلامـه أن جزت لك فأنا الرفيق الموالي "" وأن عفتني مسموح ومع السلامه دور وتلـقـالـك رفــيــق بــدالــي "" وكـل يبـي رفقتـك تـرفـع مقـامـه |
رد: قصة............... وقصيدة
هلابك
يا الغريق ومشكور على المرور والمشاركة الجميلة |
رد: قصة............... وقصيدة
حياك الله
يا الغربي ولاهنت على المرور |
رد: قصة............... وقصيدة
الصبي وان طاب طيبه من خواله... وان تردى فـعلم انهم خايبينـي
أشرب الفنجـال واكـب البيالـة... طيـبٍ واحـب سلـم الطيبينـي [[[السلام عليكم ورحمة الله وبركاته ]]] من لا يعرف .. هذين البيتين .. بيتين اشهر من نار على علم .. قد يجهل البعض قائلهما .. ولكن اكيد سمع بالبيتين من قبل .. حتى اصبح مضرب مثل يتداوله كثير من الناس .. قائل هذين البيتين .. الشاعر / راشد بن حسن بن مانع بن رحيان الضاعني الملقب بــ ( ابن الذيب ( وقيل انه توفي عام 1986م وهو في نجران وكان شايل معه شخص موصله الى قرية في نجران وحصل عليهم حادث وتوفي رحمه الله .. راشد بن حسن .. كان يشتغل في شركة ارامكوا السعوديه .. وكان يملك سيارة الشركه ( جمس ارامكوا ) .. وكان كل ما شاف له رجلي والا طرقي على الخط يبي احد يوصله يقوم ابن الذيب ويوصله بدون مقابل .. على سيارة الشركه .. حتى اشتهر عند البدوان .. لا جا احد يبي يروح مكان ولا عنده مطيه والا موتر .. يمشي في طريقه ويقول عسا يلقاني ( ابن الذيب ) على الطريق والا انا القاه .. ويشيلني ويوديني للمكان اللي انا ابيه .. حتى قاموا الناس يطرونه ويحكون فيه وهم لا يعرفونه ولا قد شافوه .. جاء يوم من الايام الا عجوز وعندها غنم شوي تعد على الاصابع .. و ( راشد بن حسن ) .. كان مشغول ومتأخر على الدوام شوي .. وشاف العجوز وشاف معها غنم تعداها وهملها .. عقب حزت في خاطره واستحى وراعي الطيب ما يجوز عن طيبه وقف الموتر ورجع للعجوز .. يوم جاها قالها يا مره انا ابشيلك وبوديك المحل اللي تبينه لكن بدون غنمك .. انا متأخر على الدوام واخاف غنمك تأخرني زياده .. قالت له العجوز .. خلاص رح الله يستر عليك يا ولدي .. انا جالسه هنا انتظر ( ابن الذيب ( .. هو اللي بيجيب العلم وبيوصلني المكان اللي انا ابيه انا وغنمي .. وهي ما تعرفه .. ولا تدري انه ( ابن الذيب ) .. هو نفسه اللي هي تكلمه .. يوم انصدم ( راشد بن حسن ) بقولها .. وتعجب !! قال اركبي يا خاله انا ( ابن الذيب ) وابشري بعزك .. ابوصلك انتي وغنمك .. وكانت انظمة ارامكو تمنع السائقين ان يشيلو الرجليه اللي يوقفون السواقين ويطلبونهم توصيلهم على طريقهم .. وشلون توصيل الغنم ؟؟؟؟؟ حتى وصل علم .. لشركه بفعل ( راشد بن حسن ) .. وهدد بالفصل من الشركه اكثر من مره .. وبعض رؤساءه يأسوا من المحاوله معه .. واعجبتهم شهامته .. وصل العجوز إلى منصاها والمكان اللي تبيه .. وقال هذهـ القصيده . قالهـا ابـن الذيـب مـن هاجـوس بالـه=كلـمـةٍ يـلـعـب بـهــا والـبــال زيـنـي قـالـهــا يــومــه طــرالــه مـاطــرالــه=مـن هواجـيـسٍ تشـيـب المرضعيـنـي حـالـفٍ مـاخـذ عـلـى الطـرقـي ريـالـه=وبـالـثـلاث مـحــرم أنــــه مايـجـيـنـي لالقيـت اللـي علـى ( السكـه ) لحالـه=يلـتـفـت ويـقــول ويـــن المستحـيـنـي أوقـف المـوتـر حـيـا وأبــي الجمـالـه=يــوم ولــد الــلاش وجـهــه مايلـيـنـي الطـمـع فــي كــروة الرجـلـي رذالـــة=.خـص وان جـابـه مـجـال الغانميـنـي والــردي فــي حـالـةٍ مـاهــي بـحـالـه=واعـويـنــه مــــن كــــلام الطيـبـيـنـي الـــردي لـــو بـــان مـايـذكـر عـمـالـه=مـايـعـد الـــلاش مـقـصـور اليمـيـنـي أركـبــه لـعـيـون مـــن زيـــنٍ دلالــــه=ماتـحـاكـوا فـــي قـفــاه الرامـسـيـنـي مابـغـى غـيـري وانــا مابـغـى بـدالـه=.قـاعــدٍ لـــي بـالـرجـا مـــدة سنـيـنـي الصبـي وان طـاب طيبـه مـن خوالـه=بـالـخـوال يــســال قــبــل الـوالـديـنـي أشـــرب الفـنـجـال واكــــب الـبـيـالـة=تــابــعٍ سـلـمــي ســلــوم الأولـيــنــي ولاقـعـدنــا بـالـعـمـل بــنــا الــرزالـــة=.نـاخــذ العـلـيـا طــريــق الفـايـزيـنـي غـرنـي بـعـض الـرجـال بكـثـر مـالــه=مادرى ان المـوت فـي حبـل الوتينـي كيـف ينفعنـي وابـا(..........) خـالـه=مايـقـوم البـيـت دام الـسـاس طـيـنـي مـاش ويــن الـلـي عـوايـده الجمـالـة=مثـل ابـن ظافـر حـمـد ليـتـه يجيـنـي الـثـنـا والـجــود دايـــم فـــي خـيـالــه=عـلـمــه ظــافــر ســلــوم الطـيـبـيـنـي جـــــوّد الـعـلـيــا ولـزمّــهــا عـيــالــه=وادركــوا مــن علمـتـه دنـيـا وديـنـي واهنـي مـن بـاع حظـه واشتـرى لــه=وسار في درب النبي وأخزى اللعيني مـوقــفــه مــاكـــل رجــــــال يــنــالــه=مــن بـغـى مـمـشـاه يـقـعـد مرتـيـنـي كـم ذبـح مـن حـايـلٍ مــن حــر مـالـه=وعـادتـه لـطـمـة خـشــوم العايلـيـنـي و البيتين اللي بأول الموضوع يقال انهم محرفين.. والبيتين الصحيحين كما ذكروا فالقصيده .. مــــــــــــلاحظه:::الشاعر راشد بن الذيب هو والد الشاعر المعروف حاليأ محمد ابن الذيب ... شيهانة تشكرين جل الشكر على تنوع افكارك واختيارك لكل جديد ومفيد من قصص وقصائد عن أسلافنا في الماضي والحاضر وفقك الله |
| 11:11 AM |
Powered by vBulletin® developed by Tar3q.com